ಸಂಪಾದಕೀಯ್:
ಆಜ್ಯಾಚ್ಯಾ ಆನಿ ನಾತ್ರಾಂಚ್ಯಾ ಖಜಾನಾ ಮಧೆಂ ಪುತಾಚಿ ಗಜಾಲ್ ಲಿಪ್ಲ್ಯಾ
ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡ್‌ಲ್ಲ್ಯಾ ಮೂಢಾಡು ಕವಿತಾ ಗೋಷ್ಟಿವೆಳಾರ್ ಸರ್ವಾಂಚಿಂ ಕಾಳ್ಜಾಂ ಮನಾಂ ಫಾರ್‌ಲ್ಲಿ ಕವಿತಾ ಹಿ. ಭಾಯ್ಲ್ಯಾನ್ ಹಿ ಕವಿತಾ ಸಾದಿ ದಿಸ್ತಾ ಜಾಂವ್ಕ್ ಪುರೊ, ಪುಣ್ ಪೊಟ್ಲುನ್ ಧರ್‌ಲ್ಲೆಬರಿ ತಿಣೆಂ ದಿಂವ್ಚೆಂ ಸುಖ್ ಆನಿ ತ್ಯಾ ಸುಖಾಂತ್ ಆಮ್ಕಾಂ ಪಿಯೆಂವ್ಕ್ ಮೆಳ್ಚ್ಯೊ ಅಮೃತಾಚ್ಯೊ ಝರಿ ಕೊಂತಾಕ್ ಪಾವನಾಂತ್. ಆಜ್ಯಾಚೆಂ ಖಜಾನ್, ತಾಚಿ ಶಿರಿ ಸೂಟ್‌ಕೇಜಿಂತ್ ಆಸಾ. ತೆ ಶಿರಿನ್ ಆಜ್ ಶೋಕೇಜಿಂತ್ಲಿಂ ಮೆಡ್ಲಾಂ ನಾತ್ರಾಂನಿ ಜೊಡ್ಲ್ಯಾಂತ್.
ಸೂಟ್‌ಕೇಜಿಂತ್ಲೆ ಶಿರಿಚೆಂ ಮೋಲ್ ನಾತ್ರಾಂಕ್‌ಚ್ ಕಿತ್ಯಾಕ್, ಭುರ್ಗ್ಯಾಂಕ್ ಕಳಿತ್ ಆಸಾ ತೆಂ ಹಾಂವ್ ನೆಣಾಂ. ಪುಣ್ ಏಕ್ ಗಜಾಲ್ ಖರಿ, ತೆ ಸೂಟ್‌ಕೇಜಿಂತ್ಲ್ಯಾ ವಸ್ತುಂಚೊ ಥೊಡೊ ತರೀ ಮೋಗ್ ತಾಂಕಾಂ ಉರ್‍ಲಾ. ನಾಂತರ್ ತಾಂತ್ಲ್ಯೊ ವಸ್ತು ಕೆದಳಾಗಿ ಧುಳಿ ಸಮಾ ಜಾತ್ಯೊ. ಶೋಕೇಜಿಂತ್ಲಿಂ ಮೆಡ್ಲಾಂ ಜೋಡ್ನ್ ಘೆಂವ್ಚಿ ತಾಂಕ್ ಜೊಡುಂಕ್ ನಾ ಪಾವ್ತ್ಯೊ.
ಆಜ್ಯಾಚೆಂ ಖಜಾನ್ ಆನಿ ನಾತ್ರಾಂಚ್ಯಾ ಖಜಾನಾ ಮಧೆಂ ಪುತಾಚೆಂ ಕಿತೆಂ ತೆಂ ಹಿ ಕವಿತಾ ಸಾಂಗಿನಾ. ತಾಣೆಂ ಆಜೂನ್ ಪಾಸುನ್ ಹಿ ಸೂಟ್‌ಕೇಜ್ ಸಾಂಬಾಳ್ಳ್ಯಾ ನ್ಹಯ್ ತಿಚ್ ಗಜಾಲ್ ಮಹತ್ವಾಚಿ ಥಾರ್‍ತಾ.
