ಕವಿತಾ:
ಯುರೇಕಾ
ಕಿತ್ಲೊಂ ಹಾಂವ್ ಉಗ್ತೊ ಜಾತಾಂ
ತುಜೆ ಮುಖಿಂ
ತಿತ್ಲ್ಯಾಚ್ ಗುಂಡಾಯೆನ್ ವೊಳ್ಕತಾಯ್ ತುಂ
ಕಿತ್ಲೊಂ ಹಾಂವ್ ಬುಡೊನ್ ವೆತಾಂ
ತುಜೆ ಭಿತರ್
ತಿತ್ಲೆಂಚ್ ಭರೊನ್ ವೊಮ್ತತಾಯ್ ತುಂ
ಹಾಂವ್‌ಗೊ
ತಕ್ಲಿ ತಾಪ್‌ಲ್ಲೊ ಆರ್ಕಿಮಿಡೀಸ್*
ಆನಿ ತೂಂ ಗಿ-
ಶೆಳ್ಯಾ ಉದ್ಕಾಚೆಂ ಬಾತ್ ಟಬ್
ತುಜಿಂ ಲ್ಹಾರಾಂ
ಮ್ಹಜೆ ಖಾಕಿಯೆಂತ್ ರಿಗ್ತಾತ್
ಬೊರಿಯಾಂಕ್ ಮಾರ್‍ತಾತ್
ಹರ್ಧ್ಯಾರ್ ನಾಚ್ತಾತ್
ತಕ್ಲೆಕ್ ಚಡ್ತಾತ್
ಹಾಂವ್‌ಗೊ ಖಿಣಾನ್ ಪಿಸಾಂತುರ್!
ಆನಿ ಹ್ಯಾ ಪಿಸಾಂತುರ್‌ಪಣಾಂತ್
ಕಿತೆಂಗಿ ಝಳ್ಕತಾ ಮ್ಹಾಕಾ
ತತ್ವ್..ಸೂತ್ರ್..ಕಾವ್ಯೆಂ...ವಿಗ್ಯಾನ್...
ಕಿತೆಂಗಿ ಝಳ್ಕಾತಾ ತೆನ್ನಾ,
ಎಕಾಚ್ಚಾಣೆ ಆಸಾ ತಸೋಚ್
ಭಾಯ್ರ್ ಧಾಂವೊನ್ ಬೊಬಾಟ್ತಾಂ-
"ಯುರೇಕಾ.."
ಸುತಾಂ ಸುತಾಂನಿ ಆಂಗ್ ಲಿಪವ್ನ್
ಫ಼ಟ್ಕಿರೊ ವೇಸ್ ಪಾಂಗುರ್‍ತೆಲ್ಯಾಂನೊ...
ಭಾಯ್ಲಿಂ ಫ಼ಕತ್ ನ್ಹೆಸ್ಣಾಂ ಪಳೆವ್ನ್
ಗಿರೇಸ್ತ್‌ಕಾಯ್ ಪಾರ್ಕಿತೆಲ್ಯಾಂನೊ...
ಹಾಂವ್‌ಚ್ ತೆಂ ನಾಗ್ಡೆಂ ಸತ್
ದೊಳೆ ಧಾಂಪಾ ಲಜ್ ದಿಸತ್!
-ವಿಲ್ಸನ್ ಕಟೀಲ್
*ಆರ್ಕಿಮಿಡೀಸ್ ಕ್ರಿಸ್ತಾಪುರ್ವಿಂ ತಿಸ್ರ್ಯಾ ಶೆಕ್ಡ್ಯಾಂತ್ ಜಿಯೆಲ್ಲೊ ಗ್ರೀಕ್ ಗಣಿತ್ ಶಾಸ್ತ್ರಿ, ವಿಗ್ಯಾನಿ ಆನಿ ಇಜ್ನೆರ್. ರಾಯಾಚ್ಯಾ ಭಾಂಗ್ರಾ ಕಿರೀಟಾಂತ್ ಸೊನಾರಾನ್ ರುಪೆಂ ಭರ್ಶಿಲಾಂ ಮ್ಹಳ್ಳೊ ದುಬಾವ್ ಉಟೊನ್ ತೆಂ ಸೊಧುನ್ ಕಾಡ್ಚೆವಿಶಿಂ ತಕ್ಲಿ ತಾಪಯಿಲ್ಲಿ ತಾಣೆ. ಹ್ಯಾಚ್ ಚಿಂತ್ನಾರ್ ಆಸ್ತಾನಾ ನ್ಹಾಣಿಯೆಂತ್ ಬಾತ್ ಟಬ್ಬಾಂತ್ ಬುಡ್‌ಲ್ಲ್ಯಾ ವೆಳಿಂ ಝಳ್ಕಲೆಂ ತಾಕಾ ಸೂತ್ರ್. ಏಕ್ ವಸ್ತ್ ಜೆನ್ನಾ ಉದ್ಕಾಂತ್ ಬುಡ್ತಾ ತೆನ್ನಾ ತಿತ್ಲ್ಯಾಚ್ ಪ್ರಮಾಣಾಚೆಂ ಉದಕ್ ಭಾಯ್ರ್ ವೊಮ್ತತಾ. ಹೆಂಚ್ ತೆಂ ಸೂತ್ರ್. ಸೊಧುನ್ ಕಾಡ್ ಲ್ಲ್ಯಾ ಖಿಣಾ ಎಕಾಚ್ಛಾಣೆ ಆಪ್ಣಾಕ್‌ಚ್ ವಿಸ್ರೊನ್ ಆಸಾ ತಸೋಚ್ ಭಾಯ್ರ್ ಧಾಂವ್‌ಲ್ಲೊ. ಆನಿ "ಯುರೇಕಾ..." ಮ್ಹಣ್ ಬೊಬಾಟುನ್ "ಸಿರೇಕ್ಯೂಸ್" ನಾಂವಾಚೆ ಬಿದಿಂತ್ ವಿಣ್ಗೊ ಪುರ್ಶ್ಯಾಂವ್ ಕಾಡ್‌ಲ್ಲೊ. ತಾಚೆಂ ಸೂತ್ರ್ ಕಾವ್ಯಾಕ್‌ಯೀ ಲಾಗು ಜಾಂವ್ಚೆ ತಸಲೆಂ. ಜರ್ ಕೊಣೀ ಎಕ್ಲೊ ಅನ್ಭೊಗಾಂತ್ ಜಿತ್ಲೊ ಬುಡತ್, ತಿತ್ಲ್ಯಾಚ್ ಪ್ರಭಾವ್ ಭರಿತ್ ಉತ್ರಾಂನಿ ಕಾವ್ಯೆಂ ಭರೊನ್ ವೊಮ್ತತ್.
"ಯುರೇಕಾ" ಗ್ರೀಕ್ ಭಾಶೆಚೊ ಸಬ್ದ್. ಹಾಂವೆಂ ಸೊಧುನ್ ಕಾಡ್ಲೆಂ ವಾ ಹಾಂವ್ ಸೊಧುನ್ ಕಾಡ್‌ಲ್ಲ್ಯಾ ಸಂಭ್ರಮಾಂತ್ ಆಸಾಂ ಮ್ಹಳ್ಳೊ ಅರ್ಥ್.