ಸಂಪಾದಕೀಯ್:
ತರ್ನಾಟ್ಪಣಾಚ್ಯಾ ದಾಂಡಾಕ್ ಕಸಲೀಂಯ್ ಕಾಟಿಂ ಕೊಸಾಳ್ತಾತ್
ತರ್ನಾಟ್ಪಣ್ ತಶೆಂಚ್! ತರ್ನಾಟ್ಪಣಾಚ್ಯಾ ದಾಂಡಾಕ್ (ಫೊರ್‍ಸಾಕ್) ಕನ್ನಂಬಾಡಿ ಉದ್ಕಾಕಾಟಿಂ ಲೆಗುನ್ ಉರನಾಂತ್, ಕೊಸಾಳ್ತಾತ್. ಹಾಂಗಾಸರ್ ಕಸಲ್ಯೋಯ್ ಆಲ್ಸಾಂದೆಚ್ಯೊ ಸಾಂಗೊ ಸುಶೆಗಾನ್ ಝಾಡಾರ್ ಉರನಾಂತ್, ಫುಟೊನ್ ಉಸಳ್ತಾತ್. ತಶೆಂಚ್ ಘಡ್ಲಾಂ ಹೆ ಕವಿತೆಂತ್ಲ್ಯಾ ಪುತಾಕ್! ತಾಚಿ ಪಿಡಾ ಸಹಜ್ ತಿ. ಸಂಸಾರಾಚ್ಯಾ ನೆಮಾಂ ಪ್ರಕಾರ್ ಕಾಂಯ್ ನವಿ ನ್ಹಯ್. ಪುಣ್ ತೆ ಪಿಡೆವರ್‍ವಿಂ ತೊ ಆಪ್ಲ್ಯಾ ಬಾಪಾಯ್ಚೆಂ ನಾಕ್ ಲೆಂವ್ತಾನಾ ಮಾತ್ರ್ ಗಳ್ಯಾಲಾಗಿಂ ಹೆ ಪಿಡೆಚೊ ಕಾಂಟಾಳೊ ಖೊಟಾಯಿಲ್ಲೆಬರಿ ಜಾತಾ.
ಓಸ್ಟಿನ್ ಪ್ರಭುಕ್ ಕವಿತಾ ಬರಯ್ತಾನಾ ಉತ್ರಾಂ ಸರಾಗ್ ವ್ಹಾಳ್ತಾತ್. ಉತ್ರಾಂಚೆ ಮಾಂಡಾವಳಿಚೆಂ ಮಾಪ್ ಚಡುಣೆ ಆಸ್‌ಲ್ಲೆಂ ಝಳ್ಕನಾ. ತಿ ತಾಚಿ ವ್ಹಡ್ವಿಕಾಯ್. ಪುಣ್ ಹಿ ವ್ಹಡ್ವಿಕಾಯ್ ಘೆವ್ನ್ ಅಪ್ರೂಪ್, ’ಸೆನ್ಸೇಶನಲ್’ ವಿಷಯಾಂಚೆರ್ ತಾಣೆ ಕವಿತಾ ವಿಣ್ಲ್ಯೊ ಜಾಲ್ಯಾರ್ ಕಾಂಯ್ ಕೊಂಕಣಿಚ್ಯಾ ಮೊಳ್ಬಾರ್ ತಾಚೆಂ ಥೋರ್ ನಾಂವ್ ಆನಿಕ್‌ಯ್ ಬಳ್ವಂತ್ ಥಾರ್‍ತಲೆಂ ಮ್ಹಣ್ತಾಂ ಹಾಂವ್.
