ಸಂಪಾದಕೀಯ್:
ಸುಖಾಚೆಂ ಪೀಕ್ ಲುಂವೊಂಕ್ ಸಕ್ಚಿ ಮಾಂಯ್
ಆವಯ್ ಏಕ್ ಘರ್ ಕರುಂಕ್ ಸಕ್ತಾ, ಆವಯ್ ಘರ್ ಮೊಡುಂಕ್ ಸಕ್ತಾ. ಭುರ್ಗ್ಯಾಂಕ್ ಬೂದ್‌ಬಾಳ್, ದೇವ್ ಧರ್ಮ್, ಸಂಸ್ಕೃತೆಚ್ಯೊ ಶಿರೊ ಖಾವಂವ್ಕ್ ದಿಲ್ಲ್ಯೊ ಆವಯೊ ಫುಡಾರಾಂತ್ ಸುಖಾಚೆಂ ಪೀಕ್ ಲುಂವೊಂಕ್ ಸಕ್ತಾತ್. ಹಾಕಾ ಆಡ್ ಗೆಲ್ಲ್ಯಾ ಅವಯಾಂಕ್ ಪಿಕಾ ಬದ್ಲಾ ವೀಕ್ ಪಿಯೆಂವ್ಕ್ ಮೆಳ್ಳ್ಯಾರ್‌ಯ್ ಮೆಳ್ಳೆಂ. ತಸಲ್ಯಾ ಎಕಾ ಚಿಂತ್ಪಾಚ್ಯಾ ಗುಂದ್ಯಾಚೆರ್ ವಾಯ್ಲೆಟ್ ಪಿರೇರಾಚಿ ಹಿ ಕವಿತಾ ಉಬಿ ಜಾಲ್ಯಾ. ಖುದ್ ಏಕ್ ಆವಯ್ ಜಾಲ್ಲ್ಯಾನ್ ಹೆ ಕವಿತೆಚೆಂ ವಜನ್ ಆನಿಕ್‌ಯ್ ಚಡ್ಲಾಂ.
ಸಂಪೊ ತರೀಪುಣ್ ಖತ್ಕತೊ ಏಕ್ ವಿಷಯ್, ಸರಳ್ ರಿತಿನ್ ಸೊಭಿತ್ ಕರುನ್ ಕವಯಿತ್ರಿನ್ ಹಾಂಗಾಸರ್ ಆಮ್ಕಾಂ ದಿಲಾ. ಇಂಗ್ಲಿಷಾಚೆಂ ವಾರೆಂ ಜ್ಯೊರಾನ್ ವ್ಹಾಳೊನ್ ಆಸ್ತಾನಾ ಆನಿ ಹ್ಯಾ ಝೊಡ್ ವಾರ್‍ಯಾಕ್ ಕೊಂಕ್ಣಿ ಮಾತ್ರ್ ಕಿತ್ಯಾಕ್ ಹೆರ್ ಜಾಯ್ತ್ಯೊ ಭಾಸೊ ಮುಳಾಂ ಸಮೇತ್ ಹುಂಬ್ಳೊನ್ ವೆತಾಸ್ತಾನಾ, ಹೆ ಕವಿತೆಚೆಂ ಮಹತ್ವ್ ವಾಡ್ತಾ.
ವಾಯ್ಲೆಟಾನ್ ಭೋವ್‌ಚ್ ಉಣೆ ಆವ್ದೆರ್ ಜಾಯ್ತ್ಯೊ ಕವಿತಾ ಬರವ್ನ್ ಆಮ್ಕಾಂ ವಿಜ್ಮಿತ್ ಕೆಲಾಂ. ಹುಮೆದಿಚ್ಯೊ ಝರಿ ಪಿಯೆಂವ್ಕ್ ದಿಲ್ಯಾರ್, ಕವಿತೆಚೊ ಭೊಂವಾರ್ ವಾಡಂವ್ಕ್ ಆಮ್ಕಾಂ ಕಷ್ಟ್ ನಾಂತ್ ಮ್ಹಳ್ಳ್ಯಾಕ್ ತಿ ಏಕ್ ಗೊವಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಮ್ಮಿ ಆನಿ ಮಾಂಯ್
'ಮಾಂಯ್' ಮ್ಹಣೊಂಕ್ ಲಜ್ತಾಂವ್ ಆಮಿ
ಕಿತೆಂ ಜಾತ್ಲೆಂ ಆಮ್ಚೆಂ ಕಮೀ?
