ಸಂಪಾದಕೀಯ್:
ಖಿಳ್ಯಾಂಚೆ ಗಜ್ಡೆರ್ ನಿದ್ತಲ್ಯಾಂಕ್ ಭರ್‍ವಸೊ ಹಾಂಗಾಸರ್ ದಿಸ್ತಾ
ಮನೀಸ್ ಮ್ಹಳ್ಯಾರ್ ಸುಖಾಳ್ ಜಿಣಿ ನ್ಹಯ್. ಕಷ್ಟ್, ಸಂಕಷ್ಟ್, ದಗ್ದ್, ಪಿಡಾಶಿಡೆಚ್ಯಾ ಸೊರ್ಮುಣಾಂತ್ ಜಳೊನ್ ಗೆಲ್ಲೊ ಮನೀಸ್ ಆಕ್ರೇಕ್ ಚುಕೊವ್ನ್ ಭಾಯ್ರ್ ಯೇವ್ನ್ ಸುಸ್ಕಾರ್ ಸೊಡ್ತಾನಾ ಪ್ರಾಯ್ ಭರ್‌ಲ್ಲಿ ಆಸ್ತಾ ಆನಿ ಜಿವಿತಾಚ್ಯಾ ಹುಂಬ್ರಾರ್ ಮರಣ್ ರಾಕೊನ್ ರಾವ್‌ಲ್ಲೆಂ ಆಸ್ತಾ. ಹೆಂ ಘಡಿತ್ ಕೊಣಾಯ್ಚ್ಯಾನ್‌ಯ್ ಆಡಾಂವ್ಕ್ ಜಾಯ್ನಾ. ಅಸಲ್ಯಾ ಖಿಳ್ಯಾಂಚೆ ಗಜ್ಡೆರ್ ನಿದ್‌ಲ್ಲೊ ಮನೀಸ್ ಸಯ್ತ್ ನಿರಾಸ್ ಪಾವನಾಸ್ತಾಂ ಆಶಾವಾದ್ ಆಪ್ಣಾಯ್ತ್ ಜಾಲ್ಯಾರ್?
ಹಿ ಕವಿತಾ ತೆಂಚ್ ಸಾಂಗ್ತಾ! ಹ್ಯಾ ಜಿವಿತಾಚೊ ಅಖಂಡ್ ಭರ್‍ವಸೊ ಹಾಂಗಾಚ್ಯಾ ಕವಿಕ್. ದೋನ್ ದೊಳ್ಯಾಂ ಪಯ್ಕಿ ಏಕ್ ಹೊಗ್ಡಾಯ್ಲೊ ತರೀ ಆನ್ಯೇಕಾಂತ್ ಸಂತೊಸ್ ಪಾಂವ್ಚೊ ಮನೀಸ್ ತೊ. ಏಕ್ ಹಾತ್ ಕಾತರ್‍ನ್ ಗೆಲೊ ಮ್ಹಣೊನ್ ಖಂತಿನ್ ಬಸನಾಸ್ತಾಂ, ಆನ್ಯೇಕಾ ಹಾತಾನ್ ವಾವ್ರ್ ಮುಕಾರ್‍ಸುನ್ ವ್ಹರ್‍ಚೊ ಮನೀಸ್ ತೊ. ಅಸಲಿ ಏಕ್ ಖರೊ ಆಶಾವಾದಾಚೊ ನಿರೋಪ್ ಹಿ ಕವಿತಾ ದಿತಾ.
