ಸಂಪಾದಕೀಯ್:
ಮೊಗಾಳ್ ಮನೀಸ್ ಮರ್‍ತಾನಾ ಕಾಳೀಜ್ ಕಳ್ವಳ್ತಾ ಆನಿ ಕವಿತಾ ಫುಲ್ತಾ
ಆಪ್ಣಾಚ್ಯಾ ಖಾಸ್ ಎಕಾ ಮನ್ಶಾಚೊ ಉಡಾಸ್ ಕಾಡುನ್ ಕವಿನ್ ಹಿ ಕವಿತಾ ರಚ್ಲ್ಯಾ. ದೆವಾಧಿನ್ ಮೇನಿ ಪಿಂಟೊಚಿ ವೊಳಕ್ ಕೊಡಿಯಾಳ್ ಶೆರಾಭಿತರ್ ವಸ್ತಿ ಕೆಲ್ಲ್ಯಾಂಕ್ ಪ್ರತ್ಯೇಕ್ ಜಾವ್ನ್ ಸಾಂ. ಲುವಿಸ್ ಕೊಲೆಜಿಂತ್ ಶಿಕ್‌ಲ್ಲ್ಯಾಂಕ್ ಆಸ್ತಲಿಚ್. ತಿತ್ಲೆಂ ಮಾತ್ರ್ ನ್ಹಯ್, ಸಂಗೀತ್ ಆಪ್ಣಾಚೊ ಮೋಗ್ ಮ್ಹಣೊನ್ ಕೊಣೆ ವೊಳ್ಕುನ್ ಘೆತ್ಲಾಂ ತಾಂಕಾಂ ಹೆ ವೆಕ್ತಿಚಿ ವೊಳಕ್ ನಾಸ್ತಾಂ ವೆಚಿನಾ. ತಿತ್ಲೋಯ್ ಏಕ್ ಫಾಮಾದ್ ಆಸ್‌ಲ್ಲೆ ವೆಕ್ತಿಚೆಂ ದೇಹಾಂತ್ಯ್ ಜಾತಾನಾ ಕಳ್ವಳ್‌ಲ್ಲ್ಯಾ ಕವಿಚ್ಯಾ ಪಾನಾಚೆರ್ ಹಿಂ ಉತ್ರಾಂ ವ್ಹಾಳ್ಳ್ಯಾಂತ್.
ಕವಿತಾ ವ್ಹಾಳ್ತಾನಾ ಮೇನಿ ಪಿಂಟೊಕ್ ಝಾಡಾಂಚೊ ಮೋಗ್ ಆಸ್‌ಲ್ಲೊ, ತೊ ಮ್ಹೊಂವ್ ಕಾಡ್ತಾಲೊ ಮ್ಹಳ್ಳೇಂಯ್ ಕವಿನ್ ಸಾಂಗ್ಲಾಂ. ಸಗ್ಳೆ ಕವಿತೆಂತ್ ದೇವ್ ದುತಾಂನಿ ಸಂಸಾರಾಕ್ ದೆಂವೊನ್ ತಾಚೆಚ್ ಭಾಗಿಂತ್ಲಿಂ ಫುಲಾಂ ಖುಂಟುನ್ ಸರ್ಗಾದಾರಾರ್ ತಾಕಾ ರಾಕ್ಚಿ ಪ್ರತಿಮಾ ಮಾತ್ರ್ ಭೋವ್‌ಚ್ ಸೊಭಿತ್ ಕರುನ್ ಕವಿನ್ ರಚ್ಲ್ಯಾ.
