ಸಂಪಾದಕೀಯ್:
ಠರಾವಣೆಂಕ್ ಚಡ್ಪಡ್ತಲ್ಯಾಂಕ್ ಹೆ ಕವಿತೆಂತ್ ಶಿಕೊಂಕ್ ಆಸಾ
ಕೊಂಕಣಿ ಕವಿತಾ ಶೆತಾಕ್ ಎಕಾ ಅಪ್ರೂಪ್ ವಿಷಯಾಚೆರ್ ಕಾಂಯ್ ಪಯ್ಲೆಪಾವ್ಟಿಂ ಏಕ್ ಕವಿತಾ ಪ್ರವೇಶ್ ಜಾಲ್ಲ್ಯಾಬರಿ ದಿಸ್ತಾ. ಆಮಿ ಪ್ರಕೃತಿ ವಯ್ರ್, ಮೊಗಾವಿಶಿಂ, ಧರ್ಮಾವಿಶಿಂ, ಗಾಂವಾವಿಶಿಂ ಕವಿತಾ ದೀವ್ನ್ ಆಯ್ಲ್ಯಾಂವ್. ಆಯ್ಲೆವಾರ್ ಕಾಂಯ್ ರಾಜಕೀಯ್ ಗಜಾಲೀಯ್ ಕವಿತಾದ್ವಾರಿಂ ವಾಚುಂಕ್ ಮೆಳ್ಳ್ಯೊ. ಗೊಂಯಾಂತ್ ಕಾಶಿನಾಥ್ ಶಾಂಬಾ ಲೊಳಿಯೆಂಕಾರಾನ್ `ವಾಸುಚೆಂ ಕಾಂತಾರ್', `ಸೆಲ್ಫ್ ನ್ಯೂಡ್ ಪೊಯೆಟ್ರಿ' ಅಶೆಂ ವೆಗ್ಳ್ಯಾಚ್ ಥರಾಚ್ಯೊ ಕವಿತಾ ಬರವ್ನ್ ವೀಸ್ ವರ್ಸಾಂಚ್ ಉತರ್‍ಲಿಂ. ಆತಾಂ ಪಿ.ಜೆ. ಕರುಗಳ್ನಡೆನ್ ಎಲೆಕ್ಟ್ರಿಕ್ ವಯರಾಂಚೆರ್ ಏಕ್ ಸೊಭಿತ್ ಕವಿತಾ ಹಾಂಗಾ ವಿಣ್ಲ್ಯಾ.
ವಿಷಯಾಂ ಖಾತೀರ್ ಚಡ್ಪಡ್ಚ್ಯಾ ಆಮ್ಚ್ಯಾ ಕವಿಂನಿ ಹಾಂಗಾಥಾವ್ನ್ ಶಿಕೊಂಕ್ ಜಾಯ್ತೆಂ ಆಸಾ. ಕವಿಚೆಂ ಚಿಂತಪ್ ಖಂಯ್ಚೆದಿಶಿಂ ವ್ಹಾಳೊಂಕ್ ಸಾಧ್ಯ್ ಆಸಾ ಮ್ಹಳ್ಳ್ಯಾಕ್ ಹಿ ಕವಿತಾ ಏಕ್ ಬರಿ ರುಜ್ವಾತ್. ವಿಜೆಚಿಂ ವಯರಾಂ ಆಮಿ ಲ್ಹಾನ್‌ಪಣಾಥಾವ್ನ್ ಪಳೆವ್ನ್ ಆಯ್ಲ್ಯಾಂವ್, ಪುಣ್ ಕವಿತಾ ಬರಯ್ತಲ್ಯಾಂನಿ ತಾಂಚಿಂ ಇಂದ್ರಿಯಾಂ ತಾಂಚೆರ್ ಉಗ್ತಿಂ ದವರ್‍ಲಿಂನಾಂತ್.
