ಸಂಪಾದಕೀಯ್:
ಕವಿ ಸಮಾಜ್ ಸುಧಾರಕ್ ಜಾತಾನಾ
ಏಕ್ ಜಳ್ತೊ ವಿಷಯ್. ಆಯ್ಚೆ ಸಮಾಜೆಂತ್ಲ್ಯಾ ಸಾಸ್ರ್ ಸಮಸ್ಯಾಂ ಪಯ್ಕಿ ಭೋವ್ ಪ್ರಮುಖ್ ವಿಷಯ್. ಎಕೆ ಕುಶಿನ್ ಆವಯ್ ಬಾಪಾಯ್ಚ್ಯಾ ಮೊಗಾಥಾವ್ನ್ ಪಯ್ಸ್ ಉರ್‌ಲ್ಲಿಂ ಅನಾಥ್ ಭುರ್ಗಿಂ, ಆನ್ಯೇಕೆ ಕುಶಿನ್ ಭುರ್ಗಿಂ ನಾಸ್ತಾಂ ಸಂಸಾರಾಚ್ಯಾ ಸಂತೊಸ್ ಸುಖಾಥಾವ್ನ್ ಪಯ್ಸ್ ಉರ್‌ಲ್ಲಿಂ ಆವಯ್ ಬಾಪಯ್. ಹ್ಯಾ ದೋನ್ ಸಮಸ್ಯಾಂಕ್ ಪರ್‍ಯಾರ್ ಸೊಧುನ್ ದಿತಾ ಮ್ಹಳ್ಳೆಬರಿ ಹಿ ಕವಿತಾ ಉದೆಲ್ಯಾ. ಹಾಂಗಾಸರ್ ಕವಿ, ಫಕತ್ ಕವಿ ಜಾವ್ನ್ ಉರೊಂಕ್ ನಾ, ತೊ ಏಕ್ ಸಮಾಜ್ ಸುಧಾರಕ್ ಕವಿ ಜಾಲ್ಲೊ ಝಳ್ಕತಾ.
ರೊಬರ್ಟ್ ಫೆರ್ನಾಂಡಿಸಾಚಿ ಹಿ ಕವಿತಾ ಕಾಂಯ್ ದೋನ್ ವರ್ಸಾಂ ಆದ್ಲಿ. ವಾಚ್ತಾನಾ ಅಸಲ್ಯಾ ಸಮಸ್ಯಾಂನಿ ರೆವ್ಡಲ್ಲ್ಯಾಂಚಿಂ ಸಾಳಾಂಪಾಳಾಂ ಬೊಂಚಾಯಿಲ್ಲ್ಯಾಂತ್ ನವಲ್ ನಾ.
ಮಾಗೀರ್ ಭುರ್ಗಿಂ ಆಸೊನ್ ಭುಗ್ಯಾಂವೀಣ್ ಜಿಣಿ ಸಾರ್‍ಚ್ಯಾ ಆವಯ್ ಬಾಪಾಯ್‌ವಿಶಿಂ ಪಯ್ಶಿಲ್ಯಾನ್ ಹಿ ಕವಿತಾ ಉಲಯ್ನಾಸ್ತಾಂ ರಾವನಾ. ನಾಂತರ್ ಆಪ್ಲೆಂ ಬಿಡಾರ್ ಸೊಡುನ್, ಪ್ರಾಯ್ವಂತಾಂಚ್ಯಾ ಆಸ್ರ್ಯಾಕ್ ವೆಚಿ ಗತ್ ತಾಂಕಾಂ ಕಿತ್ಯಾಕ್ ಯೇಜಾಯ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನವೊ ಸಂಬಂಧ್!
ಅನಾಥ್ ಆಸ್ರ್ಯಾಂತ್
ವಾಡ್ಚ್ಯಾ ಭುರ್ಗ್ಯಾಂಕ್
ಆನಿ
ಭುರ್ಗಿಂ ನಾಂತ್ ಮ್ಹಣ್
ರಡ್ಚ್ಯಾ ಜೊಡ್ಯಾಂಕ್
ಆಸಾ ಕಾಂಯ್ ಸಂಬಂಧ್?
ಥಂಯ್ ತಾಂಕಾಂ
ಪಪ್ಪಾ ಮಾಮ್ಮಿ
ಆಪಂವ್ಕ್ ನಾ ಕೋಣ್
ಹಾಂಗಾ ಹಾಂಕಾಂ
ಪಪ್ಪಾ ಮಾಮ್ಮಿ
ಆಪಯ್ತಲಿಂ ನಾಂತ್ ಕೋಣ್
ತಿಂ ಪ್ರಾಯ್ ಭರ್‍ತಚ್
ಆಸ್ರ್ಯಾ ಥಾವ್ನ್
ಆಶೆನ್ ಆಯ್ಲಿಂ ಭಾಯ್ರ್
ಹಿಂ ಪ್ರಾಯ್ ಉತರ್‍ತಚ್
ನಾತ್‌ಲ್ಲೆ ಖುಶೆನ್
ರಿಗ್ಲಿಂ ಭಿತರ್
ಜರೀ ಜೊಕ್ತ್ಯಾ ವೆಳಾರ್
ಅಸಲ್ಯಾಂ ಮಧೆಂ ಏಕ್
ನವೊ ಸಂಬಂಧ್ ಘಡತ್
ಪಡ್ಚಿ ನಾ ಗರಜ್
ನೆಂಟ್ಯಾ ಭುರ್ಗ್ಯಾಂನಿ
ಅನಾಥ್ ಆಸ್ರ್ಯಾಂನಿ ವಾಡ್ಚಿ
ಆನಿ ಜಾಂಟ್ಯಾ ಜೊಡ್ಯಾಂನಿ
ಬಿಡಾರ್ ಆಪ್ಲೆಂ ಸೊಡ್ಚಿ.........
-ರೊಬರ್ಟ್ ಫೆರ್ನಾಂಡಿಸ್, ಉದ್ಯಾವರ್