ಸಂಪಾದಕೀಯ್:
ಕಟ್ಟಿ ಫುಟನಾಸ್ತಾಂ ಸಾಸ್ಣಾಕ್ ಉರ್‍ಚಿ ಅಪ್ರೂಪ್
ಮನೀಸ್ ಆಪ್ಲ್ಯಾ ಜಿವಿತಾ ಕಾಳಾಂತ್ ವೆವೆಗ್ಳ್ಯಾ ಪಾಂವ್ಡ್ಯಾಂನಿ ಪಾಶಾರ್ ಜಾತಾ. ಬಾಳ್‌ಪಣ್, ಭುರ್ಗೆಪಣ್, ತರ್ನಾಟ್‌ಪಣ್ - ಅಶೆಂ ಜಲ್ಮಾಥಾವ್ನ್ ಮೊರಾಪಾಸುನ್ ಪ್ರಾಯೆತೆಕಿದ್, ಅನ್ಭೊಗಾತೆಕಿದ್, ಭೊಂವಾರಾತೆಕಿದ್, ಶಿಕ್ಪಾತೆಕಿದ್ ತಾಚೆ ಮತಿಂತ್ ಬದ್ಲಾವಣ್ ಜಾತಾ, ಚಿಂತ್ಪಾಂತ್ ಬದ್ಲಾವಣ್ ಜಾತಾ. ಅಸಲಿಚ್ ಬದ್ಲಾವಣ್ ಕುಡಿಂತ್‌ಯ್ ಘಡೊನ್ ಆಸ್ತಾ. ಅಸಲ್ಯಾ ಕಾಂಯ್ ದೋನ್ ಪಾಂವ್ಡ್ಯಾಂಚಿ ಕಾಣಿ ಸೊಭಿತ್ ಕರುನ್ ಸಮ್ಜೊಂಚೆ ರಿತಿನ್ ದೊಳ್ಯಾಂ ಮುಕಾರ್ ಹಾಡ್ಲ್ಯಾ ನವೀನ್ ಪಿರೇರಾನ್.
ನವೀನ್ ಪಿರೇರಾನ್ ಕವಿತಾ ಟ್ರಸ್ಟಾನ್ ಹ್ಯಾ ವರ್ಸಾ ಮಾಂಡುನ್ ಹಾಡ್‌ಲ್ಲ್ಯಾ ಜಾಯ್ತ್ಯಾ ಕವಿಗೋಷ್ಟಿಂನಿ ಉರ್ಬೆನ್ ವಾಂಟೊ ಘೆವ್ನ್ ಆಯಿಲ್ಲೆಂ ಹಾಂವೆಂ ದೆಖ್ಲಾಂ. ತಾಚಿ ಉರ್ಬಾ, ಹುಮೆದ್ ತಾಕಾ ಸದಾಂಕಾಳ್ ಕವಿತಾ ಬರೊಂವ್ಕ್ ಉಬೆಂತ್ ದವರ್‍ಚ್ಯಾಂತ್ ದುಬಾವ್ ನಾ.
ಕಟ್ಟಿ ಆಸ್‌ಲ್ಲೆಬರಿ ಆಸನಾ. ಪಯ್ಲೆಂ ಭಾಯ್ಲ್ಯಾನ್ ಸೊಣ್ಣಾಕ್ ಆನಿ ಭಿತರ್‍ಲ್ಯಾನ್ ಕಾಂತ್ಳೆಕ್ ಚಿಡ್ಕೊನ್ ಆಸ್ತಾ. ಮಾಗೀರ್ ಕೊಣ್ ಸೊಣ್ಣ್ ನಿಕ್ಳಾಯ್ತಾ ಆನಿ ಕೊಣ್ ಕಾಂತ್ಳೀಯ್ ಕಾಂತುನ್ ವ್ಹರ್‍ತಾ. ಕಾಳ್ ಗೆಲ್ಲ್ಯಾಬರಿ ಕಟ್ಟೆಚಿ ಸುರ್‍ವಿಲಿ ಅಖಂಡತಾ ತಶೀಚ್ ಉರನಾ. ಹಟ್‌ಯ್ ತಶೆಂಚ್. ನವೀನ್ ಪಿರೇರಾ ಪಯ್ಲೆಚ್ ಪಾವ್ಟಿಂ ಕವಿತಾ ಕುಳಾರಾಕ್ ಆಯ್ಲಾ. ಹಾಂಗಾಸರ್ ಸದಾಂಕಾಳ್ ಪಾಸಾಯೊ ಮಾರ್‍ಚಿ ಸಕತ್ ತಾಕಾ ಫಾವೊ ಜಾಂವ್.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ಹಟ್ಟಿ ಗಾಂವ್ಚ್ಯಾ ಹಟ್ಟಿ ಚೆಡ್ವಾಚಿ ಕಾಣಿ
ಆಮ್ಚ್ಯಾ ಗಾಂವ್ಚೆಂ ಚೆಡುಂ ಎಕ್ಲೆಂ
ಹಟ್ಟಿ ಮ್ಹಳ್ಯಾರ್ ಹಟ್ಟಿ
ಅರೆ ಬಾಬಾ ಸಾಂಗೊಂ ಕಿತೆಂ
ನಾರ್‌ಲಾಚಿಚ್ ಕಟ್ಟಿ
ಹ್ಯಾ ಪಾವ್ಟಿಂ ತಾಚೆಂ ಹಟ್ ಕಿತೆಂ ಜಾಣಾಂತ್?
