ಸಂಪಾದಕೀಯ್:
ಫುಸ್ಲಾವ್ನ್ ಫುಸ್ಲಾವ್ನ್ ಕವಿತಾ ರಚ್‌ಲ್ಲೊ ಕವಿ
ಆಪ್ಣಾಚೊ ಮೋಗ್ ಪಳೊನ್ ಗೆಲಾ. ತ್ಯಾ ಮೊಗಾಕ್ ಪಾಟಿಂ ಹಾಡುಂಕ್ ಕೆಲ್ಲಿಂ ಪ್ರೇತನಾಂ ಸಕ್ಕಡ್ ನಿರ್ಫಳ್ ಜಾಲ್ಯಾಂತ್. ಖೆಳ್‌ಲ್ಲೆ ಖೆಳ್ ಸಕ್ಕಡ್ ಪ್ರಯೋಜನಾಕ್ ನಾ ಜಾಲ್ಯಾತ್. ಆತಾಂ ಏಕ್‌ಚ್ ಏಕ್ ವಾಟ್ ಉರ್‍ಲ್ಯಾ. ಫುಸ್ಲಾಂವ್ಚಿ! ತೀಯ್ ಖಂಯ್ಚ್ಯಾ ನಮುನ್ಯಾಚಿ ಫುಸ್ಲಾವ್ಣಿ ಮ್ಹಣ್ಚೆಂ! ಹ್ಯಾ ನಮುನ್ಯಾಚಿ ಫುಸ್ಲಾವ್ಣಿ ಫಕತ್ ಕವಿ ಜಾಲ್ಲ್ಯಾಂಚಿ ತಾಂಕ್. ಹೆ ತಾಂಕಿಕ್ ಕಿತ್ಲೆಂ ವಜನ್ ಪಳೆಯಾ, ಹೆ ತಾಂಕಿಕ್ ಕಿತ್ಲೆಂ ಏಕ್ ಮೋಲ್ ಪಳೆಯಾ!
ವಿನ್ಸಿ ಮೆಲ್ಕಾರ್ ಪಯ್ಲ್ಯಾನ್ ಪಯ್ಲೆಂ ಕವಿತಾ ಕುಳಾರಾಕ್ ಯೆತಾನಾ ಮೊಗಾಚಿ ಕವಿತಾ ಘೆವ್ನ್‌ಚ್ ಆಯ್ಲಾ. ಮಾಗೀರ್ ಮೊಗಾನ್ ದಾಢ್ ಘಾಲಿನಾತ್‌ಲ್ಲಿ ವೆಕ್ತಿ ನಾ. ತ್ಯಾ ಆಕ್ರಮಣಾಂತ್ ಸಾಂಪ್ಡೊನ್ ವಚೊನ್ ಹಾತ್ ಹುಲ್ಪಾಯಿಲ್ಲ್ಯಾಂ ಪಯ್ಕಿ ಹೆ ಕವಿತೆಂತ್ಲೊ ನಾಯಕ್ ಎಕ್ಲೊ. ಹಾತ್ ಹುಲ್ಪಾಲ್ಯಾತ್ ವ್ಹಯ್, ಪುಣ್ ಕಾಳೀಜ್ ಖಂಯ್ ರಾವ್ತಾ? ತೆಂ ಆಪ್ಲ್ಯಾ ಮೊಗಾಕ್ ಪಾಟಿಂ ಆಪಂವ್ಚ್ಯಾ ಹಟಾಕ್ ಪಡ್ಲಾಂ.
ವಿನ್ಸಿನ್ ಕವಿತಾ ಶೆತಾಂತ್ ಬಳಾನ್ ಪಾಳಾಂ ರೊಂಬಯ್ಜಾಯ್ ಜಾಲ್ಯಾರ್ ಇಲ್ಲೆಂ ಚಡಿತ್ ಪ್ರೇತನ್ ಕರುಂಕ್ ಜಾಯ್. ನೆಟಾನ್, ಹಟಾನ್ ಪ್ರೇತನ್ ಕರುಂಕ್ ಜಾಯ್. ತವಳ್ ಯಶಸ್ವಿ ತಾಕಾ ಪೊಟ್ಲುನ್ ಧರುಂಕ್ ಯೆತಲಿ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಯೆಣ್ಯಾಕ್ ರಾಕೊನ್ ರಾಕೊನ್
ಪ್ರಕೃತಿ ಜಾಲ್ಯಾ ಮೊನಿ ಮೊನಿ
ಬಾವ್ಲ್ಯಾಂತ್ ರೂಕ್ ಝಾಡಾಂ
ವ್ಹಾಳ್ಚ್ಯಾ ವ್ಹಾಳಾಂತ್ ಸುಕ್ಲಾಂ ಪಾಣಿ
ಸುಕ್ಲ್ಯಾಂತ್ ಪಾಚ್ವಿಂ ಪೆಡಾಂ
ನಾಚ್ಚಿಂ ಲ್ಹಾರಾಂ ಪಳ್ಳ್ಯಾಂತ್ ಪುಣೀ?
ಕಿತೆಂ ಜಾಲಾಂ ನಾಡಾಂತ್?
ಹಾಂಬೆವ್ನ್ ರಾವ್ಲ್ಯಾಂತ್ ಗೊರ್‍ವಾಂ ಗೊಟ್ಯಾಂತ್
ಭೊಕ್ರ್ಯಾಂ ಹಿಂಡ್ ಫಾಸಾಳ್ಳಾ
ದೊನ್ಪಾರ್ ಸುರ್ಯೊ ಕಾಳೊಕಿ ಮಾಟ್ಯಾಂತ್
ಚಂದ್ರೆಮ್ ಖಂಯ್ ಉಸಾಳ್ಳಾ?
ಕೊಣೆ ಕೊಣ್ಣಾ ಬಂಧ್ ಕೊಟ್ಯಾಂತ್
ತಾರಾಂ ಪರ್ಜಳ್ ಪಿಸುಡ್ಲಾ
ಆಯ್ಲ್ಯಾರ್ ಪುರೊ ಖಿಣಾಕ್ ತುಂವೆಂ
ಧರ್‍ತಿ ತೋಂಡ್ ಉಗಡ್ತಲಿ
ಝಾಡಾಂ ಪೆಡಾಂ ಫುಲೊನ್ ರಾವ್ತಿತ್
ಝರ್ ಪರ್‍ತ್ಯಾನ್ ಫುಟ್ತಲಿ
ಲ್ಹಾರಾಂ ನಾಚ್ತಿತ್, ಗೊರ್‍ವಾಂ ಉಡ್ತಿತ್
ಉಜ್ವಾಡಾ ಶಿರ್ ಜಳ್ತಲಿ
ಮ್ಹಾಕಾ ನ್ಹಯ್, ತಾಂಕಾಂ ಕೊಣ್ಣಾ
ಗರ್ಜ್ ತುಜಿ ಕಾಂಯ್ ಆಸ್ತಲಿ!?
-ವಿನ್ಸಿ ಮೆಲ್ಕಾರ್