ಸಂಪಾದಕೀಯ್:
ಮುಸ್ಳಾಚ್ಯಾ ಆಣ್ಸಾಂನಿ ಕವಿತೆಕ್ ಜಾಯ್ ಜಾಲ್ಲಿಂ ಉತ್ರಾಂ ಆಸ್ತಾತ್!
ಕವಿತಾ ಬರಂವ್ಕ್ ಠರಾವಣ್ ಸೊಧುನ್ ವಚಜಾಯ್ ಮ್ಹಣೊನ್ ಆಸನಾ. ಕಾನ್, ದೊಳೆ ಉಗ್ತೆಂ ದವರಿನಾತ್ಲ್ಯಾರಿ ಥೊಡೆ ಪಾವ್ಟಿಂ ಕವಿತಾ ಭುಂಯ್ ಪಡ್ತಾ. ಕಾಳ್ಜಾಭಿತರ್ ಕೊಣ್ ತರೀ ಮುಸ್ಳಾನ್ ಕಾಂಡ್ತಾನಾ ಸಯ್ತ್, ಮುಸ್ಳಾಚ್ಯಾ ಆಣ್ಸಾಂನಿ ಅಸಲಿಂ ಉತ್ರಾಂ ಶಿಂಪ್ಡಾಂವ್ಚಿಂ ಆಸ್ತಾತ್. ತಸಲ್ಯಾ ಕಳ್ವಳ್ಯಾಂನಿ ಕಾಂಡುನ್ ಗೆಲ್ಲ್ಯಾ ಹೆ ಕವಿತೆಂತ್ಲ್ಯಾ ನಾಯಕಾನ್ ಆಪ್ಣೆಂ ಸಭಾರ್ ಕಾಳಾ ಪಾಸುನ್ ಕವಿತಾ ಬರಯ್ನಾಸ್ತಾಂ ರಾವ್‌ಲ್ಲ್ಯಾಚಿಂ ಕಾರಣಾಂ ಹೆಂ ಕವಿತೆದ್ವಾರಿಂ ಸಾಂಗ್ಲ್ಯಾಂತ್.
ಜಿವಿತಾಂತ್ ಸಂತೊಸಾಚೆ ಘೊಡೆ ಧಾಂವ್ತಾನಾ ಆನಿ ಅನ್ವಾರಾಂಚ್ಯಾ ಆವ್ರಾಂತ್ ಬುಡ್ತಾನಾ ಸಯ್ತ್ ಕವಿತಾ ಲಿಖುಂಕ್ ಪಾಟಿಂ ಸರೊಂಕ್ ನಾತ್‌ಲ್ಲೊ ಮನೀಸ್ ಕವಿ ಕುಳಿಯೆಚೆರ್ ಇತ್ಲೋಯ್ ಶಿಣುಂಕ್ ಕಾರಣಾಂ ಕಿತೆಂ ಮ್ಹಣೊನ್ ಆಮಿ ಸೊಧುನ್ ಕಾಡ್ಲೆಂ ತರ್ ಹೆ ಕವಿತೆಚಿ ಸೊಭಾಯ್ ದೊಡ್ತಿ ಜಾತಲಿ ಮ್ಹಣ್ಚ್ಯಾಂತ್ ದೋನ್ ಉತ್ರಾಂ ನಾಂತ್.
ಠರಾವಣೆಚೆ ನದ್ರೆನ್ ಏಕ್ ಅಪ್ರೂಪ್ ವಿಷಯ್ ಆಮ್ಕಾಂ ಹೆ ಕವಿತೆದ್ವಾರಿಂ ಲಾಭ್ಲಾ ಜಾಲ್ಯಾರಿ, ಎಕಾ ಕಡ್ವ್ಯಾಥಾವ್ನ್ ಆನ್ಯೇಕಾಕ್ ಉತರ್‍ತಾನಾ ಖಂಯ್ಸರ್‌ಗಿ ಗಾಂಚ್ ಚುಕ್‌ಲ್ಲ್ಯಾಬರಿ ಭೊಗ್ತಾ. ಆಮ್ಸರ್ ಕರಿನಾಸ್ತಾನಾ ಹಿ ಕವಿತಾ ಲಿಖ್‌ಲ್ಲಿ ಜಾಲ್ಯಾರ್ ಕವಿತೆಂತ್ಲೊ ನಿರೋಪ್ ಬಳ್ವಂತ್ ರಿತಿನ್ ಸಾಂಗ್ಯೆತೊ. ಲ್ಯಾನ್ಸಿ ಪಿಂಟೊ ನಾಯಕಾಚೆಂ ಸಭಾರ್ ತೆಂಪಾ ಉಪ್ರಾಂತ್ ಕವಿತಾ ಕುಳಾರಾಕ್ ಯೆಣೆಂ ಜಾಲಾಂ. ತಾಕಾ ಹಾಂಗಾ ಆಶೆಲ್ಲೊ ಸುಶೆಗ್ ಲಾಭೊಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾಯ್ ಮನ್ ಜಾಲಾಂ!?
