ಸಂಪಾದಕೀಯ್:
ಆಮ್ಚೊ ಹಾತ್ ಆಮ್ಚ್ಯಾ ಮಾತ್ಯಾರ್
ಆಮ್ಚೊ ಲೋಕ್ ಇತ್ಲೊ ಸುಶಿಕ್ಷಿತ್ ಆಸೊನ್‌ಯ್ ಸಕಾಳಿಂ ಉಟ್ತಾನಾ ದಿಸಾಳ್ಯಾ ಪತ್ರಾಂತ್ ದಿಸಾಚೆಂ ಭವಿಷ್ಯ್ ಕಿತೆಂ ಸಾಂಗ್ತಾ ತೆಂ ವಾಚ್ತಾ. ಮಾಗೀರ್ ಮಾತ್ರ್ ತ್ಯಾ ದಿಸಾ ಕರುಂಕ್ ಆಸ್ಚ್ಯಾ ಕಾಮಾಂವಿಶಿಂ ನಿಚೆವ್ ಜಾತಾ. ಜಿವಿತಾಂತ್ ಖಂಯ್ಚೆಂ ಬರೆಂ, ಖಂಯ್ಚೆಂ ವಾಯ್ಟ್ ಮ್ಹಣೊನ್ ಹಾತಾಚೆ ಗೀಟ್ ದಾಕವ್ನ್ ತುಂವೆಂ ನಿರ್ಧಾರ್ ಕರ್‍ಚೆಂ ಆಜ್ ಸದಾಂಚೆಂ ಜಾಲಾಂ.
ಭುಂಯ್ ಮಂಡಳಾಂತ್ಲ್ಯಾ ಗ್ರಹಾಂ-ನೆಕೆತ್ರಾಂಚಿ ಚಾಲ್ ಆನಿ ಜಲ್ಮಲ್ಲೊ ವೇಳ್ ತಶೆಂ ಜಾಗೊ, ಹ್ಯಾ ಸಗ್ಳ್ಯಾಂಚ್ಯಾ ಅದ್ಭುತ್ ಲೆಕಾಂಚೆರ್ ಹೊಂದೊನ್ ಜಿವಿತಾಚ್ಯೊ ಜಾಯ್ತ್ಯೊ ಸಂಗ್ತಿ ಪಯ್ಲೆಂಚ್ ನಿರ್ಧಾರ್ ಜಾತಾತ್ ಜಾಂವ್ಕ್ ಪುರೊ ಯಾ ಜಿವಿತಾಚೆರ್ ತಾಂಚೊ ಪ್ರಭಾವ್ ಆಸಾ ಜಾಂವ್ಕ್ ಪುರೊ. ಪುಣ್ ಹೆಂ ಸಗ್ಳೆಂ ಪಯ್ಲೆಂಚ್ ಜಾಣಾ ಜಾವ್ನ್, ಜಿವಿತಾನ್ ದಿಂವ್ಚೆ ತಸಲ್ಯಾ ಮಿರ್ಮಿರ್‍ಯಾಂಕ್ ಆಮಿ ಹೊಗ್ಡಾಂವ್ಚೆಂ ಸಾರ್ಕೆಂ ನ್ಹಯ್. ತಾಂತುಂ ಜಿವಿತ್ ಅಳ್ಣಿ ಜಾತಾ.
ಶಿವಾನಂದ ಶೆಣೈ ಗಾಂವಾನ್ ಕೇರಳಾಚೊ. `ಕಿರ್‌ಕಿರ್' ಆನಿ `ಚಾಂಗ್‌ಪಣಾಚೆ ಸಂತ್' ತಾಚಿಂ ಕವಿತಾ ಪುಸ್ತಕಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಿರ್‌ಕಿರ್
ಹಾತಾ ಬೊರೊ ವಾಚುನ್ ಸಾಂಗ್ತಾತ್
ಕಾಲಿ ಕಸ್ಸಿ ಆಸಿಲೊ,
ಫಾಯ್ ತಸ್ಸಿ ಆಸ್ತಲೊ
ಆಮಿ ಆಯ್ಕತಾತ್.
