ಸಂಪಾದಕೀಯ್:
ಅನ್ಭೋಗಾಕ್ ಉತ್ರಾಂಚೆಂ ರೂಪ್ ದಿತಾನಾ ಕವಿತಾ ಜಲ್ಮತಾ
ಫ್ರಾನ್ಸಿಸ್ ಫೆರ್ನಾಂಡಿಸ್ ಅನ್ಭೋಗಾಂಚೊ ಕುಡವ್. ತಾಚ್ಯಾ ಅನ್ಭೋಗಾಂತ್ಲೆಂ ಎಕೇಕ್ ಉತರ್ ಕವಿತಾ. ದಿಸ್ಪಡ್ತ್ಯಾ ಸಾದ್ಯಾ ಚಿಂತ್ನಾಂಕ್ ತೊ ಕವಿತಾ ಜಾವ್ನ್ ವಿಣ್ತಾನಾ ತಾಚೆ ಹುಶಾರ್‍ಗಾಯೆಚಿ ತೋಖ್ಣಾಯ್ ಕರಿನಾಸ್ತಾಂ ರಾವೊಂಕ್ ಜಾಯ್ನಾ. ಮಾಗೀರ್ ಹೆಂ ಕವಿತೆಚೆಂ ರೂಪ್‌ಯ್ ಕೊಂಕಣಿಕ್ ವೆಗ್ಳೆಂ. ಉರ್ದು ಶಾಯರಿಚೊ ಪ್ರಭಾವ್ ಕವಿಚೆರ್ ಧಾರಾಳ್ ಪಡ್‌ಲ್ಲೊ ಝಳ್ಕತಾ.
ನಾಟಕ್‌ಕಾರ್ ಜಾವ್ನ್‌ಚ್ ಲೊಕಾಮೊಗಾಳ್ ಜಾಲ್ಲೊ ಫ್ರಾನ್ಸಿಸ್ ಫೆರ್ನಾಂಡಿಸ್ ಎಕೆ ಲ್ಹಾನ್ ಕವಿತೆಕ್ ಲಾಗೊನ್ ಹಾಂಗಾಸರ್ ಕವಿಜಮ್ಯಾಂತ್ ಉಟೊನ್ ದಿಸ್ತಾ ಜಾಲ್ಯಾರ್ ತಾಚೆ ತಾಕ್ತೆಚಿ ಜಡಾಯ್ ಕಿತ್ಲಿ ಮ್ಹಣೊನ್ ತುಮಿಂಚ್ ಲೇಕ್ ಘಾಲಾ. 'ಕುಪಾಂ ಪೊಂದ್ಲಿಂ ಮುಖಾಂ' ಪುಸ್ತಕಾಂತ್ ಹೆಚ್ ಮಾದರಿಚಿ ತಾಚಿ ಕವಿತಾ ಆಮಿ ಪರ್ಗಟ್ ಕೆಲ್ಲಿ. ಆತಾಂ ಪರ್‍ತ್ಯಾನ್ ಏಕ್‌ಪಾವ್ಟಿಂ ಸಭಾರ್ ತೆಂಪಾ ಉಪ್ರಾಂತ್ ತೊ ಹಾಂಗಾಸರ್ ಯೆತಾನಾ, ಕವಿತಾ ಕುಳಾರಾಚೊ ಭರ್ಮ್ ಚಡ್ಲಾ.
ನವ್ಯಾನ್ ಕವಿತಾ ಬರಯ್ತಲ್ಯಾಂನಿ ಅಸಲ್ಯಾ ಕವಿತೆಚ್ಯಾ ರುಪಾಚೊ ಪೋಸ್ ಕೆಲೊ ಜಾಲ್ಯಾರ್ ರಸಿಕಾಂಚಿಂ ಕಾಳ್ಜಾಂ ಜಿಕ್ಚಿ ವಾಟ್ ಸಲೀಸಾಯೆನ್ ಜೊಡುಂಕ್ ಸಾಧ್ಯ್ ಆಸಾ ಮ್ಹಳ್ಳೆಂ ಧೈರ್ ಮ್ಹಾಕಾ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಶಾಯರಿ
ಮೋಗ್ ಕರ್‍ತಲೆ ಮರನಾಂತ್, ತಾಂಕಾಂ ಕೇವಲ್ ಪುರ್‍ತಾತ್
ತಾಂಚೊ ಫೊಂಡ್ ಉಗ್ತೆ ಕರ್‍ನ್ ಪಳೆಯಾ, ದೊಳೆ ಉಗ್ತೆಚ್ ಆಸ್ತಾತ್
ಚೆಡ್ವಾಂ ಸಕಾಳಿಂ ಉಡ್ತಾನಾ ಪಳೆ, ತಾಂಚಿಂ ಖರಿ ಸೊಭಾಯ್ ಕಳ್ತಾ
ಮೇಕಪ್ ಕೆಲ್ಯಾರ್ ಸತ್ತರ್ ವರ್ಸಾಂಚಿ ಮ್ಹಾತಾರೀಯ್ ತರ್ನಾಟಿ ದಿಸ್ತಾ
ಸೈರಿಕ್ ಸೊದ್ತಾನಾ ಗೂಣ್ ಪಳೆ, ನ್ಹಯ್ ತರ್ ಉಪ್ರಾಂತ್ ಮ್ಹಾರಗ್ ಪಡ್ತಾ
ಸೊಭಾಯ್ ಪಳೆವ್ನ್ ಕಾಜಾರ್ ಜಾಲ್ಲೊ, ಗೂಣ್ ಬರೆ ನಾಂತ್ ಮ್ಹಣ್ ರಡ್ತಾ
ಮೋಗ್ ಕರ್ ಕಾಜಾರ್ ಜಾಯ್ನಾಕಾ, ಕಾಜಾರ್ ಜಾಲ್ಯಾರ್ ಮೋಗ್ ಮರ್‍ತಾ
ಆವಯ್ ಸಾಂಗಾತಾ ಪೂತ್ ಬಸ್ಲ್ಯಾರ್, ಸುನೆಚ್ಯಾ ಪೊಟಾಂತ್ ಜಳ್ತಾ
-ಫ್ರಾನ್ಸಿಸ್ ಫೆರ್ನಾಂಡಿಸ್, ಕಾಸ್ಸಿಯಾ