ಸಂಪಾದಕೀಯ್:
ಆಪ್ಣಾಚ್ಯಾ ಆಧಾರ್ ಖಾಂಬ್ಯಾಕ್‌ಚ್ ವಿಸ್ರೊಂಚೆ ’ಅಸ್ಕತ್’ ಮನೀಸ್
ಅಸ್ಕತ್, ದುಬ್ಳೊ ಮನೀಸ್ ಏಕ್ ಆಪ್ಟೊನ್ ದಾಪ್ಟೊನ್ ಗೆಲ್ಲ್ಯಾ ಜಿವಿತಾಂತ್ ಪಾಯ್ ನೀಟ್ ಕರ್‍ನ್ ಉಬೊ ರಾವೊಂಕ್ ಮಜತೆಚ್ಯಾ ಪಾಂವ್ಯಾಂ ಪೊಂದಾ ಸರ್ಪಡ್ತಾನಾ ಹ್ಯಾ ಅನಿಷ್ಟ್ ಸಂಸಾರಾಂತ್ ಸಯ್ತ್ ಅಪ್ರೂಪ್ ಥೊಡೆಪಾವ್ಟಿಂ ಮಾಡ್ಯೆಪರಿಂ ಸಾವ್ಳಿ ದಿಂವ್ಚೆ, ಆಧಾರ್ ದಿಂವ್ಚೆ ವೆಕ್ತಿ ಆಜೂನ್‌ಯ್ ಉರ್‍ಲ್ಯಾತ್. ಆಧಾರ್ ಲಾಭ್‌ಲ್ಲೊಚ್ ಹ್ಯಾ ಅಸ್ಕತ್ ಶಿರಾಂನಿ ಬಳ್ ಧಾಂವ್ತಾ, ತ್ರಾಣ್ ಭರ್‍ತಾ ಆನಿ ಹ್ಯಾ ಆಧಾರಾಕ್ ವೆಂಗೊನ್ ರಾವೊನ್ ಹೆ ಜೀವ್ ಮೊಳ್ಬಾವೆಲ್ಯಾ ನಕ್ತಿರಾಂಕ್ ಕೊಬ್ಲೆಂ ಧರ್‍ತಾತ್.
ಜಾಯ್ತೆಪಾವ್ಟಿಂ ಆಪ್ಣೆಂ ವೆಂಗೊನ್ ರಾವ್‌ಲ್ಲ್ಯಾ ಆಧಾರಾಚೊ ವಿಸರ್ ಪಡೊನ್ ಮೀಟ್ ಖೆಲ್ಲ್ಯಾ ಘರಾಕ್ ವೀಕ್ ವಾಟ್ಚೆ ಮನೀಸ್ ಕಾಂಯ್ ಹ್ಯಾ ಸಂಸಾರಾಂತ್ ಉಣೆ ನಾಂತ್. ತಸಲ್ಯಾ ಎಕಾ ದ್ರೋಹಾಚಿ ಕವಿತಾ ಹಾಂಗಾಸರ್ ಕವಿ ಪಿ.ಜೆ. ಕರುಗಳ್ನಡೆನ್ ದಿಲ್ಯಾ.
ಕವಿತಾ ಕುಳಾರಾಂತ್ ಪಯ್ಲೆಪಾವ್ಟಿಂ ಹೊ ಕವಿ ಘರ್ ಕರುಂಕ್ ಆಯಿಲ್ಲ್ಯಾವೆಳಾರ್ ತಾಕಾ ಹಾಂವೆಂ ಕವಿಂಚ್ಯಾ ಪಂಗ್ತಿಂತ್ ಶಾಸ್ವಿತ್ ಉರ್‍ಚ್ಯಾಖಾತೀರ್ ಗರ್ಜೆಚೆ ಉಪಾವ್ ಸಾಂಗ್‌ಲ್ಲೆ. ಮ್ಹಜೆ ಉಪಾವ್ ಏಕ್‌ಯ್ ಲೆಗುನ್ ಸೊಡಿನಾಸ್ತಾಂ ಪಾಳುನ್ ತಳ್ಟ್ಯಾಬರಿ ಹೊ ಕವಿ ವಾಡತ್ ಗೆಲಾ. ಬರೆಂ ಮನ್, ಖಾಲ್ತೆಪಣ್, ಭೊಳೆಪಣ್ ಆನಿ ಹಟ್ ಕೆದಳಾಯ್ ಖಂಯ್ಚ್ಯಾಯ್ ಅಸ್ಕತ್ ಮನ್ಶಾಕ್‌ಯ್ ವ್ಹರ್‍ತೊ ಕರುಂಕ್ ಸಕ್ತಾ ಮ್ಹಳ್ಳ್ಯಾಕ್ ಹೊ ಕವಿ ಏಕ್ ಗೊವಾಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ದ್ರೋಹಿ
ಮಾಡ್ಯೆ ರುಕಾ
ಮಾತ್ಯಾವೆರಿ
ಪಾನ್ವೆಲ್ ಅಶಿ ಚರ್‍ಲಿ
ಮ್ಹಜೆ ಮತಿಂ
ಕುಡಿ ವಯ್ರ್
ಹಾಂವೆ ತುಕಾ
ಸೊಡ್ಲಿ
ಖಾಂಖ್ಯೆಂತ್ ಮ್ಹಜ್ಯಾ
ಬೊಟಾಂ ಘಾಲುನ್
ಕುಚುಲ್ಯೊ ಕರುನ್
ಖೆಳ್ಳಿಯ್
ಪಾಂಯಾಂಥಾವ್ನ್
ತಕ್ಲೆ ಪರ್‍ಯಾಂತ್
ಹೆಮ್ಗಾಲಾಪರಿಂ
ಲೊಳ್ಳಿಯ್
ಮ್ಹಜ್ಯಾ ಪಾನಾಕ್
ತುಜೆಂ ಪಾನ್
ಮ್ಹಜೆ ದುಕಿಂಕ್
ತುಜೆಂ ದೂಕ್
ಏಕ್ ಜಾವ್ನ್
ರಾವ್ಲಿಯ್
ಮ್ಹಜ್ಯಾ ಹರ್ಧ್ಯಾ
ಕುಡಿವಯ್ರ್
ಮೇಣ್ ಜಾವುನ್
ಗಳ್ಳಿಯ್
ಮಜೆಂ ಪಾಳ್
ಸುಕೊಂಕ್ ಲಾಗ್ಲೆಂ
ತಕ್ಲೆ ಚಿಗುರ್
ಬಾವೊಂಕ್ ಲಾಗ್ಲೆಂ
ಮಜೆ ಕುಡಿರ್
ಖೆಳ್ಚಿ ವಾಲ್
ದಾಕಂವ್ಕ್ ಲಾಗ್ಲಿ
ಆಪ್ಲಿ ಚಾಲ್
ಹಳೂ ಮ್ಹಜೆ
ಕುಡಿಥಾವ್ನ್
ಮೆಕ್ಳಿ ಜಾವ್ನ್
ಚಲ್ಲಿ!
(ಹೆಮ್ಗಾಲ್=ಗರಿಯೆಕ್ ಶಿರ್‍ಕೊಂಚೊ ಎಕೆ ಜಾತಿಚೊ ದಿವೊಡ್; ಚಿಗುರ್=ಆಂಕ್ರಿ)
- ಪಿ.ಜೆ. ಕರಗಳ್ನಡೆ, ಬಾರ್ಕುರ್