ಸ್ಟೀವನ್ ಕ್ವಾಡ್ರಸಾನ್ ಹೆ ಕವಿತೆದ್ವಾರಿಂ ವೆಗ್ಳೊಚ್ ಸಂಸಾರ್ ಉಗ್ತೊ ಕೆಲಾ. ತ್ಯಾ ಸಂಸಾರಾಂತ್ ಪಾಸಾಯೊ ಮಾರ್‍ಚೆಂ ಸಂಪೂರ್ಣ್ ಸ್ವಾತಂತ್ರ್ಯ್ ತುಮ್ಕಾಂ ಆಸಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮ್ಹಜಿ ಪರ್ನಿ ಸೂಟ್‌ಕೇಜ್
ಪರ್ನಿ ಸೂಟ್‌ಕೇಜ್ ಏಕ್ ಮ್ಹಜೆಲಾಗಿಂ ಆಸಾ
ಲ್ಯಾನ್ಸಿ ದಾಟ್ಟುನ್ ಫೊರಿನ್ ಥಾವ್ನ್ ಹಾಡ್‌ಲ್ಲಿ
ತಿ ಉಗ್ತಿ ಕರ್‍ನ್ ಬಸ್ಲ್ಯಾರ್ ಆಜೂನ್ ಆಮ್ಗೆರ್ ದುಸ್ರೆಂ ಫೆಸ್ತ್ ನಾಕಾ
ತೆ ಸೂಟ್‌ಕೇಜಿ ಭಿತರ್ ತುಮಿ ಏಕ್ಪಾವ್ಟಿಂ
ತಿಳಿಜೆ ಮ್ಹಣೊನ್ ಮ್ಹಜಿ ಆಶಾ
ಆಬ್ ಗೊಂಯಾಂ ಗೆಲ್ಲೆ ವೆಳಿಂ ಜುಬ್ಲೆವಾಚ್ಯಾ ಉಗ್ಡಾಸಾಕ್
ಹಾಡ್‌ಲ್ಲೊ ಗೊಂಯ್ಚ್ಯಾ ಸಾಯ್ಬಾಚೊ ತುವಾಲೊ (ತಾಂತೂಂಯ್
ಪಿಡಾ ಗೂಣ್ ಜಾತಾ ಮ್ಹಣೊನ್ ಆಬ್ ಆನಿ ವ್ಹಡ್ಲಿಮಾಂಯ್ ಘಟ್ಟ್ ಪಾತ್ಯೆಲ್ಲಿಂ)
ಖಂಯ್ಚ್ಯಾಗಿ ಪಾಸ್ಖಾಚೊ ಮಿಲಾರ್ ಇಗರ್ಜೆಚೊ
ಧುಂಪಾ ಖಿಳೊ
ಕನ್ಯಾಕುಮಾರಿ ಭೊಂವ್ತಿಂ ವಿಕ್ಚಿಂ ತೀನ್ ದರ್ಯಾಂಚೆ ರೆಂವೆಚಿಂ ಚಿಲಾಂ
ಮಾಂವಾಡ್ಯಾ ಗೆಲ್ಲೆ ವೆಳಿಂ ದರ್ಯಾವೆಳೆರ್ ವಿಂಚ್‌ಲ್ಲಿಂ ಕರ್ಲಾಂ, ಶಿಂಪಿಯೊ
