ಮೊಗಾ ಪಾರ್ವೊ

ಸಂಪಾದಕೀಯ್:

ಉಬೊನ್ ಗೆಲ್ಲೊ ಪಾರ್ವೊ, ಸೊಡುನ್ ಗೆಲಾ ಮೊಗಾಚ್ಯೊ ಕುರ್ವೊ!

ಹಾಣೆ ತಾಚ್ಯಾ ವೊಂಟಾಂನಿ ಇತ್ಲೊ ಮೋಗ್ ವೊತುನ್‌ಯ್ ಅಚಾನಕ್ ಹೊ ಮೊಗಾಪಾರ್ವೊ ಆಜ್ ಉಬೊನ್ ಗೆಲಾ. ಪಾಟಿಂ ಯೆತಲೊ ಮ್ಹಳ್ಳೆಂ ಧೈರ್ ಹಾಕಾ ನಾ, ಜಾಲ್ಯಾರ್‌ಯ್ ಕಸಲೊಕಿ ಏಕ್ ಆಶಾವಾದ್ ಪಾಂಗ್ರುನ್ ಹೊ ಬಸ್ಲಾ - ಪಾರ್ವೊ ಏಕ್ ನಾ ಏಕ್ ದೀಸ್ ಪಾಟಿಂ ಯೆತಲೊ ಮ್ಹಣೊನ್. ಪುಣ್ ಹೊ ಪಾರ್ವೊ ಕೊಣ್ ಜಾವ್ಯೆತ್? ಮೋಗ್ ಕೆಲ್ಲಿ ಚಲಿ ಕಾಂಯ್? ಜಲ್ಮ್ ದಿಲ್ಲೆಂ ಭುರ್ಗೆಂ ಕಾಂಯ್? ಜಿವಿತಾಂತ್ ಸಪ್ಣೆಲ್ಲೆಂ ಏಕ್ ಸಪಣ್ ಕಾಂಯ್? ಕಿತೇಂಯ್ ಜಾಂವ್ಕ್ ಸಾಧ್ಯ್ ಆಸಾ! ತಸಲ್ಯಾ ಎಕಾ ಉಗ್ತೆ ರಂಗ್‌ಮಾಂಚಿಯೆರ್ ಹಿ ಕವಿತಾ ಸಾದರ್ ಜಾಲ್ಯಾ.

'ಫ್ರೀ ವೆರ್ಸಾಚೆರ್' ಹಿ ಕವಿತಾ ವ್ಹಾಳ್ಳ್ಯಾ ಜಾಲ್ಯಾರ್‌ಯ್ ವಾಚ್ತಾಂ ವಾಚ್ತಾಂ ಎಕಾ ಆಮ್ಕ್ಯಾ ಸಂಗೀತಾಂತ್ ಹಿ ಕವಿತಾ ನೆಟಯಿಲ್ಲ್ಯಾಬರಿ ದಿಸ್ತಾ. ಉತ್ರಾಂ ಸರಾಗ್ ವ್ಹಾಳ್ಳ್ಯಾಂತ್ - ಥಾಂಬನಾಸ್ತಾಂ ಉಬ್ಚ್ಯಾ ಪಾರ್ವ್ಯಾಬರಿ. ಕಸಲ್ಯೋಯ್ ವೊಂಯೊಂ ಘಾಲಿನಾಸ್ತಾಂ ವಾಚ್ತಲ್ಯಾಕ್ ತಾಂಚ್ಯಾ ತಾಂಚ್ಯಾ ಅನ್ಭೋಗಾಂಚ್ಯಾ ತಳ್ಯಾಂತ್ ನ್ಹಾಂವ್ಕ್ ಸೊಡ್‌ಲ್ಲೆಂ ಹೆ ಕವಿತೆಚೆಂ ವ್ಹಡ್ಪಣ್.

ಜಿಯೋ ಆಗ್ರಾರ್ ಸಭಾರ್ ತೆಂಪಾ ಉಪ್ರಾಂತ್ ಕವಿತಾ ಕುಳಾರಾಕ್ ಆಯ್ಲಾ. ತಾಚ್ಯಾ ಯೆಣ್ಯಾನ್ ಕವಿತಾ ಕುಳಾರಾಚಿ ಸೊಭಾಯ್ ದೊಡ್ತಿ ಜಾಲ್ಯಾ. ಪಾಟ್ಲ್ಯಾ ದಿಸಾಂನಿ ಜಾಯ್ತ್ಯಾ ಮ್ಹಾಲ್ಘಡ್ಯಾ ಕವಿಂಕ್ ಹಾಂಗಾಸರ್ ಆಮಿ ಪೇಶ್ ಕೆಲಾಂ, ತಶೆಂ ಮ್ಹಣೊನ್ ನವ್ಯಾಂಕ್ ಆಮಿ ಪಾಟಿಂ ದವರುಂಕ್ ಆಮ್ಚೆಂ ಚಿಂತಪ್ ಭಿಲ್ಕುಲ್ ನಾ.

-ಮೆಲ್ವಿನ್ ರೊಡ್ರಿಗಸ್

ಕವಿತಾ:

    ಮೊಗಾ ಪಾರ್ವೊ

    ನಾ ವಾರೆಂ, ನಾ ಪಾವ್ಸ್
        ನಾ ಆಜ್ ದರ್ಯಾಗಾಜ್
            ಭುಂಯ್ಕಾಂಪ್ ಯಾ ಲ್ಹಾರಾಂಮಾರ್
                ನಾ ಕುಸ್ಕುಟ್‌ಯ್ ಆವಾಜ್

    ತರೀ ಮ್ಹಜೊ ಮೊಗಾ ಪಾರ್ವೊ
        ಎಕ್ಸುರ್‍ಯಾಕ್ ಸಾಂಡುನ್
            ಮನಾಂತ್ ಕುಸ್ಕೊನ್
                ಉಬೊನ್ ಗೆಲಾ... ಪಯ್ಸ್ ಪಾವ್ಲಾ!

