ಸಂಪಾದಕೀಯ್:
ಜಿವಿತಾಚಿ ವಾಟ್ ಧುಸ್ಪಟಾಂವ್ಚಿ ದೋತ್
ಸಮಾಜೆಂತ್ಲಿ ದೊತಿಚಿ ಸಮಸ್ಯಾ ಆನಿ ತಾಕಾ ರೆವ್ಡಲ್ಲಿಂ ಭಾರೀಕ್ ಭಾರೀಕ್ ಸುತಾಂ ಹೆ ಕವಿತೆದ್ವಾರಿಂ ಶಿಂವ್ಲ್ಯಾಂತ್ ಕವಿ ಟೋನಿ ಮೆಂಡೊನ್ಸಾನ್. ಸಭಾರ್ ಕಾಳಾಥಾವ್ನ್ ಪರ್ಗಾವಾಂತ್ ಆಸೊನ್ ದುಬಾಯ್ ಶೆರಾಚ್ಯೊ ಶಿರೇನ್ ಶಿರೊ ಪಾರ್ಕಿಲ್ಲೊ ಕವಿ, ಸಾದ್ಯಾ ಘರ್ ಕಾಮೆಲ್ಯಾಂಚಿ ಪರಿಗತ್ ಬರಿ ಜಾಣಾಂ. ತಾಂಕಾಂ ತೊ ಸಮ್ಜೊಂಕ್ ಸಕ್ಲಾ. ತ್ಯಾದೆಕುನ್ ತಾಂಚೆವಿಶಿಂ ತಾಣೆ ಹಿ ಕವಿತಾ ಬರಯ್ಲ್ಯಾ ಜಾಂವ್ಕ್ ಪುರೊ.
ಉತ್ರಾಂ ಸೊಭಿತ್ ಕರುನ್ ವ್ಹಾಳ್ಳ್ಯಾಂತ್ ಹೆ ಕವಿತೆಂತ್. ಪುಣ್ ಠರಾವಣ್ ತೆಂಚ್ ಆದ್ಲೆಂ ಜಾಲ್ಲ್ಯಾನ್ ವಾಚ್ತಲ್ಯಾಕ್ ನಿರಾಶಾ ಭೊಗುಂಕ್ ಪುರೊ. ಪುಣ್ ಕವಿಚೊ ಸಂಸಾರ್ ಜಾಣಾ ಜಾಲ್ಲ್ಯಾಂಕ್ ಹಾಚಿಂ ಕಾರಣಾಂ ಸಲೀಸಾಯೆನ್ ಕಳೀತ್ ಜಾವ್ನ್, ಹಿ ಕವಿತಾ ಆಪ್ಣಾಂವ್ಚಿ ತಾಕತ್ ಆಪಾಪಿಂಚ್ ಯೆತಲಿ ಮ್ಹಣ್ಚ್ಯಾಕ್ ದುಬಾವ್ ನಾ.
ಗಲ್ಫಾಂತ್ಲ್ಯಾ ಕೊಂಕ್ಣಿ ವಾವ್ರಾಕ್ ಸುರ್‍ವಾತ್ ಕೆಲ್ಲ್ಯಾ ಥೊಡ್ಯಾಚ್ ಮಾನೆಸ್ತಾಂ ಪಯ್ಕಿ ಟೋನಿ ಮೆಂಡೊನ್ಸಾ ಎಕ್ಲೊ ಆನಿ ಮುಕ್ಲೊ. ತಾಚೊ ಫಳ್ ಆಜ್ ಸಮೇಸ್ತ್ ಕೊಂಕಣಿ ಜನಾಂಗ್ ಆಜ್ ಭೊಗುನ್ ಆಸಾ. ತಾಚೆ ಅಸ್ವಸ್ತ್‌ಕಾಯೆಂತ್‌ಯ್ ಆಮ್ಕಾಂ ಕವಿತಾ ಬರವ್ನ್ ಧಾಡ್‌ಲ್ಲ್ಯಾ ತಾಕಾ ಆಮಿ ಋಣಿ
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನಿವ್ರಾಯ್ ದೊತಿ ದೆಣ್ಯಾಂಕ್
ಕೊಂಕಣಾಂತ್ಲ್ಯಾ ಕೊಂಕಣ್ ಬಾಳಾ, ಧಾಂವ್ತಾಯ್ ದುಬಾಯ್ ಶೆರಾ!
ಗೆಣಾ ಪೊಟಾಕ್, ಸಾರುಂಕ್ ಜೀವನ್, ಸಾಂಡುನ್ ಜನಮ್ ಘರಾ
ಪೆಲ್ಯಾ ಘರಾ ಘಸ್ಟೊ ಕಾಡ್ತಾಯ್; ಆಕ್ಲಾಸ್, ಹಾಯ್ ದೆವಾ ಸರ್ವೆಸ್ಪೊರಾ
ದುಬ್ಳಿ ಜಿಣಿ, ಚಿಂತಾಂ ಮನಿಂ ಆಟವ್ನ್ ತುಕಾ ಮಂಗ್ಳುರ್ ಶೆರಾ!
