ಸಂಪಾದಕೀಯ್:
ಪಿಶೆಪಣಾಂ ಜಾಣಾಸ್ಚೆ ಮನೀಸ್ ಗಿರೇಸ್ತ್‌ಕಾಯ್ ಖಿಣಾನ್ ಆಪ್ಣಾಂವ್ಕ್ ಸಕ್ತಾತ್
ಕವಿಂಚಿ ಕವಿತಾ ಹಿ. ತಾಂಚೆ ತಾಂಕಿಚಿ ತೋಖ್ಣಾಯ್ ಕರ್‍ತಾ ಹಿ ಕವಿತಾ. ಕವಿಂಚ್ಯಾ ಚಿಂತ್ನಾಂಕ್ ಗಡ್ ನಾ. ಸಗ್ಳೊ ವಿಶ್ವ್ ಘಡೊಂವ್ಚಿ ಸಕತ್ ತಾಂಕಾಂ ಆಸಾ. ತಾಂಚಿ ಗಿರೇಸ್ತ್‌ಕಾಯ್ ಮ್ಹಳ್ಯಾರ್ ಪಾಯ್‌ವಾಟ್, ತೆ ವಾಟೆವಯ್ಲಿಂ ಪಾವ್ಲಾಂ ಆನಿ ಪಾವ್ಲಾಂಕ್ ಬಾಂದಿಲ್ಲಿಂ ಪಾಂಯ್ಜಣಾಂ. ಚಾನ್ನ್ಯಾಂತ್ ಬಸೊನ್ ಉಗ್ಡ್ಯಾ ದೊಳ್ಯಾಂನಿ ಸಪ್ಣಾಂ ದೆಕ್ಚೆಂಚ್ ತಾಂಚಿ ಗಿರೇಸ್ತ್‌ಕಾಯ್.
ಹರ್‍ಯೆಕಾ ಕವಿಥಂಯ್ ಅಸಲಿ ತಾಂಕ್ ಆಸಾ ಕಾಂಯ್? ಅಸಲಿಂ ಪಿಶೆಪಣಾಂ ಆಧಾರ್‍ಚೆ ತಸಲಿ ಕುಶೆಲತಾ ತಾಂಣಿ ಪೊಸ್ಲ್ಯಾ ಕಾಂಯ್? ಅಸಲಿಂ ಆನಿ ಜಾಯ್ತಿಂ ಹೆರ್ ಸವಾಲಾಂ ಹೆ ಕವಿತೆಚೆ ಗುಂಡಾಯೆಕ್ ವೆತಾಂ ವೆತಾನಾ ಧೊಸುಂಕ್ ಸುರು ಜಾತಾತ್.
ಅಸಲ್ಯ್ಯ ಪಾವ್ಸಾಂತ್ ನ್ಹಾಂವ್ಚ್ಯಾ ಕವಿಂಕ್ ಕಾಂಯ್ ಪಿಶೆ ಮ್ಹಣ್ತಾತ್? ಸಂಸಾರಿ ನದ್ರೆನ್ ತಶೆಂ ಮ್ಹಣ್ತಾತ್ ಜಾಂವ್ಕ್ ಪುರೊ. ಹಾಂಗಾಚಿ ಕವಯಿತ್ರಿ ಗ್ವಾದಲೂಪ್ ಡಾಯಸ್ ಲೆಗುನ್ ತಶೀಚ್ ಲೆಕ್ತಾ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಯ್! ಪಿಶೆಚ್ ಆಮಿ
ಮೊಗಾನ್ ಪಡುನ್ ಪಿಶೆ ಜಾಲ್ಲೆ
ಹಾಂವೆಂ ಆದಿಂ ಪಳಯ್ಲ್ಯಾತ್
ಪುಣ್ ಪಿಶ್ಯಾಂಕ್ ಜೆನ್ನಾಂ ಮೋಗ್ ಜಾತಾ
ತೆನ್ನಾಂ ತಾಂಕಾಂ ಕವಿ ಮ್ಹಣ್ತಾತ್
ಹಯ್! ಪಿಶೆಚ್ ಆಮಿ.
