ಸಂಪಾದಕೀಯ್:
ದೆವ್ಳಾಂತ್ಲ್ಯಾ ಪಾರ್ವ್ಯಾಂಚಿಂ ದುಕಾಂ ಪಾರ್ಕಿಲ್ಲೊ ಕವಿ
ಕಿರಿಸ್ತಾಂವಾಂಚ್ಯಾ ದೆವ್ಳಾಚೆರ್ 'ಎಕ್ಸ್‌ರೇ' ದೀಷ್ಟ್ ಚರಂವ್ಚಿ ಹಿ ಕವಿತಾ; ಥಂಯ್ಚ್ಯಾ ದೆವಾಚೆರ್, ಥಂಯ್ಚ್ಯಾ ಸಾಂತಾಂಚೆರ್, ಥಂಯ್ಚ್ಯಾ ಸಾಯ್ಬಿಣಿಂಚೆರ್ ನದರ್ ಮಾರ್‍ತಾ ನ್ಹಯ್ ಮುಕಾರ್ ವಚೊನ್ ದೆವಾಚ್ಯಾ ಮೊಗಾನ್ ಮನ್ಶಾನ್ ಕರ್‍ಚಿಂ ಅತರ್ವಣಾಂ ಜಾಯ್ರ್ ಕರ್‍ತಾ. ಹೆ ಸಗ್ಳೆ ಮನ್ಶಾಖೆಳ್ ನಿಷ್ಪಾಪಿ ಪಾರ್ವೆ ವರ್ಸಾಂ ವರ್ಸಾಂ ಥಾವ್ನ್ ದೆಖೊನ್, ರಡ್ಚಿ ಪ್ರತಿಮಾ ಹಾಂಗಾಸರ್ ವಿಶೇಸ್ ಸೊಭ್ ದಿತಾ.
ಕಿರಿಸ್ತಾಂವಾಂಚಿ ಕವಿತಾ ದೆಕುನ್ ಕಿರಿಸ್ತಾಂವ್ ನ್ಹಯ್ ಆಸ್‌ಲ್ಲ್ಯಾಂಕ್ ಹೆ ಕವಿತೆಚೆರ್ ತಿತ್ಲಿ ಏಕ್ ವೋಡ್ ಯೆಂವ್ಚಿನಾ. ತೆಂ ಸಹಜ್. ಪುಣ್ ಹೆರಾಂಕ್ ಎಕಾ ಅಪ್ರೂಪ್ ಠರಾವಣೆಖಾತೀರ್ ಹಿ ಕವಿತಾ ಪೊಟ್ಲುನ್ ಧರುಂಕ್ ಪುರೊ. ಠರಾವಣ್ ಇತ್ಲಿ ಅಪ್ರೂಪ್, ಸೊಭಿತ್ ಜಾವ್ನ್‌ಯ್, ಗರ್ಜ್ ಆಸ್ಚೆಭಾಶೆನ್ ತಾಚಿ ಪಿಂತ್ರಾವ್ಣಿ ಹಾಂಗಾಸರ್ ಜಾಲ್ಲಿ ಝಳ್ಕನಾ. ಕಾಂಯ್ ಕವಿನ್ ಆಮ್ಸರ್ ಕೆಲಾ ಮ್ಹಳ್ಳೆಬರಿ ದಿಸ್ತಾ. ನಾಂತರ್ ಹೆ ಕವಿತೆಚೊ ಚಮತ್ಕಾರ್ ವೆಗ್ಳೊಚ್ ಆಸ್ತೊ.