ಮಾತ್ಯಾ ಬೊರೊ ವಾಚುಂಕ್ ಕೋಣ್?
ನಿಮ್ಗಿತಾತ್
ಚೊಯ್ತಾತ್
ವಾಚ್ತಾತ್
ಸಾಂಗ್ತಾತ್
ಆಯ್ಕತಾತ್
ಆಸಾ ಬಾಮುಣ್ ಕೊಚಿ
ಆನಿ ಬಾಯ್ಲ್ ಆಲ್‌ಪಳೆ
ತಿಂ ಫುಡೆ ರಾಬ್ಲಿಂ ಕೊಚಿ
ಆನಿ ಮಾಗೀರ್ ಆಲ್‌ಪಳೆ
ಆತಾಂ ಬಾಮುಣ್ ಕೊಚಿ
ಆನಿ ಬಾಯ್ಲ್ ಆಲ್‌ಪಳೆ
- ತಾಂಗೆಲೆ ಮಾತ್ಯಾರ್ ತಸಲೊ ಬೊರೊ!
ನಾಂವ್ ತ್ಯಾ ಬಾಮ್ಣಾಲೆಂ ವೆಂಕಟ್‌ಪತಿ
ಆನಿ ಬಾಯ್ಲೆಲೆಂ ಲಕ್ಷಿ.
ಆತಾಂಯ್ ತಿಂ ದೂರ್ ಗಾಂವಾಂತ್ ರಾಬ್ತಾತ್
ಬಾಮ್ಣಾನ್ ಬಾಯ್ಲೆಕ್
ಆನಿ ಬಾಯ್ಲೆನ್ ಬಾಮ್ಣಾಕ್
ಸೋಣ್ ದೂರ್‌ಗಾಂವಾಂತ್ ಪರ್‌ಗಾಂವಾಂತ್
ರಾಬ್ಚ್ಯಾಕ್ ತಾಂಗೆಲ್ಯಾ ಮಾತ್ಯಾ ಬೊರೊ!
ಆಬು ವೈದಿಕ್ ಆಸಿಲೊ
ವೈದಿಕಾಲೊ ಪೂತ್ ವಯ್ದಿಕ್ ಕರ್‍ಚೊ
ವೈದ್ಯಾಲೊ ಪೂತ್ ವ್ಯಾಪಾರ್ ಕರ್‍ಚೊ
ವ್ಯಾಪಾರಿಲೊ ಪೂತ್ -
ಕೋಣ್ ಜಾತಲೊ ಮ್ಹಣು ಸಾಂಗ್ಚೊ ಕೋಣ್?
ಹಾಂವ್ ಜಾಲೊಂ ಯಂತ್ರ್ ಚಾಂಗ್ ಕರ್‍ಚೊ
ಮಾಕಾ ಆಸಾ ದೋಗ್ ಪೂತ್
ತಾಂಕಾಂಯ್ ಆಸ್‌ಕಾ ಮಾತ್ಯಾ ಬೊರೊ
ಕೋಣ್ ವಾಚಿತಾ,
ಸಾಂಗ್ತಾ,
ಆಯ್ಕತಾ!
ಆಯ್ಕಲ್ಯಾರ್ ತೆಂ ಕಶೆಂ
ಜಿವಿತಾಂತ್ ಪಾಂವ್ತಾ?
