ಸಂಪಾದಕೀಯ್:
ಲಜ್ ಧಾಂಪುಂಕ್ ಉರನಾತ್‌ಲ್ಲಿಂ ಆಂಜುರಾಚಿಂ ಪಾನಾಂ
ಖಾನಾ ಶಹರ್ ರಗ್ತಾನ್ ನ್ಹಾವ್ನ್ ಆಸ್ತಾನಾ ಆಮ್ಚ್ಯಾ ಮೊಗಾಳ್ ಕವಿನ್ ಆಂಡ್ರ್ಯೂ ಎಲ್. ಡಿ'ಕುನ್ಹಾನ್ ಜೊಕ್ತಿ ಕವಿತಾ ಆಮ್ಕಾಂ ಧಾಡುನ್ ದಿಲ್ಯಾ. ಹಿ ಕವಿತಾ ಆಂಜುರಾಚ್ಯಾ ಪಾನಾಂಚಿ. ಚರಿತ್ರೆಂತ್ ಹ್ಯಾಚ್ ಪಾನಾಂನಿ ಮನ್ಶಾಕುಳಾಚ್ಯಾ ಪಯ್ಲ್ಯಾ ಮನ್ಶಾಂಚಿ ಲಜ್ ಧಾಂಪ್‌ಲ್ಲಿ. ಆಜ್ ಹಿಂ ಪಾನಾಂ ಆಖ್ಖ್ಯಾ ಇಸ್ರಾಯೆಲಾಚಿ ಲಜ್ ಧಾಂಪುಂಕ್ ಸಕ್ತಿತ್ ಯಾ ನಾ ಮ್ಹಳ್ಳ್ಯಾ ಗುಂದ್ಯಾಚೆರ್ ಹಿ ಕವಿತಾ ಉಬಿ ಜಾಲ್ಯಾ. ಹೊಜ್‌ಬುಲ್ಲಾ-ಇಸ್ರಾಯೆಲ್ ಝುಜಾವಿಶಿಂ, ಜುದೆವ್-ಕ್ರಿಸ್ತಾಂವ್-ಮುಸ್ಲಿಮ್ ಧರ್ಮಾಂವಿಶಿಂ ಜಾಣ್ವಾಯ್ ಆಸ್‌ಲ್ಲ್ಯಾಂಕ್ ಹಿ ಕವಿತಾ ಖಂಡಿತ್ ಶಿರ್‍ಶಿರೊ ಹಾಡಯ್ತಲಿ.
ನಿಮಾಣ್ಯಾ ಕಡ್ವ್ಯಾಕ್ ಪಾವ್ತಾನಾ, ಇತ್ಲಿಂ ರಗ್ತಾಂ ವ್ಹಾರಯಿಲ್ಲ್ಯಾ ಇಸ್ರಾಯೆಲಾಕ್ ಪರ್‍ತ್ಯಾನ್ ಏಕ್ ನಿತಳ್ ಜಾಂವ್ಚೊ ಆವ್ಕಾಸ್ ಕವಿ ದಿತಾ. ಹೊ ತಾಚೊ ಧರ್ಮ್. ಭೊಗ್ಸುಂಚೊ ಧರ್ಮ್. ಆಯ್ಚ್ಯಾ ಕಾಳಾರ್ ಹೊ ಧರ್ಮ್ ಉರ್‍ತಲೊ ಯಾ ಕಾಂಯ್ ಹ್ಯಾ ರುಕಾಚಿ ಸಂತತ್‌ಚ್ ಆಳ್ವೊನ್ ವೆಚೊ ಶಿರಾಪ್ ಭೆಜ್ತಲೊ ಮ್ಹಳ್ಳೆಂ ಆಮಿ ಪಳೆಂವ್ಕ್ ಜಾಯ್!