ಆಮ್ಚ್ಯಾ ಕಾಲ್ಪನಿಕ್ ಬಳ್ಗ್ಯಾಚೆರ್
ವಿಶ್ವ್ ನವೊ ಘಡಯ್ತಾತ್
ವಾಳ್ವಟಾಂಚಿ ತಾನ್ ಭಾಗೊಂವ್ಕ್
ಘೊಗ್ಯಾಂಚೊ ಪಾವ್ಸ್ ಝಡಯ್ತಾತ್....
ಆಮ್ಚೆಕಡೆನ್ ಗಿರೇಸ್ತ್‌ಕಾಯ್ ನಾ
ತರೀ ಪುಣ್ ದರ್ಯಾ ಆಸಾ
ದರ್ಯಾ ದೆಗೆರ್ ಮಾಡ್ ಆಸಾ
ರೆಂದೆರಾಚಿ ಖೊಂಪ್ ಆಸಾ
ಖೊಂಪಿಂತ್ಲಿ ಜೀಣ್ ಜಗುಂಕ್
ಆಮ್ಚೆ ಕವಿತೆಕ್ ತಾಂಕ್ ಆಸಾ...
ಆಮ್ಚ್ಯಾ ಮಾಥ್ಯಾರ್ ಮುಕುಟ್ ನಾ
ತರೀ ಉಗ್ಡೆಂ ಮಳಬ್ ಆಸಾ
ಮಳ್ಬಾಂತ್ಲೊ ಚಂದ್ರೀಮ್ ಆಸಾ
ಚಂದ್ರಿಮಾಚೆಂ ಚಾನ್ನೆಂ ಆಸಾ
ಚಾನ್ನ್ಯಾಂತ್ ಬಸುನ್ ಉಗ್ಡ್ಯಾ ದೊಳ್ಯಾಂನಿ
ರಂಗ್ಯಾಳಿಂ ಸಪ್ಣಾಂ ರಂಗೊಂವ್ಕ್
ಆಮ್ಚೆ ಕವಿತೆಕ್ ತಾಂಕ್ ಆಸಾ
ಆಮ್ಚ್ಯಾ ನಾಂವಾನ್ ರಸ್ತೆ ನಾಂತ್
ತರೀ ಏಕ್ ಪಾಂಯ್‌ವಾಟ್ ಆಸಾ
ಪಾಂಯ್‌ವಾಟೆರ್ ಪಾವ್ಲಾಂ ಆಸಾತ್
ಪಾವ್ಲಾಂಕ್ ಬಾಂದಿಲ್ಲಿಂ ಪಾಂಯ್ಜಣಾಂ ಆಸಾತ್
ಪಾಂಯ್ಜಣಾಂಚ್ಯಾ ನಾದಾರ್ ಪಾತ್ಯೆವ್ನ್
ಆಮ್ಚೆ ಕವಿತೆಕ್ ತಾಂಕ್ ಆಸಾ...
ಆಮ್ಚೆ ಕಡೆನ್ ಥೊಡೆಂಚ್ ಆಸಾ
ತರೀ ಪುಣ್ ಸಗ್ಳೆಂ ಆಸಾ
ಸಗ್ಳ್ಯಾ ಭಿತರ್ ಆಮಿ ಆಸಾತ್
ಆಮ್ಚೆ ಭಿತರ್ ಪಿಶೆ ಆಸಾತ್
ಹ್ಯಾಚ್ ಪಿಶ್ಯಾಂಕ್ ಮೋಗ್ ಜಾತಾ
ಆನಿ, ಪಿಶ್ಯಾಂಕ್ ಜೆನ್ನಾಂ ಮೋಗ್ ಜಾತಾ
ತೆನ್ನಾಂ ತೊ ಕವಿತಾ ಕರ್‍ತಾ
ದೆಕುನ್‌ಚ್ ತಾಕಾ ಕವಿ ಮ್ಹಣ್ತಾತ್.
-ಗ್ವಾದಲೂಪ್ ಡಾಯಸ್