ಆವಯ್ಸ್ ಮ್ಹಜೆ
ಮ್ಹಾಕಾಯ್ ಕವಿತಾ ಲಿಖ್ಚೆಂ ಮನ್ ಜಾಲಾಂ
ಪುಣ್ ನೆಣಾಂ, ಕೊಣೆಂ ಶಿಂತಿದಾಕ್ ಮಾಟ್ ಕೆಲಾಂ!
ಚಿಂತ್ನಾಂ, ಭೊಗ್ಣಾಂಕ್ ಕೊಣೆಂ ತರೀ ಕಾಟ್ ಘಾಲಾ
ಉತ್ರಾಂ ನಾಂತ್, ಚಿತ್ರಾಂ ನಾಂತ್, ಇಮಾಜ್ಯೊ ಮೆಲ್ಯಾತ್
ತರೀ ಮ್ಹಾಕಾ ಕವಿತಾ ಲಿಖ್ಚೆಂ ಮನ್ ಜಾಲಾಂ!
ಆವಯ್‌ಗಿ ಮ್ಹಜೆ
ಪೋಯ್ರ್‌ಚ್ ಸ್ವಪ್ಣಾಂತ್ ಎಕ್ಲೆಂ ಅಪ್ರೂಪ್ ಆಯ್ಲೆಂ
ಮೊಗಾರ್ ಪಡ್ಚ್ಯಾ ಆದಿಂಚ್ ನಾಗ್ಡೆಂ ಧಾಂವ್ಲೆಂ
ಕಾಳ್ಜಾ ಮೊಡೆಂ ಪಡ್ಲಾಂ, ಮನ್ ಸಗ್ಳೆಂ ತೊವ್ಲಾಂ
ತರೀ ಉಸ್ವಾಸ್ ವೊಡುನ್ ಜೀವಂತ್ ಹಾಂವ್ ರಾವ್ಲಾಂ
ಆತಾಂಯ್ ಮ್ಹಾಕಾ ಕವಿತಾ ಲಿಖ್ಚೆಂ ಮನ್ ಆಸಾ
ಹಾಯ್ ಗತಿ,
ಸತಾ ನೀತಿಚೊ ಚೊವ್ಕಾ ಕುಡ್ಕೊ ಕೊಲ್ಯಾನ್ ವೆಲಾ
ಧನ್ ಮಾನಾಚಿ ಮರ್‍ಯಾದ್ ಲಿಂಬಾಕ್ ಗೆಲ್ಯಾ
ಜಿಣ್ಯೆ ಹೊಡೆಂ ತಾಂಡುನ್, ಥಕೊನ್ ಗೆಲಾಂ
ಚಲ್ಚೆಂ ಮೊಡೆಂ ಹಾಂವ್ ಸಿಮಿಸ್ತ್ರಿಚೆ ವಾಟೆರ್ ಪಡ್ಲಾಂ
ಜಾಲ್ಯಾರಿ ಮ್ಹಾಕಾ ಕವಿತಾ ಲಿಖ್ಚಿ ಆಶಾ ಜಾಲ್ಯಾ
ಹಾಯ್ ಸಂಸಾರಾ
ಜೆದ್ನಾಂ ತರ್‍ನೊ, - ಲಿಖುನ್ ಲಿಖುನ್ ಮನೀಸ್ ಜಾಲ್ಲೊಂ
ತೆದ್ನಾಂ ನೆಣಾಂ 'ನಾಂವಾಚೆ ಲಾಬಾಡಿ' ನಾಲಿಸಾಯೆಕ್ ಜಾಲ್ಲೆ
ಭಾಶೆಚ್ಯಾ ನಾಂವಿಂ, ಪಯ್ಶೆ ಜೊಡುನ್ ಫಾಮಾದ್ ಜಾಲ್ಲೆ
ಆಪ್ಲ್ಯಾ ಮನ್ಶಾಚಿ ಗೊಮ್ಟಿ ಚಿರ್ಡುನ್ ಪಾಟಾರ್ ಚಡ್ಲೆ
ದೆಕುನ್ ಮ್ಹಾಕಾ ಕವಿಂಚೆರ್ ಆತಾಂ ವೀಟ್ ಆಯ್ಲಾ
ಆವಯ್ಸ್ ಮ್ಹಜೆ
ಪುರೊ ಜಾಲಾಂ, - ಹರ್ಧೆಂ ಫಾತರ್ ಕರ್‍ನ್ ಮಾಗ್ತಾಂ
ಲಿಖ್ಚೆಂ ತೀಂತ್ ನಾಕಾ, ರಗತ್ ಭರ್ನ್ ಲಿಖ್ತಾಂ
ಮನ್ಶಾಪಣ್ ನಾತ್‌ಲ್ಲ್ಯಾ ಮನ್ಶಾಂಕ್ 'ಕವಿ' ಕರ್‍ನಾಕಾ
ಮನೀಸ್ ಜಾವ್ನ್ ಲಿಖ್ಚ್ಯಾ ಕವಿಂಕ್ ಸಂಸಾರಿಂ ದವರ್‍ನಾಕಾ
ಮ್ಹಜೆಂ ಆತಾಂ ಕವಿತಾ ಲಿಖ್ಚೆಂ ಮನ್ ಮೊಡ್ಲಾಂ
-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್