ಸಂಪಾದಕೀಯ್:
ರುಕಾಕ್ ರೆವೊಡ್ ಘಾಲ್ಲ್ಯಾ ಹಾರಾಚೆಂ ಧಾರುಣ್ ಕಾಳೀಜ್
ಖಂಯ್ಚೆಂ ಕೊಣ್ಣಾ ಝೊಡ್‌ವಾರೆಂ ಆಯ್ಲಾಂ ಆನಿ ತ್ಯಾ ಝೊಡ್‌ವಾರ್‍ಯಾಕ್ ಹೊ ರೂಕ್ ಶಿರ್‍ಕಲಾ. ಹೆಂ ಝೊಡ್‌ವಾರೆಂ ಕೊಣ್ ಹಾಡ್ನ್ ಆಯ್ಲಾ ಕಾಂಯ್ ವಿಚಾರುಂಕ್ ವೆತಾನಾ ಹಿ ಕವಿತಾ ಘೊವಾ-ಬಾಯ್ಲೆ ಮಧ್ಲ್ಯಾ ವೆಗ್ಳಾಚಾರಾಚಿ ಕಥಾ ಸಾಂಗ್ತಾ. ಲಗ್ನಾ ಜಿವಿತಾಂತ್ಲೊ ವೆಗ್ಳಾಚಾರ್ ಕವಿಂನಿ ಕವಿತಾ ವಿಣುಂಕ್ ಆಪ್ಣಾಯಿಲ್ಲೊ ನವೊ ವಿಷಯ್ ನ್ಹಯ್. ಪುಣ್ ಜೆ ರಿತಿನ್ ಹೊ ವಿಷಯ್ ಹಾಂಗಾಸರ್ ಸಾದರ್ ಜಾಲಾ, ತ್ಯಾ ಖಾತೀರ್ ಕವಯಿತ್ರಿ ವಿಲ್ಮಾ ರೇಗೊ ಉಟೊನ್ ದಿಸ್ತಾ.
ಹೆ ಕವಿತೆಂತ್ ಸಾದರ್ ಜಾಲ್ಲ್ಯೊ ಕಾಂಯ್ ಅಸ್ಪಶ್ಟ್, ಅಪ್ರೂಪ್ ಪ್ರತಿಮಾ ಆನಿ ಅಲಂಕಾರ್ ವಾಚ್ತಲ್ಯಾಕ್ ಎಕಾ ವೆಗ್ಳ್ಯಾಚ್ ಅನ್ಭೋಗಾಚ್ಯಾ ಸಂಸಾರಾಕ್ ವ್ಹರುನ್ ಪಾಯ್ತಾತ್. ಮರ್‍ಣಾಕ್ ತೆಂಕ್‌ಲ್ಲೊ, ಪಾನಾಂ ಝಡಯಿಲ್ಲೊ, ಮಾತ್ ಖೆಲ್ಲೊ ರೂಕ್ ದೊಳ್ಯಾಂ ಮುಕಾರ್ ಹಾಡುನ್ ಜರ್ ಹಿ ಕವಿತಾ ಕೊಣ್ ವಾಚ್ತಾ, ತಾಂಕಾಂ ಹೆ ಕವಿತೆಚ್ಯೊ ಝರಿ ಅಮೃತ್ ಜಾತಲ್ಯೊ ಖಂಡಿತ್.
ವಿಲ್ಮಾ ರೇಗೊ ಸಭಾರ್ ವರ್‍ಸಾಂಥಾವ್ನ್ ಕಾವ್ಯಶೆತಾಂತ್ ಲಿಖ್ಣಿ ಝರಯಿಲ್ಲಿ ಕವಯಿತ್ರಿ. ಪುಣ್ ಕವಿತಾ ಕುಳಾರಾಂತ್ ತಿಚೆಂ ಹೆಂ ಫುಡ್ಲದ್ ಯೆಣೆಂ. ತಿಕಾ ಆಮಿ ಸ್ವಾಗತ್ ಕರ್‍ತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರುಕಾಚಿ ಕಥಾ
ತುಜ್ಯಾ ಮೊಗಾಚ್ಯಾ ಝೊಡ್‌ವಾರ್‍ಯಾಕ್
ಶಿರ್‍ಕಲ್ಲೊ ಹಾಂವ್ ಏಕ್ ರೂಕ್
ತುಜ್ಯಾ ಮನಾಂತ್ಲ್ಯಾ ಶುಭ್ರ್ ವಾರ್‍ಯಾಂತ್
ಹಾಂವ್ ಏಕ್ ಕಾಳೆಂ ಖತ್
ವೊತ್, ಪಾವ್ಸ್, ವಾರೆಂ ಸರ್ವಾಂತ್‌ಯ್
ಹಗೂರ್ ಆಸ್ಲೆಂ ಮನ್
ದ್ವೇಶ್, ರಾಗ್, ದೂಕ್, ಭಿಂಯಾಂತ್
ಮಧುರ್ ಜಾಲ್ಲೆಂ ಸ್ವಪಣ್
ಹ್ಯಾ ಸ್ವಪ್ಣಾಂಚ್ಯಾ ಸಂಸಾರಾಂತ್
ಆತಾಂ ವ್ಹಾಳ್ಳಾಂ ದೂಕ್
ಹಾಂವ್ ಆತಾಂ ಶಿರ್‍ಶಿರ್‍ಚೊ ರೂಕ್!
ಹಾರಾ ತಶೆಂ ಮ್ಹಾಕಾ ರೆವ್ಡೊನ್ ಥಕ್ಲೆಂಯ್
ಸ್ವಪ್ಣಾಂ ಸರ್ವ್ ಪಿಸ್ಡುನ್
ಸಾಂಗಾತ್ ಸೊಡ್ನ್ ಚಲ್ಲೆಂಯ್
ಆಶಾ ದಾಕವ್ನ್ ಯೆತಾಂ ಮ್ಹಣೊನ್
ಗೆಲ್ಲೆಂಯ್ - ತುಂ ಆಯ್ಲೆಂಚ್ ನಾಂಯ್!!
ಹಾಂವ್ ಹಾಂಗಾ ರಾಕೊನ್ ಥಕೊನ್
ಸುಕೊನ್ ಜಳೊವಾಚೊ ಜಾಲೊಂ
ತುಜ್ಯಾ ಮೊಗಾಚೆ ಜಿವೆ ಉಗ್ಡಾಸ್
ಉಸ್ವಾಸಾ ಸಾಂಗಾತಾ ಕಾಳ್ಜಾಕ್ ತೊಪ್ತಾತ್
ಭುಜ್ವಣ್ ದೀಂವ್ಕ್ ಉರ್‍ಲಾಂ ಫಕತ್
ಮ್ಹಜ್ಯಾ ಕುಂಬು ಮಾತ್ಯಾವಯ್ಲೆಂ
ನಿಳ್ಶೆಂ ಮೊಳಾಬ್ ಮಾತ್ರ್!
-ವಿಲ್ಮಾ ರೇಗೊ