ಕವಿತಾ ವಾಚನಾಕ್ ಕವಿತಾ ವಿಂಚ್ತಾನಾ ಕಸಲ್ಯೊ ವಿಂಚಿಜಾಯ್?
ಥೊಡ್ಯೊ ಕವಿತಾ, ಕವಿತಾಗೋಶ್ಟಿಂನಿ ಸರ್ವಾಂಕ್‌ಯ್ ದಾಧೊಸ್ ಕರ್‍ಚ್ಯೊ ಆಸ್ತಾತ್. ತಾಂತ್ಲ್ಯಾ ಉತ್ರಾಂ ಉತ್ರಾಂನಿ ಕುಚುಲ್ಯೊ ಜಾಂವ್ಚ್ಯೊ ಆಸ್ತಾತ್. ತ್ಯೊ ಆಯ್ಕತಾನಾ ಖಂತಿ ವಿರಾರಾಯೊ ಏಕ್ ಪಾವ್ಟಿಂ ಶಮನ್ ಜಾತಾತ್. ತಸಲಿ ಏಕ್ ಕವಿತಾ ಹಾಂಗಾಸರ್ ಆಸಾ. ಮಾಯ್ ಸತ್ತಾವೀಸ್ ತಾರಿಕೆರ್ ಹಿ ಕವಿತಾ ವಾಚುನ್ ವಿಲ್ಸನ್ ಕಟೀಲಾನ್ ಸಮೇಸ್ತಾಂಕ್ ದಾಧೊಸ್ ಕೆಲೆಂ. ಹೆ ಕವಿತೆಂತ್ ತರ್‍ನಾಟ್ಯಾಚೆಂ ಪೊಕ್ರಿಪಣ್ ಆಸ್‌ಲ್ಲೆಂ. ಮ್ಹಜೆಲಾಗಿಂ ಬಸೊನ್ ಆಸ್‌ಲ್ಲೊ ಎಕ್ಲೊ ಮ್ಹಣಾಲೊ: "ಕೆದೊಸೊ ಏಕ್ ಲ್ಹಾನ್ ಸಾದೊ ವಿಷಯ್ ಘೆವ್ನ್ ವಿಲ್ಸನಾನ್ ಕಿತ್ಲಿ ಏಕ್ ಸೊಭಿತ್ ಕವಿತಾ ಬರಯ್ಲ್ಯಾ ಪಳೆ!".
ಆಮ್ಚ್ಯಾ ಕವಿಂನಿ ಕವಿಗೋಷ್ಟಿಂನಿ ಕವಿತಾ ವಿಂಚ್ತಾನಾ ಅಸಲೆಂ ಏಕ್ ಚಿಂತಪ್ ದವರಿಜಾಯ್. ಆಯ್ಕತೆಲ್ಯಾಕ್ ಏಕ್ ಪಾವ್ಟಿಂ ವಾಚ್ತಾನಾಂಚ್ ಸಮ್ಜೊಂಚೆ ಕವಿತೆಚಿ ತಾಂಣಿ ವಿಂಚವ್ಣಿ ಕರಿಜಾಯ್. ತವಳ್ ಕವಿತಾ ಮ್ಹಳ್ಳಿ ತಿ ಆಯ್ಕತೆಲ್ಯಾಚ್ಯಾ ಕಾಳ್ಜಾಂತ್ ರಾವ್ತಲಿ, ಕವಿತೆಚೆಂ ಆನಿ ಕವಿಚೆಂ ವ್ಹಡ್‌ಪಣ್ ಗಾಜ್ತಲೆಂ. ಜಶೆಂ ವಿಲ್ಸನಾಕ್ ಜಾಲೆಂ.
