ಸಂಪಾದಕೀಯ್:
ಕಾಳ್ಜಾ-ಮನಾಚ್ಯೊ ದುಕಿ ಶಮನ್ ಕರ್‍ಚ್ಯೊ ಕವಿತಾ
ದೆವಾಧೀನ್ ಲುವಿಸ್ ಪಾವ್ಲ್ ಬೊತೆಲಾಚ್ಯೊ ಕವಿತಾ ವಾಚ್ತಾನಾ ಹಾಶ್ಯಾಂಚೊ ಜೊ ಸಂಸಾರ್ ಉಬೊ ಜಾತಾ, ತಾಂತ್ಲ್ಯಾನ್ ಕಾಳ್ಜಾ-ಮನಾಚ್ಯೊ ದುಕಿ ಸಗ್ಳ್ಯೊ ಥೊಡ್ಯಾ ಕಾಳಾಕ್ ತರೀ ಶಮನ್ ಜಾತಾತ್. ಕಾಂಯ್ ಪನ್ನಾಸ್ ವರ್ಸಾಂ ಆದಿಂ ‘ರಾಕ್ಣೊ’ ಪತ್ರಾರ್ ಪರ್ಗಟ್ ಜಾಲ್ಲಿ ಕವಿತಾ ಹಾಂಗಾಸರ್ ದಿಲ್ಯಾ. ಹಿ ಕವಿತಾ ವಾಚ್ತಾಸ್ತಾನಾ ಫಾತರ್ ಕಾಳೀಜ್ ಲೆಗುನ್ ಆಪ್ಲಿಂ ಧಾರುಣ್ ಖೊವ್ಳಾಂ ಹೊಗ್ಡಾವ್ನ್ ಘೆವ್ನ್ ಹಾಸೊಂಕ್ ಲಾಗನಾಸ್ತಾಂ ರಾವಶೆಂನಾ. ತಿತ್ಲೀಯ್ ತಾಕತ್ ಹ್ಯಾ ಕವಿತಾಂಕ್ ಆಸಾ.
ಏಕ್ ಕಿರಿಸ್ತಾಂವ್ ಯಾಜಕ್ ಜಾವ್ನ್ ಫಾ. ಬೊತೆಲಾನ್ ಲಿಖ್‌ಲ್ಲ್ಯೊ ಕವಿತಾ ವಾಚ್ಲ್ಯಾರ್, ತಾಣೆಂ ಧರ್ಮಾಚ್ಯಾ ಪಾಗೊರಾಂ ಭಿತರ್ ರಾವೊನ್‌ಯ್ ಕಾಯಿಂಚ್ ಫಿಕಿರ್ ನಾಸ್ತಾನಾ ಇಗರ್ಜೆ ಭಿತರ್‍ಲ್ಯೊ ಗಜಾಲಿ ಭೋವ್ ಮಾರ್ಮಿಕ್ ರಿತಿನ್ ಹಾಸವ್ನ್ ಹಾಸವ್ನ್ ಲೊಕಾಕ್ ದಿಲ್ಲೆ ಸಂಗ್ತಿಚಿ ತಾರೀಫ್ ಕರಿಜಾಯಿಚ್ ಪಡ್ತಾ. ಥಕೊನ್ ಗೆಲ್ಲ್ಯಾ ಮನ್ಶಾಚ್ಯಾ ಮನಾಕ್ ಗರ್ಜೆಚೆಂ ಶರ್ಬತ್ ದೀಂವ್ಕ್ ಪಿಎಲ್‌ಬಿಚ್ಯಾ ಕವಿತಾ ಶಿವಾಯ್ ದುಸ್ರೆಂ ಏಕ್ ವೊಕತ್ ಗರ್ಜ್‌ಶೆಂ ದಿಸನಾ.