ಜೊಸ್ಸಿ ಬಜ್ಜೋಡಿ ವಿಶೇಸ್ ಹುಮೆದಿಚೊ ಕವಿ. ತಾಚೆಲಾಗಿಂ ಠರಾವಣೆಂಕ್ ಬೊರ್‍ಗೊಳ್ ನಾ. ಉತ್ರಾಂಕ್‌ಯ್ ಉಣೆಪಣ್ ನಾ. ಪುಣ್ ಖಂಯ್‌ಕಿ ಉತ್ರಾಂ ಗರ್ಜೆಚ್ಯಾ ಜಾಗ್ಯಾಂನಿ ಬಸನಾಸ್ತಾಂ, ಕವಿತೆಚೊ ವ್ಹಾಳೊ ತುಟ್‌ಲ್ಲ್ಯಾಬರಿ ಝಳ್ಕತಾ. ಸರಾಗ್ ತೊ ಬರವ್ನ್ ಗೆಲೊ ಜಾಲ್ಯಾರ್ ಹ್ಯಾ ಉಣೆಪಣಾಂತ್ಲೇಂಯ್ ತೊ ಉತ್ರೊನ್ ವೆತಲೊ ಮ್ಹಳ್ಳೆಂ ಖಂಡಿತ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೆವಾಧಿನ್ ಮೇನಿ ಪಿಂಟೊಚೊ ಉಡಾಸ್ ಕಾಡುನ್
ವಾದಾಳ್ ಖಂಯ್ ಥಾವ್ನ್ ವ್ಹಾಳ್ತಾ
ಚೊರಿಯಾಂ ಆಪ್ಲೊ ಇರಾದೊ ಕಳಯ್ನಾಸ್ತಾಂ
ನದ್ರೆಕ್ ದಿಸನಾ, ಆಪ್ಡುಂಕ್ ಮೆಳನಾ
ಚೊರಿಯಾಂ ಪುಸುನ್ ವ್ಹರ್‍ತಾಂ ವಿಚಾರ್‍ನಾಸ್ತಾಂ
ವ್ಹಾಳ್ಳೆಂ ವಾದಾಳ್ ವ್ಹಡ್ ರಭಸಾನ್
ಧುಳಿಂತ್ ರಚ್‌ಲ್ಲ್ಯಾ ಮಂದಿರಾಕ್ ಆಪ್ಟಾಲೆಂ
ಖಿಣಾನ್ ಮಂದಿರ್ ಕೊಸಾಳ್ಳೆಂ
ದೆಖ್ತಾಂ ಕಾಳೀಜ್ ಕಡ್ಲೆಂ
ಸಗ್ಳೆಂ ತಿಂಗಾ ಸಂಪ್ಲೆಂ
ಆಜ್ ನ್ಹಯ್ ಫಾಲ್ಯಾಂ ತೆಂ ಕೊಸ್ಳೊಂಚೆಂಚ್
ಧುಳಿಚೆಂ ತೆಂ ಧುಳಿಕ್ ವೆಚೆಂಚ್
ಇತ್ಲ್ಯಾ ವೆಗಿಂ ಸಂಪೊತ್ ಮ್ಹಣ್
ಚಿಂತ್ಲಾಂ ತರೀ ಕೊಣೆಂ
ಹೆಂ ದೆವಾಚೆಂಚ್ ನಿರ್ಮೊಣೆಂ
ತುಜಿಂ ಥೊಡಿಂ ತಾಲೆಂತಾಂ
ಸೊಡ್ನ್ ಗೆಲಾಯ್ ಹ್ಯಾ ಭುಂಯ್ ಥಳಾರ್
ತಾಚೊ ಆಮಿ ಉಡಾಸ್ ಕಾಡ್ತಾನಾ
ತುಂ ಸುಮಧುರ್ ಸಂಗೀತಾಚಿ ಝರ್
ತಿ ಹಾಂಗಾ ಸುಕ್ತಾನಾ
ತೆ ಮೂಸ್‌ಯ್ ರುಪ್ಣೆಂ ತುಜೆಂ ಸೊಧ್ತಾನಾ
ತಿಂ ಝಾಡಾಂಯ್ ಖಂತ್ ಕಾಡ್ತಾನಾ
ಹೆಂ ದೆಖ್ತಾಂ ಸೊಸುಂಕ್ ಜಾಯ್ನಾ
ಸರ್ಗಿಂ ಥಾವ್ನ್ ದೂತ್ ಥೊಡೆ
ಭುಂಯ್ ಥಳಾಕ್ ದೆಂವ್ಲ್ಯಾತ್
ತುಜೆಚ್ ಭಾಗಿಂತ್ಲಿಂ
ಫುಲಾಂ ಖುಂಟುಂಕ್ ಲಾಗ್ಲ್ಯಾತ್
ತಿಂ ಗುಂತುನ್ ಸರ್ಗಿಂ ದಾರ್‍ವಟ್ಯಾರ್
ತುಕಾ ಸ್ವಾಗತ್ ಕರುಂಕ್ ರಾವ್ಲ್ಯಾತ್
ತುಜ್ಯಾ ಹ್ಯಾ ಮರ್‍ಣಾನಿಮ್ತಿಂ
ಹಿಂಗಾ ವ್ಹಾಳ್ತಾ ದುಕಾಂ ವ್ಹಾಳೊ
ಸರ್ಗಿಂ ವ್ಹಾಜ್ಚ್ಯಾ ತುರ್ಬೆಂತಾಚ್ಯಾ ಆವಾಜಾನ್
ಸಂಸಾರ್ ಸಗ್ಳೊ ಹಾಲ್ತಲೊ
- ಜೊಸ್ಸಿ ಬಜ್ಜೋಡಿ