ಮಾಂಯ್ ಜಾವ್ನಾಸಾ ಕೊಂಕ್ಣೆಚೊ ವ್ಹಾಳೊ
'ಮಾಮ್ಮಿ' ಕೊಂಕ್ಣಿ ಭಾಶೆಕ್ ಭಾಲೊ
ಮಾಂಯ್ ಮ್ಹಣ್ತಾನಾ ತಾಳೊ ಜಾತಾ ಲ್ಹಾನ್
ಮಾಮ್ಮಿಚ್ಯಾ ಆವಾಜಾಕ್ ಫುಟ್ತಾತ್ ಕಾನ್
ಆಸ್ತಾನಾ ಆಮಿ ನೆಣ್ತಿಂ ಪೊರಾಂ
ಮಾಂಯ್ಚ್ಯಾ ಪಾಲ್ವಾ ಭೊಂವ್ತಿಂ ಚೊವೀಸ್ ವೊರಾಂ
ಇಲ್ಲೆಂ ಶಿಕಪ್ ಜೊಡ್ಲ್ಯಾ ನಂತರ್
ಮಾಂಯ್ಚ್ಯಾ ಪಾಲ್ವಾಥಾವ್ನ್ ದವರ್‍ತಾಂವ್ ಅಂತರ್
ಮಾಂಯ್ ಜಾವ್ನಾಸಾ ಸರ್ವಸ್ವ್ ಎಕಾ ಘರ್‍ಚಿ
ಮಾಮ್ಮಿ ಆತಾಂಚಿ ಭಾಯ್ರ್ ಕಾಮಾಂತ್ ಭಿಝಿ
ಮಾಂಯ್ ಉಲಯ್ತಾ ಭಾಸ್ ಆಪುಟ್ ಕೊಂಕ್ಣಿ
ಮಾಮ್ಮಿಕ್ ಕೊಂಕ್ಣಿ ಉಲಯ್ತಾನಾ ಯೆತಾ ಖೊಂಕ್ಲಿ
ಉರವ್ನ್ ಹಾಡ್ನ್ ಆಯ್ಲಿ ಮಾಂಯ್ ಕೊಂಕ್ಣಿ ಭಾಸ್
ಮಾಮ್ಮಿನ್ ಕೆಲೆಂ ಹೆ ಭಾಷೆಚೆಂ ನಾಸ್
ಮಾಮ್ಮಿ ಸೊಡಿನಾ ಭುರ್ಗ್ಯಾಂಕ್ ಉಲಂವ್ಕ್ ಕೊಂಕ್ಣಿ
ಜಿಬೆರ್ ಪ್ರೆಸ್ಟೀಜಾಚಿಂ ಘಟ್ ಧಾಂಪ್ಲ್ಯಾಂತ್ ಧಾಂಪ್ಣಿಂ
ಭುರ್ಗ್ಯಾಂಕ್ ಉಲಂವ್ಕ್ ಶಿಕಯ್ನಾಂವ್ ತರ್ ಹಿ ಭಾಸ್
ಕೊಂಕ್ಣಿ ಮಾಂಯ್ಚೆ ಸಮಾಜೆಂತ್ ಜಾತಲೆಂ ಸತ್ತ್ಯಾನಾಸ್
- ವಾಯ್ಲೆಟ್ ಜೆ. ಪಿರೇರಾ, ಬೆಂದುರ್/ದುಬಾಯ್