ಸಂಪಾದಕೀಯ್
ಚಾ.ಫ್ರಾ.ಚ್ಯಾ ಪಾವನ್ಶಾಂವ್ಯಾ ಜಲ್ಮಾದಿಸಾಕ್
ಒಕ್ಟೋಬರ್ ಧಾ ತಾರಿಕೆರ್ 'ಕೊಂಕಣಿ ಸಾಹಿತ್ಯ್ ಕುಲರತ್ನ್' ದಿವಂಗತ್ ಚಾ.ಫ್ರಾ. ದೆಕೊಸ್ತಾಚೊ ಪಾವನ್ಶಾಂಚೊ ಜಲ್ಮಾದೀಸ್. ಲುವೀಸ್ ಮಸ್ಕರೆಞಾ ಉಪ್ರಾಂತ್ ಜಾಯ್ತ್ಯಾ ಕವಿಂನಿ ಕರ್ನಾಟಕಾಚೆ ಕೊಂಕಣಿ ಕವಿತೆಕ್ ಜಾಯ್ತೆಂ ಯೋಗ್‌ದಾನ್ ದಿಲಾಂ ಜಾಲ್ಯಾರ್‌ಯ್ ಚಾ.ಫ್ರಾ.ನ್ ತಾಕಾ ಏಕ್ ನವಿ ಚಾಲ್ ದಿಲ್ಲಿ. ತಾಚೆ ಸಾವ್ಳೆಂತ್ ವ್ಹಡ್ ಜಾಲ್ಲ್ಯಾ ಜಾಯ್ತ್ಯಾ ಕವಿಂನಿ ಕೊಂಕಣಿ ಕವಿತೆಕ್ ಮರ್‍ಯಾದಿಚೆಂ ಸ್ಥಾನ್ ಫಾವೊ ಕೆಲಾಂ.
`ರಡುಂನಾಕಾ, ಕೊಂಕ್ಣಿ ಬಾಳಾ' ಕವಿತಾ ತಾಚ್ಯಾ ಮರ್‍ಣಾ ನಂತರ್ ಹಾಂವೆಂ ಲಿಖ್‌ಲ್ಲಿ. ತಾಚ್ಯಾ ಕವಿತಾಂತ್ಲೆ, ನಾಟಕಾಂತ್ಲೆ, ಜಿವಿತಾಂತ್ಲೆ ಜಾಯ್ತೆ ಸಂಕೇತಾಂಕ್ ಹಾಂಗಾಸರ್ ಜೀವ್ ದಿಂವ್ಚೆಂ ಪ್ರೇತನ್ ಹಾಂವೆಂ ಕೆಲಾಂ. ಕೊಂಕಣಿ ಕವಿತೆಚೊ ಸೊಂರ್ಗೊ, ಜೊ ಚಾಫ್ರಾನ್ ಕೊಂಕಣಿ ಮೊಳ್ಬಾರ್ ಉಬಯಿಲ್ಲೊ ತೊ ಆಜೂನ್ ಪರ್‍ಯಾಂತ್ ಕೊಂಕಣಿ ದಿಗಂತಾರ್ ಉಬೊನ್ ಆಸಾ - ಪಯ್ಲೆಂಚ್ಯಾಕ್‌ಯ್ ಚಡಿತ್ ವೆಗಾನ್. ತ್ಯಾ ಸೊಂರ್ಗ್ಯಾಚೊ ಧಾಗೊ ಆಮಿ ಸೊಡ್ಚೊನಾಕಾ ಮ್ಹಣೊನ್ ಹಿ ಕವಿತಾ ಉಲೊ ದಿತಾ.
ಹಿ ಕವಿತಾ ಚಾಫ್ರಾಚ್ಯಾ ಜಿವಿತಾಂತ್ಲ್ಯಾನ್ ಆನಿ ಕವಿತೆಂತ್ಲ್ಯಾನ್ ಪಳೆಜಾಯ್ ಪಡ್ತಾ. ಕೊಣ್ ತಶೆಂ ಪಳೆತಾ, ತಾಂಕಾಂ ಹಾಚಿ ರೂಚ್ ಚಡಿತ್ ಲಾಭ್ತಲಿ ಮ್ಹಳ್ಳೊ ಭರ್‍ವಸೊ ಮ್ಹಾಕಾ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ರಡುಂನಾಕಾ, ಕೊಂಕ್ಣಿ ಬಾಳಾ
ರಡುಂನಾಕಾ ಕೊಂಕ್ಣಿ ಬಾಳಾ
ರಡುಂನಾಕಾ ವೊಗೊ
ದೊಳ್ಯಾಂಭಾಯ್ರ್ ಸೊಂರ್ಗೊ ದೆಕುನ್
ಸೊಡಿನಾಕಾ ಧಾಗೊ
ದೊಳ್ಯಾಂಫುಡೆಂ ಆಸ್ತಾಂ ತಾಣೆ
ದರ್ಯಾಲೆಗುನ್ ಚಾಳ್ಳಾ
ಮಿಟಾಕಣಾ ಜೊಡ್ಚೆಖಾತೀರ್
ಮೊರಾಪಾಸುನ್ ಘೊಳ್ಳಾ
ಘೊಳ್ತಾಂ ಘೊಳ್ತಾಂ ಕಾತಿ ಜಾವುನ್
ಮಾತ್ಯೆಂತ್ ಆತಾಂ ಮೆಳ್ಳಾ
ಫೊಂಡಾವಯ್ಲೊ ಚಿವೊ ಸಯ್ತಿ
ಕವಿ ಮಾತ್ಯೆಕ್ ಭುಲ್ಲಾ
ಚಿವ್ಯಾಥಾವುನ್ ಲಿಸಾಂವ್ ಜೋಡ್
ತೊಂಡ್ ಕಿತ್ಯಾಕ್ ಫುಗೊ?
