ಸಂಪಾದಕೀಯ್:
ಪೊಟಾಚ್ಯಾ ಗ್ರಾಸಾಮುಕಾರ್ ಮೊಗಾಚೆ ಲಾಸ್, ನಾಸ್!
ಪೊಟಾಚೆ ಭುಕೆ ಮುಕಾರ್ ಮೋಗ್ ಉಬೊ ರಾವೊಂಕ್ ಸಕನಾ. ಪಾಟಿಕ್ ಲಾಗ್‌ಲ್ಲ್ಯಾ ಪೊಟಾವಯ್ಲ್ಯಾ ಕಾಳ್ಜಾಕ್ ಮೊಗಾಚೊ ಅರ್ಥ್‌ಚ್ ಕಳಿತ್ ಆಸನಾ. ಹೆಂ ಕಾಳೀಜ್ ಪೊಟ್ ಭರ್‍ಚೆವಿಶಿಂ ಚಿಂತಿತ್ ಸೊಡ್ಲ್ಯಾರ್ ಮೊಗಾಚೆ ಸಿಸ್ಲೆಥಾವ್ನ್ ಅಮೃತ್ ಗಳ್ಳ್ಯಾರ್‌ಯ್ ತಾಕಾ ಫಿಕಿರ್ ಆಸನಾ. ತ್ಯಾದೆಕುನ್ ಮೋಗ್ ಆಶೆಂವ್ಚೊ ಹೊ ಮನೀಸ್ ಪಯ್ಲೆಂ ಪೊಟಾಚಿ ಪೋಡ್ ಭರ್‍ಚಿ ವ್ಯಾಪ್ತ್ ದಾಕವ್ನ್ ದಿತಾ. ಮಾಗೀರ್ ಹೆ ವ್ಯಾಪ್ತೆಚಿ ಸೊಭಾಯ್ ಕಿತೆಂ? ಥಂಯ್ ಉಕಾಲ್ಚೊ ಪರ್ಮಳ್ ಕಿತೆಂ? ಥಂಯ್ ಸಾಲ್ವಾರ್ ಜಾಂವ್ಚ್ಯೊ ರುಚಿ ಕಿತೆಂ?
ಗಾಂವ್ ದಾಕವ್ನ್, ಥಂಯ್ಚಿ ಸೊಭಾಯ್ ಚಾಕಂವ್ಕ್ ದೀವ್ನ್, ಥಂಯ್ಚಿಂ ಚುರ್ನಾಂ-ಕಾರ್ಣಾಂ ಖಾಂವ್ಕ್ ಆಪವ್ನ್ ನಿಮಾಣೆಂ ಮೊಗಾಚಿ ಗರಿ ಘಾಲ್ಚಿ ವಿದ್ಯಾ ದಾಕಂವ್ಚ್ಯೊ ಕವಿತಾ ಸಭಾರ್ ತೆಂಪಾ ಆದಿಂ ಜೊಸ್ಸಿಚ್ಯಾ 'ಗಾಂವ್‌ಗೋ ಚೆಡ್ವಾ' ಥಾವ್ನ್ ಸುರು ಜಾಲ್ಲ್ಯೊ. ತ್ಯಾನಂತರ್ ಸಭಾರಾಂನಿ ಅಸಲ್ಯಾಚ್ ಮಾದರೆಚ್ಯೊ ಕವಿತಾ ಭೋವ್ ಪ್ರಭಾವ್‌ಭರಿತ್ ರಿತಿನ್ ಬರಯ್ಲ್ಯಾತ್. ಆತಾಂ ಕಿಶೂನ್ ತ್ಯೊ ಸರ್ವಯ್ ಕವಿತಾ ಮೊಳುನ್, ತಾಕಾ ಚಾ.ಫ್ರಾ.ಚೆ 'ಕಾಳ್ಜಾಕ್ ವಚೊಂಕ್' ಕವಿತೆಚೊ ಮಾತ್ಸೊ ಲೇಪ್ ದೀವ್ನ್ ವೆಗ್ಳಿಚ್ ಕವಿತಾ ಬರಯ್ಲ್ಯಾ.
ಅಶೆಂ ಬರಯ್ತಾನಾ ಬಾರ್ಕುರ್‍ಚೊ ಜೊ ಗಾಂವ್ ಉಗ್ತೊ ಜಾಲಾ, ತ್ಯಾ ಗಾಂವ್ಚಿ ನಂಯ್; ತೆ ನಂಯ್ತ್‌ಲ್ಯೊ ಮಾಸ್ಳ್ಯೊ, ತಾಂಚಿ ಕಡಿ, ಕಡಿಯೆಚೊ ಪರ್ಮಳ್ ಸಗ್ಳೊ ಪ್ರಸಾರ್‍ಲಾ. ತಶೆಂ ಕರ್‍ತಾನಾ, ಬಾರ್ಕುರ್‍ಚ್ಯಾ ಮೋಗ್ ಕರ್‍ಣಾರಾಂಚೊ ವರ್ಸಾಂ ಆದ್ಲೊ ಏಕ್ ಗುಟ್‌ಯ್ ಆಪಾಪಿಂಚ್ ಕಳಿತ್ ಜಾಲಾ.