ಶೆಂಭರ್ ಕಂತಿಗೊ, ಬನ್ನಿರಿ ಆರಾಧಿಸೋಣ, ಅಮೃತ
ಸಾತ್ ಆಟ್ ವಿಲ್ಫಿಚ್ಯೊ ಕೆಸೆಟಿ, ಬರಯ್ನಾಂತ್ ತರೀ
ಸೊಭಿತ್ ದಿಸ್ತಾತ್ ದೆಕುನ್ ರಾಸ್ ಕೆಲ್ಲಿಂ ಪೆನ್ನಾಂ
ಸೆಂಟ್ಟ್ ಮುಗ್ದಾಲ್ಲ್ಯೊ ಖಾಲಿ ಬೊತ್ಲ್ಯೊ
ಖಂಯ್ಚ್ಯಾ ಖಂಯ್ಚ್ಯಾ ವರ್ಸಾ ಕೊಣೆ ಕೊಣೆ ಧಾಡ್‌ಲ್ಲಿಂ
ಗ್ರೀಟಿಂಗ್ ಕಾರ್ಡಾಂ, ಪಾತಳ್ ನೈಲೊನಾಚ್ಯಾ ಲುಗ್ಟಾಂಚೆ ಕುಡ್ಕೆ
ಮಂಜೆಟ್ಟ್ಯೊ, ಸುಕ್‌ಲ್ಲಿಂ ರೂಂದ್ ಆಳ್ಮಿಂ, ಬೆಗೆಡ್
ಕಿತೆಂ ಆಸಾ ಕಿತೆಂ ನಾ ಆತಾಂ ಆಮ್ಕಾಂ ಕೊಣಾಕ್‌ಚ್ ಕಳಿತ್ ನಾ
ತೆ ಪೆಟೆಚಿ ವ್ಹಡ್ಲಿ ಕೊಂಟ್ರಿಬ್ಯೂಟರ್
ಮ್ಹಜಿ ಆಜಿ
ಮಿಂಜಿತ್ ಕಾತರ್‍ನ್ ಬಾಂದ್ಲ್ಯಾ ಉಪ್ರಾಂತ್
ಉರ್‌ಲ್ಲಿಂ ಪೊಂತಾಂ
ಹಫ್ತ್ಯಾ ಮಿಸಾಕ್, ಮ್ಹಯ್ನ್ಯಾ ಮಿಸಾಂಕ್
ವರ್ಸಾ ಮಿಸಾಂಕ್, ಖಂಯ್ಚ್ಯಾ ಮಿಸಾಂಕ್ ಗೆಲ್ಯಾರಿ
ದಿಲ್ಲೆ ರಜಿಸ್ತ್ರ್ ಸಕ್ಕಡ್ ಹೆ ಪೆಟೆಂತ್
ಪರ್ನಿಂ ನಾಣಿಂ, ಸೊಭಿತ್ ಸ್ಟೆಂಪಾಂ, ಮೊಂತಿ ಫೆಸ್ತಾಚೆಂ
ನವೆಂ, ಕರೆಜ್ಮಾಂತ್ಲೊ ರಾಮ್, ಚಡ್ತಿಕ್ ಉರ್‌ಲ್ಲಿ ಶಿಂಜ್
ಖಂಯ್ಚೆಂ ಆಸಾ ಖಂಯ್ಚೆಂ ನಾ?
