ಸಂಪಾದಕೀಯ್:
ಉಗ್ತಿ ಪಡ್‌ಲ್ಲೆ ಹಾಂಡಿಯೆಚೊ ಮೊಗಾಳ್ ಉಡಾಸ್
ಕವಿಂನಿ ಚಲಿಯೆಕ್, ಸ್ತ್ರೀಯೆಕ್ ವರ್ಣಿಲ್ಲ್ಯಾಬರಿ ಹೆರ್ ಖಂಯ್ಚ್ಯಾಯ್ ಜೀವಿಕ್ ವರ್ಣುಂಕ್ ನಾ ಕೊಣ್ಣಾ. ತಿಚೆ ದೊಳೆ, ತಿಚೆ ಕೇಸ್, ತಿಚಿ ಚಾಲ್, ತಿಚೆ ಗಾಲ್, ತಿಚಿ ಖಾಡ್ಕಿ, ತಿಚೆ ವೋಂಟ್, ತಿಚೆಂ ನಾಕ್, ತಿಚ್ಯೊ ಆಸ್ಡ್ಯೊ, ತಿಚ್ಯೊ ಭೊಂವ್ರ್ಯೊ, ತಿಚಿ ದೀಷ್ಟ್, ತಿಚ್ಯೊ ಹಾಸೊ ವ್ಹಾ ವ್ಹಾ ಆನಿ ಆತಾಂ ತಿಚಿ ಹಾಂಡಿ. ಕೊಳ್ಶೆ, ಭುರ್ಗೆ ಹೊ ಜಾಗೊ ಅಪಹರ್‍ಶಿತಾತ್ ಮ್ಹಣೊನ್ ಹಾಕಾ ಮೊಸೊರ್! ತಾಚೆ ದೊಳೆ ತಿಚೆ ಹಾಂಡಿಯೆಚೆರ್ ಖಂಚ್ಲ್ಯಾತ್.
ಗೀತಿಕಾ ರುಪಾರ್ ಆಸ್ಚಿ ಕವಿತಾ ಘೆವ್ನ್ ವೊಲ್ಟರ್ ದಾಂತಿಸ್ ಹಾಂಗಾ ಪಾವ್ಲಾ. ತಾಚೆ ಕವಿತೆಂತ್ ಉತ್ರಾಂಕ್ ದುಕೊಳ್ ನಾ. ತಿಂ ವ್ಹಾಳ್ಚ್ಯಾ ಉದ್ಕಾಬರಿ ಸರಾಗ್ ವ್ಹಾಳ್ತಾತ್.
ವಾಚ್ತಲೊ ದಾದ್ಲೊ ತರ್ ತಾಚೆ ಚಲಿಯೆಚೊ ಉಡಾಸ್ ಯೇವ್ನ್ ಹಾಂಡಿಯೆಚಿ ಯಾದ್ ಧೊಸ್ಲಿ ಜಾಲ್ಯಾರಿ ನವಲ್ ನಾ. ಮಾಗೀರ್ ಚಲಿ ತರ್, ಉಗ್ತೆ ಹಾಂಡಿಯೆಚೆರ್ ಹಾತ್ ಚರೊವ್ನ್ ಪಾಲಂವ್ ಹಾಂಡಿಯೆ ಭೊಂವ್ತಿಂ ಪಾಂಗರ್‍ಲ್ಯಾರಿ ಪಾಂಗರ್‍ಲೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ತುಜೆ ಹಾಂಡಿಯೆಚೆಂ ಪಿಶೆಂ
ತುಜೆ ಹಾಂಡಿಯೆಚೆಂ ಅಶೆಂ
ಮ್ಹಾಕಾ ಲಾಗ್ಲಾಂಗೊ ಪಿಶೆಂ
ದೀಸ್ ರಾತ್ ನಾಕಾ ತಿಂ ಭೊಗ್ಣಾಂ
ನಿದೆಂತ್ ಸಯ್ತ್ ಹಾಂಡಿಯೆಚಿಂ ಸಪ್ಣಾಂ
ಬರೆಂಚ್ ಸೊಭ್ತಾ ನಾಜೂಕ್ ಪೊಟ್
ಅಂರ್ದುನ್ ಬಾಂದ್ಲ್ಯಾಯ್ ಕಾಪ್ಡಾ ಗಾಂಟ್
ಇಲ್ಲಿ ಬಿರ್ಮತ್ ಮ್ಹಜೆರ್ ದಾಕಯ್
ಹಾಂಡಿ ಆಪುಡ್ಚಿ ಆಶಾ ಥಾಂಬಯ್
ಆತ್ತಾಂ ಚಡ್ತಾ ಉದ್ಕಾ ಕೊಳ್ಸೊ
ಆತ್ತಾಂ ಬಸ್ಲಾ ಧಾಕ್ಟುಲೊ ಭುರ್ಗೊ
ತಿ ಹಾಂಡಿ ರಿತಿ ಕೆದ್ನಾಂ ಮೆಳತ್?
ಸಾಂಗ್ ಕೆದ್ನಾಂ ನಶೀಬ್ ಫುಲತ್?
ಹಾಂಡಿ ಭಿಜತ್ ಕೊಳ್ಸೊ ಲಕೊನ್
ಮ್ಹೆಳೆಂ ಕರಿತ್ ಭುರ್ಗೊ ಮುತೊನ್
ಪರ್ಕಿ ಕೊಣೀ ಕರಿತ್ ವಿಭಾಡ್
ಹಾಂಡಿ ಮ್ಹಾಕಾಚ್ ದೀವ್ನ್ ಸೊಡ್
- ವಾಲ್ಟರ್ ದಾಂತಿಸ್. ಕಿನ್ನಿಗೋಳಿ