ಸಂಪಾದಕೀಯ್:
ಮೊನ್ಕೊ ಘೊಟುನ್ ಬಸ್‌ಲ್ಲ್ಯಾಂಕ್ ಹಾಸೊ ಪಿಯೆಂವ್ಕ್ ದಿಂವ್ಚಿ ಬಾಯ್
ಹಾಂಗಾಸರ್ ಆಮ್ಚೊ ಕವಿ ಖಂಯ್ಚೆ ಬಾಯೆವಿಶಿಂ ಸಾಂಗೊನ್ ಆಸಾ ತೆಂ ಕಳನಾ. ಪುಣ್ ಹೆ ಕವಿತೆಂತ್ ಬಾಯೆಚೆಂ ಜೆಂ ವರ್ಣನ್ ಜಾಲಾಂ, ತಸಲ್ಯೊ ಬಾಯೊ ತುಜ್ಯಾ ಮ್ಹಜ್ಯಾ ಸಂಬಂಧಾಂತ್ ಮಿಸ್ಳಲ್ಲ್ಯೊ ಆಸ್ಚ್ಯಾಕ್ ಪುರೊ. ಮ್ಹಜ್ಯಾ ತುಜ್ಯಾ ಭೊಂವ್ತಣಿ ಸದಾಂ ಮೆಳ್ಚ್ಯಾಕ್ ಪುರೊ. ಹೆ ಕವಿತೆಂತ್ ಎಕೆ ವ್ಯಕ್ತಿಚೆಂ ಮ್ಹಳ್ಯಾರ್ ಬಾಯೆಚೆಂ ವರ್ಣನ್ ಮಾತ್ರ್ ಆಸಾ. ಅಲಂಕಾರ್ ಶಿಕ್ತಲ್ಯಾಂಕ್ ಹಿ ಕವಿತಾ ಭೋವ್ ಆಪುರ್ಬಾಯೆಚೊ ದಾಕ್ಲೊ ಜಾವ್ನ್ ದಿವ್ಯೆತಾ.
ಸಿಜ್ಯೆಸ್ ತಾಕೊಡೆಚೆಂ ಬರಪ್‌ಚ್ ತಶೆಂ. ತಾಚ್ಯಾ ಬರ್ಪಾಂಚ್ಯಾ ದರ್ಯಾಂತ್ ಅಲಂಕಾರಾಚಿಂ ಹೊಡಿಂ ದಿಸ್ಚಿಂ ಚಡ್. ತಶೆಂ ಜಾಲ್ಲ್ಯಾನ್ ಖಂಯ್ಚ್ಯಾಯ್ ಖಿಣ್ ಹೊ ದರ್ಯೊ ಪಳೆಂವ್ಕ್ ಸೊಭಿತ್ ದಿಸ್ತಾ.
ಸಭಾರ್ ತೆಂಪಾ ಉಪ್ರಾಂತ್ ಸಿಜ್ಯೆಸ್ ಕವಿತಾ ಕುಳಾರಾಕ್ ಆಯ್ಲಾ. ಮೊನ್ಕೊ ಘೊಟುನ್ ಬಸ್‌ಲ್ಲ್ಯಾ ಸಭಾರಾಂಕ್ ಹಾಸೊ ಘೆವ್ನ್ ಆಯ್ಲಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಬಾಯೆ ತುಂ ಕಳೊ
ಬಾಯೆ ತುಂ ಮೊಗ್ರೆ ಕಳೊ
ಕಪಾಲಾರ್ ತುಜ್ಯಾ ಚಂದ್ರಾ ತಿಳೊ
ದೆಕುನ್ ಬಾಯೆ ತುಜೆರ್
ಸಕ್ಟಾಂಕ್‌ಯಿ ದೊಳೊ
ಬೆಬ್ದ್ಯಾ ಘೊವಾಕ್ ತುಂ
ಶಿಂದುನ್ ಘಾಲ್ಚೊ ಆದಾಳೊ
ಅತ್ತ್ಯಾಚಾರಿ ದಾದ್ಲ್ಯಾಕ್
ಹುಲ್ಪಾವ್ನ್ ಪುರ್‍ಚೊ ಸಳ್ಸಳೊ
ತುಕಾ ಚಿಡಾಯ್ತೆಲ್ಯಾಂಕ್
ದೊಳೆ ಕೊಂಕ್ಚೊ ಪಾಕ್ಕಿಸಾಳೊ
ತುಕಾ ಹೆಡಾಯ್ತೆಲ್ಯಾಂಕ್
ಹುನ್ ಉದ್ಕಾಚೊ ಬುಳ್ಬುಳೊ
ಬಾಯೆ ತುಂ ಮೊಗಾಪೆಳೊ
ಉತ್ರಾ ಉತ್ರಾಂನಿ ರುಚಿಕ್ ಆವಾಳೊ
ಜೆವ್ಣಾ ಪಿರಿಂತ್ ಮಿಟಿಯೊ ಮಾರ್‍ಚೊ
ಬಾಫಾತಾಚೊ ಕುವಾಳೊ
ಸೈಂಭಾನ್ ಬಾಯೆ ತುಂ ಮೊಗಿಣ್
ನಾಂವ್ ಪಾಡ್ ಕರ್‍ಚ್ಯಾ ಜಿಬೆಂಕ್
ಖೊಂಚ್ ಮಾರ್‍ಚಿ ನಾಗಿಣ್
ಫಾಪ್ಸುನ್ ಉಡೊಂವ್ಚಿ ವಾಗಿಣ್
ಬಾಯೆ ತುಂ ಸೊಭಿತ್ ಚಂದ್ರಮುಖಿ
ಹಾಸೊ ವಾಂಟ್ಚೆಂ ಹಸನ್ಮುಖಿ
ಹರಾಮ್ಯಾಂಕ್ ಲಾಸ್ಚೆಂ ಜ್ವಾಲಾಮುಖಿ
ಖೊಟ್ಯಾಂಕ್ ಚಿರ್‍ಚೆಂ ಸೂರ್ಪನಖಿ
ಬಾಯೆ ತುಂ ಹಾಸ್ಲ್ಯಾರ್ ಕಳೊ
ಚಿಡ್ಲ್ಯಾರ್ ಸುರ್ಯಾಪರಿಂ ಸಳ್ಸಳೊ
ಪುಣ್ ರಡ್ಲ್ಯಾರ್ ಮಾತ್ರ್
ದರ್ಯಾಂತುಲೊ ಉಮಾಳೊ
-ಸಿಜ್ಯೆಸ್ ತಾಕೊಡೆ