ಸಂಪಾದಕೀಯ್:
ಅಸಲ್ಯಾ ಮೊಗಾಕ್ ಸೊಧುನ್ ಗೆಲ್ಲೊ ಪಾಟಿಂ ಆಯಿಲ್ಲೊ ನಾ
ಸಗ್ಳೆಂ ಬರ್‍ಯಾನ್‌ಚ್ ಪಳೆಂವ್ಚೊ ಬರೊ, ಖರೊ ಮೋಗ್ ಹೆ ಕವಿತೆಂತ್ ಉಫಾಟ್ ದಿಸ್ತಾ. ನೀಜ್ ಮೊಗಾಚೊ ಅರ್ಥ್ ಅಸೋಚ್ ಮ್ಹಣ್ಚೆಂ ಆಮಿ ಆಯ್ಕಲಾಂ. ಪುಣ್ ತಸಲ್ಯಾ ಎಕಾ ಮೊಗಾಕ್ ಸೊಧುನ್ ಸೊಧುನ್ ಕೊಣೇಂಯ್ ಜೀಕ್ ಆಪ್ಣಾಯಿಲ್ಲಿ ನಾ. ಹೊ ಮೋಗ್ ಸಪ್ಣಾಂತ್ಲೊ, ಹೊ ಮೋಗ್ ಬುಕಾಂತ್ಲೊ ಆನಿ ಹೊ ಮೋಗ್ ಕ್ಲೊಟಿಲ್ಡಾ ತೆಲ್ಮಾಚೆ ಕವಿತೆಂತ್ಲೊ. ಹೊ ಮೋಗ್ ಸಾಂಗೊಂಕ್, ಸರಳ್ ಸಾದ್ಯಾ ಉತ್ರಾಂಚೊ ಪ್ರಭಾವ್‌ಭರಿತ್ ವಾಪರ್ ಹೆ ಕವಿತೆಂತ್ ಜಾಲಾ.
ಪಯ್ಶಿಲ್ಯಾ ಸೈಪ್ರಸ್ ಗಾಂವಾಂತ್ ಆಸೊನ್‌ಯ್ ಕೊಂಕಣಿಚೊ ಮೋಗ್ ಚ್ಯಾರ್ ಚವ್ಗಾಂ ಮಧೆಂ ಪಸ್ರಾಂವ್ಕ್ ಪೆಂಕಟ್ ಬಾಂಧ್‌ಲಿ ಧೀರ್ ಸ್ತ್ರೀ, ಕವಯಿತ್ರಿ, ಸಮಾಜ್ ಸೆವಕಿ ಕ್ಲೊಟಿಲ್ಡಾ ಕೊಂಕಣಿ ಪತ್ರಾಂಚೆರ್ ಸದಾಂ ಝಳ್ಕೊಂಚಿ ವೆಕ್ತಿ. ತಿಚಿ ಹುಮೆದ್ ಹ್ಯಾ ಆದೀಂಯ್ ತಿಕಾ ಕವಿತಾ ಕುಳಾರಾಕ್ ಆಪವ್ನ್ ಹಾಡ್ನ್ ಆಯ್ಲ್ಯಾ.
ಕ್ಲೊಟಿಲ್ಡಾ ಫುಡಾರಾಂತ್‌ಯ್ ಕವಿತಾ ಶೆತ್ ಗಿರೇಸ್ತ್ ಕರ್‍ಚ್ಯಾ ತಿಚೆಂ ಬರ್‍ಯಾಂತ್ಲೆಂ ಬರೆಂ ಯೋಗ್‌ದಾನ್ ದಿತಲಿ ಮ್ಹಣ್ ಭರ್‍ವಸ್ತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭಾಗಿ ಮಿಲನ್
ದೊಳ್ಯಾಂ ಮುಕಾರ್ ಬಸೊನ್
ದೊಳೆ ಮ್ಹಜೆ ಪುಸ್ಲೆಯ್
ಆಕರ್ಷಿಕ್ ದೀಷ್ಟ್ ದವರ್ನ್
ಕಾಳೀಜ್ ಮ್ಹಜೆಂ ಜಿಕ್ಲೆಂಯ್
ತೋಂಡ್ ಮ್ಹಜೆಂ ಪಳೆವ್ನ್
ಮ್ಹಜೆರ್ ತುಂ ಭುಲ್ಲೊಯ್
ಹಾಸೊ ಮ್ಹಜೊ ಚಾಕೊನ್
ಮೋಗ್ ಕರುಂಕ್ ಶಿಕ್ಲೊಯ್
ಉತ್ರಾಕ್ ಉತರ್ ದೀವ್ನ್
ವಾರ್‍ಯಾರ್ ಮ್ಹಾಕಾ ಧಲಯ್ಲೆಂಯ್
ಗೂಣ್ ಮ್ಹಜೆ ತುಕುನ್
ಕಾಳ್ಜಾಂತ್ ತುಜ್ಯಾ ಬಸಯ್ಲೆಂಯ್
ಹಾತಾಂಚಿ ಊಬ್ ಘೆವ್ನ್
ಧೃಡ್ ನಿಚೆವ್ ಕೆಲೊಯ್
ಮುಕ್ಲೊ ಫುಡಾರ್ ಚಿಂತುನ್
ವಿಂಚುನ್ ಮ್ಹಾಕಾ ಕಾಡ್ಲೆಂಯ್
ಉಸ್ವಾಸ್ ಮ್ಹಜೊ ಪಾರ್ಕುನ್
ವೆಂಗೆಂತ್ ಮ್ಹಾಕಾ ಆರಾಯ್ಲೆಂಯ್
ದೊಳ್ಯಾಂ ಮುಕ್ಲೆ ಸಾವ್ಳೆನ್
ಆಂಗ್ ಕಾಡಿಶೆಂ ಕೆಲೆಂಯ್
ವಾಯ್ಟ್ ವಾರ್‍ಯಾಕ್ ಆಡಾವ್ನ್
ಸಾವದ್ ಪಾಟಿಂ ದಿಲಿಯ್
ಜಿವಿತ್ ಹೆಂ ಪಿಂತ್ರಾವ್ನ್
ಸಪಣ್ ನೀಜ್ ಕೆಲೆಂಯ್!
-ಕ್ಲೊಟಿಲ್ಡಾ ತೆಲ್ಮಾ ಡಿ'ಆಲ್ಮೇಡಾ, ಸಾಸ್ತಾನ್ (ಸೈಪ್ರಸ್)