ಸಂಪಾದಕೀಯ್:
ಬೂರ್ಶ್ವಾಶಾಹಿ ವರ್ಗಾನ್ ಭಿರ್ಮತ್ ಲೊಕಾಚೆಂ ರಗತ್ ಪಿಯೆತಾನಾ!
ಧನಿ ಆನಿ ಕಾಮೆಲಿ, ಗ್ರೇಸ್ತ್ ಆನಿ ದುಬ್ಳೊ, ವಯ್ಲ್ಯಾ ವರ್ಗಾಚೊ ಆನಿ ನೀಚ್ ಕುಳಿಯೆಚೊ - ಅಶೆಂ ಸಮಾಜೆಚೆ ವೆವಸ್ಥೆಚೆರ್ ಹೊಂದೊನ್ ಆನಿ ಆರ್ಥಿಕ್ ಪರಿಸ್ಥಿತೆಕ್ ಲಾಗೊನ್ ಮನ್ಶಾಂಚ್ಯಾ ವರ್ಗಾಮಧೆಂ ಆದಿಂ ಥಾವ್ನ್ ಆಸ್‌ಲ್ಲೊ ಕಂದಕ್ ಆಜೂನ್ ಉರ್‍ಲಾ. ಶೋಷಣ್ ಕರ್‍ತಲೆ ದುಬ್ಳ್ಯಾ ಧಾಕ್ಟ್ಯಾಂಚ್ಯಾ ರಗ್ತಾಚೆರ್ ಆಜೂನ್ ಜುಗಾರ್ ಖೆಳ್ತಾತ್, ತಾಂಚ್ಯಾ ಹಾಡಾಂಚೆ ಆಪ್ಲ್ಯಾ ಪೆಲ್ಯಾಂಚ್ಯಾ ಸಂಭ್ರಮಾಂಕ್ ಮಾಟವ್ ಬಾಂದ್ತಾತ್. ತಾಂಚೆ ಕಾತಿಂಚೆ ಆಪ್ಲ್ಯಾ ಆಂಗಾಪಾಂಗಾಕ್ ವಸ್ತುರ್ ಶಿಂವ್ತಾತ್.
ಅಸಲಿ ಏಕ್ ಕರಾಳ್ ಕಥಾ ಭೋವ್‌ಚ್ ಆಪುರ್ಬಾಯೆನ್ ವಿಲ್ಸನ್ ಕಟೀಲಾನ್ ಹಾಂಗಾಸರ್ ಸಾದರ್ ಕೆಲ್ಯಾ. ತಶೆಂ ಸಾದರ್ ಕರ್‍ತಾನಾ ಆಪುಣ್ ಜಾವ್ನ್ ಶೋಷಿತ್ ವರ್ಗಾಚೊ ಪ್ರತಿನಿಧಿ ಕಸೊ ಕವಿ ಜಾಲಾ, ನ್ಹಯ್ ಬೂರ್ಶ್ವಾ ವರ್ಗಾಚೊ.
ಠರಾವಣೆಚೆ ನದ್ರೆನ್ ಮಾತ್ರ್ ನ್ಹಯ್, ತಾಂತ್ರಿಕ್ ನದ್ರೆನ್, ಅಲಂಕಾರಾಚೆ ನದ್ರೆನ್ ಸಯ್ತ್ ಹಿ ಕವಿತಾ ಉಂಚ್ಲಿ. ವಿಲ್ಸನಾ ತಸಲೆ ಆಮ್ಚೆ ಕವಿ ಆಜ್ ಇತ್ಲೆ ಉಂಚಾಯೆಕ್ ಪಾವ್ಲ್ಯಾತ್ ಮ್ಹಣ್ತಾನಾ, ಆಮಿ ಕಿತ್ಯಾಂತ್ ಉಣೆ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮಿ ಆನಿ ತುಮಿ
ಆಮಿ
ಗಾಂವ್ ಭೊಂವ್ಚೆ
ಘೊಳೊನ್ ಖಾಂವ್ಚೆ
ತುಮಿ
ರಾವ್‌ಲ್ಲ್ಯಾ ಥಯಿಂಚ್ ರಾಂವ್ಚೆ
ಪಾಸ್ ಮಾಂಡುನ್ ಆಮ್ಕಾಂ ಭೊಕಾಂವ್ಚೆ!
ಆಮಿ
ಮ್ಹೆಳ್ಯಾಂತ್ ಕುಸ್ಚೆ
ಪಿಂಜ್‌ಲ್ಲೆಂ ನ್ಹೆಸ್ಚೆ
ತುಮಿ
ಆಮ್ಕಾಂ ಮೊಲಾಂವ್ಚೆ
ಪಯ್ಶಾಂನಿಂಚ್ ಆಮ್ಚಿಂ ತೊಂಡಾಂ ಶಿಂವ್ಚೆ!
ಆಮಿ
ಕಟ್ಟೋಣಾಂ ಬಾಂದ್ಚೆ
ಆನಿ ರುಕಾಸಾವ್ಳೆಂತ್ ನಿದ್ಚೆ
ತುಮಿ
ರೂಕ್ ಕಾತ್ರವ್ನ್ ಕಟ್ಟೋಣಾಂ ಬಾಂದಂವ್ಚೆ
ಆಮ್ಕಾಂ ಖೊಲಿಯಾಂಬರಿ ಗುಡ್ಡಾಂವ್ಚೆ!
ಆಮಿ
ತುಮ್ಚ್ಯಾ ಮುಕಾರ್ ಕಡ್ಚೆ
ರಶೀಮ್ ಕಿಡ್ಯಾಂಬರಿ ಉಕಡ್ಚೆ
ತುಮಿ
ಆಮ್ಚಿಂ ಸುತಾಂ ಕಾಡ್ಚೆ
ಆನಿ ಭಾಣ್ಶಿರೆಂ ಕರ್‍ಚೆ!
ಆಮಿ ಮಾತ್ಯೆಂತ್ ಲೊಳ್ಚೆ
ಮಾತ್ಯಾಕ್ ಮಾತಿಚ್ ಮಾಳ್ಚೆ
ಆನಿ ಮಾತ್ಯೆಕ್ ಮೆಳ್ಚೆ
ಪಾಳಾಂಬರಿ!
ತುಮಿ
ಆಮ್ಕಾಂ ಪಿಳ್ಚೆ
ಫುಲ್ಚೆ
ಆನಿ ವಾರ್‍ಯಾರ್ ಧಲ್ಚೆ
ಫುಲಾಂಬರಿ!
ತುಮಿ ಜರ್,
ಆಮ್ಕಾಂ ಮಸ್ತುಂಕ್ ಪಳಯ್ಶಾತ್
ಆಮ್ಕಾಂ ಉಸ್ತುಂಕ್ ಪಳಯ್ಶಾತ್
ತರ್
ತುಮ್ಚ್ಯಾ ಆಂಗಾಪಾಂಗಾಕ್ ಮಾತಿ ಜಾಯ್ತ್
ಆಮಿ ಜರ್,
ತುಮ್ಚೆರ್ ಉಪ್ರಾಟ್ಲ್ಯಾಂವ್
ಮಾತಿ ಫಾಪುಡ್ನ್ ಉಟ್ಲ್ಯಾಂವ್
ತರ್
ತುಮ್ಚಿಚ್ ಧುಳ್ ಜಾಯ್ತ್!!
-ವಿಲ್ಸನ್ ಕಟೀಲ್