ಸಂಪಾದಕೀಯ್:
ಅನಾಥ್ ಮ್ಹಣ್ತಲ್ಯಾನ್ ಕವಿತೆಚೆಂ ಖಜಾನ್ ಪುರುನ್ ದವರ್‍ಲಾಂ
ಕವಿತಾ ಕುಳಾರಾಚೆರ್ ಬಾರ್ಕುರ್‌ಗಾರ್ ಅಶೇಯ್ ದಾಢ್ ಘಾಲ್ತಿತ್ ಮ್ಹಣೊನ್ ಹಾಂವೆಂ ಲೆಕೊಂಕ್ ನಾತ್‌ಲ್ಲೆಂ. ತೇಂಯ್ ಬೆಂಡಾ ವ್ಹಾಜ್ಪಾನ್ ಯೇವ್ನ್ ಹಾಂಗಾಸರ್ ತಾಂಚಿ ಮ್ಹೊರ್ ದಾಂಬ್ತಲೆ ಮ್ಹಣೊನ್ ಚಿಂತುಂಕ್ ನಾತ್‌ಲ್ಲೆಂ. ಕವಿ ಪಿ.ಜೆ. ಕರುಗಳ್ನಡೆ 'ಅನಾಥ್' ಕವಿತೆದ್ವಾರಿಂ ಹಾಂಗಾಸರ್ ಆಯ್ಲಾ. ಕವಿತಾ ಕುಳಾರಾಂತ್ ಗುಲೊಬ್ ಫುಲಯಿಲ್ಲ್ಯಾಂ ಪಯ್ಕಿ ತೋಯ್ ಎಕ್ಲೊ. ಆತಾಂ ತಾಚ್ಯಾ ಝಾಡಾರ್ ಜಾಂವ್ಚ್ಯಾ ಗುಲೊಬಾಂಕ್ ಮೊಲ್ ಬಾಂಧುಂಕ್ ಕಷ್ಟ್ ಜಾತೇ ಆಸಾತ್.
ಸೊಭಿತ್ ಆಸಾತ್ ಮ್ಹಣೊನ್, ಪರ್ಮಳ್ ದಿತಾತ್ ಮ್ಹಣೊನ್ ಸಕ್ಕಡ್ ಫುಲಾಂಕ್ ಖಾಯ್ಸ್ ಆಸಾ ಮ್ಹಣೊನ್ ಸಾಂಗೊಂಕ್ ಜಾಯ್ನಾ. ಸಕ್ಕಡ್ ಫುಲಾಂ ಚಲಿಯೆಚ್ಯಾ ಮಾತ್ಯಾರ್ ಬಸ್ತಾತ್ ಆನಿ ದೆವಾಚ್ಯಾ ಪಾಂಯಾಂ ಮುಳಿಂ ನಾಚ್ತಾತ್ ಸಾಂಗೊಂಕ್ ಜಾಯ್ನಾ. ಫುಲ್ ದಿಂವ್ಚೆಂ ಝಾಡ್ ಮಾತ್ರ್ ನ್ಹಯ್ ತೆಂ ಫುಲ್‌ಲ್ಲೊ ಜಾಗೋಯ್ ಅಸಲ್ಯಾ ಎಕಾ ತಫಾವತಾಂತ್ ವಾಂಟೊ ಘೆತಾ. ತಶೆಂಚ್ ಹೆ ಕವಿತೆಂತ್ಲ್ಯಾ ನಾಯಕಾಚಿ ಗತ್ ಜಾಲ್ಯಾ.
