ಸಂಪಾದಕೀಯ್:
ಗಿತಾಂಚ್ಯಾ ಸಂಸಾರಾಂತ್ಲಿ ಥೊಡಿ ಗೊಡ್ಸಾಣ್
ಮ್ಹಾಲ್ಘಡೊ ನಾಟಕ್‌ಕಾರ್ ಸನ್ನಿ ಎ. ಡಿ'ಸೋಜಾನ್ ಆಪ್ಲ್ಯಾ 'ಘಟ್ ಧರ್, ಸೊಡಿನಾಕಾ' ನಾಟಕಾಖಾತೀರ್ ಲಿಖ್‌ಲ್ಲೆಂ ಹೆಂ ಗೀತ್ ಹಾಂಗಾಸರ್ ದಿಲಾಂ. ಗಿತಾಂಚೊ ಸಂಸಾರ್ ಕವಿತಾಂಚ್ಯಾ ಸಂಸಾರಾಪ್ರಾಸ್ ವೆಗ್ಳೊ. ಗೀತ್, ಕವಿತೆಚೊ ವೆಗ್ಳೊಚ್ ಪ್ರಕಾರ್ ಜಾಲ್ಯಾರ್‌ಯ್ ಕಾಂಯ್ ಥೊಡೆಪಾವ್ಟಿಂ ಗಿತಾಂಚಿ ತಾಕತ್ ಕವಿತೆಂಕ್ ಮಿಕ್ವಲ್ಲಿ ಆಸ್ತಾ. ವಿಲ್ಫಿ ರೆಬಿಂಬಸಾಚಿಂ ಕಾಂಯ್ ಕಾಂತಾರಾಂ ಯಾ ಗಿತಾಂ ಅಸಲೆ ಸಕ್ತೆಚಿಂ ಆಸಾತ್.
ನಾಟಕಾಂತ್ಲ್ಯಾ ಸಂದರ್ಭಾಚೆರ್ ಹೊಂದೊನ್ ನಾಟಕಾಂತ್ಲ್ಯಾ ಗಿತಾಂಚೊ ಅರ್ಥ್ ಸೊಧಿಜಾಯ್ ಪಡ್ತಾ ಆನಿ ತಾಂತ್ಲೊ ರೋಸ್ ಚಾಕಿಜಾಯ್ ಪಡ್ತಾ. ತಸಲೊ ಕಸಲೊ ಸಂದರ್ಭ್ ಹ್ಯಾ ಗಿತಾಚೊ ತೆಂ ಹಾಂವ್ ನೆಣಾಂ. ತ್ಯಾ ಸಂದರ್ಭಾಚ್ಯಾ ಭಾಯ್ರ್ ರಾವೊನ್‌ಯ್ ಹ್ಯಾ ಗಿತಾನ್ ಕರ್‍ಚೆಂ ಗುಣ್‌ಗಾನ್, ಜೊಕ್ಚಿಂ ಬೊಟಾಂ, ದಿಂವ್ಚೆ ಎಕ್ತಾರಾಚೆ ಉಲೆ - ಹ್ಯಾ ಗಿತಾಂತ್ ಸಲೀಸಾಯೆನ್ ಸಮ್ಜತಾತ್.
ಸನ್ನಿ ಡಿ'ಸೋಜಾ ಪಯ್ಲೆಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಫುಡಾರಾಂತ್ ಆಪ್ಲಿಂ ಗಿತಾಂ ನ್ಹಯ್, ಕವಿತಾ ಘೆವ್ನ್ ತೊ ಯೆತಲೊ ಮ್ಹಳ್ಳಿ ಆಶಾ ಆಮಿ ಬಾಳ್ಗಿತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೊಂಕಣ್ ಮ್ಹಜೊ ಗಾಂವ್
ಆರ್ಬಿ ದರ್ಯಾ ಲ್ಹಾರಾಕ್ ಖೆಳ್ತಾ
ಕೊಂಕಣಾಚೆಂ ನಾಂವ್
ಕೊಂಕಣಾಂತ್ಲೊ ಕೊಂಕ್ಣೊ ಹಾಂವ್
ಮಂಗ್ಳುರ್ ಮ್ಹಜೊ ಗಾಂವ್
ಆರ್ಬಿ ತಡಿರ್ ವಾರ್‍ಯಾರ್ ವ್ಹಾಳ್ತಾ
ಕೊಂಕಣಾಚೆಂ ನಾಂವ್
ಮಂಗ್ಳುರಾಂತ್ಲೊ ಕೊಂಕ್ಣೊ ಹಾಂವ್
ಸೊಭಿತ್ ಮ್ಹಜೊ ಗಾಂವ್
ಮಾಡಾ ಮಾಡಿಯಾಂಚಿಂ ಹಿತ್ಲಾಂ
ಶೆತಾಂತ್ ಭಾಂಗರ್ ಪಿಕ್ಲಾಂ
ಶಿಂವ್ತ್ಯಾಂ-ಕಳ್ಯಾಂನಿ ಪರ್ಮಳ್ಳಾಂ
ನಳ್ಯಾಂಚ್ಯಾ ನಾಂವಾನ್ ನಾಂವಾಡ್ಲಾಂ
ಹೊ ದೇಶ್ ಆಮ್ಚೊ ದುಧಾ-ಮ್ಹೊಂವಾಚೊ
ಹೊ ಕುರೊವ್ ಆಮ್ಚ್ಯಾ ಮಸ್ತಕಾರ್, ವಜ್ರಾಂ ಮೊತಿಯಾಂಚೊ
ಆಮ್ಚೆ ತೆ ಆದ್ಲೆ ಮ್ಹಾಲ್ಘಡೆ
ಕೊಂಕ್ಣೆಚೊ ಗೌರವ್ ಕರ್‍ತಾಲೆ
ಆತಾಂಚೆ ಥೊಡೆ ಶಿಕ್ಲಲೆ
ಕೊಂಕ್ಣೆಕ್ ಕೌರವ್ ತೆ ಜಾಲೆ
ಸಾಂಗಾತಾ ಮೆಳುಯಾಂ, ಹಾಸೊನ್ ಗಾವುಯಾಂ
ಆಮಿ ಕೊಂಕಣಾಂತ್ಲೆ ಕೊಂಕ್ಣೆ ಮ್ಹಣೊನ್ ಉಗ್ತೆಂ ಪಾಚಾರುಯಾಂ
-ಸನ್ನಿ ಎ. ಡಿ'ಸೋಜಾ