ಮ್ಹಜೆ ಸುಟ್‌ಕೇಜಿಕ್ ಖಾವ್ನ್ ಖಾವ್ನ್ ಖಾವ್ನ್
ಫುಡ್ ಪೊಯ್ಜನ್, ಡಿಸೆಂಟ್ರಿ, ಆಲ್ಸರ್ ಜಾಂವ್ಕ್‌ಚ್ ನಾ
ದಾಟ್ ಕಟ್ಟೆ ಭಿತರ್‍ಲೆಂ ಸೊಭಿತ್ ಹಳ್ದುವೆಂ
ಮಕ್ಮಲ್ ಇತ್ಲೆಂಯ್ ವಾಯ್ಟೊಂಕ್ ನಾ
ಆತಾಂ ಭುರ್ಗಿಂ ಮ್ಹಜಿಂ ವ್ಹಡ್ಲ್ಯಾ
ಇಸ್ಕೊಲಾಂಕ್ ವಚೊಂಕ್ ಸುರು ಜಾಲ್ಯಾ ಮಾಗೀರ್
ಹೆ ಸುಟ್‌ಕೇಜಿಚೇಯ್ ಬರೆ ದೀಸ್ ಆಯ್ಲ್ಯಾತ್
ತೆಗಾಂ ಪಯ್ಕಿ ಖಂಯ್ಚೇಂಯ್ ಏಕ್ ಪೀಲ್ ಹಫ್ತ್ಯಾಂತ್ ಏಕ್ ಪಾವ್ಟಿಂ ಪುಣಿ
ತಾಚ್ಯಾ ಗರ್ಭಾಂತ್ ಹಾತ್ ಘಾಲ್ತಾ
ಪ್ರೊಜೆಕ್ಟ್ ವರ್ಕ್, ಮೊಡೆಲ್ ಮೇಕಿಂಗ್ ಮ್ಹಣೊನ್
ಖಂಯ್ಚೇಂಯ್ ಏಕ್ ಭಾಯ್ರ್ ಕಾಡ್ತಾ
ಬೇಂ ಮ್ಹಣೊನ್ ರಡ್ಚ್ಯಾಂತ್ ಮುಕಾರ್ ಆಸ್ಚ್ಯಾ
ನಿಮಾಣ್ಯಾಕ್ ಮಾತ್ರ್ ಹಾಂವೆಂಚ್ ಖಂಯ್ಚೇಂಯ್ ತರೀ
ಕಾಡ್ನ್ ದಿಂವ್ಚೆಂ ಪಡ್ತಾ
ಆಬಾನ್ ದವರ್‌ಲ್ಲೊ ಸಾಣ್‌ಸಾಣಿಚೊ ಕಾಟ್, ವ್ಹಡ್ಲಿಮಾಂಯ್ಚ್ಯಾ ಕಾಪ್ಡಾಚೆ
ಜರಿಚೆಂ ಪೋಂತ್
ಮ್ಹಜ್ಯಾ ಭುರ್ಗ್ಯಾಂಚ್ಯಾ ಪ್ರೊಜೆಕ್ಟ್ ವರ್ಕಾಂನಿ ಖೆಳ್ತಾ
ಪ್ರೈಜ್ ಆಯಿಲ್ಲಿಂ ಮೆಡ್ಲಾಂ ಹೊಲಾಂತ್ ಶೋಕೇಜಿಂನಿ
ಲಾಂಬ್ತಾತ್
-ಸ್ಟೀವನ್ ಕ್ವಾಡ್ರಸ್, ಪೆರ್ಮುದೆ
संपादकीय:
आज्याच्या आनी नात्रांच्या खजाना मधें पुताची गजाल लिपल्या
कविता ट्रसटान मांडून हाडल्ल्या मूढाडू कविता गोषटिवेळार सर्वांचीं काळजां मनां फारल्ली कविता ही. भायल्यान ही कविता सादी दिसता जावंक पुरो, पूण पोटलून धरल्लेबरी तिणें दिंवचें सूख आनी त्या सुखांत आमकां पियेवंक मेळच्यो अमृताच्यो झरी कोंताक पावनांत. आज्याचें खजान, ताची शिरी सूटकेजिंत आसा. ते शिरीन आज शोकेजिंतलीं मेडलां नात्रांनी जोडल्यांत.
सूटकेजिंतले शिरिचें मोल नात्रांकच कित्याक, भुर्ग्यांक कळीत आसा तें हांव नेणां. पूण एक गजाल खरी, ते सूटकेजिंतल्या वसतुंचो थोडो तरी मोग तांकां ऊरला. नांतर तांतल्यो वसतू केदळागी धुळी समा जात्यो. शोकेजिंतलीं मेडलां जोडन घेंवची तांक जोडुंक ना पावत्यो.
