ಕವಿತಾ:
ಬಾಜ್ವೆ ಭಿತರ್...
ಹರ್ಧ್ಯಾಚೊ ಕೋಟ್ ಬಾಜು
ಭೊಗ್ಣಾಂಚೊ ಕಾಟ್ ಬಾಜು!
ಬಾಜ್ವೆ ಭಿತರ್ಲೊ ಸಂಸಾರ್‌ಚ್
ವೆಗ್ಳೊಗೆ ಸಾಯ್ಬಿಣಿ!
ಬಾಜ್ವೆ ಭಿತರ್ಲೊ ಸಂಸಾರ್!
ಥಂಯ್ಸರ್...
ಆತುರಾಯೆನ್ ಚೆಪ್‌ಲ್ಲ್ಯಾ ನೊಟಾಂತ್
ಜಿಣಿಯೆ ಮೊಲಾಂ ವಿಕ್ತಾನಾ
ಝೆಂಜ್ರಲ್ಲೊ ಗಾಂಧಿಚೊ ತಕ್ಲೊ ಆಸತ್.
ಕಾಲ್ವಾರ್ ದೊಂಗ್ರಾಚೊ ಖಡ್ಪಿ ಧೊಮೊಸ್ ವಿಸ್ರೊನ್
ಮೊವಾಳಾಯೆಂತ್ ರೊಂಬ್‌ಲ್ಲೊ
ಭಾಂಗಾರ್ ರುಪ್ಯಾಚೊ ಖುರಿಸ್ ಆಸತ್.
ದುಬ್ಳ್ಯಾಂ ಪಾಟಿರ್ ಮಿರಂವ್ಚ್ಯೊ
ಧನಿಯಾಂಚ್ಯೊ ಮುಟಿ ಲಾಚಾರ್ ಕರುನ್
ಬೊಟಾಂ ಕಾಂಪಂವ್ಚಿ ಸಕತ್ ಆಸತ್.
ನೆಂಟ್ಯಾ ಬಾಳಾಚೆಂ ಉಶ್ಟೆಂ ಆಸತ್
ತರ್ನ್ಯಾ ಮೊಗಾಚಿ ವೋಡ್ ಆಸತ್
ದೆಂವೊನ್ ಆಯಿಲ್ಲೊ ಘಾಮಾ ಥೆಂಬೊ ಆಸತ್
ರಸಿಕಾಚಿ ವಿದ್ಯಾ ಆಸತ್
ಕಾಳಿಜ್ ಪಂದಾ ಪಡ್ಲ್ಯಾರೀ
ಹರ್ಧೆಂ ಉಬಾರ್ ಮ್ಹಣ್ ದಾಕಂವ್ಚ್ಯಾಕ್
ಖೊವಯಿಲ್ಲೆಂ ಮೊವಾಳ್ ಸ್ಪಂಜ್‌ಯೀ ಆಸತ್
ನಾಟಕಾಚೊ ಪಾತ್ರ್‌ಧಾರ್ ತರ್
ಸುಕ್ಯಾ ನಾರ್ಲಾಂಚ್ಯೊ
ದರಗ್ ಕಟ್ಟ್ಯೊಯ್ ಆಸ್ತಿತ್.
ಬಾಜ್ವೆ ಭಿತರ್ಲೊ ಸಂಸಾರ್‌ಚ್
ವೆಗ್ಳೊಗೆ ಸಾಯ್ಬಿಣಿ...
ಬಾಜ್ವೆ ಭಿತರ್ಲೊ ಸಂಸಾರ್!
-ವಿಲ್ಸನ್ ಕಟೀಲ್