ಸಂಪಾದಕೀಯ್:
ಕೊಂಕಣಿ ಕಾವ್ಯಾಚ್ಯಾ ನವ್ಯಾ ಪಾಂವ್ಡ್ಯಾಚೊ ತಾಂಡೆಲಿ
ಮೊಗಾರ್ ಪಡ್ತಾನಾ ದೊಳೆ ಧಾಂಪ್‌ಲ್ಲೆ ಆಸ್ತಾತ್. ಪರ್ಮಳಾಚೆಂ ಫುಲ್ ಲೆಗುನ್ ದೊಳೆ ಧಾಂಪುನ್ ಘಾಮಾಚೆ ಖಾಕಿಯೆಂತ್ಲ್ಯಾ ಕೆಸಾಂಕ್ ಪೊಟ್ಲುನ್ ಧರುಂಕ್ ವೆತಾ. ತಾಕಾ ಶಾಂಪೂಂತ್ ನ್ಹಾಲ್ಲೆ ಜಾಂವ್, ತೆಲಾಂ ಮಾಖ್‌ಲ್ಲೆ ಜಾಂವ್ ಕೇಸ್ ಝಳ್ಕನಾಂತ್. ವಿಲ್ಸನಾಚಿ ಹಿ ಕವಿತಾ ಭಾಯ್ಲೆ ದೆಕುಕ್ ಸಾದಿ ದಿಸೊಂಕ್ ಪುರೊ. ಪುಣ್ ಮೊಗಾಚಿ ಏಕ್ ಖರಿ ಸಂಗತ್ ಉಗ್ಡಾಪಿ ಕರ್‍ತಾ.
ಮಾಗೀರ್ ಅಸಲೆಂ ಸತ್ ಉಗ್ಡಾಪೆಂ ಕರುಂಕ್ ತಾಣೆ ವಾಪರ್‌ಲ್ಲ್ಯೊ ಪ್ರತಿಮಾ ಪಳೆಯಾ. ಹ್ಯಾ ಪ್ರತಿಮಾಂನಿ ಏಕ್ ಸಾದೊ ವಿಷಯ್ ಸುಂರ್‍ಗರಾಯ್ಲಾ ದೆಕುನ್ ಹೆ ಕವಿತೆಚಿ ವ್ಹಡ್ವಿಕಾಯ್ ವಾಡ್ಲ್ಯಾ.
ಮಾಗೀರ್ ವಿಲ್ಸನಾ ತಸಲೊ ಕವಿ ಆಮ್ಕಾಂ ಲಾಭ್‌ಲ್ಲೆಂ ಆಮ್ಚೆಂ ಭಾಗ್. ಕೊಂಕಣಿ ಕಾವ್ಯಾಚೊ ನವ್ಯಾ ಪಾಂವ್ಡ್ಯಾಚೊ ತಾಂಡೆಲಿ ತೊ ಮ್ಹಣ್ ತಾಕಾ ಆಪೊಂವ್?
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನವೊ ಸೊಲ್ಲೊ
ಮ್ಹಜೆ ಖಾಕಿಯೆಂತ್ ಫುಲ್‌ಲ್ಲ್ಯಾ ಕಾಂಟ್ಯಾಕ್
ತೊಪ್ಚ್ಯೊ ಪಾಕ್ಳ್ಯೊ
ಕಾಳೊ ರಂಗ್
ಘಾಮಾಚಿ ಘಾಣ್
ತುಂವೆಂ ಪಾಂತಿಯೆರ್ ಮಾಳ್‌ಲ್ಲ್ಯಾ ಫುಲಾಕ್
ನಾಜೂಕ್ ಕಾಂಟೆ
ಸೊಭಿತ್ ರಂಗ್
ಪರ್ಮಳ್‌ಚ್ ಪರ್ಮಳ್
ತರಿಪುಣ್ ತೆಂ ಫುಲ್
ಕೆಸಾ ಸಾವ್ಳಿ ಉತ್ರೊನ್
ದೊರಾ ವಾವ್ಳಿ ಸುಟವ್ನ್
ಫಿಂತಾ ಮೊವ್ಳಿ ಕಾತರ್ನ್
ಖಾಕಿಯೆಚ್ಯಾ ಮೊಗಾಂತ್ ಅಡ್ಚಲೆಂ.
ಹ್ಯಾ ಫುಡೆಂ...
ಖಾಕಿಯೆಚೋಯ್ ಪರ್ಮಳ್ ಸುಟ್ತಲೊ
ಫುಲಾಕ್‌ಯ್ ಘಾಮ್ ಉಟ್ತಲೊ.
-ವಿಲ್ಸನ್ ಕಟೀಲ್