ಸಂಪಾದಕೀಯ್:
ಕಿರ್‍ಲಾರ್ ಇತ್ಲೊ, ವಾಶ್ಯಾರ್ ಕಿತ್ಲೊ? ಕಾಂಡಿಯೆರ್ ಇತ್ಲೊ, ಬೊಂಡಿಯೆರ್ ಕಿತ್ಲೊ?
ಪಾವ್ಸಾಚೆ ಎಕೆ ಸಾಂಜೆಂತ್ಲ್ಯಾನ್ ಪಾಶಾರ್ ಜಾವ್ನ್ ಸಗ್ಳೆ ಜಿಣ್ಯೆಂತ್ ಸಕಾಳ್ ಫುಲಂವ್ಚಿ ಕವಿತಾ ಹಿ. ಮಾಗೀರ್ ಹ್ಯಾ ಪಾವ್ಸಾಕ್ ಶೆಳ್ ಜಾಯ್ತ್ ಮ್ಹಳ್ಳಿ ಭಿರಾಂತ್, ವ್ಹಾಳ್ ಉತರ್‍ತಾನಾ ಅವ್ಫಡ್ ಜಾಯ್ತ್ ಮ್ಹಳ್ಳಿ ಭಿರಾಂತ್ ಧೊಸ್ತಾ ಧೊಸ್ತಾನಾ ಪಾವ್ಳ್ಯಾಂಕ್ ಮುದೊ ಜಾವ್ನ್ ಜೀವ್ ಉಬೆಕ್ ಆಶೆತಾನಾ ಬಯ್ಲಾಂತ್ ಸಗ್ಳ್ಯಾ ದೊಗಾಂಚ್ ಮ್ಹಳ್ಳಿ ಖುಶಿ ಪಾವ್ಸಾ ತಿತ್ಲೀಚ್ ಭರೊನ್ ವೊಮ್ತತಾ.
ಆಂಟನಿ ಬಾರ್ಕುರ್ ಆಚಾನಕ್ ಕೊಂಕಣಿ ಕವಿತೆಚ್ಯಾ ಮೊಳ್ಬಾರ್ ಉದೆಲ್ಲೊಚ್ ತಾಣೆ ಕವಿತೆಚೊ ಪಾವ್ಸ್ ಜೊ ವೊತ್ಲಾ, ತಾಂತುಂ ಆಮಿ ಸರ್ವ್ ಕಸಲ್ಯಾಯ್ ಭಿರಾಂತೆವಿಣೆಂ, ಖುಶೆನ್ ಭಿಜೊನ್ ಗೆಲ್ಯಾಂವ್. ತಾಚೆ ಕವಿತೆಂನಿ ಬಳ್ವಂತ್ ಠರಾವಣ್ ನಾ ಆಸ್ಯೆತ್, ಪುಣ್ ಏಕ್ ಕುಸ್ಕುಟ್ ವಿಷಯ್ ಲೆಗುನ್ ವಾಪರ್‌ಲ್ಲ್ಯಾ ಪ್ರತಿಮಾಂಚ್ಯಾ ದಗ್ಲ್ಯಾಂನಿ ಜಿ ಗಿರೇಸ್ತ್‌ಕಾಯ್ ಜೊಡುನ್ ಘೆತಾ ತಾಂತುಂ ಆಮ್ಕಾಂ ದಾಧೊಸ್ಕಾಯೆಚೆಂ ಜೆವಣ್ ಲಾಭ್ತಾ.