ಆಲ್ತಡಿ ಯೆತಾ
ಪೆಲ್ತಡಿ ವತಾ
ಮಂಚೂವ್ ನಂಯ್ತ್ ಬುಡುನ್ ವತಾ
ಚೊವ್ನ್ ಚೊವ್ನ್ ರಾಬಿಲ್ಯಾ ವೆಳಾರ್
ಜಾಪ್ ದೀನಾತ್ಲೆಂಚ್ ವತಾ
ಉಲೊ ದೀನಾತ್ಲೆಂಚ್ ಮರ್‍ತಾ;
ರಾನಾಂತ್ಲಿ ಹಸ್ತಿ ಗಾಂವಾಂತ್ ಪಾಂವ್ತಾ
ಮೃತ್ಯು ಪಿಶ್ಶೆ ಲಾಗುನ್ ಧಾಂವ್ನ್ ಭೊಂವ್ತಾ
ಕೊಚಿಚೆ ಬಾಮ್ಣಾಕ್ ಖಾಣ್ ಚಡ್; ಜೆವಣ್ ಚಡ್;
ದುಡು ಚಡ್ ಘರ್ ಚಡ್, ನ್ಹೆಸ್ವಣ್ ಭಾಂಗರ್ ಚಡ್;
ಬಾಯ್ಲ್ ದೂರ್ ಮ್ಹಳೆಲ್ಯಾಚೆಂ ದುಖ್ ಚಡ್ ಚಡ್.
ಆಲ್‌ಪಳೆಚೆ ಬಾಯ್ಲೆಕ್ ಖಾಣ್ ಚಡ್, ಜೆವಣ್ ಚಡ್:
ದುಡು ಚಡ್ ಘರ್ ಚಡ್, ನ್ಹೆಸ್ವಣ್ ಭಾಂಗರ್ ಚಡ್;
ಬಾಮುಣ್ ಲಾಗಿ ನಾತಿಲ್ಯಾಚೆಂ ದುಖ್ ಮನಾಂತ್ ಚಡ್.
ಆಲ್ತಡಿ ತೊ
ಪೆಲ್ತಡಿ ತಿ;
ಆಲ್ತಡಿ ಪೆಲ್ತಡಿ ದೋಗ್‌ಯ್ ರಾಬುನ್
ಚೊಯ್ತಾತ್ ದೆಖ್ತಾತ್
ಹಾಸ್ತಾತ್ ಉಳ್ದಿತಾತ್
ಉಲೊ ಘೆತಾತ್
ಧಾಂವ್ನ್ ವಚುನ್ ಪೊಟೊನ್ ಧರುಂಕ್
ಆಶಾ ಕರ್‍ತಾತ್
ಜಾಯ್ನಾತಿಲೆ ರಡ್ತಾತ್....
ಆಲ್ತಡಿ ತೊ
ಪೆಲ್ತಡಿ ತೊ
ಆಲ್ತಡಿ ಪೆಲ್ತಡಿ ದೊಗಂಯ್ ರಾಬುನ್
ರಡ್ತಾತ್..
-ತಾಂಕಾಂ ಏಕ್ ಮಂಚೂವ್ ಖಂಯ್?
ಏಕ್ ಸಾಂಕೊವ್ ಖಂಯ್?
ಅಸ್ಸಿ ಹಾಂವ್ ತುಮ್ಚೆ ಲಾಗಿಂ ನಿಮ್ಗಿತಾಂ
ತುಮಿ ಸಾಂಗ್ತಾತ್:-
ರಾಬಯ್‌ರೆ ತುಗೆಲೆ ಹೆ ಕಿರ್‌ಕಿರ್!
ಹಾಂವ್ ರಾಬಯ್ತಾಂ ಕಿರ್‌ಕಿರ್;
ಅಸ್ಸಿ ಆಸುಕಾ ಮಿಗೆಲೆ ಮಾತ್ಯಾ ಬೋರೊ;
ತುಮ್ಕಾಂ ಹೆ ಕಿರ್‌ಕಿರ್ ಆಯ್ಕೊವ್ಚೊ ಬೊರೊ!
-ಪಿ. ಎನ್. ಶಿವಾನಂದ್ ಶೆಣೈ