ಠರಾವಣೆಚೆ ದಿಷ್ಟಿನ್ ಹಿ ಕವಿತಾ ಅಸ್ಕತ್ ನ್ಹಯ್. ಜ್ಯೊ ಪ್ರತಿಮಾ ಹಿ ಕವಿತಾ ಉಗ್ತಾಯ್ತಾ ತಾಂತ್ಲ್ಯಾನ್ ಕಾಂಯ್ ವೆಕ್ತಿಚಿಂ ಕಾಳ್ಜಾಂ ಕಡ್ತಲಿಂ ಮ್ಹಣ್ಚ್ಯಾಕ್ ದುಬಾವ್ ನಾ. ವೆಕ್ತಿಂಕ್ ತಾಂಚ್ಯಾ ತಾಂಚ್ಯಾ ಜಿವಿತಾಚ್ಯಾ ಕೊಡು ಅನ್ಭೊಗಾಚೆರ್ ಹಿ ಕವಿತಾ ಆರ್ಸೊ ಖಂಡಿತ್ ಧರ್‍ತಾ. ಪ್ರಾಸ್ ಘಾಲ್ಲ್ಯಾನ್ ಜೊ ಆವಾಜ್ ಹಾಂಗಾ ಉಟ್ಲಾ, ತೊ ಸರಾಗ್ ಸಂಗೀತಾಬರಿ ವ್ಹಾಳೊನ್ ವೆತಾ ಮ್ಹಣೊನ್ ಸಾಂಗೊಂಕ್ ಜಾಯ್ನಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಅನಾಥ್
ಕಾಳ್ಕ್ಯಾ ಅಂಧ್ಕಾರಾಂತ್ಲ್ಯಾ ಭುಂಯಾರಾಂತ್
ಕೊಟಾರ್ಲೆಚೆಂ ಜಿವಿತ್ ಮ್ಹಜೆಂ
ಹ್ಯಾ ಪರ್ಜಳಿಕ್ ಸಂಸಾರಾಂತ್
ಕೋಣ್ ವ್ಹಾವಯ್ತ್ ಮ್ಹಜೆಂ ವೊಜೆಂ?
ಉದ್ಕಾವ್ಹಾಳೊ ದೊಳ್ಯಾಂ ಭೊಂವ್ತಿಂ
ಬಗ್ಲೆಕ್ ಪಾವ್ಲಿಂ ನಾಂತ್ ಪರ್ಮಳಿಕ್ ಶಿಂವ್ತಿಂ
ದೊಳೆ ಭರೊನ್ ಚೊಯ್ತಾಂ ಉದ್ಯಾನಾಕ್
ಖೆಳ್ಚ್ಯಾ ಗುಲೊಬ್, ಗೊಂಡೆ, ಲಿಲ್ಲಿ, ಜಿಡ್ಡೆ ಫುಲಾಂಕ್
ತಾಂಚೆ ಸರಿ ಮ್ಹಾಕಾಚ್ ವೊರಯ್ಲೆಂ
ರಾವ್ಲಾಂ ಏಕ್ ಕಾಟ್‌ಫುಲ್ ದರ್ಯಾವಯ್ಲೆಂ
ನಾ ಹುಂಗನಾಂತ್, ಸೊಭಾಯ್ ಚಾಕಿನಾಂತ್
ಪಾಯಾಂಕ್ ಆದಾಳ್ಚ್ಯಾ ಕಚ್ರ್ಯಾಕ್ ಕೊಣಿ ಲೆಕಿನಾಂತ್
ವಿಶಾಲ್ ಸಮ್ದಿರಾಂತ್ ಪೆಂವ್ಚಿ ಏಕ್ ಪಾತ್
ಉಜ್ವಾಡ್ ಕಳಿತ್‌ನಾಸ್ತಾಂ ಭರೊನ್ ಆಸ್ಚಿ ಕಾಳ್ಕಿ ರಾತ್
ಹ್ಯಾ ಸಂಸಾರಾಕ್ ಆನಿ ಮ್ಹಾಕಾ ಕಸ್ಲೆಂ ನಾತೆಂ?
ರಾಕೊನ್ ರಾವ್ಲಾಂ, ಕೆದ್ನಾಂ ಉದೆತ್ ಮ್ಹಜೆಂ ಫಾಂತೆಂ
- ಪಿ.ಜೆ. ಕರಗಳ್ನಡೆ, ಬಾರ್ಕುರ್