ಸಂಪಾದಕೀಯ್:
ತಾಚೆ ವ್ಹಡ್ವಿಕಾಯೆಕ್ ಮ್ಹಜೊ ಸೈಲಾಪ್ ನಾಕಾ
ಎಕೆ ಕುಶೀನ್ ಕುತ್ತ್ ಕರುನ್ ಹಾಸೊ ಯೆತಿತ್ ತರೀ, ಖಿಣಾನ್ 'ಸಾಯ್ಬಾ'ಚೆರ್ ಆಸ್‌ಲ್ಲೆ ಜಾಳ್ ಸೊರ್ಮುಣಾಂತ್ ಬದ್ಲೊನ್, ಕುಡಿಂತ್ಲೆಂ ರಗತ್ ಸಗ್ಳೆಂ ಖತ್ಕತೊಂಕ್ ಆಸಾ ಹಿ ಕವಿತಾ ವಾಚ್ತಾನಾ. ತಸಲಿ ಏಕ್ ತಾಕತ್ ಹೆ ಕವಿತೆಕ್ ಆಸಾ. ಮಾಗೀರ್ ಹಿ ಕವಿತಾ ಎರಿಕ್ ಸೋನ್ಸ್ ತಸಲ್ಯಾ ಕವಿನ್ ಬರಯ್ಲ್ಯಾ ಮ್ಹಣ್ತಾನಾ, ಮ್ಹಜ್ಯಾ ಉತ್ರಾಂನಿ ಸೈಲಾಪಾಚಿ ಸಾಯ್ ಆಸಾ ಮ್ಹಣೊನ್ ಕೊಣೇಂಯ್ ಚಿಂತ್ಚೆಬರಿ ನಾ. ಅಸಲೊ ಏಕ್ ತಾಕ್ತೆಚೊ ಕವಿ ಕಿತ್ಯಾಕ್ ಆಮ್ಕಾಂ ಸರಾಗ್ ಕವಿತಾ ದೀನಾ? ಅಸಲೊ ಏಕ್ ಸಕ್ತೆಚೊ ಕವಿ, ಕಿತ್ಯಾಕ್ ಕೊಂಕಣಿ ಕವಿತಾ ಖಜಾನ್ ಬಳ್ವಂತ್ ಕರುಂಕ್ ಯೇನಾ?
ಕಾರಣಾಂ ಕಸಲೀಂಯ್ ಆಸೊಂ, ತಾಣೆ ಬರಯಿಲ್ಲೆಂ ಉರ್‍ಚೆ ತಸಲೆಂ. ಕೊಂಕಣಿ ಕವಿತಾ ಶೆತಾಂತ್ ದಿನೇಶ್ ಕೊರೆಯಾ ತಸಲ್ಯಾಂನಿ ವಸ್ತಿ ಕೆಲ್ಲ್ಯಾ ಘರಾಂತ್ ಎರಿಕ್ ಸೋನ್ಸ್ ಆಜ್ಯಾಪಾಂ ಕರ್‍ತಾ. ಹಿಂ ಆಜ್ಯಾಪಾಂ ಕೊಂಕಣಿ ಕವಿಂಕ್ ಪಿಶ್ಯಾರ್ ಘಾಲುಂ. ತಾಂಚಿ ಹುಮೆದ್ ವಾಡೊಂ ಮ್ಹಣೊನ್‌ಚ್ ಆಮ್ಚಿ ಆಶಾ.
