ಸಂಪಾದಕೀಯ್:
ಉತ್ರಾಂಚಿ ತಾಕ್ಡಿ ಕವಿತೆಚೆ ಜಡಾಯೆ ಮುಕಾರ್ ಭೋವ್ ಅಸ್ಕತ್ ಪಡ್ಲ್ಯಾ
ಎಕಾ ಸುಕ್ರಾರಾ ಹೆಂ ಘಡಿತ್ ಜಾಲ್ಲೆಂ. ಪುಣ್ ಆತಾಂ ಶೆಕ್ಡ್ಯಾಂಚೆ ಶೆಕ್ಡೆ ಸಂಪೊನ್ ಗೆಲೆ ತರೀ ತ್ಯಾ ಎಕಾ ಘಡಿತಾಚ್ಯಾ ನಾಂವಾರ್ ಜಾತಾತ್ ತೆ `ಬಾರಾ ಬ್ರೆಸ್ತಾರ್' ಹಾಂಗಾಸರ್ ಹೆ ಕವಿತೆಂತ್ ವಯ್ರ್ ಪಡ್ಲ್ಯಾತ್. ವೆವೆಗ್ಳಿಂ ಚಿಂತ್ನಾಂ, ಕೆನ್ವಸಾಚೆರ್ ರಂಗ್ ಶಿಂಪೊನ್ ಗೆಲ್ಲ್ಯಾಬರಿ ಹಾಂಗಾಸರ್ ಹೆ ಕವಿತೆಂತ್ ಶಿಂಪೊನ್ ಗೆಲ್ಯಾಂತ್. ಕಠಿಣ್ ಸವಲಾಂ ಉಟಯ್ಲ್ಯಾಂತ್ ಕವಿನ್ ಹೆ ಕವಿತೆ ಮಾರಿಫಾತ್. ತಾಚಿಂ ಸವಲಾಂ ವಾಜ್ಬಿ? ವಾಜ್ಬಿ ನ್ಹಯ್ ತರ್ ಕಿತ್ಯಾಕ್ ಆನಿ ವಾಜ್ಬಿ ವ್ಹಯ್ ತರ್ ಕಿತ್ಯಾಕ್ ಮ್ಹಳ್ಳೆಂ ಸಗ್ಳೆಂ ನಿಯಾಳುಂಕ್ ತುಮ್ಕಾಂಚ್ ಸೊಡ್ತಾಂ.
ಕಿಶೂ ಬಾರ್ಕುರಾಚ್ಯೊ ಕವಿತಾ ಆಮಿ ಹಾಚ್ಯಾ ಆದಿಂ ವಾಚ್ಲ್ಯಾತ್. ಪುಣ್ ಅಸಲೊ ಖತ್ಕತೊ ಹಾಚ್ಯಾ ಆದಿಂ ತಾಚ್ಯಾ ಕವಿತಾಂನಿ ಹಾಂವೆಂ ದೆಖ್‌ಲ್ಲೊ ನಾ. ಹಾಚಿಂ ಕಾರಣಾಂ ಜಾಣಾ ಜಾಂವ್ಚೆಂ ಮ್ಹಾಕಾ ಗರ್ಜೆಚೆಂ ನ್ಹಯ್, ಪುಣ್ ತಸಲ್ಯಾ ಕಾರಣಾವರ್ವಿಂ ಉಬ್ಜಲ್ಲೆ ಹೆ ಆಪುರ್ಬಾಯೆಚೆ ಕವಿತೆಚೆಂ ಮಾಪ್ ಮೆಜುಂಕ್ ಮ್ಹಜ್ಯಾ ಉತ್ರಾಂಚಿ ತಾಕ್ಡಿ ಭೋವ್ ಅಸ್ಕತ್ ದಿಸ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಿರ್ಮೆಂತ್
ತ್ಯಾ ಎಕಾ ಸುಕ್ರಾರಾ
ತುಂ ಫಕತ್ ತೀನ್ ವೊರಾಂ
ದೊನ್ಪಾರಾಂಚ್ಯಾ ಭರಾರ್
ಪೂಣ್ ಆಮ್ಕಾಂ ಮಾತ್
ಹರ್‌ದಿಸಾಚಿಂ
ಚೋವೀಸ್ ವೊರಾಂಯ್
