ಸಂಪಾದಕೀಯ್:
ನಿದೆಚಿಂ ಮ್ಹಯ್ಮಾಂ ಆನಿ ಉಬೆಚಿ ಸಕತ್
ಕಸಲಿ ಏಕ್ ತಾಕತ್ ಹೆ ಕವಿತೆಚಿ ಮ್ಹಣ್ಚೆಂ! ಹರ್‍ಯೆಕ್ ಪಾವ್ಟಿಂ ವಾಚ್ತಾನಾ ಹೆ ಕವಿತೆನ್ ಉಗ್ತಿಂ ಕರ್‍ಚ್ಯಾ ಪಿಂತುರಾಂ ವರ್‍ವಿಂ ಮನಾಕ್ ಪಾಕಟ್ಯಾಂಚೆ ಪಾಕಟೆ ಫುಟ್ತಾತ್. ಎಕೆ ಕುಶೀನ್ ನಿದೆಂತ್ ಮನ್ಶಾನ್ ಜೊಡ್ಚ್ಯಾ ಅಪಾರ್ ಸುಖಾಚೆಂ ವರ್ಣನ್ ಆನಿ ಆನ್ಯೇಕೆ ಕುಶೀನ್ ನಿದೆನ್ ಉಟಂವ್ಚೆ ಉಬೆಚಿ ಉರ್ಬಾಳ್ ಸಕತ್ - ಹಿ ಕವಿತಾ ವಾಚ್ತಲ್ಯಾಕ್ ಮಂತ್ರ್ ಮುಗ್ದ್ ಕರ್‍ನ್ ಸೊಡ್ತಾತ್. ಕಿತ್ಲ್ಯಾಯ್ ಅಸ್ಕತ್ ಮನ್ಶಾಕ್ ಲೆಗುನ್ ಆತಾಂಚ್ ನಿದ್ಯಾಂ, ಏಕ್ ಪಾವ್ಟಿಂ ನಿದ್ಯಾಂ ಆನಿ ಕಷ್ಟಾಂ ದಗ್ದೊಣೆಂನಿ ಸಾಂಪ್ಡೊನ್ ಕುಲ್ಕುಲ್ಚ್ಯಾ ಸಂಸಾರಾಕ್ ಖಿಣಾಕ್ ತರೀ ಉಬೆಚಿ ಕಾಂಬಳ್ ಜಾವ್ಯಾಂ ಮ್ಹಳ್ಳೆಂ ಚಿಂತಪ್ ವ್ಹಾಳನಾಸ್ತಾಂ ರಾವಶೆಂನಾ.
ಜಯಂತ ಕಾಯ್ಕಿಣಿ ಕನ್ನಡಾಚೊ ನವಲ್‌ಕಾರ್, ಕವಿ, ಅಂಕಣ್‌ಕಾರ್, ಗೀತ್‌ಕಾರ್, ಟಿವಿ ಕಾರ್ಯಾವಳಿಂಚೊ ನಿರೂಪಕ್ ಜಾವ್ನ್ ಫಾಮಾದ್. ಹ್ಯಾ ವರ್ಸಾ ಜನೆರಾಂತ್ ಆಮಿ ಚಲಯಿಲ್ಲ್ಯಾ `ಕವಿತಾ ಫೆಸ್ತ್' ವಿಚಾರ್‌ಸಾತ್ಯಾಚೊ ತೊ ಅಧ್ಯಕ್ಷ್ ಆಸ್‌ಲ್ಲೊ. ತಾಚಿಂ ಹರ್‍ಯೆಕ್ ಬರ್ಪಾಂ ವೆಗ್ಳ್ಯಾಚ್, ಅತ್ವ್ಯಾ, ಅಪ್ರೂಪ್ ಎಕಾ ಅನ್ಭೋಗಾಕ್ ವಾಚ್ಪ್ಯಾಕ್ ವ್ಹರ್‍ನ್ ಪಾಯ್ತಾತ್.
ಫುಡಾರಾಂತ್ ಅಪ್ರೂಪ್ ತರೀ ಜಯಂತಾಚ್ಯೊ ಕವಿತಾ ಆಮಿ ತುಮ್ಕಾಂ ವಾಚುಂಕ್ ದಿತಲ್ಯಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಊಬ್
ಮಗಲೆ ಬಾಜೂಕ್ ಬಶಿಲ್ಲೊ ಅಪರಿಚಿತ್ ಪಯ್ಣಾರಿ
ನಿದ್ದೂನ್ ಪಳ್ಳಾ
ಆಂಗ್ ಪೂರಾ ಸಡ್ಲ ಜಾವ್ನು ತಾಗಲೆ ಮಾತ್ತೆ
ಮಗಲೆ ಖಾಂದಾರಿ ಆಯಿಲಾಂ
ಆಪ್ಲೇಂಚಿ ನಿದಾಂತ್ ತೊ ಕಿತ್ಲೊ ಮುಗ್ಧ್
ಕಿತ್ಲೊ ನಿರುಪಾಯ್ ದಿಸ್ತಾ.