ಪಿ.ಜೆ. ಕರುಗಳ್ನಡೆ ವಿಶೇಸ್ ಭರ್ವಶ್ಯಾಚೊ ಕವಿ. ತಾಚಿ `ನಿಮಾಣಿ ಸೈರಿಕ್' ಕವಿತಾ ಯೆದೊಳ್‌ಚ್ ದುಬಾಯಾಂತ್ ಫಾಮಾದ್ ಜಾಲ್ಯಾ. ಆತಾಂ ಹೆ ಕವಿತೆದ್ವಾರೀಂಯ್ ತೊ ಸರ್ವಾಂಚಿಂ ಕಾಳ್ಜಾಂ ಜಿಕೊಂಕ್ ಪಾವ್ತಲೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಮಿ ತೆಗಿ ಭಯ್ಣಿ
ತಾಂಬ್ಡೆಂ
ಹಳ್ದುವೆಂ
ನಿಳ್ಶೆಂ
ಆಮಿ ತೆಗಿ ಭಯ್ಣಿ
ಹೊ ರಂಗ್ ಆಮ್ಚ್ಯಾ
ಆಂಗ್ಲ್ಯಾಂಚೊ
ಆಮಿ ತುಮ್ಕಾಂ ದಿಸನಾಂವ್
ರಂಗಾನ್ ತುಮಿ ವೊಳ್ಕತಾತ್
ಕೊಣೀ ಆಮ್ಕಾಂ ಧರುಂಕ್ ಸಕನಾ
ಚಲೊಂಕ್ ಆಮ್ಕಾಂ ಕಳಿತ್ ನಾ
ಆಮಿ ಧಾಂವ್ತಾಂವ್
ಬಳ್ ಆಮ್ಚೆಂ ಹಸ್ತಿಚೆಂ
ಕಾಮ್ ಆಮ್ಚೆಂ ರಾಕ್ಸಾಚೆಂ
ವಾರ್‍ಯಾವೆಗಾನ್ ಧಾಂವ್ತಾಂವ್
ಘಡ್ಯೆಭಿತರ್ ಲಿಪ್ತಾಂವ್
ಆಮಿ ತೆಗಿ ಭಯ್ಣಿ
ಎಕಾಮೆಕಾ ದುಸ್ಮಾನಾಂ
ರಾಗಾಕ್ ಆಮ್ಚ್ಯಾ ಗಡ್ ನಾ
ಹಾಕಾ ಕಸ್ಲೀಯ್ ತಡ್ ನಾ
ಕೆನ್ನಾಂ ಕೆನ್ನಾಂ ಉಮೊ ದಿತಾಂವ್
ಉಜ್ಜೊ ಆನಿ ಇಂಗ್ಳೊ ಹಾಗ್ತಾಂವ್
ಅಸ್ಲೊ ಆಮ್ಚೊ ಧಾರುಣ್ ಮೋಗ್
ಸಗ್ಳೆಂ ಕುಟಮ್ ರಂಗಾಂಚೆಂ
ಹಳ್ದುವ್ಯಾ ಸಂಗಿಂ ಪಾಚ್ವೆಂ ಆನಿ ಕಾಳೆಂ
ಆಸಾತ್ ವಿವಿಧ್ ರಂಗ್, ಸಗ್ಳಿಂ ದುಸ್ಮಾನಾಂ
ಆಮಿ ಭೊಂವ್ತಾಂವ್ ತುಮ್ಚ್ಯಾ ಘರಾಂತ್
ತುಮ್ಚ್ಯಾ ಘರ್‍ಚೊ ಮುಲ್ಯಾನ್ ಮುಲೊ ಜಾಣಾಂವ್
ಆಮ್ಚೆ ಬಗರ್ ತುಮ್ಚಿ ರಾತ್ ಸರನಾ
ಆಮ್ಚೆವಿಣೆಂ ತುಮ್ಚೊ ರಗ್ಡೊ ಘುಂವನಾ
ತುಮ್ಕಾಂ ಆಜ್ ನೆಣಾಂವ್ ಆಮಿ
ಅಶೆಂ ಜರ್ ಸಾಂಗ್ಶಾತ್ ತುಮಿ
ಘಾಸಾಕ್ ಆಮ್ಚ್ಯಾ ಮೆಳ್ಶಾತ್ ತರ್
ವೊಳ್ಕೊಂಕ್ ಪಾಂವ್ಚೆನಾಂತ್ ತುಮ್ಕಾಂಚ್ ತುಮಿ
ತುಮ್ಚೆಂ ಘರ್ ಉಜ್ವಾಡಾಂವ್ಚಿಂ ಆಮಿ ತುಮ್ಚಿಂ ಸೆವಕಾಂ
ತಾಂಬ್ಡಿಂ, ಹಳ್ದುವಿಂ ಆನಿ ನಿಳ್ಶಿಂ ವಯರಾಂ!
- ಪಿ.ಜೆ. ಕರಗಳ್ನಡೆ, ಬಾರ್ಕುರ್