ಸಂಪಾದಕೀಯ್:
ಪನ್ನಾಸ್ ವರ್ಸಾಂಥಾವ್ನ್ ಹಾಸವ್ನ್ ಆಯಿಲ್ಲಿ ಕವಿತಾ
ಹಾಸ್ಯ್ ಕವಿತಾ ಬರಯ್ತಲೆ ಬೋವ್ ಉಣೆ ಝಳ್ಕತಾತ್. ಕವಿ ಸಿಜ್ಯೆಸಾಚ್ಯಾ ಕಾವ್ಯಾಂನಿ ಹಾಸ್ಯ್ ಆಸಾ ತರೀ, ತಾಂತುಂ ವಿಡಂಬನ್ ಭರೊನ್ ವೊಮ್ತಾತಾ. ಪುಣ್ ಫಕತ್ ಹಾಸ್ಯಾಖಾತೀರ್ ಜರ್ ಶೆಂಭರಾಂ ವಯ್ರ್ ಕವಿತಾ ಬರಯಿಲ್ಲೊ ಕವಿ ಕೊಂಕಣಿಂತ್ ಆಸಾ ಜಾಲ್ಯಾರ್ ತೊ ದೆವಾಧಿನ್ ಯಾಜಕ್ ಪಾವ್ಲ್ ಲುವಿಸ್ ಬೊತೆಲ್. ತಾಕಾ ಕೊಂಕಣಿ ಕಾವ್ಯಸಂಸಾರ್ ಪಿ.ಎಲ್.ಬಿ. ಮ್ಹಣೊನ್‌ಚ್ ವೊಳ್ಕತಾ. ತೆಂಚ್ ತಾಚೆಂ ಕಾವ್ಯನಾಂವ್.
ಕಾಂಯ್ ೧೯೩೩ ಇಸ್ವೆಥಾವ್ನ್ ಸತ್ತೀಸ್ ವರ್ಸಾಂ ಪರ್‍ಯಾಂತ್ ಪಿ.ಎಲ್.ಬಿ. ನ್ 'ದಿರ್ವೆಂ', 'ರಾಕ್ಣೊ', 'ಆಂಜ್' ಆನಿ 'ಮಿತ್ರ್' ಪತ್ರಾಂನಿ ಥರಾವಳ್ ಠರಾವಣೆಂಚೆರ್ ಹಾಸ್ಯ್ ಕವಿತಾ ಬರಯ್ಲ್ಯಾತ್. ತಾಚ್ಯಾ 'ಕಾವ್ಯಾಂ ಝೆಲೊ' ಪುಸ್ತಕಾಚೆ ದೋನ್ ಛಾಪೆ ಆಯ್ಲ್ಯಾತ್. ಕ್ರಿಸ್ತಾಂವ್ ಲೊಕಾನ್ ಆಜೂನ್ ಗಾಂವ್ಚೆಂ 'ದೇವ್ ಆಮ್ಕಾಂ ಜಾಯ್ ಆಂಕ್ವಾರಿ ಮರಿಯೆ' ಕಾಂತಾರ್ ಪಿ.ಎಲ್.ಬಿ.ನ್ ೧೯೩೭ ಇಸ್ವೆಂತ್ ಮದ್ರಾಸಾಂತ್ ಎವ್ಕರಿಸ್ತಿಕ್ ಕೊಂಗ್ರೆಸ್ ಜಮ್‌ಲ್ಲ್ಯಾಚ್ಯಾ ಉಡಾಸಾಕ್ ಘಡ್‌ಲ್ಲೆಂ.
