ಸಂಪಾದಕೀಯ್:
ಕಾಳೊಕಾಚ್ಯಾ ಕುಡಾಂತ್ಲ್ಯಾ ಕುರ್ಡ್ಯಾಚೆ ಕರ್ಕರೆ
ಹೊ ಮನೀಸ್ ಕುಡ್ಡೊ. ಕುಡ್ಡೊ ಕಾಳೊಕಾಚ್ಯಾ ಕುಡಾಂತ್ ಆಸಾ. ಹ್ಯಾ ಕಾಳೊಕಾಚ್ಯಾ ಕುಡಾಂತ್ ಕಾಳೆಂ ಮಾಜರ್ ಏಕ್ ಘುಸ್ಲಾಂ. ಮಾಗೀರ್ ಕಾಣ್ಘೆನಾಂಯ್ ತೆ ಆಟೆವಿಟೆ, ಭ್ಯೆಂ, ಥರ್ಥರೆ, ಕಾವ್ಜೆಣಿ. ಆಕ್ರೇಕ್ ಕೊಣ್‌ಗಿ ಪುನೆಗೆಲ್ಲೊ ಉಜ್ವಾಡಾಚಿ ಪಣ್ತಿ ಘೆವ್ನ್ ಆಯ್ಲ್ಯಾ ಮಾಗೀರ್ ಹೆ ಭ್ಯೆಂ ಪೊಳ್ನ್ ವೆತಾ. ಮಾಗೀರ್ ಕುರ್ಡ್ಯಾಕ್ ಕಾಳೊಕ್ ಯಾ ಉಜ್ವಾಡಾ ಮಧೆಂ ಫರಕ್ ಕಸೊ ಕಳ್ತಾ? ಹೆಂ ಕಾಳೆಂ ಮಾಜರ್ ಖಂಯ್ಚೆಂ? ಹೊ ಪಣ್ತಿ ಘೆವ್ನ್ ಆಯಿಲ್ಲೊ ಕೊಣ್? ಹೊ ಕಾಳೊಕ್ ಕಸಲೊ? ಕುರ್ಡ್ಯಾಕ್ ಕಾಳೆ ಮಾಜರ್ ಕಶೆಂ ದಿಸ್ತಾ? ಸವಾಲಾಂಚಿಂ ಸವಾಲಾಂ ಉದೆತಾತ್ ಆನಿ ಎಕೇಕ್ ಪಾವ್ಟಿಂ ಎಕೇಕ್ ಜಾಪ್ ಮೆಳೊಂಕ್ ಲಾಗೊನ್ ಹಿ ಕವಿತಾ ಕರ್ಕರ್‍ಯಾಂಚಿ ಕಶೆಂ ತುಕಾ ಧೊಸುಂಕ್ ಲಾಗ್ತಾ.
ಹಿ ಕವಿತಾ ಜ್ಯೊ ಪ್ರತಿಮಾ ಉಬ್ಯೊ ಕರ್‍ತಾ ತಾಕಾ ಲೇಕ್ ನಾ. ಹಾಂವೆಂ ಜಿತ್ಲೆ ಪಾವ್ಟಿಂ ಹಿ ಕವಿತಾ ವಾಚ್ಲ್ಯಾ ತಿತ್ಲೆಪಾವ್ಟಿಂ ವೆಗ್ಳ್ಯಾಚ್ ಎಕಾ ಥರಾಚೊ ಅನ್ಭೋಗ್ ಮ್ಹಾಕಾ ಜಾಲಾ. ಹೆ ಕವಿತೆಚ್ಯಾ ವ್ಹಡ್ಪಣಾ ಸಾಂಗಾತಾ ಆಯ್ಲೆವಾರ್ ಕವಿತಾಶೆತಾಕ್ ಪಾವ್ಲ್ ತೆಂಕ್‌ಲ್ಲ್ಯಾ ಆಂಟನಿ ಬಾರ್ಕುರಾಚಿ ವಿಜ್ಮಿತ್ಕಾಯೆಚಿ ವಾಡಾವಳ್ ಮ್ಹಾಕಾ ದಿಸ್ತಾ.
ಆಂಟನಿ ಬಾರ್ಕುರ್ ಕವಿತಾ ಕುಳಾರಾಚೊ ನವೊ ಸೊಧ್. ತಾಚೆ ವಾಡಾವಳಿ ಸಾಂಗಾತಾ ಆಮಿ ವಿಶೇಸ್ ಖುಶಿ ಪಾವ್ತಾಂವ್ ಆನಿ ತಾಚೊ ಕವಿತಾ ಫುಡಾರ್ ಜೈತೆವಂತ್ ಜಾಂವ್ ಆಶೆತಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಕಾಳೆಂ ಮಾಜರ್
ಕಾಳೊಕಾ ಕುಡಾಂತ್ ಕಾಳ್ಯಾ ಮಾಜ್ರಾಕ್
ಚೊವುನ್ ಬಸ್ಲಾಂ;
ಖಂಯ್ ಆಸಾ, ಖಂಯ್ ಆಸಾ-
ಭಿಯೆವ್ನ್ ಥಕ್ಲಾಂ.
ದಾವ್ಲಿ ಮಾರಿತ್, ಸುರೂಪ್ ವಿದ್ರೂಪ್ ಕರೀತ್,
ಗಳ್ಯಾಕ್ ಚಾಬಿತ್, ಉಸ್ವಾಸಾ ನಳಿ ಫಾಪ್ಸಿತ್,
ಪಾಟಿಕಣ್ಯಾಂತ್ ಭಾರೀಕ್ ಶಿರ್ಶಿರೊ.
ಖೊಂಟ್ ಮಾರುಂ, ಮೊಡುಂ ಪೆಂಕಟ್,
ಬೊಡಿ ಹಾಡುಂ, ಧೈರಾಕ್ ಸಾಂಗಾತ್,
ಉಣೆಂ ಜಾಯ್ನಾಂತ್ ದಡ್ಧಡೆ.
ಮಾಜ್ರಾ ಜಾತಿಕ್ ಸಾತ್ ಜೀವ್,
ಕಾಳೊಕಾಂತ್ ಖಂಯ್ ಮಾರುಂ ಧಾಂವ್,
ಅವ್ಯಕ್ತ್ ಅಸಂಗತ್ ಕುಲ್ಕುಲೊ.
ಕುಡಾಂತ್ ಕುಡ್ಡೊ, ಭಿತರ್‌ಚ್ ಘಾಬರ್ತಾಂ,
ಬೊಟಾಂ ತಕ್ಲ್ಯೊ ದೊಳೆ ಜಾತಾತ್, ಸಾಸ್ಪಾತಾಂ,
ದೆಂವನಾ ಭಿಯಾಂ-ತಾಪ್.
ವಾಟೆರ್ ವೆಚೊ ಕೊಣ್‌ಗೀ ಪೆಲೊ,
ಪಣ್ತಿ ಹಾತಿಂ ಘೆವುನ್ ಆಯ್ಲೊ,
ಕಾಳೊಕ್ ನಾ, ಕೂಡ್‌ಯ್ ನಾ, ಮಾಯಾಕ್ ಮಾಜರ್.
-ಆಂಟನಿ, ಬಾರ್ಕುರ್