ವಿನ್ಸಿ ಪಿಂಟೊ, ಆಂಜೆಲೊರ್ ಬಿಂದಾಸ್ ಕವಿ. ಆಸ್‌ಲ್ಲೆಂ ಆಸಾ ತಶೆಂ ಸಾಂಗ್ಚೆಂ ಧೈರ್ ತಾಚೆ ಕವಿತೆಂನಿ ಸಭಾರ್ ಪಾವ್ಟಿಂ ಝಳ್ಕೆಕ್ ಯೆತಾ. ಥೊಡೆಪಾವ್ಟಿಂ ಫಕತ್ ಹಾಶಾಂ ಖಾತೀರ್ ಬರಂವ್ಚೊ ತೊ, ಕಾಂಯ್ ಥೊಡೆಪಾವ್ಟಿಂ ವಿಡಂಬನಾತ್ಮಕ್ ರಿತಿನ್ ಬರಯ್ತಾ - ಜಶೆಂ ಹೆ ಕವಿತೆಂತ್ ತಾಣೆ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದೆವಾಚೆ ಪಾರ್ವೆ
ಆಮಿ ದೆವಾಳಾಂತ್ಲೆ ಪಾರ್ವೆ, ದೆವಾಕ್ ರಾಕ್ಚೆ ಭಡ್ವೆ
ದೆಕ್ತಾಂ ದೆಕ್ತಾಂ ಸದಾಂಚ್ ದೊಳೆ ದುಕಾಂನಿ ಪೊವ್ಲೆ
ಮ್ಹಜ್ಯಾ ದೆವಾಚೆಂ ಮಂದಿರ್ ಮೊಡುನ್
ಕೊರೊಡಾಚೆಂ ಮಾಗ್ಣ್ಯಾ ಸಾಲ್ ಕೆಲಾಂ
ತ್ಯಾಯಿ ಸಾಲಾಂತ್ ಮ್ಹಜ್ಯಾ ದೆವಾಕ್ ತುಮಿ ಖುರ್ಸಾಯ್ಲಾ
ಹರ್ ದಾರಾಂ ಬಗ್ಲೆಕ್ ತಾಚೆಂ "ಕ್ಲೊನಿಂಗ್" ಉಬಾರ್‍ಲಾಂ
ಮಿನಿನ್ ಜೆಜುಚ್ಯಾ ಮಸ್ತಕಾರ್ ಮುಕುಟ್ ಸಜ್ಲಾ
ತೊಚ್ ಸಾಂತ್ ಆಂತೊನಿಚ್ಯಾ ಹಾತಾರ್ ಬಸ್ಲಾ
ಮರಿಯೆ ಗೊಪಾಂತ್ ಬಾಳೊಕ್ ಜೆಜು ಖೆಳ್ತಾ
ತೊಚ್ ತಿಚ್ಯಾ ಉಸ್ಕ್ಯಾರ್ ನಿರ್ಜೀವ್ ನಿದ್ಲಾ
ಹ್ಯಾಯಿ ದೆವಾಳಾಂತ್, ಕಾಳೊಕಾಚ್ಯಾ ಭುಯಾರಾಂತ್
ಹರ್ ದಿಸಾ ತೊ ಎಕ್ಸುರೊ ಉರ್‍ತಾ
ಹಜಾರ್ ವರ್ಸಾಂ ಪುರ್ವಿಂ
ಸ್ಪಿರಿತಾ ವರ್ವಿಂ ಪುರ್ವಜ್ ತಾಚೆರ್ ದೆಂವ್ಲೆ
ಆಜ್ ಎಕ್ಸುರ್‍ಯಾ ತಾಕಾ ಆಮಿ ಪಾರ್ವೆ
ಸಾಂಗಾತ್ ದೀಂವ್ಕ್ ಪಾವ್ಲೆ
ಆಂಕ್ವಾರ್ ಚಲಿ, ಆಂಕ್ವಾರ್ ಮಾಯೆ ಮುಳಿಂ ಪಡ್ತಾ,
ಬೆಬ್ದೊ ಬಾವ್ಡೊ ಸಾಂ ಲೊರೆಸಾಲಾಗಿಂ ಝಗಡ್ತಾ
ಮಿನಿನ್‌ಜೆಜುಲಾಗಿಂ ದಾಕ್ಟೊ ಪಿಲೊ 'ಮನಿ' ಮಾಗ್ತಾ.
ತರ್ನಿ ಸ್ರೀ ಸದಾಂಚ್, ಸಾಂತಾಕ್ ಫ್ರೀ ಉಮೆ ವೊತ್ತಾ
ಸೊಂತಾಚ್ಯಾ ದಿಸಾ ವಿಶೇಸ್ ಸಾಂತ್ ಆಸಾ,
ಕಾಂತಾರಾಂ ಚೆಂ 'ಬೀಟ್ ಗ್ರೂಪ್', ಪುಲಾಂಚೆಂ 'ಬ್ಯಾಕ್ ಡ್ರೊಪ್'
ವಿವಿಧ್ ಆವಾಜ್ ಕರ್‍ಚಿಂ ಮೊಬಾಯ್ಲಾಂ,
'ಕ್ಯಾಟ್ ವೊಕ್' ಕರ್‍ಚಿ ಬಾಯ್ಲಾಂ
ಪಾದ್ರಿಚೊ ಬೆಸಾಂವಾಚೊ ಮಾನ್, ಉಪ್ರಾಂತ್ ಮಾಗ್ಚೆಂ ದಾನ್
ದೆಖೊನ್ ದೇವ್ ಸದಾಂಚ್ ರಡ್ತಾ
ಹ್ಯಾಯಿ ಶೆರಾಂತ್, ಮ್ಹಜ್ಯಾ ದೆವಾಚ್ಯಾ ಘರಾಂತ್,
ಸದಾಂಚ್ ದುಡ್ವಾಚೆಂ ಏಲಮ್ ಆಸ್ತಾ
ಹಾಕಾ ಲಾಗೊನ್ ತೊ ಹರ್ ವರ್ಸಾ ಜಲ್ಮತಾ ಮೊರ್‍ತಾ
ಉಪ್ರಾಂತ್ ಜಿವಂತ್ ಜಾವ್ನ್ ಸರ್ಗಾರ್ ಚಡ್ತಾ
-ವಿನ್ಸಿ ಪಿಂಟೊ, ಆಂಜೆಲೊರ್.