ಚಡಾವತ್ ಕ್ರಿಸ್ತಾಂವ್ ವಿಷಯಾಂ ಭೊಂವ್ತಿಂ ವಿಣ್ಲಲ್ಯೊ ಕವಿತಾಚ್ ಕವಿನ್ ಬರಯ್ಲ್ಯಾತ್ ಜಾಲ್ಯಾರಿ ಹಾಂಗಾ ದಿಲ್ಲಿ ಕವಿತಾ ವೆಗ್ಳಿ. ತಿ ಲ್ಹಾನಾ ವ್ಹಡಾಂಕ್ ಹರ್‍ಯೆಕಾ ಧರ್ಮಾಂಚ್ಯಾಂಕ್ ಸಮ್ಜತಾ ಮ್ಹಣೊನ್ ಆಮಿ ವಿಂಚ್ಲ್ಯಾ. ಹೆ ಕವಿತೆಂತ್ ಪಾಟ್ಲ್ಯಾ ಪನ್ನಾಸ್ ವರ್ಸಾಂನಿ ಕಿತ್ಲ್ಯಾ ಧಾರುಣ್ ಕಾಳ್ಜಾಂಕ್ ಹಾಸಯ್ಲಾಂ ಕೋಣ್ ಜಾಣಾ?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಸುಬ್ರಾಯ್ ನಾಯ್ಕಾಲ್ಯೊ ಮಿಶ್ಶ್ಯೊ
ಧುರತ್ ರಾಯಾನ್ ಹುಕುಮ್ ದಿಲಿ
ಸಗ್ಳ್ಯಾ ರಾಜಾಂತ್ ತಿ ಫಾಯ್ಸ್ ಕೆಲಿ
ಹುಕುಮ್ ತಮಾ ಅರ್ಧಿ ಪಿಶಿ
ಪರ್ಗಟ್ ಕೆಲಿ ಪ್ರಜೆಕ್ ಅಶಿ
"ರಾಯಾ ಶಿವಾಯ್ ದುಸ್ರ್ಯಾ ಮನ್ಶಾನ್
ಮಿಶ್ಯೊ ತಾಶಿಜಾಯ್ ಹರ್ ಎಕ್ಲ್ಯಾನ್
ಕೊಣೀ ಮಿಶ್ಯೊ ವಾಡೊವ್ನ್ ಭೊಂವಾತ್
ತಕ್ಲಿ ತಾಚಿ ಹೊಗ್ಡಾಂವ್ಕ್ ಪಾವತ್"
ತಾಸ್ಲ್ಯೊ ಸಾಯ್ಬಾ ತರ್ನಾಟ್ಯಾಂನಿ
ಸತ್ತರ್ ಅಯ್ಶ್ಯಾಂಚ್ಯಾ ಆಬಾಂನಿ
ಮಿಶ್ಯೊ ಕಾಳ್ಯೊ, ಮಿಶ್ಯೊ ಧವ್ಯೊ
ಬಾರೀಕ್, ಮೊಟ್ಯೊ, ಲಾಂಬ್ಶ್ಯೊ, ಮಟ್ವ್ಯೊ!
ಕೊಂಕ್ಣ್ಯಾನ್ ಎಕ್ಲ್ಯಾನ್ ಸುಬ್ರಾಯ್ ನಾಯ್ಕಾನ್
ಮಿಶ್ಯೊ ವಾಡಯ್ಲ್ಯೊ ಬೋವ್ ಧಯ್ರಾನ್
ರಾಯಾಕ್ ಹಾಚಿ ಮೆಳ್ತಚ್ ಖಬರ್
ಕೊಂಕ್ಣ್ಯಾಕ್ ಆಪವ್ನ್ ಕೆಲೊ ವಿಚಾರ್
"ಸ್ವಾಮೀ" ಮ್ಹಣ್ತಾ ಕೊಂಕ್ಣೊ ಹಾತ್ ಜೋಡ್ನ್
"ಸಾಧ್ಯ್ ನಾ ಮಿಶ್ಶ್ಯೊ ಕಾಡ್ಚ್ಯಾಕ್ ತಾಸ್ಸೊವ್ನ್
ದುಸ್ರ್ಯಾ ಎಕ್ಲ್ಯಾಕ್ ತ್ಯೊ ದೀವ್ನ್ ಜಾಲ್ಯಾತ್
ಹಜಾರ್ ರುಪ್ಯಾಂಕ್ ಆಡೊವ್ ಘಾಲ್ಯಾತ್"