ಪಿಎಲ್‌ಬಿನ್ ‘ಕೊಂಕ್ಣಿ ದಿರ್ವೆಂ’ ಧರುನ್ ‘ರಾಕ್ಣೊ’ ‘ಮಿತ್ರ್’ ಪತ್ರಾಂಚೆರ್ ಧಾರಾಳ್ ಕವಿತಾ ಬರಯ್ಲ್ಯಾತ್. ‘ದೇವ್ ಆಮ್ಕಾಂ ಜಾಯ್ ಆಂಕ್ವಾರಿ ಮರಿಯೆ’ ಭಕ್ತಿಕ್ ಗೀತ್ ಪಿಎಲ್‌ಬಿನ್ ಬರಯಿಲ್ಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕೆಳ್ಯಾಂಕ್ ಕಾಜಾರ್, ಅಡ್ಕಳಿ ಯೇಂವ್ ಮುಕಾರ್
ಪಿಕ್ಯಾ ಕೆಳ್ಯಾಂಚೊ ಏಕ್ ಘಡಾಯ್
ಕುಡಾಂತ್ ಉಮ್ಕಳಾಯಿಲ್ಲೊ
ಜೊನಿನ್ ಎಕೇಕ್ ಕೆಳೆಂ ತುಟವ್ನ್
ಅರ್ಧೊ ಕಾಬಾರ್ ಕೆಲೊ
ಬಾಪಾಯ್ಕ್ ಕಳ್ತಚ್, ಜೊನಿಕ್ ಆಪವ್ನ್
ಘಟ್ಟ್ ಕರ್ನ್ ಹಾತಾಕ್ ಧರ್‍ಲೊ
"ಕೆಳಿಂ ಕೊಣೆಂರೆ ಚೊರ್ನ್ ಖೆಲ್ಲಿಂ?"
ಮ್ಹಣೊನ್ ವಿಚಾರ್ ಕೆಲೊ
"ಹಾಂವೆಂ ಕೆಳಿಂ ಚೊರುಂಕ್‌ಚ್ ನಾಂತ್"
ಮ್ಹಣ್ತಾ ಜೊನಿ ನರ್ಗೊನ್
"ಕೆಳಿಂ ಕಾಡ್ಲಲಿಂ ವ್ಹಯ್ ತರಿ
ಖೆಲ್ಯಾಂತ್ ಸಕ್ಡಾಂಕ್ ಸಾಂಗೊನ್.
"ಹರ್ಯೆಕ್ ಕೆಳೆಂ ಖಾಂವ್ಚ್ಯಾ ಆದಿಂ
ತಾಚ್ಯೊ ಸಾಲಿ ಕಾಡ್ಲ್ಯೊ
ಸೊಲ್ಲೆಂ ಕೆಳೆಂ ಹಾತಾಂತ್ ಕಾಣ್ಘೆವ್ನ್
ಅಶ್ಯೊ ಚಿಟಿ ವಾಚ್ಲ್ಯೊ.
"ಜೊನಿಚೆಂ ತೊಂಡ್ ಕೆಳ್ಯಾಲಾಗಿಂ
ಆತ್ತಾಂ ಜಾತಾ ಕಾಜಾರ್
ಮುಕಾರ್ ಯೆಯಾ, ವೆಗ್ಗಿಂ ಸಾಂಗಾ
ಕಸ್ಲೀಯ್ ಆಡ್ಕಳ್ ಆಸ್ಲ್ಯಾರ್"
"ಕೊಣ್‌ಚ್ ಮುಕಾರ್ ಯೇಂವ್ಕ್ ನಾ ದೆಕುನ್
ಆಡ್ಕಳ್ ನಾ ಮ್ಹಣ್ ಚಿಂತ್ಲೆಂ
ಹರ್ಯೆಕ್ ಕೆಳ್ಯಾಚಿ ಚೀಟ್ ವಾಚುನ್
ತೊಂಡಾಕ್ ಕಾಜಾರ್ ಕೆಲೆಂ"
ಜೊನಿಚ್ಯೊ ಹ್ಯೊ ಜಾಪಿ ಆಯ್ಕೊನ್
ಬಾಪಯ್ ಕುತ್ತ್ ಕರ್ನ್ ಹಾಸ್ಲೊ
ಹಾತಾಂತ್ ಬರೆಂಶೆಂ ಬೆತ್ ಕಾಣ್ಘೆವ್ನ್
ಅಶೆಂ ಮ್ಹಣೊಂಕ್ ಲಾಗ್ಲೊ
"ಜೊನಾಚಿ ಪಾಟ್ ಬೆತಾಲಾಗಿಂ
ಆತ್ತಾಂ ಜಾತಾ ಕಾಜಾರ್
ಮುಕಾರ್ ಯೆಯಾ, ವೆಗ್ಗಿಂ ಸಾಂಗಾ
ಕಸ್ಲೀಯ್ ಆಡ್ಕಳ್ ಆಸ್ಲ್ಯಾರ್"
"ಮ್ಹಜಿ ಕಠಿಣ್ ಆಡ್ಕಳ್ ಆಸಾ"
ಬೊಬ್ ಮಾರ್ನ್ ಮ್ಹಣ್ತಾ ಜೊನಾ
"ಬೆತಾಲಾಗಿಂ ಹಿ ಪಾಟ್ ಮ್ಹಜಿ
ಭಿಲ್ಕುಲ್ ಕಾಜಾರ್ ಜಾಯ್ನಾ"
ಬಾಪಯ್ ವೊಮ್ತೊ ಪಡೊನ್ ಹಾಸ್ಲೊ
ಜೊನಾಚೊ ಹಾತ್ ಸೊಡ್ಲೊ
ಉರ್‍ಲಲೊ ತೊ ಅರ್ಧೊ ಘಡಾಯ್
ಜೊನಾಕ್ ಇನಾಮ್ ದಿಲೊ!
