ಸಂಪಾದಕೀಯ್:
ಪಾವ್ಸಾಚೆಂ ರಡ್ಣೆಂ ಆನಿ ಪಾತ್ತೆದಾರಾಚಿಂ ಕಾಮಾಂ
ಆಪ್ಲ್ಯಾ `ಕಿರ್‌ಕಿರ್' ಪುಸ್ತಕಾದ್ವಾರಿಂ ಕೊಂಕಣಿ ಕವಿತಾ ಶೆತಾಕ್ ಪಾಂಯ್ ತೆಂಕ್‌ಲ್ಲ್ಯಾ ಶಿವಾನಂದ ಶೆಣೈಚಿ ಹಿ ಕವಿತಾ ತಾಚೆಂ ದುಸ್ರೆಂ ಪುಸ್ತಕ್ `ಚಾಂಗ್‌ಪಣಾಚಿ ಸಾಂತ್' ಪುಸ್ತಕಾಥಾವ್ನ್ ವಿಂಚ್ಲ್ಯಾ. ಶಿವಾನಂದ ಶೆಣೈಚ್ಯೊ ಕವಿತಾ `ಪ್ರಿಸಮ್' ಬರಿ ಮ್ಹಣ್ತಾ ಕವಿ ಶರತ್‌ಚಂದ್ರ ಶೈಣೈ. ವ್ಯಕ್ತಿ ಜಿವಿತಾಂತ್ಲೆ, ಮನೀಸ್ ಸಮಾಜಾಂತ್ಲೆ, ಸೈಂಭಾಂತ್ಲೆ ಆನಿ ಪುರಾಣಾಂತ್ಲೆ ಆಗ್ಳೆ ವೆಗ್ಳೆ ಸುಕ್ಷೀಮ್, ರಂಗ್ ರಂಗ್ಯಾಳಿಂ ಚಿತ್ರಾಂ ತಾಂತುಂತ್ಲ್ಯಾನ್ ಆಸ್ವಾದಕಾಂಚ್ಯಾ ದೊಳ್ಯಾಂ ಸಾಮ್ಕಾರ್ ಶಿಂಪ್ಡೊನ್ ಪಡ್ತಾತ್.
ಕೇರಳ ಕೊಂಕಣಿ ಸಾಹಿತ್ಯ್ ಮಳಾರ್ ಬೋವ್ ಥೊಡ್ಯಾ ಲೇಖಕಾಂಚಿಂ ನಾಂವಾಂ ಆಮ್ಕಾಂ ಆಯ್ಕೊಂಕ್ ಮೆಳ್ತಾತ್. ತಾಂತ್ಲ್ಯಾ ತಾಂತುಂ ಶಿವಾನಂದ ಶೆಣೈ ಎಕ್ಲೊ. ತಾಕಾ `ಪಂಡರಿನಾಥ ಪುರಸ್ಕಾರ್' ಲಾಭ್ಲಾ. ಗೊಂಯ್ಚ್ಯಾ ಸುನಾಪರಾಂತ್ ದಿಸಾಳ್ಯಾನ್ ಚೊವ್ದಾ ವರ್ಸಾಂ ಆದಿಂ ತಾಕಾ ಮ್ಹಯ್ನ್ಯಾಚೊ ಕವಿ ಮ್ಹಣೊನ್ ವಿಂಚೊನ್ ಮಾನ್ ಕೆಲಾ.
ಹಾಂಗಾಸರ್ ಏಕ್ ವಿಶಿಷ್ಟ್ ಕವಿತಾ ತಾಚಿ ಆಮಿ ದಿಲ್ಯಾ. ಪಾವ್ಸ್ ರಡೊನ್ ಆಸಾ. ಕೊಣ್ ಆವ್ಸುಬರಿ ರಡ್ತಾ ಮ್ಹಣ್ತಾ ಜಾಲ್ಯಾರ್ ಕೊಣ್ ಬಾಯ್ಲೆಬರಿ ಮ್ಹಣ್ತಾ. ಕವಿ ಮಾತ್ರ್ ಹಾಚ್ಯಾಕ್‌ಯ್ ಮುಕಾರ್ ತಾಂಚೊ ಘೊವ್ ಕೊಣ್ ಮ್ಹಣ್ ವಿಚಾರ್‍ತಾನಾ, ಪಾವ್ಸ್ ಮ್ಹಳ್ಳ್ಯಾ ದುಖಾ ಪಾಟ್ಲೊ ಕಾರಣ್‌ಕರ್ತ್ ತೊ ಕಾಂಯ್ ಡಿಟೆಕ್ಟಿವ್ ಕಸೊ ಸೊಧುನ್ ಕಾಡುನ್ ಆಸಾ ಮ್ಹಳ್ಳೆಬರಿ ಭೊಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಆಷಾಡಾಂತ್ಲೊ ಪಾವ್ಸ್
ಆಷಾಡಾಂತ್ಲೊ ಪಾವ್ಸ್
ಆವಯ್‌ಬರಿ ಮ್ಹಣ್
ಸಾಂಗಿಲ್ಲೆಂ ಕೊಣೆ?
ಆಷಾಡಾಂತ್ಲೊ ಪಾವ್ಸ್
ಬಾಯ್ಲೆಬರಿ ಮ್ಹಣ್
ಸಾಂಗಿಲ್ಲೆಂ ಕೊಣೆ?
ಆಷಾಡಾಂತ್ಲೊ ಪಾವ್ಸ್
ಪಡೊನ್ ಆಸಾ
ರಾತ್ ನಾಸ್ತಾಂ
ದೀಸ್ ನಾಸ್ತಾಂ ಪಡೊನ್ ಆಸಾ!
ದೊಳೆ ಭರೊನ್ ರಡ್ಚೆ
ಹೆ ಬಾಯ್ಲೆಚೊ
ಘೊವ್ ಕೊಣ್?
-ಪಿ.ಎನ್. ಶಿವಾನಂದ ಶೆಣೈ