"ತರ್, ಘೆ ತುಜೆ ಹಜಾರ್ ರುಪಯ್
ಆಡವ್ ಸೊಡವ್ನ್, ಮಿಶ್ಶ್ಯೊ ತಾಸಯ್"
ಅಶಿ ಹುಕುಮ್ ದಿಲಿ ರಾಯಾನ್
ರುಪಯ್ ಘೆತ್ಲೆ ಸುಬ್ರಾಯ್ ನಾಯ್ಕಾನ್
ರುಪಯ್ ಖರ್ಚುನ್ ಕೆಲೆ ಕಾಬಾರ್
ಮಿಶ್ಯೊ ತಶ್ಯೋಚ್ ಸೊಡ್ಲ್ಯೊ ತೊಂಡಾರ್
ಕೊಂಕ್ಣ್ಯಾಕ್ ವಾರಂಟಾಚೆರ್ ಧರ್‍ಲೊ
ರಾಯಾ ಹುಜ್ರಿಂ ಉಬೊ ಕೆಲೊ
"ಮಹಾರಾಯಾ!" ಮ್ಹಣಾಲೊ ನಾಯ್ಕ್
"ಮ್ಹಗೆಲಿ ಏಕ್ ವಿನಂತಿ ಆಯ್ಕ್
ಮಿಶ್ಶ್ಯೊ ಕಶ್ಯೋಯ್ ಸೊಡವ್ನ್ ಜಾಲ್ಲ್ಯೊ
ಪುಣ್ ತ್ಯೊ ಆತ್ತಾಂ ನ್ಹಯ್ ಮ್ಹಗೆಲ್ಯೊ"
"ಕೆದ್ನಾಂ ತುಮ್ಮಿ ರುಪ್ಪಯ್ ದಿಲ್ಲ್ಯಾತ್
ಮಿಶ್ಶ್ಯೊ ತುಮ್ಕಾಂಚಿ ಆಡವ್ ಜಾಲ್ಲ್ಯಾತ್
ರಾಯ್ಯಾನ್ ಘೆತ್ಲಲ್ಯೊ ಹ್ಯೊ ಮಿಶ್ಶ್ಯೊ
ಅನಿಷ್ಟ್ ಪಾಪ್ಯಾನ್ ಕಾಡ್ಚ್ಯೊ ಕಶ್ಶ್ಯೊ?"
"ಮಿಶ್ಶ್ಯೊ ತಾಸ್ಚ್ಯಾಕ್ ಹಕ್ಕ್ ನಾ ಮ್ಹಾಕ್ಕಾ
ಕಾಡ್ಚ್ಯೊ ಜಾಲ್ಯಾರಿ ತುಮ್ಮಿಂಚಿ ಕಾಡ್ಕಾ
ಕೊಣ್ಣಾಕಯಿ ಕಾಡ್ಚ್ಯಾಕ್ ದೀನಾ
ಪ್ರಾಣ್ ಕಾಳ್ಳ್ಯಾರಿ ತಾಸ್ಚ್ಯಾಕ್ ಸೋಡ್ನಾ"
ಸುಬ್ರಾಯ್ ನಾಯ್ಕಾಚ್ಯೊ ತ್ಯೊ ಮಿಶ್ಯೊ
ಮಹಾರಾಯಾನ್ ತಾಸ್ಚ್ಯೊ ಕಶ್ಯೊ?
ರಾಯಾಕ್ ಸಭೆರ್ ವ್ಹಡ್ ಲಜ್ ಭೊಗ್ಲಿ
ಆಕ್ರೇಕ್ ಅಶಿ ಹುಕುಮಿ ದಿಲಿ:
"ಮ್ಹಜ್ಯೊ ಮಿಶ್ಯೊ ಆಜ್ ಹಾಂವ್ ಕಾಡ್ತಾಂ
ಬದ್ಲಾಕ್ ತುಜ್ಯೊ ವಾಡಂವ್ಕ್ ಸೊಡ್ತಾಂ"
ಆಯ್ಕೊನ್ ನಾಯ್ಕಾಕ್ ಸಂತೋಸ್ ಜಾಲೊ
ಮಿಶ್ಯೊ ವೊಡೀತ್ ಘರಾ ಗೆಲೊ.
-ಪಿ.ಎಲ್.ಬಿ. (ಮಾ. ಬಾಪ್ ಪಾವ್ಲ್ ಲುವಿಸ್ ಬೊತೆಲ್)
(ನವೆಂಬರ್ ೧೩, ೧೯೫೭ ತಾರಿಕೆಚ್ಯಾ 'ಮಿತ್ರ್' ಪತ್ರಾರ್ ಪರ್ಗಟ್ ಜಾಲ್ಲಿ ಕವಿತಾ)