ಸಂಪಾದಕೀಯ್:
ಮಾಯ್‌ಗಾಂವಾಕ್ ಆಸಾ, ಆಯಸ್ಕಾಂತಾಚಿ ಸಕತ್
ಖಂಯ್ ಗೆಲ್ಯಾರಿ, ಕಿತ್ಲೆಂ ಸೊಧ್ಲ್ಯಾರಿ ನಿಮಾಣೆಂ ತುಜೊ ಗಾಂವ್‌ಚ್ ತುಕಾ ಜಾಯ್ ಆಸ್ಚಿ ದಾಧೊಸ್ಕಾಯ್ ದಿತಾ ತರ್ ಹ್ಯಾ ಗಾಂವಾಂತ್ ಆಕ್ರೇಕ್ ಕಿತೆಂ ದಿಪ್ಕಲಾಂ? ತ್ಯಾ ದೆಕುನ್ ಆಮ್ಚ್ಯಾ ಗಾಂವಾಕ್ ಮಾಯ್‌ಗಾಂವ್ ಮ್ಹಣ್ತಾಂವ್? ಆವಯ್ ತಿ ದುಬ್ಳಿ ಆಸುಂಯೆತಾ, ಆವಯ್ ತಿ ಅಸ್ಕತ್ ಆಸುಂಯೆತಾ - ಖಂಯ್ಚ್ಯಾಯ್ ನಾಪಾಸ್, ಕಸಾಪ್ಪಿ ಪುತಾಕ್ ಲೆಗುನ್ ತಿ ಪೊಟ್ಲುನ್ ಧರುಂಕ್ ಕೆದಿಂಕ್‌ಚ್ ನರ್ಗನಾ. ತ್ಯಾಚ್ ನಮುನ್ಯಾಚಿ ದಾಧೊಸ್ಕಾಯ್ ಹೊ ಮಾಯ್‌ಗಾಂವ್‌ಯ್ ಆಮ್ಕಾಂ ದಿತಾ. ತ್ಯಾ ದೆಕುನ್ ಅಸಲ್ಯಾ ಆಯಸ್ಕಾಂತಾಚಿ ಸಕತ್ ಹ್ಯಾ ಗಾಂವಾಕ್.
ಕೊಂಕಣಿಂತ್ ಸೊಡ್ಲ್ಯಾರ್ ಹೆರ್ ಕಿತ್ಲ್ಯಾ ಭಾಸಾಂನಿ ಜಲ್ಮಾ ಗಾಂವಾಕ್ ಮಾಯ್‌ಗಾಂವ್ ಮ್ಹಣ್ತಾತ್ ಮ್ಹಾಕಾ ಖಬರ್ ನಾ. ತುಮ್ಕಾಂ ಕಳಿತ್ ಆಸಾ ತರ್ ಮ್ಹಾಕಾ ಕಳಯಾ. ಫಕತ್ ಕೊಂಕಣಿಂತ್ ಅಶೆಂ ಮ್ಹಣ್ತಾತ್ ಜಾಲ್ಯಾರ್ ಹಿ ಏಕ್ ವಿಚಿತ್ರಾಂಚಿ, ವಿಜ್ಮಿತ್ಕಾಯೆಚಿ ಗಜಾಲ್ ಕೊಣ್ಣಾ.
ಮಾಯ್‌ಗಾಂವಾವಿಶಿಂ ಜಾಯ್ತ್ಯಾಂನಿ ಜಾಯ್ತೆ ಪಾವ್ಟಿಂ ಬರಯ್ಲಾಂ. ಕವಿ ಜೊನಿ ಸುರತ್ಕಲ್ ತ್ಯಾಚ್ ಗಾಂವಾವಿಶಿಂ ಮಾತ್ಶೆಂ ವೆಗ್ಳೆ ರಿತಿನ್ ಬರಯ್ತಾ. ಮಾಗೀರ್ ಮ್ಹಜ್ಯಾಚ್ ಗಾಂವಾವಿಶಿಂ ಆಯ್ಕೊಂಕ್ ಮ್ಹಾಕಾ ನಾಕಾ ಜಾಲಾಂ ಕಾಂಯ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೊ ಗಾಂವ್
ಜನಮ್ ದಿಲ್ಲಿ ಮಾತಿ ಸಾಂಡುನ್
ಗಾಂವಾನ್ ಗಾಂವ್ ಭೊಂವೊನ್ ದೆಖ್ಲೆಂ
ವಿವಿಧ್ ಭಾಸೊ ರಿವಾಜಿ ಪಳೆವ್ನ್
ಗಾಂವಾಕ್ ಮ್ಹಜ್ಯಾ ಸರಿ ಕೆಲೆಂ
ತರೀ
ಖಂಯ್ಸರೀ ಉಂಚಾಯ್ ಮ್ಹಾಕಾ ದಿಸ್ಲಿ ನಾ
ದೇಶ್ ಸಾಂಡುನ್ ಪರ್ದೆಶಾಕ್ ಪಾವೊನ್
ಪರ್ಕಿ ಗಾಂವಾಂತ್ ಜಿವಿತ್ ಝರಯ್ಲೆಂ
ಪರ್ಗಾಂವಿ ರುಚಿ ಸಂಸ್ಕೃತಿ ಪಳೆವ್ನ್
ಗಾಂವಾಕ್ ಮ್ಹಜ್ಯಾ ಸರಿ ಕೆಲೆಂ
ತರೀ
ಥಂಯ್ಸರಿ ಮ್ಹಾಕಾ ತೃಪ್ತಿ ಮೆಳ್ಳಿ ನಾ
ಪಾಟಿಂ ಆಯ್ಲೊಂ ಸರ್ವ್ ಸೊಡುನ್
ಆಶೆ ರುಚಿಕ್ ಕುಶಿಕ್ ತಾಂಡುನ್
ದೆಖ್ಲೆಂ ಭೊಂವ್ತಿಂ ಗೊಮ್ಟಿ ವೊಡುನ್
ಭುಮಿ ವೈಂಕುಟ್ ಆಸ್ಲೆಂ ಲಿಪೊನ್
ಮ್ಹಾಕಾ
ಜನಮ್ ದಿಲ್ಲ್ಯಾ ಮಾಯ್‌ಗಾಂವಾಂತ್
-ಜೊನಿ ಸುರತ್ಕಲ್