ಸಂಪಾದಕೀಯ್:
ಜಿವಿತಾಂತ್ಲೆ ಮಧ್ಯಾನ್ ರಾತಿಂ ಎಕಾನೇಕ್ ಸುರ್ಯೊ ಪರ್ಜಳ್ತಾನಾ!
ಜಿವಿತಾಂತ್ಲೆ ಮಧ್ಯಾನ್ ರಾತಿಂ ಸುರ್ಯಾಚೊ ಪರ್ಜಳ್ ಆಯ್ಲೊ ತರ್, ಕುಸ್ಕಲ್ಲ್ಯಾ ಮನಾಕ್ ಕಿತ್ಲೊ ಸಂತೊಸ್ ಜಾಯ್ನಾ ಜಾಯ್ತ್! ದುಕೇಸ್ತ್ ಕಾಳ್ಜಾಂತ್ ಸುಖಾಚಿಂ ಆಲ್ಪುಲಿಂ ಎಕಾನೇಕ್ ಸುಗಂಧ್ ಪಸ್ರಾಯ್ತಾನಾ, ತೆಂ ಜಡಾಯೆಚೆಂ ಮನ್ ಪಿಸೊಳ್ಯಾಬರಿ ಉಬನಾ ಜಾಯ್ತ್? ಜಿವಿತ್ ಅಶೆಂ ಆಸನಾ, ಪುಣ್ ತಶೆಂ ಜಾಲ್ಲ್ಯಾ ವೆಳಾರ್ ವಾಟೆ ವಾಟೆರ್ ಸಾಳ್ಕಾಂಚೆ ಮಳೆ ದಿಸ್ತಾತ್ ಆನಿ ಜಿಣಿಂಚ್ ಕಸ್ತೂರ್ ಮೊಗ್ರೆಂ ಜಾತಾ.
ನೂತನ್ ಸಾಖರ್‌ದಾಂಡೆ ಕೊಂಕಣಿಚಿ ಮ್ಹಾಲ್ಘಡಿ ಕವಯಿತ್ರಿ. ಅರ್ಥಶಾಸ್ತ್ರ್ ಆನಿ ಮನ್ಶಾಶಾಸ್ತ್ರಾಂತ್ ತಿ ಪದ್ವೆದಾರ್. ಹೆಚ್ ಕವಿತೆಚ್ಯಾ ನಾಂವಾಚೆಂ ತಿಚೆಂ ಪುಸ್ತಕ್ ಪರ್ಗಟ್ ಜಾಲಾಂ. ಹೆ ಕವಿತೆಂತ್ ಜ್ಯೊ ಪ್ರತಿಮಾ ತಿಣೆಂ ಉಬ್ಯೊ ಕೆಲ್ಯಾತ್ ತಾಚಿ ಆಪುರ್ಬಾಯಿಚ್ ವೆಗ್ಳಿ.
ಪಿಂಜ್ರ್ಯಾಂತ್ಲ್ಯಾ ಪಾರ್ವ್ಯಾಂಕ್ ಸುಟ್ಕಾ ಮೆಳ್ಚೆಂ, ಮಳ್ಬಾನ್ ಸಕ್ಲಾ ದೆಂವಲ್ಲ್ಯಾನ್ ಮಾತಿಯೆನ್ ನಿಳ್ಸೊ ರಂಗ್ ಪಾಂಗರ್‍ಚೊ, ಸ್ವಾಸಾ ಸ್ವಾಸಾಂತ್ ನವೆ ಸಂಬಂಧ್ ಘಡೊನ್ ಯೆಂವ್ಚೆ - ಹಿ ಸೊಭಾಯ್ ಚಾಕ್ತಾಂ ಚಾಕ್ತಾಂ ಕಾವ್ಯರಸಿಕಾಂಕ್ ಜಾಂವ್ಚಿ ದಾಧೊಸ್ಕಾಯ್ ವರ್ಣುಂಕ್ ಅಸಾಧ್ಯ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಜೀಣ್ ಜಾಲಿ ಕಸ್ತೂರಿ
ಮಧ್ಯಾನ್ ರಾತಿಂ ಪೆಟ್ಲೆ ದಿವೆ
ಅಂತರ್ಮಳಾಂ ಪರ್ಜಳ್ಳಿಂ
ಪಾಂಜ್ರ್ಯಾಂತ್ಲೆ ಪ್ರಾಣ್-ಪಾರ್ವೆ
ಸುಟ್ಲೆ ಸಗ್ಳೆ ಜಳಿಂ ಮಳಿಂ
ಮಳಬ್ ಪಳೆ ಸಕಯ್ಲ್ ದೆಂವ್ಲಾಂ
ಆತಾಂ ನಿಳೀಚಾರ್ ಮಾತಿ
ಸ್ವಾಸಾ ಸ್ವಾಸಾಂತ್ ಕಿರ್ಲತಾತ್
ನವಿಂ ಲಕ್ಷ್ ಲಕ್ಷ್ ನಾತಿಂ.
ಭುಂಯೆ ಮಾತೆ ಗೊಪಾಂತ್ ಘೆ
ಮನಾಂ ಮನಾಂತ್ಲೆ ದುಖಾ ಕಾಂಟೆ
ದರ್ಯಾ ದೇಗ್ ಭರುನ್ ಗೆಲೆ
ಜಿವಿತಾಂತ್ಲೆ ಸುಖಾ ವಾಂಟೆ
ಸುರ್ಯಾ ಜಾಲಾ ಲಾಮಣ್ ದಿವೊ
ಗರ್ಭ್ ಕುಡಾಂತ್ ಕಾಜುಲೆ
ರಂಧ್ರಾ ರಂಧ್ರಾಂತ್ ಪ್ರಾಣ್ ನವೆ
ಕೊಣೆ ದಿಲೆ? ಕೊಣೆ ದಿಲೆ?
ಝಾಡಾಂ ಪೆಡಾಂಕ್ ಮೊಗಾ ದೊಳೆ
ಮುಕ್ತ್ ನವಿ ಧರ್ತರಿ
ವಾಟೆ ವಾಟೆರ್ ಸಾಳ್ಕಾ ಮಳೆ
ಜೀಣ್ ಜಾಲಿ ಕಸ್ತುರಿ!
-ನೂತನ್ ಸಾಖರ್‌ದಾಂಡೆ