ತುವೆಂ ಪುರ್‌ಲ್ಲ್ಯಾ ಖುರ್‍ಸಾರ್
ತೊ ಜಲ್ಮಲ್ಲ್ಯಾ ಮಂದಿರಾಕ್
ಹಾಚೆ ಪಳ್ಳೆ ತೊರಿರ್
ತಾಚೆ ಘಾಂಟಿ ದೊರ್‍ಯೆಕ್
ಉಮ್ಕಾಳಾವ್ನ್
ಮಾಸಾಂ ಖಾಂವ್ಕ್ ಎಕಾಮೆಕಾಚಿಂ
ಮಿಟಿಯೊ ಮಾರುನ್
ಕೊಚಾವ್ನ್
ಜೆರ್ಬಾಂದ್ ಮಾರುನ್
ದುರ್‍ಬೊಳ್‌ಪಣಾಂತ್ ಶಿಜವ್ನ್
ತೆಲಾಂತ್ ಭಾಜುನ್
ಆಕಾಂತಾಂತ್ ಬುಡೊವ್ನ್
ಘೆಟೆಘೆಟೆ ರಗ್ತಾಂ ಮಧೆ೦
ಮತಿಹೀನ್ ಪಡ್‌ಲ್ಲ್ಯಾ ಮನ್ಶಾಪಣಾಕ್
ಖೊಂಟಾವ್ನ್
ದೇವ್ ಜಾಂವ್ಚ್ಯಾ ಪಿಶೆಪಣಾರ್
ನಾತ್ಯಾಂಚೆಂ ನಾತೆಂ ತುಟೊನ್
ಗೊಬೊರ್ ಇಲ್ಲೊ ಮಾತ್ಯಾರ್ ಶೆಣಾವ್ನ್
ಮೆಲ್ಲ್ಯಾ ದೆವಾಂಕ್
ಊಂಚ್ ಉಬಾರುಂಕ್
ಸರ್‍ಗಾವಯ್ಲ್ಯಾ ಸುಖಾಕ್ ಸೊಧುನ್
ಆಯ್ಚ್ಯಾ ದುಧಾಂತ್ ದೀಕ್
ವೊತುನ್
ಪಾಶಾಂವಾಂ ಪಾಟ್ಲ್ಯಾನ್
ಹಾಡಾಂಕ್ ಧಾಂವ್ಚ್ಯಾ
ಸುಣ್ಯಾಂಬರಿ
ಜಿವಿಂ ಜಿವಿಂ ಖೊಂವ್ಚಾಂ ಉಕ್ಲಾವ್ನ್
ಮೆಲ್ಲೆ ಘಾಯ್ ವರ್‍ಸಾನ್ ವರ್‍ಸಾ
ಪರತ್ ಪರತ್
ಖೊರ್‍ವಟೊನ್ .......
ಬಡ್ಡ್ ಪಡ್‌ಲ್ಲ್ಯೊ ಧೊಮ್ಶಿ
ಗಿನ್ಯಾನ್ ಪೊಕರ್‍ಚ್ಯೊ
ಸಾಣ್ಶಿ......
ಕಾಳ್ಜಾಂ ತೊಪುಂಕ್
ಲಾಲಾಂಬ್ ಭಾಲಿಯೊ
ಪೊಕೊಳ್ ಕಡ್ವಳಾಂನಿ ಮಾತ್
ಝರ್-ಮೆಲ್ಲೆಂ
ರಗತ್ ಆನಿ ಉದಕ್......
ಸಾಂಗ್ ಮ್ಹಾಕಾ
ಸಾಂಗ್ ಮ್ಹಾಕಾ ನಜ್ರೆನಾ
ವಿಚಾರುಂಕ್ ಹಾಂವ್ ಲಜೆನಾ
ಸಾಂಗ್ ಮ್ಹಾಕಾ......
ತ್ಯಾ ಎಕಾ ಸುಕ್ರಾರಾ
ತೀನ್ ವೊರಾಂ
ದೊನ್ಪಾರಾಂಚ್ಯಾ ಭರಾರ್
ತುಕಾಗಿ ತ್ಯಾ ಯಮ್ಕುಳ್ಯಾಂನಿ
ಉಮ್ಕಾಳಾಯಿಲ್ಲೆಂ?
(ಬಿರ್ಮೆಂತ್=ಭೃಮಿದ್)
-ಕಿಶೂ, ಬಾರ್‍ಕುರ್