-ಪಿ.ಎಲ್.ಬಿ. (ಮಾ. ಬಾಪ್ ಪಾವ್ಲ್ ಲುವಿಸ್ ಬೊತೆಲ್)
संपादकीय:
काळजा-मनाच्यो दुकी शमन करच्यो कविता
देवाधीन लुवीस पावल बोतेलाच्यो कविता वाचताना हाश्यांचो जो संवसार उबो जाता, तांतल्यान काळजा-मनाच्यो दुकी सगळ्यो थोड्या काळाक तरी शमन जातात. कांय पन्नास वरसां आदीं ‘राकणो’ पत्रार पर्गट जाल्ली कविता हांगासर दिल्या. ही कविता वाचतासताना फातर काळीज लेगून आपलीं धारूण खोवळां होगडावन घेवन हासोंक लागनासतां रावशेंना. तितलीय ताकत ह्या कवितांक आसा.
एक किरिस्तांव याजक जावन फा. बोतेलान लिखल्ल्यो कविता वाचल्यार, ताणें धर्माच्या पागोरां भितर रावोनय कायिंच फिकीर नासताना इगर्जे भितरल्यो गजाली भोव मार्मीक रितीन हासवन हासवन लोकाक दिल्ले संगतिची तारीफ करिजायीच पडता. थकोन गेल्ल्या मनशाच्या मनाक गर्जेचें शरबत दीवंक पिएलबीच्या कविता शिवाय दुसरें एक वोकत गर्जशें दिसना.
पिएलबीन ‘कोंकणी दिर्वें’ धरून ‘राकणो’ ‘मित्र’ पत्रांचेर धाराळ कविता बरयल्यात. ‘देव आमकां जाय आंकवारी मरिये’ भक्तीक गीत पिएलबीन बरयिल्लें.
-मेल्विन रोड्रीगस
कविता:
केळ्यांक काजार, अडकळी येंव मुकार
पिक्या केळ्यांचो एक घडाय
कुडांत उमकळायिल्लो
जोनीन एकेक केळें तुटवन
अर्धो काबार केलो
बापायक कळतच, जोनीक आपवन
घट्ट कर्न हाताक धरलो
"केळीं कोणेंरे चोर्न खेल्लीं?"
म्हणोन विचार केलो
"हांवें केळीं चोरुंकच नांत"
म्हणता जोनी नर्गोन
"केळीं काडललीं व्हय तरी
खेल्यांत सकडांक सांगोन.
"हऱ्येक केळें खांवच्या आदीं
ताच्यो साली काडल्यो
सोल्लें केळें हातांत काणघेवन
अश्यो चिटी वाचल्यो.
"जोनिचें तोंड केळ्यालागीं
आत्तां जाता काजार
मुकार येया, वेग्गीं सांगा
कसलीय आडकळ आसल्यार"
"कोणच मुकार येवंक ना देकून
आडकळ ना म्हण चिंतलें
हऱ्येक केळ्याची चीट वाचून
तोंडाक काजार केलें"
जोनिच्यो ह्यो जापी आयकोन
बापय कुत्त कर्न हासलो
हातांत बरेंशें बेत काणघेवन
अशें म्हणोंक लागलो
"जोनाची पाट बेतालागीं
आत्तां जाता काजार
मुकार येया, वेग्गीं सांगा
कसलीय आडकळ आसल्यार"
"म्हजी कठीण आडकळ आसा"
बोब मार्न म्हणता जोना
"बेतालागीं ही पाट म्हजी
भिल्कूल काजार जायना"
बापय वोमतो पडोन हासलो
जोनाचो हात सोडलो
उरललो तो अर्धो घडाय
जोनाक इनाम दिलो!
-पी.एल.बी. (मा. बाप पावल लुवीस बोतेल)