ಸಂಪಾದಕೀಯ್:
ಪಲ್ತಡಿಚ್ಯಾ ಸುಖಾಕ್ ಆಪವ್ನ್ ವ್ಹರ್‍ಚೆಂ ಗೀತ್
ಹ್ಯಾ ಸಂಸಾರಾಚ್ಯಾ ಸರ್‍ವಯ್ ಸಂಗ್ತಿಂ ಥಾವ್ನ್ ಮುಕ್ತ್ ಜಾಂವ್ಕ್ ಆಶೆಂವ್ಚೊ ಏಕ್ ಮನ್ಶಾ ಅತ್ಮೊ ಹಾಂಗಾಸರ್ ಪಲ್ತಡಿಚ್ಯಾ ಸುಖಾಕ್ ಖರ್‍ಶೆಂವ್ಚೊ ದಿಸ್ತಾ. ದೈವಿಕ್ ಸುಖ್ ಆಶೆಂವ್ಚೆಂ ಗೀತ್ ಹೆಂ ಜಾಂವ್ಕ್ ಪುರೊ. ಕೊಣಾಕ್ ರುಚತ್ ಆನಿ ಕೊಣಾಕ್ ಕೊಡು ಲಾಗತ್. ಪುಣ್ ಕವಿತೆಚೆ ದಿಷ್ಟಿನ್ ಚೊಯ್ತಲ್ಯಾಂಕ್ ಹೆ ಕವಿತೆನ್ ಸಾದರ್ ಕರ್‍ಚೆ ಸೊಭಾಯೆಕ್, ಉತ್ರಾಂಚೊ ಖೆಳ್ ಆನಿ ಜಾದುಕ್ ಲಾಗೊನ್ - ಪಲ್ತಡಿಚೊ ಅನ್ಭೋಗ್ ಜಾಲ್ಲ್ಯಾಂತ್ ನವಲ್ ನಾ.
ಮಾಗೀರ್ ಬಾಕಿಬಾಬಾಚಿ ಕವಿತಾ ಅಶೀಚ್. ಎಕೆ ಉತ್ತೀಮ್ ಕವಿತೆಕ್ ಜಾಯ್ ಜಾಲ್ಲಿಂ ಉತ್ತೀಮ್ ಉತ್ರಾಂ ವಿಣ್ಚ್ಯಾಂತ್ ತಾಕಾ ಲಾಗ್‌ಲ್ಲೊ ದುಸ್ರೊ ನಾ. ಕೊಂಕಣಿನ್ ಆಪ್ಣಾಯಿಲ್ಲೊ ಭೋವ್ ಆಪುರ್ಬಾಯೆಚೊ ಕವಿ ಹೊ. ಆದ್ಲ್ಯಾ ಶೆಕ್ಡ್ಯಾಂತ್ ಭಾರತಾನ್ ಜೊಡ್‌ಲ್ಲ್ಯಾ ಉತ್ತೀಮ್ ಧಾ ಕವಿಂ ಪಯ್ಕಿ ಎಕ್ಲೊ ತೊ ಮ್ಹಣೊನ್‌ಯ್ ಜಾಯ್ತೆ ಜಣ್ ತಾಕಾ ಮಾನ್ತಾತ್. ಕೊಂಕಣಿಂತ್ ಮಾತ್ರ್ ನ್ಹಯ್ ಬಾಕಿಬಾಬಾನ್ ಮರಾಠಿಂತ್‌ಯ್ ಕವಿತಾ ಕೃಷಿ ಜಾಯ್ತಿ ಕೆಲ್ಯಾ.
ಕವಿತೆನ್ ದೀಜಾಯ್ ಜಾಲ್ಲೆಂ ಸುಖ್ ಸಗ್ಳೆಂ ಹೆ ಕವಿತೆಂತ್ ಆಸಾ ಮ್ಹಣ್ ಮ್ಹಾಕಾ ಭೊಗ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಾಕಾ ಪಲ್ತಡಿ ಪಾಯ್
ವ್ಹಡೆಂ ಆಲ್ತಡಿ ಲಾಯ್, ಮ್ಹಾಕಾ ಪಲ್ತಡಿ ಪಾಯ್
ಜಂಯ್ ಸುಖ್ ಥಂಡಾಯ್, ಪಾಂಡುರಂಗಾ.
ಕಾಂಯ್ ಬಾಂದ್‌ಚೆಲೆಂ ನಾ, ಕಾಂಯ್ ಘೆಂವ್ಚೆಲೆಂ ನಾ
ಜಗ್ ಸಾಯ್, ನಸಾಯ್, ಪಾಂಡುರಂಗಾ
ಹಾಂಗಾ ಕಾಂಯ್ ಖರೆಂ ನ್ಹಯ್, ಮನಾಭೊಂವ್ತಣಿ ವೋಂಯ್
ಸುಖ್ ದೂಖ್ ಪಿಸಾಯ್, ಪಾಂಡುರಂಗಾ
ಗುಂಡೆ ಪಡ್ತಾನಾ ಜಾಂವ್, ಫುಲಾಂ ಝಡ್ತಾನಾ ಜಾಂವ್
ತುಜಿ ಫಳ್ಳಿ ಸಾಸಾಯ್, ಪಾಂಡುರಂಗಾ
ವೋತ್ ಮೋವ್ ಜಾಲಾಂ, ದಳ್ಬಾರ್ ಫುಲಾಂ
ಸಾವ್ಳ್ಯಾಂತ್ ನಿಳಾಯ್, ಪಾಂಡುರಂಗಾ
ತುಜೆವೀಣ್ ಮ್ಹಾಕಾ, ಆತಾಂ ಕಾಯಿಂಚ್ ನಾಕಾ
ಜಾ ತುಂಚ್ ಥಾಕಾಯ್, ಪಾಂಡುರಂಗಾ
ಜಡ್ ನ್ಹಯ್ ರೆ ಮ್ಹಜೆಂ, ತುಕಾ ಜಾಂವ್ಚೆಂ ವೊಜೆಂ
ಶರೀರ್‌ಚ್ ಲ್ಹವ್ ಲ್ಹಾಯ್, ಪಾಂಡುರಂಗಾ
-ಬಾಕಿಬಾಬ್ ಬೋರ್ಕರ್