ಆಂಟನಿಲಾಗಿಂ ಉತ್ರಾಂಚೊ ಜಾದು ಆಸಾ. ತೊ ಕುಂಬಾರಾನ್ ಆವ್ಯಾಲಾಗಿಂ ಖೆಳ್‌ಲ್ಲ್ಯಾಬರಿ, ಉತ್ರಾಂಲಾಗಿಂ ಸಲೀಸಾಯೆನ್ ಖೆಳೊಂಕ್ ಜಾಣಾ. ಫುಡಾರಾಂತ್ ಹ್ಯಾ ಕವಿಥಾವ್ನ್ ಆಪುರ್ಬಾಯೆಚ್ಯೊ, ಉಂಚಾನ್ ಊಂಚ್ ಕವಿತಾ ಆಮಿ ಖಂಡಿತ್ ಆಶೆವ್ಯೆತ್. ಹೊ ಕವಿ ಕಿರ್‍ಲಾರ್ ಇತ್ಲೊ, ತರ್ ವಾಶ್ಯಾರ್ ಕಿತ್ಲೊ? ಕಾಂಡಿಯೆರ್ ಇತ್ಲೊ ಜಾಲ್ಯಾರ್ ಬೊಂಡಿಯೆರ್ ಕಿತ್ಲೊ ಜಾವ್ಯೆತ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಪಾವ್ಸಾಚಿ ಏಕ್ ಸಾಂಜ್
ಅಂತ್ರಳಿಂ ಮಾಂಡ್ಲ್ಯಾಂತ್ ಮೊಡಾಂ, ಪಾತಳ್‌ಸೊ ಕಾಳೊಕ್ ಮುಡ್ಲಾ
ಪಾವ್ಸ್ ಯೆತಾ ಕಿತೆಂಗೀ, ಧಗ್‌ಯ್ ಬರೊಚ್ ಚಡ್ಲಾ
ಸತ್ರಿ ನಾಂಗೊ ಹಾತಿಂತ್, ವೆಗಿಂ ವೆಗಿಂ ಚಲ್ಯಾಂ
ಭಿಜೊನ್ ಘರಾ ಗೆಲ್ಯಾರ್, ಶೆಳ್ ಜಾಯ್ತ್ ಫಾಲ್ಯಾಂ
ವ್ಹಾಳ್ ಉತ್ರೊಂಕ್ ಆಸಾ, ಅವ್ಝಡಾಂತ್ ಜಾಯ್ನಾ ಧಯ್ರ್
ಘಾಟಾರ್‌ಯ್ ಬರೋ ವೊತ್ಲಾ ಖಂಯ್, ಅವ್ರ್ ಯೇತ್ ವಯ್ರ್
ವಾಟ್ ಗುಡ್ಡಾಯ್ ಮಾಣ್ಕುಲ್ಯಾ, ಸಾಂಜ್ ಜಾವ್ನ್ ಆಯ್ಲಿ
ಪಾವ್ಸಾಂತ್ ಜರೀ ಶಿರ್‍ಕಲ್ಯಾರ್, ಫಜಿಂತ್‌ಮುಂಗೋ ವ್ಹಡ್ಲಿ
ಅರೆರೆ ಆಯ್ಲೊಚ್-ಮೂ, ಪಳೆ ಪಾವ್ಸಾಚಿ ಸೋಭ್
ಥಂಯ್ ಥಂಯ್ ಭಿಜ್ಲಾಂಯ್, ಪಳೆಂವ್ಕ್ ದಿಸ್ತಾಯ್ ಖೂಬ್
ವಾರ್‍ಯಾಕ್ ಕಾಂಪ್ತಾ ಕೂಡ್, ಜೀವ್ ಆಶೆತಾ ಊಬ್
ತುಕಾ ಆರಾವ್ನ್ ಚಲೊಂಕ್, ಮ್ಹಾಕಾ ಏಕ್ ನೀಬ್
ನಾಂಗೊರ್ ಆಸಾ ವಾಟೆರ್, ರೆಡ್ಯಾಂಕ್ ಬಾಂಧುನ್ ಘಾಲಾಂ
ರೋಂಪ್ ಸಂಪವ್ನ್ ಲೋಕ್ ಘರಾ ವಚೊನ್ ಜಾಲಾ
ಯೆದ್ಯಾ ವ್ಹಡಾ ಬಯ್ಲಾಂತ್, ಫಕತ್ ಆಮಿ ದೋಗ್
ಚಲ್ತಾಂ ಚಲ್ತಾಂ ಮ್ಹಾಕಾ ಉಮಾಳೊನ್ ಯೆತಾಮೂ ಮೋಗ್
ಜಿಣ್ಯೆಂತ್‌ಯ್ ಯೆತಾ ಪಾವ್ಸ್, ಕೆನ್ನಾಂ ಮೆಳತ್‌ಗೀ ವೋತ್
ಸಾಂಗಾತಾ ಚಲ್ಲ್ಯಾರ್ ಮಾತ್ ಗಾಡಿ ವೊಡಿತ್ ಜೋತ್
ಹಾತ್ ಧರುನ್ ಚಲ್ಯಾಂ, ನಶಿಬಾಂತ್ ಕಿತೆಂಯ್ ಯೇಂವ್
ಮ್ಹಾಕಾ ತುಂಗೊ ಆಧಾರ್, ತುಜಿ ಸತ್ರಿ ಹಾಂವ್
-ಆಂಟನಿ, ಬಾರ್ಕುರ್