ಸಂಪಾದಕೀಯ್:
ರೆಂವೆಂತ್ಲೆಂ ಮೊತಿಂ ವಿಂಚುಂಕ್ ಗೆಲ್ಲೊ ಬಂದ್ಖಣೆಂತ್ಲೊ ಮನೀಸ್
ಖಾಡ್ಯೆಂತ್ಲ್ಯಾ ಗಾಂವಾಂತ್ ಘೊಳ್ಚ್ಯಾ ಮನ್ಶಾಚೆಂ ಚಿತ್ರಣ್ ಹೆ ಕವಿತೆಂತ್ ಉಗ್ಡಾಪೆಂ ಜಾಲಾಂ. ಗಾಂವಾಂತ್ಲ್ಯಾ ರಿತ್ಯಾ ಪೊಟಾಂ ಖಾತೀರ್ ರಗತ್ ಘಾಮ್ ಕರುನ್, ಹಿಂವಾಕ್ ಬೊಟಾಂ ರೂಕ್ ಕರುನ್, ಗಾಂವಾಂತ್ಲ್ಯಾ ಮೊಗಾಚ್ಯಾ ಮನ್ಶಾಂಚ್ಯಾ ಭುಕೆ ಉಜ್ಯಾ ಮುಕಾರ್ ಗಲ್ಫಾಚ್ಯಾ ಗಿಮಾಂತ್ಲೊ ಸುರ್ಯಾ ಉಜೊ ಗಿಳುನ್ ಜಿವಿತ್ ಸಾರುನ್ ಆಸಾ ಹೆ ಕವಿತೆಂತ್ಲೊ ನಾಯಕ್. ನಿಮಾಣೆಂ ಹೆಂ ಜಿವಿತ್ ತಾಣೆ ಆಶೆಲ್ಲೆಂ ಕಾಂಯ್ ನ್ಹಯ್, ಜಿವಿತಾಚ್ಯಾ ವಿಪರ್‍ಯಾಸಾನ್ ಆಪ್ಣಾಭೊಂವ್ತಿಂ ಉಬಾರ್‌ಲ್ಲಿ ಬಂದ್ಖಣ್ ಮ್ಹಣ್ ತೊ ಬರ್‍ಯಾನ್ ಜಾಣಾ.
ತ್ಯಾದೆಕುನ್ ತೊ ಹ್ಯಾ ಗಾಂವ್ಚಿಂ ನಕ್ಲಾಂ ಕರುಂಕ್ ಭಾಯ್ರ್ ಸರ್‍ಲಾ ತರೀ, ತೊ ದೀಸ್ ದೆವಾನ್ ಮಾತ್ರ್ ಫಾವೊ ಕರ್‍ಯೆತ್ ಮ್ಹಳ್ಳೆಂ ಜಾಣಾ ಜಾವ್ನ್ ಸಗ್ಳೆಂ ತೊ ದೆವಾಚೆರ್ ಸೊಡ್ತಾ. ಹಿ ಏಕ್ ಸಹಜ್ ಆಶಾ, ಗಲ್ಫಾಂತ್ ಘೊಳ್ಚ್ಯಾ ಸಾದ್ಯಾ ಕಾಮೆಲ್ಯಾಚಿ.
'ಅರುಣಾ' ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಯೆತಾನಾ ನಿರಾಶೆಚಿಂ ಕುಪಾಂ ತಾಚ್ಯಾ ಮಾತ್ಯಾರ್ ಪಸ್ರೊನ್ ಆಸ್ಚಿಂ ದಾಧೋಶಿ ದಿಸ್ತಾತ್. ಹಿಂ ಕುಪಾಂ ದಾಧೊಸ್ಕಾಯೆಚೊ ಪಾವ್ಸ್ ತಾಚ್ಯಾ ಜಿವಿತಾಂತ್ ಹಾಡುನ್ ಯೇಂವ್ದಿತ್ ಆನಿ ಫುಡಾರಾಂತ್, ತಾಚ್ಯಾ ಕವಿತಾಂನಿ ಆಶಾವಾದಾಚಿಂ ಆಲ್ಪುಲಿಂ ಫುಲೊಂದಿತ್ ಅಶೆಂ ಆಶೆತಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರೆಂವೆಂತ್ಲಿಂ ಮೊತಿಂ
ರಗ್ತಾಥೆಂಬೆ ಘಾಮ್ ಕರುನ್
ವಿಂಚ್ತಾಂ ಮಾಣ್ಕಾಂ ಮೊತಿಯಾಂ
ರಾಕೊನ್ ಮ್ಹಾಕಾ ರಾವ್ಲ್ಯಾಂತ್ ಘರಾ
ರಿತಿಂ ತಾಂಚಿಂ ಪೊಟಾಂ
ಹಿಂವಾ ಆಗ್ಟೆಂ ಜಳೊಂಕ್ ಲಾಗ್ಲಾಂ
ಬೊಟಾಂಕ್ ಕರುನ್ ರುಕಾ ಸಾರ್ಕೆಂ
ಊಬ್ ಮರೊನ್ ಕೂಡ್ ಉರ್‍ಲ್ಯಾ
ಉರ್‍ಲಾಂ ಫಕತ್ ವಾರೆಂ
ಗಿಮೆ ದಿಸಾಂನಿ ಶಿರಾಪ್ ತುಜೊ
ಸುರ್ಯೊ ವೊಂಕ್ತಾ ಉಜೊ
ಹಾಚೆವರ್ನಿಂ ಖಂಡಿತ್ ವ್ಹರ್ತೊ
ಮೊಗಾಚ್ಯಾಂಚೊ ಭುಕೆ ಉಜೊ
ಕೆನ್ನಾಂ ತುಜೆಂ ರಾಜ್ ಯೆತಾ
ದೆವಾ ರಾಕೊನ್ ಥಕ್ಲಾಂ
ಆಮ್ಚೇಯ್ ಭುಂಯ್ತ್ ತೇಲ್ ದಿ
ಹಾಂಚಿಂ ಕರ್‍ತಾಂ ನಕ್ಲಾಂ
-ಅರುಣಾ