ತಿತ್ಲ್ಯಾರ್ ಸಂಪನಾ. ಕವಿತಾ ವಾಚನ್ ಕರ್‍ತಲ್ಯಾಂನಿ ಆಪ್ಲಿ ಕವಿತಾ ಪೇಶ್ ಕರ್‍ಚೆವಿಶಿಂ ಥೊಡೆಂ ತರೀ ಅಭ್ಯಾಸ್ ಕರ್‍ಚೆಂ ಬರೆಂ. ತವಳ್ ಆಮ್ಚ್ಯೊ ಕವಿತಾ ಲೊಕಾಮೊಗಾಳ್ ಕರುಂಕ್ ಸಲೀಸ್ ಜಾತಲೆಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಭುಂಯ್‌ಗೋಳಿಕ್ ಮೆಸ್ತ್ರಿಣ್
ನಿಳೊ ಪಾಲಂವ್ ವಾರ್‍ಯಾರ್ ಉಬವ್ನ್‌ಚ್
ಭಿತರ್ ಸರ್‍ತಾ ಮೆಸ್ತ್ರಿಣ್ ಆಮ್ಚಿ
ಭುಂಯ್‌ಗೋಳ್‌ಚ್ ಕೊವ್ಳುನ್ ಧರ್‌ಲ್ಲ್ಯಾಬರಿ
ಮುಟಿಂತ್ಲಿ ನಕ್ಷಾ ಹಳೂ ಸೊಡವ್ನ್
ವೊಣದಿಕ್ ಖಿಳಾಂವ್ಕ್ ಬಾವ್ಳೊ ಉಬಾರ್‍ತಾನಾ
ಪಳೇತ್ ಬಸ್ತಾಂವ್ ಆಮಿ
ತಿಚ್ಯಾ ಪೆಂಕ್ಟಾಪರ್‍ಯಾಂತ್‌ಯ್ ಪಾವನಾತ್ಲೆ!
ನಾಜೂಕ್ ತಿಚ್ಯಾ ಬೊಟಾ ಇಡ್ಯಾಂತ್
ಸಡಿಳಾಯೆನ್ ಧರ್‌ಲ್ಲಿ ಬಾರೀಕ್ ಬೊಡಿ
ಗಡಿ-ದೊರ್‍ಯಾಂಚಿ ಪರ್‍ವಾ ನಾಸ್ತಾಂ ಖಿಣಾನ್
ಸಂಸಾರ್‌ಭರ್ ಭೊಂವಾಡೊ ಕಾಡ್ತಾ.
ಹೆಂ ವಿಶಾಲ್ ಹರ್ಧೆಂ ಯುರೊಪಾಚೆಂ
ಹಿ ವಿಸ್ತಾರ್ ಪಾಟ್ ಏಶಿಯಾಚಿ
ಹೊ ಅನಾಥ್ ವಿಸ್ವೊ ಆಸ್ಟ್ರೇಲಿಯಾ
ತಿ ಖಾಕಿ ಆಫ್ರಿಕಾಚಿ
ವಯ್ಲೆಂ ಲಾಂಬ್ ನಾಕ್ ಉತ್ತರ್ ಆಮೇರಿಕಾ
ಸಕಯ್ಲೆಂ ಸನ್ನೆಶಿ ಖಾಡ್ ದಕ್ಷಿಣ್ ಆಮೇರಿಕಾ
ಓ... ತೆಂ ಭೆಸಾಂ ಕಾಳೀಜ್ - ಅಂಟಾರ್‌ಟಿಕಾ
ಆಖ್ಖೊ ಸಂಸಾರ್ ಖಿಣಾನ್ ವರ್ಣುಂಚಿ
ಮಧುರ್ ಉತ್ರಾಂಚಿ ಉಡ್ತಿ ಚಾಲ್
ಪಳೇತ್ ಬಸ್ತಾಂವ್ ಆಮಿ
ಪಾಕಟೆ ನಾತ್ಲೆ ಕಾವ್ಳೆ.
