ಸಂಪಾದಕೀಯ್:
ತೊಂಡಾಂತ್ ಏಕ್, ಕಾಳ್ಜಾಂತ್ ಏಕ್!
ಮನ್ಶಾಚಿ ಜಾತ್ ತಶೀಚ್. ಭಿಯಾಚೆಂ ಬುಯಾಂವ್. ಹ್ಯಾ ಭಿಯಾಂತ್ಲೆಂ ಸುಟೊಂಕ್ ಏಕ್‌ಚ್ ವಾಟ್ ತಾಕಾ ದಿಸ್ಚಿ ಮ್ಹಳ್ಯಾರ್ 'ಮಾಗ್ಣೆಂ'. ಮಾಗ್ಣೆಂ, ವಾಯ್ಟಾ-ವಿಘ್ನಾಂ-ಅನ್ವಾರಾಂಚ್ಯೊ ಸಾಂಖ್ಳ್ಯೊ ಸರ್‍ವಯ್ ತುಟಯ್ತಾ ಮ್ಹಣೊನ್ ಮನೀಸ್ ಲೆಕ್ತಾ. ಆಪ್ಲ್ಯಾ ಮಾಗ್ಣ್ಯಾಂನಿ ಕಾಯಿಂಚ್ ಭೆಟ್ವೊಳ್ ಕರುಂಕ್ ತಯಾರ್ ನಾತ್‌ಲ್ಲ್ಯಾ ಮನ್ಶಾ ಸೈಂಭಾನ್ ಆಪ್ಣಾಚೆಂ ಬರೆಪಣ್ ಆಶೆಂವ್ಚೆಂ ಕಾಂಯ್ ನವೆಂ ನ್ಹಯ್. ತಶೆಂ ಬರೆಪಣ್ ಆಶೆತಾನಾ ಆನ್ಯೇಕ್ಲ್ಯಾಚ್ಯಾ ಮಾತ್ಯಾರ್ ನಳೆ ಮಾತ್ರ್ ನ್ಹಯ್ ದಾಂಬೇಯ್ ಪಡೊಂದಿತ್ ಮ್ಹಣೊನ್ ಮಾಗ್ಚೆಂ ಆಸ್ತಾ.
ಕಾಂಯ್ ಥೊಡ್ಯಾಂನಿ ಮಾಗ್‌ಲ್ಲೆಂ ಹಕ್ಕಾನ್ ಮೆಳಜೆ ಮ್ಹಣೊನ್ ಚಿಂತ್ಚೆಂ ಆಸ್ತಾ. ಮ್ಹಜಿ ಎಕ್ಲಿ ಆಜಿಮಾದ್ರ್ - ಆಪ್ಣಾಕ್ ಜೆಜು ಸರ್ಗಾಕ್ ವ್ಹರ್‍ನಾ ಜಾಲ್ಯಾರ್ ತಾಚ್ಯಾ ಖಾಡಾಕ್ ಧರ್‍ನ್ ಉಕ್ಲುನ್ ಉಳ್ಳಾಲ್ ದಾಕಯ್ತಾಂ ಮ್ಹಣ್ತಾಲಿ. ತಿತ್ಲೀಯ್ ತಿಚ್ಯಾ ಮಾಗ್ಣ್ಯಾಚಿ ಗ್ಯಾರಂಟಿ ಆಸ್‌ಲ್ಲಿ ತಿಕಾ.
ಕಿಶೂ ಬಾರ್ಕೂರಾನ್ ಅಸಲ್ಯಾಚ್ ಎಕಾ ಮನ್ಶಾಸೈಂಭಾಚಿ ಕಾಲೆತ್ ಆಮ್ಚೆ ಹುಜಿರ್ ದವರ್‍ಲ್ಯಾ. ತಶೆಂ ಕರ್‍ತಾನಾ ಆಮ್ಚೆ ಸಮಾಜೆಚೆಂ ಪಿಂತುರ್ ಆಪ್ಶೆಂಚ್ ದೊಳ್ಯಾಂ ಸಾಮ್ಖಾರ್ ಉಬೆಂ ಜಾತಾ.
