ಸಂಪಾದಕೀಯ್:
ಕಾಳ್ಯಾಂಕ್ ರೊಂಟಾಂ ಮಾತ್ರ್ ಕಿತ್ಯಾಕ್ ಮ್ಹಳ್ಳಿಂ ಝಾಂಟಾಂ
ಕಾತಿಚೆರ್ ಆನಿ ಜಾತಿಚೆರ್ ಹೊಂದೊನ್ ಸಮಾಜೆಚೆ ವರ್ಗ್ ಸಗ್ಳ್ಯಾ ಸಂಸಾರಾಂತ್ ಆಸಾತ್. ಬಾಮ್ಣಾಂಕ್ ದೆವ್ಳಾಂನಿ ಫುಗ್ ಘಾಲ್ಲಿ ಪೊಳಿ ಮೆಳ್ತಾನಾ, ಸುದ್ರಾಂಕ್ ಫುಗ್ ಘಾಲ್ನಾತ್‌ಲ್ಲಿಂ ರೊಂಟಾಂ ಮಾತ್ರ್ ಮೆಳ್ಚೊ ಕಾಳ್ ಆದಿಂ ಆಸ್‌ಲ್ಲೊ. ಹಿ ರಿವಾಜ್ ಆತಾಂಯ್ ಕಾಂಯ್ ಜಾಗ್ಯಾಂನಿ ಚಾಲು ಆಸಾ. ಯೆರೊಪಾಂತ್, ಆಮೇರಿಕಾಂತ್ ಕಾತಿಚೆರ್ ಹೊಂದೊನ್ ಜಾಯ್ತೆ ರಾಜಕೀಯ್ ನಿಚೆವ್ ಆಜೂನ್ ಧಾರಾಳ್ ಮಾಪಾನ್ ಜಾತಾತ್. ಅಸಲ್ಯಾ ಎಕಾ ಅಂತರ್ರಾಷ್ಟ್ರೀಯ್ ಸಮಸ್ಯಾಚೆರ್ ಹಾಂಗಾಸರ್ ಏಕ್ ಕವಿತಾ ಸಾದರ್ ಜಾಲ್ಯಾ.
ಹೆ ಕವಿತೆಂತ್ ಕಾತಿಚ್ಯಾ ರಂಗಾಚೆರ್ ಹೊಂದೊನ್ ಉಬ್ಜಾಲ್ಲ್ಯಾ ಸಮಸ್ಯಾಂಚೆರ್ ಸವಾಲಾಂಚಿ ಶಿಂಕಳ್‌ಚ್ ಪೇಶ್ ಜಾಲ್ಯಾ. ಪುಣ್ ಜಾಪಿ ಆಶೆಂವ್ಚ್ಯಾ ನಾಯಕಾನ್, ಜಾಪಿ ಕೆದಳಾಯ್ ದೀನಾ ಮ್ಹಣೊನ್ ಜಾಣಾಸ್‌ಲ್ಲ್ಯಾ ದೆವಾಲಾಗಿಂ ಕಿತ್ಯಾಕ್‌ಗಾಯ್ ಸವಾಲಾಂ ವಿಚಾರ್‍ಚಿಂ? ಕಾಂಯ್ ಹ್ಯಾ ಸವಾಲಾಂಕ್ ಪರ್‍ಯಾರ್ ನಾ ಮ್ಹಳ್ಳಿ ಗ್ಯಾರಂಟಿ ತಾಕಾ ಆಸಾ ಕಿತೆಂ?
ಜೆರಿ ಡಿ'ಮೆಲ್ಲೊನ್ ಆಪ್ಲೆ ಕವಿತೆಕ್ ವಿಂಚ್‌ಲ್ಲೊ ವಿಷಯ್ ಕಾಂಯ್ ನವೊ ನ್ಹಯ್. ಪುಣ್ ತೊ ಸಾದರ್ ಕೆಲ್ಲಿ ರೀತ್ ಮಾತ್ರ್ ವೆಗ್ಳಿ. ತಾಚೆಲಾಗಿಂ ಉತ್ರಾಂಚಿ ತುರ್ಪಣ್‌ಕಾಯ್ ಕುಸ್ಕುಟ್ ಆಸ್ಚಿ ಝಳ್ಕನಾ.
ಅಸಲಿ ಗಿರೇಸ್ತ್‌ಕಾಯ್ ಆಪ್ಣಾಯಿಲ್ಲ್ಯಾ ಕವಿನ್ ಉಂಚ್ಲೆ ವಿಷಯ್ ಬಗ್ಲೆಕ್ ಘೆವ್ನ್ ಪರ್‍ತ್ಯಾನ್ ಕವಿತಾ ಕುಳಾರಾಕ್ ಯೇಜಾಯ್ ಮ್ಹಣೊನ್ ಆಮ್ಚಿ ಆಶಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನಾ ಕಾಳೊ...ನಾ ಗೊರೊ...!
ಏ ದೆವಾ.. ಏ ರಚ್ನಾರಾ ..
ಮನ್ಶಾಕ್ ತುಂವೆಂ ರಚ್ಲೊಯ್
ಸಾರ್ಕ್ಯಾಚೊ ತುಜ್ಯಾ ಕೆಲೊಯ್
ಸುರ್ಪಾಯೆನ್ ತಾಕಾ ನೆಟಯ್ಲೊಯ್
ಸಾಂಗ್ ಮ್ಹಾಕಾ ಸಾಂಗ್...