ವಾರ್‍ಯಾಕ್ ತಾಗಲೆ ಹಾತಾಚೆ ಝಗ್‌ಮಗಿ ರೋಮ್ ಹಾಲ್ತಾ
ತೆಲ್‌ಕಟ್ ನಿಡ್ಲಾಕ್ ಮುಕಾರ್ಚೆ ಚಾರ್ ಕೇಸ್ ಚಿಕಟ್ಲ್ಯಾ
ದೋನಿ ದೋಳ್ಯಾ ಬಾಜೂಕ್ ಸಾನ್ನ್ ಗೇರೆ - ತಾನ್ನೆ ಖುಷೇನ್ ಹಾಸ್ತಾನಾ ಥಂಯ್
ನೀದೆ ಪಡ್ಚ್ಯಾ ಪುರೊ
ಘರಾ ಜಾಲ್ಯಾರಿ ದೋನಿ ಪಾಂಯ್ ಪೊಟಾಕ್ ಹಾಡ್ನು
ಏಕ್ ಹಾತ್ತಾರಿ ಮಾತ್ತೆ ದವರ್ನು ನಿತ್ತಾಶಿಲ್ಲೊ....
ಕಶ್ಶಿ ಗಲ್‌ಗಲೀ ಹಾಲ್ತಾ ತಾಗಲೇ ಲಾಂಬಟ್ ತೊಗ್ಗೂ ವಟ -
ಆಯೀನ್ ಜೋರಾನೇ ಮಾತ್ತ್ಯಾಕ್ ತೇಲ್ ಘಾತ್ತಿಲ್‌ವರಿ
ಹಾಗಲೋ ಆವಾಜು ಕಶ್ಶಿ ಆಸ್ಸು ಪುರೋ -
ಕಾಲರಾ ವಯ್ರಿ ಮಾತ್ರ್ ಘಾಸೂನ್ ಗೆಲ್ಲೆ ಶರ್ಟಾಚೆ
ಪ್ರಿಂಟಾ ಮ್ಹಣ್ಕಿ?
ತಾಗಲೆ ಬಾಪಾಯ್ನ್ ತಾಕ್ಕಾ ಪಯ್ಲೆ ವೇಳಾ
ಆಂಗ್ಡೀಕ್ ಸಾಮಾನ್ ಹಾಡ್ಚ್ಯಾಕ್ ಪೇಟೈಲ್ ತಾವಳಿ
ಕಸ್ಶಿ ಭೀವ್ನು ಕಾಂಪ್ಲೊ?
ತೀನ್‌ಸಾಣೀರಿ ದಿವೊ ಲಾಯ್ತಾನಾ ತಾಕ್ಕಾ
ಕೊಣಾಲೆ ಉಗ್ಡಾಸು ಜಾವ್ನು ಗಳೊ ಭರ್‍ನು ಆಯ್ಲೊ?
ತಾಗಲೆ ಪಾಯಾ ನಾಕ್ಟಾಂ ಖರ್‌ಖರೀ ವಾಡತ್ ಆಸ್ಸಾತ್
ಏಕ್ ಪಾವುಲಾಚ್ಯಾನ್ ಚಪ್ಪಲ್ ಹಗೂರ್ ನಿಸರ್‌ಲ್ಯಾ
ದಿಶೇಕ್ ಏಕ್ ಥಕಲ್ಲೆ ಹಾತ್ ಪಾಂಯ್ ಸೋಣ್ಣು
ಏಕ್‌ದಂ ಹಗೂರ್ ಜಾಲ್ಲಾ ಹೋ ಜೀವು -
ಆತ್ತಾ ಅನಂತಾಂತ್ ಫುಲತ್ ಆಶಿಲ್ಲೊ ಏಕ್ ಸ್ವಪ್ನಾ ಕಳೊ
ಹಾಗಲೆ ಹೇ ಹಾಲ್ತ ತೇ ಛಾತೀ ಭಿತ್ತರ್‍ಲೆ
ಶ್ವಾಸಾಚಿ ಊಬ್‌ಚ್ ಪುರೊ -
ಹ್ಯಾ ಸಬಂದ್ ವಿಶ್ವಾಕ್ ಊಬ್ ದವರ್‍ಚ್ಯಾಕ್!
-ಜಯಂತ ಕಾಯ್ಕಿಣಿ