ದೊತಿಕ್ ಲಾಗೊನ್ ಬೊಂಬೈ ಯೆಣೆಂ, ಚಲಿಯೊ ಪರ್ಗಾಂವ್ ಭೊಂವಲಾಗ್ಲ್ಯೊ
ನಿಬಾಕ್ ಥೊಡೆ ಪಯ್ಶೆ ಧಾಡುನ್, ಆವಯ್ ಬಾಪಾಂಕ್ ಫಟಂವ್ಕ್ ಲಾಗ್ಲ್ಯೊ
ವ್ಹಡ್ಲಿಂ ಊಂಚಿ ಶಿಕ್ಪಾಂ ಜೊಡುನ್ ಹೊಗ್ಡಾಂವ್ಕ್ ಪಾವ್ಲ್ಯೊ ಮಾನ್ ಆಪ್ಲೊ -
ಬಾವ್ಡಿಂ ಸಭಾರ್ ಪಾಟಿಂ ಉರೊನ್, ದೊತಿ ದೆಣ್ಯಾಂಕ್ ಸೊವುಂಕ್ ಲಾಗ್ಲ್ಯೊ!
"ಕೊಂಕಣ್ ಮಾತಾ" ಆವಯ್ ಆಮ್ಚಿ, ಸವಾಲ್ ತುಕಾ ಕರಿ -
ಖಂಯ್ಸರ್ ಪಾವ್ಲಿಂ ಪ್ರೇಮಾಳ್ ಭುರ್ಗಿಂ, ಸುಖಾ ಸಂಪತೆಚಿಂ ನಾಂತ್ ಘರಾಣಿಂ
ಹಾ! ಕಠೋರ್ ಕಾಳ್ಜಾ, ನಿಷ್ಟುರ್ ಮನಾ, ಪುರ್ವಿಲೊ ಮಾನ್-ಗೌರವ್ ವಿಕುಂಕ್ ಲಾಗ್ಲಿಂ?
ಭಾವ್-ಬಂದ್ವಾಂಕ್ ಪಯ್ಸ್ ಲೊಟುನ್ ನಿಸ್ಕಳ್ಪಣಾ’ಪ್ಲೆಂ ಕಿತ್ಯಾಕ್ ಹೊಗ್ಡಾಂವ್ಕ್ ಪಾವ್ಲಿಂ?
ಮಾತಾ ರಾಕ್ತಾ ತುಕಾ, ಪಡ್ನಾಂಯ್ ನದ್ರೆಕ್ ತಿಚ್ಯಾ, ನಾ ಅಂತ್ಯ್ ತಿಚ್ಯಾ ಪ್ರೇಮಾಕ್
ಆಸ್ಕಾರ್ ಹುಸ್ಕಾರ್ ಸೊಡ್ತಾ, ಲಾಲೆವ್ನ್ ಪಾಲೆವ್ನ್ ಮಾಗ್ತಾ, ಗಳವ್ನ್ ದುಕಾಂ ಪುತ್ರಾಕ್
"ಹಾಯ್, ಮ್ಹಜ್ಯಾ ಸ್ವಾಧಿಕ್ ಸಾಳ್ಕಾ, ಘಡ್ಲೆಂ ಕಿತೆಂ ತುಕಾ?" ದುಕಿ ಉಮಾಳ್ ಶಿಜ್ತಾ
"ಎಕ್ಸುರ್ ಮ್ಹಾಕಾ ಸೊಡ್ತಾಯ್, ಭಾಲಿ ಹೃದಯಿಂ ತೊಪ್ತಾಯ್" ಕಾಳೀಜ್ ತಿಚೆಂ ಲಾಸ್ತಾ
ತುಂವೆಂ ತುಜ್ಯಾಚ್ ಕ್ಷಣಿಕ್ ಸುಖಾಕ್, ಅಪರಿಚಿತ್ ಪುರುಷಾಕ್ ವೆಂಗ್ಲೆಂಯ್
ಕಷ್ಟಾಂ ಜಿಣಿ ಆಟಯ್ನಾಸ್ತಾಂ, ಜಿಣ್ಯೆಮಣಿ ಗಳಯ್ನಾಸ್ತಾಂ, ಎವೆ! ಅತ್ಮ್ಯಾಕ್ ಕಿತ್ಯಾ ವಿಕ್ಲೆಂಯ್?
ಚೀಂತ್ ಭಯ್ಣಿ, ಲಿಪ್ಚಿನಾ ಕಾಣಿ - ಜಿವಿತ್ ದೆಖೊನ್ ಹಾಸ್ತಲೆ -
ಕಿಡೆ, ಶರೀರ್ ಭಕಾಯ್ತಾನಾ, ಅತ್ಮೊ ಝಡ್ತೆಕ್ ರಾವ್ತಾನಾ ದೆಂವ್ಚಾರ್ ಲಾಗಿಂ ಸರ್‍ತಲೆ
ತರ್ ಜಾಗ್ ಸಮಾಜೆ, ಫಾಂಕಯ್ ಉಜ್ವಾಡ್ ಆಮ್ಚ್ಯಾ ಗರೀಬ್ ಘರಾಣ್ಯಾಂಕ್
ಭಾಗಿ ಕರ್ ತುಂ ಆಮ್ಚ್ಯಾ ಚಲಿಯಾಂಕ್ ನಿವ್ರಾವ್ನ್ ಹ್ಯಾ ದೊತಿ ದೆಣ್ಯಾಂಕ್
ಮಾಲ್ದಿಸಾಂವ್ ಪಡೊಂ ಹ್ಯಾ ದಳ್ದಿರ್‌ಪಣಾಕ್, ಗೋಳ್ ಕರ್‍ಚ್ಯಾ ದೊತಿ ರಿವಾಜಿಂಕ್
ಗರಿಬಾ ಘೊಂಟೆರ್ ಸುಖಾ ಫಾಂಟೆರ್ ಧಲಯ್ ಕೊಂಕಣಾಕ್ ತುಜ್ಯಾ ಗೊಪಾಂತ್!
-ಟೊನಿ ಮೆಂಡೊನ್ಸಾ, ನಿಡ್ಡೋಡಿ (ದುಬಾಯ್)