ಸಂಪಾದಕೀಯ್:
ಸೆಕ್ಸಾಚೆರ್ ಕಿತ್ಲೊ ತೇಂಪ್ ಕವಿಂನಿ ಖಾಡುಂ ಘಾಲ್ಯೆತ್?
ನೆಲ್ಲುಚ್ಯೊ ಕವಿತಾ ಮಾತ್ಶೊ ವೆಗ್ಳ್ಯೊ. ತಾಂತುಂ ಚಿಮ್ಟೆ ಆಸಾತ್. ತಾಂತುಂ ಧಖೊ ಆಸಾ. ಆಧುನಿಕ್ ತರ್‍ನಾಟ್ಯಾಂಚೆಂ ಚಿಂತಪ್ ಆಸಾ ಆನಿ ತೆಂ ವೆಕ್ತ್ ಕರುಂಕ್ ತಸಲಿಚ್ ಭಾಸ್ ಆಸಾ. ಸಾಹಿತಿಕ್ ನದ್ರೆನ್ ಅಸಲ್ಯೊ ಕವಿತಾ ಖಂಯ್ಚ್ಯಾ ಸ್ತರಾರ್ ರಾವ್ತಾತ್ ಮ್ಹಣೊಂಕ್ ಸಾಂಗೊಂಕ್ ಕಷ್ಟ್ ತರ್‌ಯ್, ತಾಣೆ ಏಕ್ ವಿಷಯ್ ಸಾಂಗ್ಚೆ ರಿತಿಕ್ ಲಾಗೊನ್ ಆನಿ ಉತ್ರಾಂಚೆ ಮಾಂಡಾವಳಿಕ್ ಲಾಗೊನ್, ತಾಚ್ಯೊ ಕವಿತಾ ತುಜ್ಯಾ ಕಾಳ್ಜಾಚೆರೆಲಾರ್ ಥಪ್ಕಲ್ ಮಾರುನ್ ಬಸ್ತಾತ್.
ಅಪ್ರೂಪ್‌ಶೆಂ ಅಸಲ್ಯೊ ಕವಿತಾಯ್ ಆಮ್ಕಾಂ ಜಾಯ್. ಹ್ಯೊ ಕವಿತಾ ಶೀದಾ ಮತಿಕ್ ನಾಟ್ವತಾತ್. ಹಾಸೊಂಕ್‌ಯ್ ವೊಕತ್ ದಿತಾತ್. ಹ್ಯೊ ಕವಿತಾ ಕೊಣ್ ಇಲ್ಲ್ಯೊ 'ಸೆಕ್ಸಿ' ಮ್ಹಣತ್, ಪುಣ್ ಸೆಕ್ಸಾಚೆರ್ ಕಿತ್ಲೊ ತೇಂಪ್ ಕವಿಂನಿ ಖಾಡುಂ ಘಾಲ್ನ್ ರಾಂವ್ಚೆಂ?
ನೆಲ್ಲುಚೆಂ ಚಿಂತಪ್ ಚೆಡ್ವಾಂಕ್ ಸೊಡುನ್ ಪಯ್ಸ್ ಉಬ್ತಾನಾ, ತಾಚೆಥಾವ್ನ್ ಆನಿಕ್‌ಯ್ ಜಬರ್‌ದಸ್ತ್ ಕವಿತಾ ವ್ಹಾಳೊಂಕ್ ಸಕ್ತಲ್ಯೊ ಮ್ಹಣ್ಚ್ಯಾಕ್ ಮ್ಹಾಕಾ ಕಾಂಯ್ ದುಬಾವ್ ಉರೊಂಕ್ ನಾ. ತಶೆಂ ಮ್ಹಣೊನ್ ಹಿ ಕವಿತಾ ಲೊಕಾಚಿಂ ಕಾಳ್ಜಾಂ ಜಿಕ್ಚ್ಯಾಂತ್ ಸುಫಳ್ ಜಾಂವ್ಕ್ ನಾ -ಅಶೆಂ ಹಾಂವ್ ಸಾಂಗನಾ!
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನೋಟ್ ದಿಸ್ ಪೊಂಯ್ಟ್
ಮ್ಹಜೆ ಪಾಟಿಕ್ ಲಾಗ್ಚ್ಯಾ ಚೆಡ್ವಾಂಕ್
ಕಳ್ನಾ ಕಾಂಯ್ ಘಡ್ಗಡೊ ಮಾರ್‍ತಾ
ಯಾ ಕೊಣೀ ಮಾಟ್ ಕರ್‍ತಾ
ಮ್ಹಜೊ ಮೋಗ್ ಕಾಳ್ಜಾಂತ್‌ಚ್ ಉರ್‍ತಾ
ತಾಂಚೊ ಜಿವೊಚ್ ಮಾತಿಯೆಂತ್ ಪುರ್‍ತಾ...
ಗಡಿ ತಿಳ್ಚೆಂ ಜೀನ್ಸ್ ನಾಕಾ ಮ್ಹಳ್ಳೆಂ
ತೆಂ ಎಕ್ಲ್ಯಾಕ್ ಜಾಲೆಂನಾ
ಚಾಮ್ಕೊಳ್ ದಿಸ್ಚೆಂ ಟೀ-ಶರ್ಟ್ ನಾಕಾ ಮ್ಹಳ್ಳೆಂ
ದುಸ್ರ್ಯಾಕ್ ತೆಂ ಜಾಲೆಂನಾ
ಪಳೆಲ್ಲೆಂ ಪಳೆವ್ನಾ ಮ್ಹಣ್ಚೊ ಹಾಂವ್ ನ್ಹಯ್
ಆತಾಂ ತುಮ್ಚ್ಯಾ ಮಾತ್ಯಾರ್ ಶೆಂಡೆ ನಾಂತ್
ಹರ್ದ್ಯಾರ್ ಬೊಂಗುಲೆ ಮಾತ್ರ್...
ಭೊಗ್ಚೆಂ ಭಾಗ್ ತುಮಿ ದಿತಾನಾ
ಚಾಕ್ಚೆಂ ನಶೀಬ್ ಮ್ಹಜೆಂ..
ಮ್ಹಜ್ಯಾ ಮನಾಂತ್ ತುಮ್ಚ್ಯಾ ಮಾನಾಂತ್
ಮ್ಹಜೇಂಯ್ ಥೊಡೆಂ ಹಕ್ಕ್ ಆಸಾ
ಫುಡೆಂ ತುಮಿ ಕಶೇಂಯ್ ರಾವಾ
ಹಾಂವ್ ಮುಖಾರ್ ಉಲಯ್ನಾ..
ಅಡೇಜ್ ಮಯ್ಲಾಂ ಉಲವ್ನ್ ಚಲ್ಲೊಂ
ತುಜೆ ಜಿಬೆಂತ್ ವಾರೇಂಯ್ ವ್ಹಾಳ್ಳೆಂನಾ
ಆತಾಂ ಡೈರೆಕ್ಟ್ ಪೊಂಯ್ಟಾಕ್ ಯೆತಾಂ
ನ್ಹೆಸೊಂಕ್ ಕಶೇಂಯ್ ಜೀನ್ಸ್ ನ್ಹೆಸ್ಲಾಂಯ್‌ಗೊ
ಪ್ಲೀಜ್ ತೆಂ `ಝಿಪ್' ಘಾಲ್!!
-ನೆಲ್ಲು ಪೆರ್ಮನ್ನೂರ್