ಕಿಶೂ ಬಾರ್ಕೂರ್ ಸೈಂಭಾನ್ ಕಥಾಕಾರ್. ಕಾಂಯ್ ಅಪ್ರೂಪ್ ಕವಿತಾ ಲಿಖ್ತಾ. ತಾಚೆಂ ಕವಿತಾ ಪುಸ್ತಕ್ "ಧಾಕ್ಟ್ಯಾ ದೆವಾಚಿಂ ಭುರ್ಗಿಂ' ಯೆದೊಳ್‌ಚ್ ಪರ್‍ಗಟ್ ಜಾಲಾಂ. ತಾಚ್ಯಾ 'ರುಪ್ಣಿಂ' ಕಥಾಪುಸ್ತಕಾಕ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾದೆಮಿಚೊ ಪುರಸ್ಕಾರ್ ಲಾಬ್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಗ್ಣೆಂ
ಸದಾಂ ಮಿಸಾಕ್ ವೆತಾಂ ದೆವಾ
ಸದಾಂಚ್ ತುಕಾ ಸೆವ್ತಾಂ
ಮಾಗ್ಣಿಂ, ರಜಾರ್ ಕಾಂತಾರಾಂ ಆಮ್ಗೆರ್
ವ್ಹಾಳ್ತಾತ್ ಕಾಂಯ್ ಚುಕನಾಸ್ತಾಂ
ಇಗರ್ಜೆ ಹೊಲಾಚ್ಯಾ ಮಾರ್ಬಲಾಚೆರ್
ಆಮ್ಚೆಂ ನಾಂವ್ ಸಗ್ಳ್ಯಾಂ ವಯ್ರ್ ಸೊಭ್ತಾ
ಆಮಿಂಚ್ ಮುಡ್ದೊಮ್, ಆಮಿಂಚ್ ಫಿರ್ಜೆಂತ್
ಚಡ್ತಾವ್ ತುಜ್ಯಾ ಫೆಸ್ತಾಂ
ಸರ್‍ವ್ ಪದ್ವೆದಾರ್ ಜಾಣಾರಿ ತುಂ
ಹೆಂ ಸರ್‍ವ್ ತುಕಾಚ್ ಕಳ್ತಾ
ಉಪ್ರಾಂತ್‌ಯ್ ಕಿತ್ಯಾಕ್ ಪರಿಕ್ಷಾ ಕರ್‍ತಾಯ್
ತುಜ್ಯಾ ಅವ್ವಲ್ ಭಕ್ತಾಂಕ್?
ವಯ್ಲ್ಯಾ ಘರ್‍ಚೊ ರುಜಾರಿ ಸದಾಂಚ್
ಪಿಯೆವ್ನ್ ಆಮ್ಕಾಂ ಸೊವ್ತಾ
ಉಗ್ತ್ಯಾ ರಸ್ತ್ಯಾರ್ ಕಾಡ್ತಾ ಮರ್‍ಯಾದ್
ತುಕಾ ತೆಂ ಕಾಂಯ್ ತರೀ ಸೊಭ್ತಾ?
ಮ್ಹಯ್ನೊಭರ್ ಜೈಲಾಂತ್ ಪಡ್ಲ್ಯಾರ್ ದೆವಾ
ತುಜೊ ಉಪ್ಕಾರ್ ಭಾವುಡ್ತಾಂ
ಎಸ್ತುಬಾಯೆಚೊ ಕೊಂಬ್ಲೊ ಸದಾಂ
ಆಮ್ಚ್ಯಾ ಹಿತ್ಲಾಂತ್‌ಚ್ ಉಸ್ತಿತಾ
ಸಾಂಗೊನ್ ಸಾಂಗೊನ್ ಪುರೊ ಜಾಲೆಂ
ತಿಕಾ ಖಂಯ್ಸರ್ ಆಯ್ಕತಾ?
ವಿಕಾಳ್ ಶಿತ್ ಖಾವ್ನ್ ಮೆಲೊ ತರ್ ದೆವಾ
ಸಾಯ್ಬಿಣಿ ಮಾನಾಕ್ ಮೀಸ್ ಭೆಟಯ್ತಾಂ
ಪರ್ಮಿಟ್ ನಾಸ್ತಾಂ ನಾಟೆ ಭರುನ್
ಟ್ರಕ್ ವ್ಹರ್‍ನ್ ಗೆಲಾ ಪೂತ್ ಮ್ಹಜೊ
ಫೊರೆಸ್ಟರಾಂ ಥಾವ್ನ್ ಶಾಬೀತ್ ರಾಕ್ಲ್ಯಾರ್
ದೆವಾ, ವ್ಹಡ್ ಉಪ್ಕಾರ್ ತುಜೊ
ವಾಡೊನ್ ರಾವ್‌ಲ್ಲ್ಯಾ ಚೆಡ್ವಾಕ್ ಮ್ಹಜ್ಯಾ
ಮಾಪ್ಳ್ಯಾ ಸಂಗಿಂ ಚಂಗಾಯ್
ಪೋಟ್ ದೆಂವಯಿಲ್ಲೆಂ ಗಾಂವಾರ್ ಗಾಜನಾಶೆಂ
ಮರ್‍ಯಾದ್ ತುಂಚ್ ಉರಯ್
ವರ್‍ಸಾಂಥಾವ್ನ್ ಖಟ್ಲ್ಯಾರ್ ಲೊಳ್ತಾ
ಆಮ್ಗೆಲ್ಯಾಚಿ ಮ್ಹಾತಾರಿ ಆವಯ್
ವೀಲ್ ಆಮ್ಕಾಂಚ್ ರಿಜಿಸ್ತ್ರಿ ಕೆಲಾ
ತಿಕಾ ತುಂ ವೆಗಿಂಚ್ ಆಪಯ್
- ಕಿಶೂ, ಬಾರ್ಕೂರ್