ಆಯ್ಲೆವಾರ್ ಆಂಟನಿಚಿ ಕವಿತಾ ವಾಚ್ಲ್ಯಾ ಉಪ್ರಾಂತ್ ಬಾರ್ಕುರ್‌ಗಾರಾಂಕ್ ಮಾಸ್ಳೆಚೊ ಮೋಗ್ ಕಿತ್ಲೊ ಮ್ಹಣ್ ಪರ್‍ತ್ಯಾನ್ ಹಾಂವೆಂ ಸಾಂಗಜಾಯ್ ಮ್ಹಣ್ ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮೋಗ್, ಪೋಟ್ ಆನಿ ನಂಯ್
ಕಾಳ್ಜಾಕ್ ವಚೊಂಕ್ ಪೊಟಾಂತ್ಲ್ಯಾನ್ ವಾಟ್
ಮ್ಹಣ್ಚ್ಯಾ ಚೆಡ್ವಾ, ಸಾಂಗ್ಣೆಂ ಆಯ್ಕಲಾಂಯ್?
ಕಾಳ್ಜಾಂತ್ ತುಟ್ತಾಗೋ, ಮೊಗಾ ಕಾಟ್
ವಾಟ್ ದಾಕಯ್ತ್‌ಗೀ ಆಮ್ಚಿ ನಂಯ್?
ಥೊಡ್ಯಾ ದಿಸಾಂಕ್ ತರೀಗೊ ಬಾಯೆ
ಮ್ಹಜ್ಯಾ ಗಾಂವಾಂತ್ ಯೇವ್ನ್ ರಾವನಾಂಯ್?
ಅಸ್ಲಿ ಮೊಗಾ ವಾಟ್ ದಾಕಯ್ತಾಂ
ಖಂಯ್ ಮ್ಹಣ್ ತುಂಚ್ ಪಳೆನಾಂಯ್?
ರಾತ್ಚ್ಯಾ ಫಾರಾ ಜಾಗೆಕ್‌ಗೋ, ನಂಯ್ತ್
ಪೆಟವ್ನ್ ವ್ಹರ್‍ಯಾಂ ಚುಡಿ
ಕಾಣೆ, ಖೊರ್‍ವೊ, ಚಿಪ್ಪಾರಾಂನಿ
ಪರ್ಮಳ್ ಜಾತಾ ಪಳೆ ಕಡಿ
ಕೊಕ್ಕೆಂ ಘಾಲ್ನ್ ಬಿಳಾಂತ್ಲ್ಯೊಗೋ
ಧರ್‍ಯಾಂ ಮಾಸಾಳ್ ಕುರ್‍ಲ್ಯೊ
ಪೂಡ್ ಘಾಲ್ಯಾರ್, ಮುಕಾರ್ ದುಸ್ರ್ಯಾ
ಪಕ್ವನಾಂ ರುಚಿ ಸರ್‍ವ್ ಮೆಲ್ಯೊ
ಗ್ಯಾಸ್‌ಲಾಯ್ಟಾ ಉಜ್ವಾಡಾಕ್‌ಗೋ ಆಮಿ
ದೆಂವ್ಲ್ಯಾರ್ ಘೆವ್ನ್ ಕುತ್ತಾಳಿ
ಪಯ್ಲೆಂಚ್ ಜಾಲ್ಯಾರ್ ಬರವ್ನ್ ದಿತಾಂ
ಗ್ಯಾರಂಟಿ ಕೊಳ್ಸೊಭರ್ ಮಾಸ್ಳಿ
ದೆಂವ್ತೆ ವೆಳಾರ್ ಬೊಳ್ಪು ವೊಡ್ಯೆತ್
ಬೊಳ್ಚಿಲ್ಯಾರ್ ಮೆಳ್ತಾತ್ ಸುಂಕ್ಟಾಂ
ಮ್ಹಜಿಗೊ ಕಸ್ರತ್, ತುಜೊಗೊ ಕೊಳ್ಸೊ
"ಜೊಡಿ ಪಳೆ!" ಮ್ಹಣ್ತಿತ್ ಸಕ್ಟಾಂ
ದೆಕುನ್‌ಗೊ ಬಾಯೆ, ವೊವ್ಳಿಗ್ ದಿತಾಂ
ಚ್ಯಾರ್ ದೀಸ್ ಯೇವ್ನ್ ಹಾಂಗಾ ರಾವ್ಶಿ
ಪೊಟಾಂತ್ಲ್ಯಾನ್‌ಗೋ ಕಾಳ್ಜಾಕ್ ರಿಗ್ತಾಂ
ಸಗ್ಳೆಂಚ್ ಮೊಗಾನ್ ಕಾಂಯ್ ತೊವ್ಶಿ
- ಕಿಶೂ, ಬಾರ್‍ಕೂರ್