ಏಕ್ ಹುನೊನಿ ವಿಷಯ್ ಭೋವ್ ಮಾರ್ಮಿಕ್ ಥರಾನ್ ಕವಿನ್ ವಿಣ್ಲಾ. ತೊ ವಿಣ್ತಾನಾ ಆಂಜುರಾಚ್ಯಾ ರುಕಾಚಿ ಸರ್ ಘಾಲ್ಯಾ ಜಾಲ್ಲ್ಯಾನ್ ದಾಧೊಸ್ಕಾಯೆಚೊ ಸಂಸಾರ್ ವಿಸ್ತಾರ್ ಜಾಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಂಜುರಾಚೆಂ ಪಾನ್
ಕಾಳ್ಯಾಮೊಡಾಂನಿ ಕರ್‍ಪಲ್ಲ್ಯಾ
ಆಂಜುರಾಚ್ಯಾ ಪಾನಾಂಕ್
ಲಾಗ್ಲ್ಯಾ ತಾನ್
ರಗ್ತಾಚಿ
ಗಡಿ ತಡಿ ಉತ್ರೊನ್
ವಾರ್‍ಯಾರ್ ಉಸಾಳ್ಳಾಂ ರಗತ್
ಪಾನಾಂಕ್ ಪುರ್‍ತೆಂ ಭಿಜವ್ನ್
ಖಾನಾ ಗಾಂವ್ಚ್ಯಾ ಬಾಳಾಂಚೆಂ
ಫುಲಾಂ ಫಳಾಂ ಮಾಗೊಂಕ್
ಭಿಕೆಚಿ ದೀಶ್ಟ್ ಸರ್‍ಗಾಕ್
ಉಮೆದಿಚೆ ಕೊಂಬ್ರೆ ತೆದ್ನಾಂ
ಆಂಕ್ರೆಲ್ಲೆ ಮುಳ್ಕುಟಾಕ್
ಪುಟ್ಚ್ಯಾ ಪಯ್ಲೆಂಚ್ ಫುಲಾಂ ಫಳಾಂ
ರಗ್ತಾ ತಾನೆಕ್ ದೀಶ್ಟ್ ಧರ್‍ಣಿಕ್
ಶೆವ್ಟಾಲೆ ಖೊಟೆ ಫಾಂಟೆ
ಧುಳಿಂತ್ಲೆ ಧುಳಿಕ್
ವಾಂಜ್ ಜಿಣಿ ನಾಂತ್‌ಚ್ ಫಳಾಂ
ಪಾಳಾಂ ಇಡ್ಯಾಂನಿ ಜಿವ್ದಾಳಿ ಬಿಳಾಂ
ವಿಂಚುನ್ ಕಾಡ್‌ಲ್ಲ್ಯಾ ಲೊಕಾಕ್ ಮುಳಾಂತ್
ನ್ಹಾಣ್ ರಗ್ತಾಚೆಂಚ್
ಪರತ್ ಪಡ್ಲಾ ಶಿರಾಪ್
ಫಾಸ್ಳಾಲ್ಲ್ಯಾ ಬಾಳಾಂ ರಗ್ತಾಚೊ
ಲಜ್ ಧಾಂಪುಕೀ ಉಪ್ಕಾರ್‍ಚೆಂನಾ
ಪಾನ್ ರಗ್ತಾಳೆಂ ಅಂಜುರಾಚೆಂ!
ತಾಂಬ್ಸಾಣ್ ಶಾಶ್ವಿತ್ ಥಾಪ್ಚ್ಯಾ ಪಯ್ಲೆಂ
ನಿತಳ್ ಜಾ ಪಾಚ್ವೆಂ ಜಾ ದುಖಾಂನಿ
ಲಾಂಕ್ಡಾಕೀ ಅಂಕರ್ ಫುಟೊನ್ ಯೇತ್
ಆಜ್ಯಾಪಾಂನಿ!!
-ಆಂಡ್ರ್ಯೂ ಎಲ್ ಡಿ ಕೂನ್ಹಾ