ಸಂಪಾದಕೀಯ್:
ಉಪಾಸಾಚ್ಯಾ ನಾಂವಾರ್ ಮನ್ಶಾಕ್ ರೆವ್ಡಲ್ಲೆ ಪಾಸ್
ಉಪಾಸಾಚ್ಯಾ ನಾಂವಾರ್ ಮನ್ಶಾಕ್ ರೆವ್ಡಲ್ಲೆ ಪಾಸ್ ಸೊಡಂವ್ಚೆಂ ಏಕ್ ಪ್ರೇತನ್ ಹೆ ಕವಿತೆದ್ವಾರಿಂ ಡೇವಿಡ್ ಲುವಿಸಾನ್ ಭೋವ್‌ಚ್ ಆಪುರ್ಬಾಯೆನ್ ಕೆಲಾಂ. ಉಪಾಸ್ ಆಧಾರ್‌ಲ್ಲ್ಯಾನ್ ಕೊಣಾಯ್ಕಿ ಸಾಲ್ವಾಸಾಂವ್ ಲಾಬನಾ, ಬದ್ಲಾ ಕೆಲ್ಲೆಂ ಕರ್ಮ್ ಉಡಾಸಾಕ್ ಹಾಡ್ನ್ ದಾನ್ ಧರ್ಮ್ ಕೆಲ್ಯಾರ್ ವೈಕುಂಠಾಚೆಂ ಸುಖ್ ಆಪ್ಣಾವ್ಯೆತ್ ಮ್ಹಣೊನ್ ಕವಿ ಸಾಂಗ್ತಾ. ಆನ್ಯೇಕೆ ವಾಟೆನ್ ಉಪಾಶಿಂ ಆಸ್ಲಲ್ಯಾಂಚೊ ಹುಸ್ಕೊ ಹಿ ಕವಿತಾ ವೆಕ್ತ್ ಕರ್‍ತಾ.
ಡೇವಿಡ್ ಲುವಿಸ್ ಪಯ್ಲೆ ಪಾವ್ಟಿಂ ಕವಿತಾ ಕುಳಾರಾಕ್ ಯೆತಾನಾ ಧರ್ಮಾಚೊ ಲೇಪ್ ಆಸ್‌ಲ್ಲಿ ಠರಾವಣ್ ಘೆವ್ನ್ ಆಯ್ಲಾ ಜಾಂವ್ಕ್ ಪುರೊ, ಪುಣ್ ಹ್ಯಾ ಠರಾವಣಾಂತ್ ಎಕಾ ರಸಿಕಾಕ್ ಗರ್ಜ್ ಆಸ್ಚಿ ಹರ್‍ಯೆಕ್ ಖುಶಿ ತಾಣೆ ದಿಲ್ಯಾ. ಕವಿತಾ ಕುಳಾರಾದ್ವಾರಿಂ ಮೆಳ್ಚೆ ಹುಮೆದಿಚಿ ಝರ್ ಪಿಯೆವ್ನ್ ಸರಾಗ್ ಕವಿತೆಚೆಂ ಶೆತ್ ತಾಣೆ ನಾಂಗ್ರಾಯ್ಲೆಂ ಜಾಲ್ಯಾರ್ ಫುಡಾರಾಂತ್ ರುಚಿಚಿಂ ಕಾವ್ಯಾಳ್ ಫಳಾಂ ತೊ ವಾಂಟ್ತಲೊ ತೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮ್ಚೊ ಉಪಾಸ್
ಉಪಾಸ್ ನಾಯ್ಕಾಲೊಂ ಲಾಯೆಕ್‌ರೆ ಸಾಯ್ಬಾ
ಹಾಸೊನ್ ಕೆಂಡ್ತಾ ಶೆಜಾರ್‍ಚೊ ಕಾಮ್ತಿ
ತೀನ್‌ಯ್ ವೆಳಾರ್ ಜೇವ್ನ್ ಉಪಾಸ್
ನಂಜ್ಯೊ ವೊಂಕ್ತಾ ಅಬ್ದುಲ್ ನಾಯ್ತಿ
ಗೊಡ್ಶೆಂ ಖಾವ್ಯೆತ್ ಜೆವ್ಣಾ ವೆಳಿಂ
ಜೆವ್ಣಾ ಉಪ್ರಾಂತ್ ಖಾವ್ಯೆತ್ ಕೆಳಿಂ
ವೊರ್ನ್ ಕೆಲಾಂ ಬಾಬಾರೆ ಬಾಬಾ
ಘಾಲುನ್ ದಾಕೊ-ಮೋಯ್-ದಾಳಿ
ಆಮ್ಚೊ ಉಪಾಸ್ ಕಸ್ಲೊ ಅಭಾಸ್!
ಪರ್ಕ್ಯಾಂ ಮುಕಾರ್ ಜಾಲಾ ನಾಪಾಸ್
ಭುಕೆ ವೊಡಿ ಸಮ್ಜೊಂಕ್ ಆವ್ಕಾಸ್
ದೆವಾಕ್ ಮೆಚ್ವೊಂಕ್ ಜಾಯ್ಗೀ ಬಾಂದ್ಪಾಸ್?
ಕಾಳ್ಜಾ ಮನಾಂತ್ ರಡ್‌ರೆ ಪಾತಕ್
ಸಾಂಗಾತ್ ದೀರೆ ದೆವಾ ಪುತಾಕ್
ಆಧಾರ್ ನಾಸ್ತಾಂ ಉಪಾಶಿಂ ಆಸಾತ್
ದೀರೆ ತಾಂಕಾಂ ನೀಸ್-ಉದಕ್
ದೆವಾಕ್ ನಾಕಾ ತುಜೊ ಉಪಾಸ್
ಸಾಲ್ವಾರ್ ಜಾಂವ್ಚ್ಯಾಕ್ ರಡ್ ಪಾತಕ್
ಉರವ್ನ್ ಕಿತೆಂ ದಿಶಿ ಪೆಲ್ಯಾಕ್
ಖಂಡಿತ್ ತುಕಾ ದಾಯ್ಜ್ ಸರ್‍ಗಾರ್
-ಡೇವಿಡ್ ಲುವಿಸ್, ತಲ್ಲುರ್