    ಧಾಕ್ಟುಲಿಂ ತಾಚಿಂ ಪಾವ್ಲಾಂ
        ಆಂಗ್‌ಭರ್ ಮೊಗಾ ಪಾಕಾಂ
            ಹಾಸ್ಕುರ್‍ಯಾ ಗಾಲಾಂತುಲಿಂ ಭಾಂಗ್ರಾಳಿಂ ಪಾವ್ಲಾಂ
                ಕೊಣಾಥಂಯ್ ಆನಿ ದೆಖೊಂ...

    ಪಾಂಯಾಂಗೋಳ್ ಬಾಂದ್ಲಲ್ಯಾ ಪಾಂಯ್ಜಣಾಂನಿ
        ಮಜೆಂಚ್ ರಗತ್ ವ್ಹಾಳ್ತಾ...
    ದೀಸ್‌ರಾತ್ ವೊತ್ಲಾ ತೊ ಮೋಗ್
        ವೊಂಟಾರ್ ತಾಚ್ಯಾ ಆತಾಂಯಿ ಗಳ್ತಾ..
            ತರೀ ಮ್ಹಜೊ ಮೊಗಾ ಪಾರ್ವೊ...

    ಅಶೆಂ ಕೆನ್ನಾಂಯ್ ಘಡ್‌ಲ್ಲೆಂ ನಾ
        ಇತ್ಲೆ ಉಂಚಾಯೆರ್ ಉಬ್‌ಲ್ಲೆಂಚ್ ನಾ
            ಹಜಾರ್ ಉಮ್ಯಾಂಕ್ ವೋಂಟ್ ದೀವ್ನ್
    ಪಾಕಾಂ ಫುಲವ್ನ್ ಉಬೊನ್ ಉಬೊನ್
        ಪರತ್ ಘುಂವೊನ್ ಘುಂವೊನ್
            ಮ್ಹಜೆಚ್ ವೆಂಗೆಂತ್ ರಿಗ್ಲಾಂ ಮೊಗಾಕ್ ಆಶೆವ್ನ್!
                ತರೀ ಮ್ಹಜೊ ಮೊಗಾ ಪಾರ್ವೊ..

    ಆಜ್ ನಾ ಏಕ್ ದೀಷ್ಟ್ ಏಕ್ ಉತರ್
        ನಾ ಇಲ್ಲೋಯ್ ಉಸ್ವಾಸ್
            ಭೊಗ್ಣಾಂ ನಾಸ್ತಾಂ ಚಿಂತ್ನಾಂ ನಾಸ್ಚ್ಯಾ
                ಸೊಂರ್ಗ್ಯಾಪರಿಂ ತುಟೊನ್ ಗೆಲಾ ಅಚಾನಕ್

    ಊಬ್ ಪಾರ್ವ್ಯಾ ಊಬ್
        ಊಂಚ್ ಆನಿ ಊಂಚ್
            ಆಯ್ಚೆಂ ಬಳ್ ಗಳ್ತಾ ಪರ್‍ಯಾಂತ್
                ಸೊಭಾಯೆ ಸುರ್ಯೊ ಪಳ್ತಾವರೇಗ್

    ಪಯ್ಣಾರ್ ತುಜ್ಯಾ ಗುಡೆ ದೊಂಗ್ರಾ ಆಡ್ಕಳಿ
        ವಾದಾಳ್ ಯಾ ಅವ್ಘಡಾಂ ಖಿಳಿ
            ನಾಂಚ್ ಜಾಂವ್
                ಭಾಂಗ್ರಾಶೆತಾಂ ತುಂವೆಂ ರಾಂವ್ಚೊ
    ಗಾಂವ್ ಜಾಂವ್
        ಮೊತಿಯಾಂ ವಜ್ರಾಂ ಸುಖ್
            ಉಸ್ಕ್ಯಾರ್ ತುಜ್ಯಾ ರಾಜ್ ಕರುಂ

    ಊಬ್ ಪಾರ್ವ್ಯಾ ಊಬ್
        ಊಂಚ್ ಆನಿ ಊಂಚ್..

    ಆಜ್ ನಾ ಫಾಲ್ಯಾಂ ಕಾಂಯ್
        ಉಗ್ಡಾಸಾ ಕಿಟಾಳಾಂ ಜಳ್ತಿತ್‌ಗಾಯ್
            ಮೊಗಾಝರಿ ಉಮಾಳ್ತಿತ್‌ಗಾಯ್
                ಕಿಸ್ಪರಾಂ ತರೀ ಪರ್ವಾನಾ ... ತೆನ್ನಾ

    ಊಬ್ ಪಾರ್ವ್ಯಾ ಊಬ್
        ಪಾಟಿಂ ಪರತ್ ಊಬ್
            ತೆಚ್ ವೆಂಗೆಂತ್ ತ್ಯಾಚ್ ಮೊಗಾಕ್
                ಊಬ್ ಪಾರ್ವ್ಯಾ ಊಬ್!

    -ಜಿಯೋ ಆಗ್ರಾರ್