ಸಂಪಾದಕೀಯ್:
ನವ್ಯಾರ್ ಮಾತ್ಯಾಕ್ ಮುಂಡಾಸ್ ಬಾಂಧುನ್ ಆಯಿಲ್ಲೊ ಕವಿ
ನವ್ಯಾರ್‌ಚ್ ಮಾತ್ಯಾಕ್ ಮುಂಡಾಸ್ ಬಾಂಧುನ್ ಆಯಿಲ್ಲ್ಯಾಬರಿ ಸೊಭ್ತಾ ಬಾರ್ಕುರ್‍ಚೊ ಆಂಟನಿ ಹೆ ಕವಿತೆದ್ವಾರಿಂ. ಹಾಂವೆಂ 'ಆನಿ ಮ್ಹಾಕಾ ಕಾಂಯ್ ನಾ ಉಣೆಂ' ಗೀತ್ ಆತಾಂ ಗಾಂವ್ಚೆಂಚ್ ಪಡ್ತಾ. ಆಮ್ಚಿ ವಾಂವ್ಟ್ ಸಾರ್ಥಕ್ ಕರುನ್ ಮ್ಹಳ್ಳೆಬರಿ ಹಿ ಏಕ್ ಸುರಸ್ ಕವಿತಾ ಹಾಂಗಾಸರ್ ವ್ಹಾಳ್ಳ್ಯಾ. ತಿ ಅಶಿ ವ್ಹಾಳ್ಳ್ಯಾ, ಏಕ್ ಪಾವ್ಟಿಂ ವಾಚ್‌ಲ್ಲೊ ಮನೀಸ್ ಶೀದಾ ಗಾಂವ್ಚ್ಯಾ ಆಪ್ಲ್ಯಾ ಘರಾ ಸುರಾಂಟಿ ಮಾರುನ್ ಧಾಂವ್ತಾ ಆನಿ 'ಇಲ್ಲೆಂ ವಾಡ್ ಮಾಂಯ್' ಮ್ಹಣೊನ್ ವಿಚಾರ್‍ತಾ.
ಆಮಿ ಅಸಲ್ಯೊ ಆಪುರ್ಬಾಯೆಚ್ಯೊ ಕವಿತಾ ವಾಡ್ಚೆಂ ಪ್ರೇತನ್ ಕರೀತ್ ಆಸ್ತಾನಾ, ಆಂಟನಿ ತಸಲ್ಯಾಂಚಿಂ ಪ್ರೇತನಾಂ ಆಮ್ಕಾಂ ಹುಮೆದ್ ವಾಡ್ತಾತ್. ಗಾಂವ್ಚೊ ಉಡಾಸ್ ಜಾಯ್ತ್ಯಾ ಕವಿಂನಿ ಜಾಯ್ತೆ ರಿತಿಂನಿ ಕಾಡ್ಲಾ ಆಸ್ಯೆತ್. ಪುಣ್ ಆನ್ಯೇಕ್ ಗಾಂವ್ಚೊ ಉಡಾಸ್ ಹಾಡ್ಚಿ ಕವಿತಾ ವಾಚುಂಕ್ ಆಮ್ಕಾಂ ಉಬ್ಗೊಣ್ ಯೇನಾ. ವೆಗ್ಳ್ಯಾಚ್ ಭೊಂವಾರಾಕ್ ವ್ಹರ್‍ನ್ ಪಾವಂವ್ಚ್ಯಾ ಹೆ ಕವಿತೆಚಿ ಆಕೇರ್ ಹ್ಯಾ ಕವಿಚಿ ವ್ಹಡ್ವಿಕಾಯ್, ಯಶಸ್ವಿ ಪಾಚಾರ್‍ತಾ.
ಆಂಟನಿಕ್ ಕೊಂಕಣಿ ಕವಿತಾ ಶೆತಾಂತ್ ಉಜ್ವಳ್ ಫುಡಾರ್ ಆಸಾ ಮ್ಹಣ್ ಸಾಂಗೊಂಕ್ ಮ್ಹಾಕಾ ಕುಸ್ಕುಟ್ ದಾಕ್ಷೆಣ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಗಾಂವಾ ಉಗ್ಡಾಸ್
ಬಸ್ಲಾಂ ಪರ್‍ದೆಸಾಂತ್, ಉಗ್ಡಾಸ್ ಗಾಂವ್ಚೆ ವಾಟೆರ್
ಲಾಗ್‌ಲ್ಲೊಸೊ ಥಂಡ್ ಧೋವ್, ಚಲ್ತಾಂ ಗಾದ್ಯಾ ಮೆರೆರ್
ತೊಂದ್ರಾಂತ್ ಉಕಡ್‌ಲ್ಲ್ಯೊ ಸುರೆಚ್ಯೊ ಇಡ್ಲ್ಯೊ ಮೋವ್
ರುಚಿಕ್ ನ್ಹಯ್‌ಗೀ ನಾರ್‍ಲಾ-ಗೊಡಾಚೊ ಫೊವ್
ಧವ್ಯೊ ಖೊರ್‍ವೊ, ಪೆಜೆಚೊ ಪರ್‍ಮಳಿಕ್ ನೀಸ್
ಆಯ್ತಾರಾ ಸಕಾಳಿಂ ಕೊಂಕ್ಣೆಂತ್ ಭೆಟಂವ್ಚೆಂ ಮೀಸ್
ಜಿವೆ ಜಿವೆ ತಾರ್‍ಲೆ, ಧಾ ರುಪ್ಯಾಂಕ್ ವೀಸ್
ಚಿಂತುಂಕ್ ಯೆತಾತ್ ಸೊಭಿತ್ ಸುಂದರ್ ತೆ ದೀಸ್
ವೆಂಗುನ್ ವ್ಹಾಳ್ತಾ ಗಾಂವಾಂ ಭೊಂವಾರಿಂ ನಂಯ್
ಝಾಡಾಂಕ್, ಮಾಡಾಂಕ್ ಉದಕ್ ಭರಂವ್ಚಿ ಮಾಂಯ್
ಧಾ ಧಾ ಘರ್‍ಚ್ಯಾಂಕ್ ಸುಧಾರ್‍ಸುಂಕ್ ಏಕ್‌ಚ್ ಬಾಂಯ್
ರಜಾರ್ ಮಾಗ್ಣ್ಯಾಕ್ ಸದೆಂವ್ ಮರಿ ಮಾಂಯ್
ಬಾಂದ್ಪಾಸ್ ನಾತ್‌ಲ್ಲಿ ಸ್ವತಂತ್ರ್ ನಿರಾಳ್ ಜಿಣಿ
ಉಲವ್ನ್ ಹಾಸೊಂಕ್ ದಿಸಾಕ್ ಏಕ್ ಕಾಣಿ
ಜಿಯೆಂವ್ಕ್ ನಾ ಆವ್ಕಾಸ್, ಉರ್‌ಲ್ಲಿ ಆವ್ದಿ ಉಣಿ
ಮಾತ್ಯೆಂತ್ ಮಾತಿ ಜಾಂವ್ಕ್ ತರೀ ಫಾವೊ ಕರ್ ಸೊಮಿಣಿ
-ಆಂಟನಿ, ಬಾರ್‍ಕುರ್