ಲ್ಯಾನ್ಸಿ ಪಿಂಟೊ ನಾಯಕಾನ್ ಆಮ್ಕಾಂ ಸರ್‍ವಾಂಕ್ ಮಾಡಾ ತೆವ್ಶಿಂ ಚೊವುಂಕ್ ಸಾಂಗೊನ್ ವಿಶೇಸ್ ಧೈರ್ ಹ್ಯಾ ಅಸ್ಕತ್ ಜಿವಾಂ ಥಂಯ್ ಭರ್‍ಚೆಂ ಪ್ರೇತನ್ ಕೆಲಾಂ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಮಾಡ್ ಕರ್
ಊಂಚ್ ದಿಗಂತಾರ್ ಆಸಾಂ ಉಬೊ,
ಜಿಣ್ಯೆ ಭರ್‍ವಶ್ಯಾಸೊ ಆನ್ಯೇಕ್ `ಖುಬೊ'
ಮರ್‍ಣಾ ಗಾಜ್ ಜಾಲ್ಯಾ ಗಾಬೊ
ಫರ್ಬಿಂ ಪಾಟೊಂವ್ಕ್ ಸರ್‍ಗಿಂ ಜಿಬೊ!
ಎಕೇಕ್ `ಶಿಮ್ಟೆಂ' ಸುಕೊನ್ ಗೆಲೆಂ
ಬಾಳಂತ್ `ಕೊಂಬ್' ಜಿವಂತ್ ಜಾಲೆ
`ಮೊಡ್ಲಾಂ' ಸಗ್ಳಿಂ ಜೊಳ್ವಾಕ್ ಪಾವ್ಲಿಂ
ಮುಳಾಂತ್ಲಿಂ ತಣಾಂ ಧಯ್ರಾಕ್ ರಾವ್ಲಿಂ
`ನಾರ್‍ಲಾ' ಸಂಗಿಂ ವೊರ್‍ಲ್ ದಿಲೆಂ
`ಬೊಂಡ್ಯಾಂ' ವೊಂಟಿಯೆನ್ ಮನಾಂಕ್ ಪಿಕಯ್ಲೆಂ
`ಸುಫಲಾ'ಚ್ಯಾ ತ್ರಾಣಾನ್ ಮ್ಹಾಕಾ ಜಿಕಯ್ಲೆಂ
ಮೊರ್‍ಚ್ಯಾ ಪ್ರಾಣಾಂತ್‌ಯ್ ಮ್ಹಾಕಾ ರಾಕಯ್ಲೆಂ
ಜಿಣಿ ಫಕತ್ ದೆವಾನ್ ದಿಂವ್ಚಿ!
ತಕ್ಲಿ ಉಕಲ್ನ್ ಆಮಿ ರಾಂವ್ಚಿ
ಆಜ್ ಜಿಕೊಂಕ್ ಪ್ರಯತ್ನ್ ಕರ್‍ಶಿ!
ಫಾಲ್ಯಾಂ ತು ಚರಿತ್ರೆಂತ್ ಉರ್‍ಶಿ
ಲಾಂಬ್ ಜಿಣ್ಯೆಚ್ಯಾ ಆಂಯ್ಡ್ಯಾಂತ್ ರಾವನಾಕಾ,
ಮಟ್ವೆ ಅವ್ದೆಂತ್ಲೊ `ಫಳ್' ಹೊಗ್ಡಾಯ್ನಾಕಾ
`ಆಡಿಂ-ಫಕ್ಕಾಸೊ' ಮೆಲ್ಯಾ ಉಪ್ರಾಂತ್ ಜಾಂವ್ಚೆಂ
`ಜುನ್ಕಾಟ್' ಮ್ಹಣ್ತಾಸರ್ ಹಾಸೊನ್‌ಚ್ ರಾಂವ್ಚೆಂ.
ದೆವಾ ದೆವಾ ಮಾಗ್ತಾಂ ಉಪ್ಕಾರ್!
ಜಿಣ್ಯೆ ಹೊಡೆಂ ಸರ್‍ವಾಂಕ್ ತಾಂಡುಂಕ್ ಸೊಡ್
ಮಧೆಂ ಯೇಂವ್ದಿ ಕಿತೇಯ್ ಅನ್ವಾರ್,
`ಮಾಡಾ' ಭಾಶೆನ್ ಜಿಯೆಂವ್ಕ್ ಸೊಡ್.
-ಲ್ಯಾನ್ಸಿ ಪಿಂಟೊ ನಾಯಕ್, ಕುಲ್ಶೇಕರ್.