आज्याचें खजान आनी नात्रांच्या खजाना मधें पुताचें कितें तें ही कविता सांगिना. ताणें आजून पासून ही सूटकेज सांबाळ्ळ्या न्हय तीच गजाल महत्वाची थारता.
स्टीवन क्वाड्रसान हे कवितेद्वारीं वेगळोच संसार उग्तो केला. त्या संसारांत पासायो मारचें संपूर्ण स्वातंतऱ्य तुमकां आसा.
-मेलवीन रोड्रिगस
कविता:
म्हजी पर्नी सूटकेज
पर्नी सूटकेज एक म्हजेलागीं आसा
ल्यान्सी दाट्टून फोरीन थावन हाडल्ली
ती उग्ती करन बसल्यार आजून आमगेर दुस्रें फेसत नाका
ते सूटकेजी भितर तुमी एकपावटीं
तिळिजे म्हणोन म्हजी आशा
आब गोंयां गेल्ले वेळीं जुबलेवाच्या उगडासाक
हाडल्लो गोंयच्या सायबाचो तुवालो (तांतूंय
पिडा गूण जाता म्हणोन आब आनी व्हडलिमांय घट्ट पात्येल्लीं)
खंयच्यागी पास्खाचो मिलार इगर्जेचो
धुंपा खिळो
कन्याकुमारी भोंवतीं विकचीं तीन दऱ्यांचे रेंवेचीं चिलां
मांवाड्या गेल्ले वेळीं दऱ्यावेळेर विंचल्लीं करलां, शिंपियो
शेंभर कंतिगो, बन्निरी आराधिसोण, अमृत
सात आट विलफिच्यो केसेटी, बरयनांत तरी
सोभीत दिसतात देकून रास केल्लीं पेन्नां
सेंट्ट मुगदाल्ल्यो खाली बोतल्यो
खंयच्या खंयच्या वर्सा कोणे कोणे धाडल्लीं
ग्रीटिंग कार्डां, पातळ नैलोनाच्या लुगटांचे कुडके
मंजेट्ट्यो, सूकल्लीं रूंद आळमीं, बेगेड
कितें आसा कितें ना आतां आमकां कोणाकच कळीत ना
ते पेटेची व्हडली कोंट्रिब्यूटर
म्हजी आजी
मिंजीत कातरन बांदल्या उपरांत
ऊरल्लीं पोंतां
हफ्त्या मिसाक, म्हयन्या मिसांक
वर्सा मिसांक, खंयच्या मिसांक गेल्यारी
दिल्ले रजिसत्र सक्कड हे पेटेंत
पर्नीं नाणीं, सोभीत स्टेंपां, मोंती फेसताचें
नवें, करेज्मांतलो राम, चडतीक ऊरल्ली शिंज
खंयचें आसा खंयचें ना?
म्हजे सूटकेजीक खावन खावन खावन
फूड पोयजन, डिसेंट्री, आल्सर जावंकच ना
दाट कट्टे भितरलें सोभीत हळदुवें
मक्मल इतलेंय वायटोंक ना
आतां भुर्गीं म्हजीं व्हडल्या
इसकोलांक वचोंक सुरू जाल्या मागीर
हे सूटकेजिचेय बरे दीस आयल्यात
तेगां पयकी खंयचेंय एक पील हफ्त्यांत एक पावटीं पुणी
ताच्या गर्भांत हात घाल्ता
प्रोजेकट वर्क, मोडेल मेकिंग म्हणोन
खंयचेंय एक भायर काडता
बें म्हणोन रडच्यांत मुकार आसच्या
निमाण्याक मात्र हांवेंच खंयचेंय तरी
काडन दिंवचें पडता
आबान दवरल्लो साणसाणिचो काट, व्हडलिमांयच्या कापडाचे
जरिचें पोंत
म्हज्या भुर्ग्यांच्या प्रोजेकट वर्कांनी खेळता
प्रैज आयिल्लीं मेडलां होलांत शोकेजिंनी
लांबतात
-स्टीवन क्वाड्रस, पेर्मुदे