ಓಸ್ಟಿನಾಚಿ ಸಭಾರ್ ವರ್‍ಸಾಂ ಆದ್ಲಿ ಹುಮೆದ್ ಜಿವಾಳ್ ಜಾಲ್ಯಾ ಖರಿ. ಹೆ ಹುಮೆದಿಕ್ ತೆಕಿದ್ ಗರ್ಜೆಚೊ ಭೊಂವಾರ್ ತಾಕಾ ಲಾಭ್ಲಾ ಸಾಂಗೊಂಕ್ ಜಾಯ್ನಾ. ಹ್ಯಾ ಉಣೆಪಣಾಂತ್‌ಯ್ ಆಪ್ಣಾಕ್ ಉಬಾಳ್ ದವರ್‍ಚೆಂ ತಾಚೆಂ ಪ್ರೇತನ್ ಶಾಭಾಸ್ಕೆಚೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜೊ ಪೂತ್
ಚೆಡ್ವಾಕ್ ಪಳೆವ್ನ್ ಲಾಗ್‌ಲ್ಲೊ ದೆಂವ್ಚಾರ್
ಸೊಡಂವ್ಚೊ ಕಸೊ ಸಮ್ಜನಾ
ಪಕ್ಷಿಕೆರೆ ನೊವೆನಾಕ್ ವೆಲೆಂ ತರೀ
ತೊ ಸುಟೊಂಕ್‌ಚ್ ಆಯ್ಕನಾ!
ರಾತ್ ಆನಿ ದೀಸ್ ಹೊ ಚಲೊ
ಚಲಿಯೆಕ್‌ಚ್ ನ್ಹಯ್‌ಗಿ ಸ್ವಪ್ಣೆತಾ
ರಾತಿಂ ಪರ್ಯಾಂತ್ ನಿದ್ಲೊ ತೆನ್ನಾಂ
ತಾಚೆ ಸಂಗಿಂಚ್ ತೊ ಉಪ್ಯೆತಾ
ಪೋಯ್ರ್ ಆಮ್ಗೆರ್ ಸಯ್ರಿಂ ಆಯ್ಲಿಂ
ಸಗ್ಳಿಂ ಸಾಲಾಂತ್ ನಿದ್‌ಲ್ಲ್ಯಾಂವ್
ಲಾಗಿಂ ಲಾಗಿಂಚ್ ಉಶಿಂ ದವ್ರುನ್
ಸ್ವಪ್ಣಾ-ಲೊಕಾಕ್ ತೆಂಕ್‌ಲ್ಲ್ಯಾಂವ್
ಫಾಂತ್ಯಾಚಿಂ ವ್ಹಾಜ್ಲಿಂ ಸಾಡೆ ಬಾರಾ
ತಾಣೆಂ ಮ್ಹಾಕಾ ಪೊಟ್ಲುನ್ ಧರ್ತಾನಾ
ಐ ಲವ್ ಯೂ ಮ್ಹಣೊನ್ ಮ್ಹಜೆಂ
ನಾಕ್ ಸಗ್ಳೆಂಚ್ ಲೆಂವ್ತಾನಾ
ಕುಚುಲ್ಯೊ ಜಾವ್ನ್ ಶಿಂಕ್ ಆಯ್ಲಿ
ದೊಗಾಂಯ್ಚೆ ಮಾಂಡ್ಡೆ ಆಪ್ಟಾಲೆ
ಪೂತ್ ಸಗ್ಳೊಚ್ ಶಿರಿಂ ಚುಕ್ಲೊ
ಸಯ್ರೆ ಉಟೊನ್ ತೆ ಹಾಸ್ತಾಲೆ
ಚೆಡ್ಯಾಕ್ ಹ್ಯಾ ಕರ್‍ಯಾಂ ಕಿತೆಂ
ಮ್ಹಾಕಾ ಕಿತೆಂಚ್ ಸುಸ್ತನಾ
ಸ್ವಪ್ಣಾಂತ್ ಪರ್ಯಾಂತ್ ತಾಕಾ ಚಿಂತುನ್
ಹೊ ಮ್ಹಜೆ ಕುಶಿಕ್ ಘುಸ್ತಾನಾ
ಚಿಂತ್ಲೆಂ ಹಾಂವೆಂ ತಿ ಪತಿಣ್ ಮ್ಹಣೊನ್
ತಾಣೆಂ ಪಯ್ಲೆಂ ಪೊಟ್ಲುನ್ ಧರ್ತಾನಾ
ಉಪ್ರಾಂತ್ ನ್ಹಯ್‌ಗಿ ಕಳ್ಳೆಂ ಮ್ಹಾಕಾ
ತಾಚೆಂ ಖಾಡ್ ನಾಕಾಂತ್ ರಿಗ್ತಾನಾ!
ಓಸ್ಟಿನ್ ಪ್ರಭು, ಚಿಕಾಗೊ