ತುಮಿ ರಸಿಕಾಂನಿ ಕವಿತಾಂಚೆರ್ ರಚನಾತ್ಮಕ್ ಅಭಿಪ್ರಾಯ್ ಬರವ್ನ್ ಧಾಡ್ಲಿ ತರ್ ತಿ ಆಮಿ ಫಾಯ್ಸ್ ಕರ್‍ತಾಂವ್. ತುಮ್ಚಿ ಅಭಿಪ್ರಾಯ್ ಇಂಗ್ಲಿಷಾಂತ್‌ಯ್ ಬರವ್ಯೆತಾ, ಕೊಂಕಣಿಂತ್‌ಯ್ ಜಾತಾ. ಆಮ್ಚೊ 'ಉಚಾರ್ ವಿಚಾರ್' ವಿಭಾಗ್ ತುಮ್ಕಾಂ ಸದಾಂಚ್ ಉಗ್ತೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸಾಯ್ಬ್ ಯೆಂವ್ಚೊ ಆಸಾ
ಸಾಯ್ಬ್ ಯೆಂವ್ಚೊ ಆಸಾ
ವಾಟ್ ಸೊಡಾ, ವಾಟ್ ಸೊಡಾ
ವಾರ್‍ಯಾರ್ ಉಬೊನ್ ಯೆತಾ
ದೆಂವೊಂಕ್ ಅತ್ವೊಚ್ ದಾರ್‍ವಾಟೊ ಆಸೊಂ
ತಾಂಬ್ಡಿ ಕಾಂಬೊಳ್ ಹಾಂತುಳಾ
ಹಾತ್ ಧರ್‍ನ್ ಸಕ್ಲಾ ದೆಂವಯಾ
ಬೆಂಝಾಂ, ಲ್ಯಾನ್ಸರಾಂ, ಒಪ್ಟ್ರಾಂ ಪರ್ನಿಂ ಜಾಲಿಂ
ಆಮ್ಚ್ಯಾ ಫೊಂಡ್ ಪಡ್‌ಲ್ಲ್ಯಾ ಮಾರ್ಗಾರ್
ಟ್ರಾಫಿಕ್ ಜ್ಯಾಮಾಂತ್ ಶಿರ್‍ಕೊನ್
ತಾಣೆ ಆಮ್ಕಾಂ ಯೆಟ್ಚ್ಯಾ ಬದ್ಲಾಕ್
ಧರ್‍ಣಿರ್ ತಾಣೆ ಪಾಂಯ್ ತೆಂಕ್ಚ್ಯಾ ಫುಡೆಂಚ್
ಹೆಲಿಕೊಪ್ಟರ್ ತಯಾರ್ ಆಸೊಂ
ರಸ್ತ್ಯಾ ಕುಶಿಂನಿ ತ್ಯೊ ಗೋಬಿ-ಮಂಚೂರಿ,
ಚ್ಯಾಟ್-ಮಸಾಲಾ-ಕುಲ್ಫಿಚ್ಯೊ ಗಾಡಿಯೊ!
ಶೀ, ಧಾಂವ್ಡಾಯಾ ತಾಂಕಾಂ.
ಹರ್‍ಯೆಕ್ ಗಲ್ಲ್ಯಾಂನಿ ಪಿಜ್ಜಾಹಟ್ಟ್, ವೊಲ್‌ಮಾರ್ಟ್,
ಮೆಕ್ ಡೊನಾಲ್ಡ್ಸ್ ಉಬಿಂ ಕರಾ
ದೀಂವ್ದಿತ್ ತಿಂ ಸಾಯ್ಬಾಕ್ ಅದ್ಭುತ್ ಸೆನ್ಸ್ ಒಫ್ ಕಂಪರ್‍ಟ್!
ತಾಚಿ ಮೂಡ್ ಉಲ್ಲಾಸಿತ್ ಉರೊಂ.
ತ್ಯಾ ರಾಜ್ ರಸ್ತ್ಯಾ ವಯ್ಲ್ಯಾ ಕಾಪ್ಡಾಂ-ಮುಂಡು
ನ್ಹೆಸ್ಲಲ್ಯಾಂಕ್ ಕುಶಿನ್ ಲೊಟಾ
೩೬-೨೪-೩೬, ಮಿನಿ, ಮಾಯ್ಯೊ ಸುಂದರಿಂಕ್ ಆಪಯಾ
ತಿಂಚ್ ನ್ಹಯ್ ಸಾಯ್ಬಾಕ್ ಭೊಂವ್ಡಾಂವ್ಕ್
ಹ್ಯಾ ಕಾಮಾಕ್ ಆಮ್ಚೆಂ ಮಿಸ್ ಇಂಡಿಯಾ
ಆಯ್ಲ್ಯಾರಿ ಜಾಯ್ತ್
ಸಾಯ್ಬ್ ಸಾಮಾನ್ಯಾಂಚೊ ನ್ಹಯ್
ಮೂಡ್ ಜಾವ್ನ್ ವ್ಹಡ್ಲೆ ವ್ಹಡ್ಲೆ ನಿರ್ಣಯ್ ಘೆತ್ಲ್ಯಾರ್‌ಯ್ ಘೆತ್ಲೆ!
ಸಾಯ್ಬ್ ಯೆಂವ್ಚೊ ಆಸಾ,
ವಾಟ್ ಸೊಡಾ, ವಾಟ್ ಸೊಡಾ
ವಾಟ್ ನಾ ತರ್, ಕೊಣಾ ಬಾವ್ಡ್ಯಾಚ್ಯಾ
ಪೊಟಾರ್ ಪಾಂಯ್ ದವರ್‍ಚಿ
ವೆವಸ್ಥಾ ಪುಣ್‌ಯ್ ಕರಾ!
-ಎರಿಕ್ ಸೋನ್ಸ್, ಬಾರ್ಕುರ್