ಭಾರತ್‌ಮಾಂಯ್ಚ್ಯಾ ಪಾಂಯಾಂ ಥಳಾ ಹಿಂದೂ,
ಉಜ್ವ್ಯಾಕ್ ಆರ್ಬಿ, ದಾವ್ಯಾಕ್ ಬಂಗಾಳಿ
ಫೆಸಿಫಿಕ್, ಆಟ್ಲಾಂಟಿಕ್
ಎಕ್ಲೊ ಶಾಂತ್, ದುಸ್ರೊ ಉಚಾಂಬಳ್
ಹೊ ಮೆಲ್ಲೊ, ತೊ ಜೀವ್ ಆಸ್‌ಲ್ಲೊ
ಎಕ್ಲೊ ಕಾಳೊ, ಹೊ ತಾಂಬ್ಡೊ
ಹೊ ಘೆಟೊ ಆಂಟಾರ್‌ಟಿಕ್!
ಸಾತ್ ದರ್ಯಾಚೀಂಯ್ ಲ್ಹಾರಾಂ ಪೂರಾ
ಎಕಾಚ್‌ಫಾರಾ ತಿಚ್ಯಾ ವೊಂಟಾರ್ ಉಮಾಳ್ಚೆಂ
ಪಳೇತ್ ಬಸ್ತಾಂವ್ ಆಮಿ
ಬಾಂಯ್ತ್‌ಲೆ ಮಾಣ್ಕೆ!
ಪಾಠ್ ಸಂಪ್ತಚ್ ಆಕ್ರೇಕ್ ಮ್ಹಣ್ತಾ:
"ಸವಾಲಾಂ ಘಾಲ್ತಾಂ ಜಾಗ್ರುತ್ ರಾವಾ".
ಆಮ್ಚ್ಯಾ ದೊಳ್ಯಾಂನಿ ಖಂತಿಚಿಂ ಕುಪಾಂ ಉಬ್ತಾತ್
ದುಸ್ರ್ಯಾಚ್ ಖಿಣಾ ಪುಸುನ್ ಕಾಡ್ಚೆಬರಿ
ಆಪ್ಲೆ ತಾಂಬ್ಶೆ ವೋಂಟ್ ಫುಲವ್ನ್ ಹಾಸ್ತಾ ತಿ.
ನಾಕಾಕ್ ಮಾರ್‍ಚ್ಯಾ ತಿಚ್ಯಾ ಪರ್ಫ್ಯೂಮಾಂತ್
ಮಾತ್ಯೆಚೊ ಪರ್ಮಳ್ ವಿಸ್ರತಾಂವ್ ಆಮಿ!
ನಿಮಾಣೆಂ ಪರತ್ ನಕ್ಷಾ ಕೊವ್ಳುನ್
ಮುಟಿಂತ್ ಘೆವುನ್,
ಅಟ್ಲಾಸ್ ಬೂಕ್ ಆಪ್ಲ್ಯಾ ಹರ್ಧ್ಯಾಕ್ ದಾಂಬುನ್
ಪಾಟಿಂ ಸರ್‍ತಾ ಭುಂಯ್‌ಗೊಳಾಚಿ ಮೆಸ್ತ್ರಿಣ್.
ದಾರಾಲಾಗಿಂ ಪಾವ್ತಾನಾ ಪಾಟಿಂ ಘುಂವ್ತಾ
ಆನಿ ಹಳೂ ದೊಳೊ ಮೊಡುನ್ ವಿಚಾರ್‍ತಾ -
"ಕಶೆಂ ಜಾಲೆಂ, ಆಜ್ ಸಮ್ಜಲೆಂಗಿ?"
ತೆನ್ನಾಂ-
ಕೆನ್ನಾಂಯ್ ಮುಕಾರ್ ಬಸ್ಚೊ ಮಾನಾಯ್
ಆಪುಟ್ ಕೊಂಕ್ಣಿ ಬರ್‌ಪ್ಯಾಚೊ ಪೂತ್
ಉಬೊ ರಾವುನ್ ಉದ್ಗಾರ್‍ತಾ -
"ವೆರಿ ನೈಸ್ ಮ್ಯಾಡಮ್, ಬಿವ್ಟಿಫುಲ್!"
-ವಿಲ್ಸನ್ ಕಟೀಲ್