ಸಂಪಾದಕೀಯ್:
ಕಾಳ್ಜಾಕ್ ಜಾಲ್ಲ್ಯಾ ಘಾಯಾಂಚ್ಯಾ ಉಜ್ಯಾಂತ್ ಉಬ್ಜಾಲ್ಲಿ ಕವಿತಾ
ಹರ್ಯೆಕೆ ಕವಿತೆಚ್ಯಾ ಉದೆವಾ ಸಂಗಿಂ ಉಂಚಾಯೆಚಿ ನಿಸಣ್ ಚಡೊನ್ ವೆತಾ ಹೊ ಕವಿ. ಹಾಂಗಾಸರ್ ಎಕೆ ಸ್ತ್ರೀಯೆಚ್ಯಾ ಅಂತಸ್ಕರ್ನಾಚೊ ತಾಳೊ ಆಪ್ಣಾಚೆ ಕವಿತೆದ್ವಾರಿಂ ತಾಣೆ ಭಾಯ್ರ್ ಘಾಲಾ. ಕಾಂಯ್ ಲಗ್ನಾಚ್ಯಾ ಭೆಸಾಂತ್ ಆತ್ತಾಂ, ಪೋಯ್ರ್ ಎಕ್ವಟ್‌ಲ್ಲಿ ಸ್ತ್ರೀ ತಿಚ್ಯಾ ಮೊಗಾಚಿ ಧಾಂವ್ ಮಯ್ಪಾಸಿ ದೆವಾನ್ ರಾವಯ್ಲಿ ಮ್ಹಣ್ತಾ ಜಾಲ್ಯಾರ್ ಹಾಂಗಾಸರ್ ಕಿತೆಂಕಿ ಆನಾಉತ್ ಘಡ್ಲಾಂ ತೆಂ ಖಂಡಿತ್. ಹ್ಯಾ ಅವ್ಘಡಾನ್ ಕಾಳ್ಜಾಂಕ್ ಸೊಸುಂಕ್ ನಜೊ ಜಾಲ್ಲೆ ಘಾವೆ ಜಾತಾನಾ ಉಟ್‌ಲ್ಲ್ಯಾ ಉಜ್ಯಾಂತ್ ಹಿ ಕವಿತಾ ಭುಂಯ್ ಪಡ್ಲ್ಯಾ.
ಆರ್ಥರ್ ಪಿರೇರಾ ಕೊಂಕಣಿಚ್ಯಾ ಕಾವ್ಯ ಶೆತಾಂತ್ ಭರ್‍ವಶಾಚೆಂ ನೆಕೆತ್ರ್. ಕಾಂಯ್ ಅಶೆಂಚ್ ತಾಚಿ ವಾಟ್ ತೊ ಚಮ್ಕೊನ್ ಗೆಲೊ ತರ್ ಫುಡಾರಾಂತ್ ಆಪ್ಲೆಂ ಸ್ಥಾನ್ ಥಿರ್ ಉರಯ್ತಲೊ ಮ್ಹಣ್ಚ್ಯಾಂತ್ ನವಾಲ್ ನಾ.
ಆಮಿ ಹಿ ಕವಿತಾ ವಾಚ್‌ಲ್ಲ್ಯಾಂನಿ ಪಯ್ಸ್ ವಚನಾಸ್ತಾಂ ಲಾಗಿಂ ರಾವೊನ್ ಹೆ ಕವಿತೆನ್ ಪಸ್ರಾಯಿಲ್ಲೊ ಸುಗಂಧ್ ಚಾಕ್ಲೊ ಜಾಲ್ಯಾರ್ ಸಗ್ಳೆಂ ಚಂದ್ ಜಾತಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತಿತ್ಲೋಯ್ ಪಯ್ಸ್ ವಚನಾಕಾ
ತಿತ್ಲೋಯ್ ಪಯ್ಸ್ ತುಂ ವಚನಾಕಾ
ಹಿಂ ಕಾಳ್ಜಾಂ ಕೆದಿಂಕ್‌ಚ್ ತುಟ್ಚಿಂನಾಂತ್
ಥಾಂಬ್ಚೊನಾ ಮೋಗ್ ದೀವ್ನ್ ಆದೇವ್ಸ್ ತುಕಾ
ಹ್ಯೊ ದೊಳ್ಯಾಂ ತಡಿ ಧಾಂಪ್ಚ್ಯೊ ನಾಂತ್
ಸಾತ್ ಜಲ್ಮಾಂಚಿ ಆತಾಂ ಖಬರ್ ನಾಕಾ
ಜೀವ್ ಮ್ಹಜೊ ಭರ್ ತುಜ್ಯಾ ಜಿವಾಂತ್
ಉಲಯ್ ಮೊಗಾ ಆಜ್ ಮೌನ್ ನಾಕಾ
ಆರಾವ್ನ್ ಧರ್ ಮ್ಹಾಕಾ ತುಜ್ಯಾ ಗೊಪಾಂತ್
ಬಾವ್ಚೆ ಆದಿಂ ಪಾಕ್ಳ್ಯೊ ಝಡ್ಲ್ಯೊ
ತರೀ ಸುಕೊನ್ ತ್ಯೊ ಗೆಲ್ಯೊನಾಂತ್
ಸಾಂಡ್ಲೆಂ ಧರ್ತಿನ್ ವೆಂಗ್ಲೆಂ ವಾರ್‍ಯಾನ್
ಉಬೊನ್ ಗೆಲ್ಯೊ, ಹಾತಾಕ್ ಮೆಳ್ಳ್ಯೊನಾಂತ್
ಉದಕ್ ವಾರೆಂ ದಿಲ್ಲೆಂ ದೆವಾನ್
ಪುಣ್ ಮೋಗ್ ರಚ್‌ಲ್ಲೊ ಹಾಂವೆಂ ತುಂವೆಂ
ತುಜೆವಿಣೆಂ ಕಶೆಂ ಸೊಶಿನ್
ಸ್ವಾಸ್ ಆಸ್ತಾಂ ಮ್ಹಜೊ ತುಜೆ ಸವೆಂ
ಬುಳ್ಬುಳ್ಯಾ ಉದ್ಕಾಂತ್ ಖತ್ಕತಿ ಧಾವ್
ಜಲ್ಮ್ ದಿಲ್ಲೊ ಜಬ್ಬೊರ್ ಉಜ್ಯಾನ್
ಕಾಜಾರಿ ಪಯ್ಣಾಂತ್ ಮೊಗಾಚಿ ಧಾಂವ್
ರಾವಯ್ಲಿ ಕಿತ್ಯಾಕ್ ಮಯ್ಪಾಸಿ ದೆವಾನ್?
-ಆರ್ಥರ್ ಪಿರೇರಾ ಒಮ್ಜೂರ್