ದೊಳ್ಯಾಂಭಾಯ್ರ್ ಸೊಂರ್ಗೊ ದೆಕುನ್
ಸೊಡಿನಾಕಾ ಧಾಗೊ!
ಖರಸ್ ತಾಚಿ ವಯ್ರ್ ಪಡ್ಲಿ
ಆಶಾ ಮೆಣ್ ಜಾಲಿ
ದಸ್ತುರ್‍ಯಾಂಚೆ ಪಾಜೆಮುಕಾರ್
ತಕ್ಲೊ ದಿಲೊ ಬಲಿ
ಜಿವಿತಾಚ್ಯಾ ನಿಮ್ಣ್ಯಾಕಾಳಾರ್
ಲಾಬ್ಲ್ಯೊ ಮಾನಾದಾಲಿ
ಸೊಂಶ್ಯಾಕಾನ್ ಜೊಡ್ಲೆ ಪುಣ್
ಸೊಸ್ಚೆಂ ತ್ರಾಣ್ ಖಾಲಿ
ಜೀವ್ ದೀವ್ನ್ ರಚ್ಲಾಂ ಸಾಹಿತ್ಯ್
ತಾನ್ ತುಜಿ ಭಾಗೊ
ದೊಳ್ಯಾಂಭಾಯ್ರ್ ಸೊಂರ್ಗೊ ದೆಕುನ್
ಸೊಡಿನಾಕಾ ಧಾಗೊ
ತುಜೆಂ ತಾಚೆಂ ನಾತೆಂ ಆತಾಂ
ಫಕತ್ ಧಾಗ್ಯಾರ್ ಉರ್‍ಲಾಂ
ಧಾಗ್ಯಾ ಪೊಂತಾರ್ ಜಡಾಯ್ ಕಿತ್ಲಿ
ರೊಸಾಳ್ ಕಾವ್ಯೆಂ ಭರ್‍ಲಾಂ
ಸಾಹಿತ್ಯಾಂತ್ಲೆ ರಿವಾಜಿಂಚಿಂ
ತೊಡುನ್ ಕಾಡುನ್ ಕರ್‍ಲಾಂ
ವೆಚೆ ಆದಿಂ ಕೊಂಕ್ಣಿ ಆವಯ್ಕ್
ಜಾಯ್ ತೆ ಶಿರಿನ್ ಪುರ್‍ಲಾಂ
ಜಿವಿತಾಂತ್ಲ್ಯಾ ಹರ್ ಉದೆವಾ
ಕವಿ ಜಾಂವ್ಚ್ಯಾಕ್ ಮಾಗೊ
ಜಾಗೊ ತಾಚೊ ಭರ್‍ತಿ ಕರ್
ಸೊಡಿನಾಕಾ ಧಾಗೊ
-ಮೆಲ್ವಿನ್ ರೊಡ್ರಿಗಸ್
कविता:
रडुंनाका, कोंकणी बाळा
रडुंनाका कोंकणी बाळा
रडुंनाका वोगो
दोळ्यांभायर सोंरगो देकून
सोडीनाका धागो
दोळ्यांफुडें आसतां ताणे
दर्यालेगून चाळ्ळा
मिटाकणा जोडचेखातीर
मोरापासून घोळ्ळा
घोळतां घोळतां काती जावून
मातयेंत आतां मेळ्ळा
फोंडावयलो चिवो सयती
कवी मातयेक भुल्ला
चिव्याथावून लिसांव जोड
तोंड कित्याक फुगो?
दोळ्यांभायर सोंरगो देकून
सोडीनाका धागो!
खरस ताची वयर पडली
आशा मेण जाली
दस्तुऱ्यांचे पाजेमुकार
तकलो दिलो बली
जिविताच्या निमण्याकाळार
लाबल्यो मानादाली
सोंश्याकान जोडले पूण
सोसचें त्राण खाली
जीव दीवन रचलां साहित्य
तान तुजी भागो
दोळ्यांभायर सोंरगो देकून
सोडीनाका धागो
तुजें ताचें नातें आतां
फकत धाग्यार उरलां
धाग्या पोंतार जडाय कितली
रोसाळ काव्यें भरलां
साहित्यांतले रिवाजिंचीं
तोडून काडून करलां
वेचे आदीं कोंकणी आवयक
जाय ते शिरीन पूरलां
जिवितांतल्या हर उदेवा
कवी जांवच्याक मागो
जागो ताचो भरती कर
सोडीनाका धागो
-मेल्विन रोड्रीगस