ಕಿತ್ಯಾಕ್ ಕೆಲೊಯ್ ಎಕ್ಲ್ಯಾಕ್
ಕಾಜ಼ಳಾ ಸಾರ್‍ಕೊ ಕಾಳೊ...ಕಾಳೊ...
ದುಸ್ರೊ ಜಾಲೊ ದುಧಾ ಬರಿ ಗೊರೊ...ಗೊರೊ...
ಸಾಂಗ್ ರಚ್ನಾರಾ... ಉಚಾರ್ ಆತಾಂ...
ಗೊರೆ ಕಾತಿಚ್ಯಾ ಮನ್ಶಾ ಜಾತಿನ್
ಬೆಸಾಂವಾಂಚೆಂ ಭಂಡಾರ್ ಜೊಡ್ಲಾಂ...?
ಭಾಂಗ್ರಾ ಶೆತಾಂತ್ ರಶೀಮ್ ಪಿಕಯ್ಲಾಂ...?
ಗೊರ್‍ಯಾ ಗಾಲ್-ಮಿಶ್ಯಾಂಚ್ಯಾ ಸಾಯ್ಬಾ ಮುಕಾರ್
ಮಾನಾಚೊ ಗಾಜ್, ವ್ಹಡ್ ನಮಸ್ಕಾರ್
ಸರ್‍ದಾರಾಂಚೊ ಸಲಾಮ್ ತಾಕಾ ಹೆ ಧರ್ತೆರ್
ಆನಿ ಸಂಸಾರ್‌ಚ್ ತಾಂಚೆ ಮುಟಿ ಭಿತರ್...
ಗೊರಿ ಚಲಿ ಜಾಲಿ ಪಾಶಾರ್
ಪಡ್ತಾ ತಾಚೆರ್ ಆಬ್ಲೆಶಿ ನದರ್
ಗೊರೆ ಕಾತಿರ್ ಪಡ್ತಾತ್ ಮೊಗಾರ್
ಆಸಾತ್ ಚಲೆ ಪಾಟ್ಲ್ಯಾನ್ ಸಭಾರ್!
ಸಾಂಗ್ ಈಶ್ವರಾ... ಸಾಂಗ್ ಮ್ಹಾಕಾ...
ಕಾಳೆ ಕಾತಿಚ್ಯಾ ಕಾಂಟೆರ್‍ಯಾಂನಿ
ಚೊಬ್ಕೊ ಮಾಸ್ ತುಜೆಂ ಖೆಲಾಂ...?
ಗಾಲಾರ್ ತುಜ್ಯಾ ಕೆಸೊಳಿ ಫುಟಯ್ಲ್ಯಾ...?
ಕಿತ್ಯಾಕ್ ಮಾಲ್ದಿಸಾಂವ್ ತಾಚೆ ತಕ್ಲೆರ್?
ಕಾಳೊ ಛಾರೊ... ನಾ ತಾಕಾ ಥಾರೊ...
ಸದಾಂ ಸರ್ವದಾಂ ಕಷ್ಟಾಂಚೊ ಭೊರೊ
ಸತೆವಂತ್ ಸಾದೊ-ಭೊಳೊ ನವ್ಕರ್
ಗೊರ್‍ಯಾ ಸಾಯ್ಬಾಚೊ ಗುಲಾಮ್ ಚಾಕೊರ್...
ಜಲ್ಮಲ್ಲೆಂ ಬಾಳ್ ಸಾವ್ಳೆಂ ತರ್
ಜಲ್ಮ್ ದಿಲ್ಲ್ಯಾಂಚಿ ಮತ್ ವಿರ್‍ಯಾರ್
ದೀಷ್ಟ್ ಪಡ್ಚಿನಾ ಚಲ್ಯಾಚಿ ಕಾಜ್ರಾ ರಂಗಾರ್
ಆಕೇರ್ ಪರ್‍ಯಾಂತ್ ಉರಯ್ಲೆಂ ಆಂಕ್ವಾರ್...
ವ್ಹಯ್ ಪರಮೇಶ್ವರಾ... ಖರೆಂಚ್ ವ್ಹಯ್...
ಕಾತಿ ಪೊಂದ್ಲೊ ರಂಗ್ ಸರ್‍ವಾಂಕ್
ದಿಲೊಯ್ ತುಂವೆಂ ತಾಂಬ್ಡೊ ಖರೊ...
ತರೀ ಕಾತಿ ವಯ್ಲ್ಯಾ ರಂಗಾನ್
ಮನ್ಶಾ ಮಧೆಂ ಘಾಲ್ಯೊ ಮೆರೊ...
ಸಾಂಗ್ ಧನ್ಯಾ... ಸಾಂಗ್...
ತುಜೊ ರಂಗ್ ಖಂಯ್ಚೊ...?
ಪುಣ್ ಹೆಂ ಏಕ್ ಸತ್! ಅಪುಟ್ ಸತ್!!
ರಂಗ್ ಖಂಡಿತ್ ಜಾಂವ್ಚೊನಾ ತುಜೊ...
ನಾ ಕಾಳೊ...!!! ನಾ ಗೊರೊ...!!!
- ಜೆರಿ ಡಿ'ಮೆಲ್ಲೊ, ಬೆಂದುರ್