ಗುಮ್ಟ್ಯಾಲಾಗಿಂ ಕಾಜಾರ್ ಜಾತಾಂ
ಗುಮ್ಟ್ಯಾಲಾಗಿಂ ಕಾಜಾರ್ ಜಾತಾಂ
ಪಾಂಚ್ ವರ್ಸಾಂ ಉಪಾಶಿಂ ರಾವೊನ್
ಏಕ್ ವರಸ್ ದುಧಾಂತ್ ನ್ಹಾತಾಂ
ಬಾಪಯ್ ತಾಚೊ ಪಾಪ್ ಬಾವ್ಡೊ
ಧುವೆಕ್ ಸಮ್ಜಾಂವ್ಕ್ ಸಕ್ಲೊ ನಾ
ಧಾಂವೊನ್ ಯೇವ್ನ್ ಮ್ಹಜ್ಯಾ ಪಾಂಯಾಂಕ್ ಪಡ್ಲೊ
ಮ್ಹಜ್ಯಾನ್ ಸೊಸುಂಕ್ ತಾಂಕ್ಲೆಂ ನಾ
ಹಾಂವ್ ಹ್ಯಾ ವಾಡ್ಯಾಚೊ ಗುರ್‌ಕಾರ್
ಸೈಂಭಾನ್ ಹಾಂವ್‌ಯಿ ಹಟ್ಟಿ
ಕಶೆಂ ತರಿ ಚೆಡ್ವಾಕ್ ವಾಟೆಕ್ ಹಾಡಿಜೆಮೂ
ಕರಿಲಾಗ್ಲೊಂ ಉಪಾಯಾಂಚಿ ಪಟ್ಟಿ
ಮ್ಹಜೆಲಾಗಿಂ ಆಸ್‌ಲ್ಲ್ಯೊ ವಿಂಚವ್ಣ್ಯೊ ದೋನ್
ಏಕ್‌ಚ್ ತ್ಯಾ ಚೆಡ್ವಾಕ್ ಸಮ್ಜಾಯ್ಜೆ
ವಾ ಗುಮ್ಟ್ಯಾಕ್ ದೂಧ್ ವೊತ್ಚೆಂ ರಾವಯ್ಜೆ
ಬಾಪಾಯ್ಕ್ ಆಯ್ಕನಾತ್‌ಲ್ಲ್ಯಾ ಚೆಡ್ವಾಕ್ ತ್ಯಾ
ಹಾಂವ್ ಕಶೆಂ ಸಮ್ಜಾಯ್ನ್?
ಗುಮ್ಟ್ಯಾಕ್ ದೂಧ್ ವೊತ್ಚೆಂ ರಾವಂವ್ಚೆಂ ಬರೆಂ
ಕೆಲಿ ಹಾಂವೆಂ ವಿಂಚವ್ಣ್
ಗುಮ್ಟ್ಯಾಕ್ ದೂಧ್ ವೊತ್ಚೆಂ ರಾವಯಾ
ಗುಮ್ಟ್ಯಾಕ್ ದೂಧ್ ವೊತ್ಚೆಂ ರಾವಯಾ
ಬೊಬಾಟ್ಲೊಂ ಭೊಂವುನ್ ಗಾಂವಾನ್ ಗಾಂವ್
ಮುಕೆಲ್ಯಾಂಕ್ ತಾಂಚ್ಯಾ ಭೆಟೊನ್
ದಿಲೆಂ ಹಾಂವೆಂ ಭಾಶಣ್
ಅರೆ ಬಾಬಾ ತುಮ್ಚೆ ಜಾತಿಂತ್ ಕಿತ್ಲೊಸೊ ಲೋಕ್
ತಾನೆ ಭುಕೆನ್ ವಳ್ವಳ್ಟಾ
ತರ್ ಗುಮ್ಟ್ಯಾಕ್ ದೂಧ್ ವೊತುನ್ ತುಮಿ
ಪಯ್ಶೆ ಕಿತ್ಯಾಕ್ ವಿಭಾಡ್ತಾತ್?
ಮ್ಹಜ್ಯಾ ಸವಾಲಾಕ್ ತಾಂಚಿ ಜಾಪ್ ಕಿತೆಂ ಜಾಣಾಂತ್?
ತುಮ್ಚೆ ಜಾತಿಂತ್ ಕಿತ್ಲೊಸೊ ಲೋಕ್
ಬಿಡಾರ್ ನಾಸ್ತಾಂ ವಳ್ವಳ್ಟಾ
ತರ್ ತಿನ್ಶಿಂ ಕುಟ್ಮಾಂಚೆ ಫಿರ್ಗಜೆಕ್
ಕೊರೊಡಾಂಚಿ ಇಗರ್ಜ್ ಕಿತ್ಯಾಕ್?
ತಾಂಕಾಂ ಜಾಪ್ ದೀಂವ್ಕ್ ಸಕ್ಲೊಂ ನಾ
ಹಟ್ ಮ್ಹಜೆಂ ಜಿಕ್ಲೆಂ ನಾ
ವರ್ಸಾಂಚಿಂ ವರ್ಸಾಂ ಮ್ಹಿನತ್ ಕಾಡ್ಲ್ಯಾರಿ
ಗುಮ್ಟ್ಯಾಕ್ ದೂಧ್ ವೊತ್ಚೆಂ ರಾವ್ಲೆಂ ನಾ
ಸಲ್ವಣ್ ಮ್ಹಜಿ ಮಾನುನ್
ಪಾವ್ಲೊಂ ಪಾಟಿಂ ತ್ಯಾ ಚೆಡ್ವಾ ಘರ್‍ಚ್ಯಾ ದಾರಾರ್
ದಾರ್ ಉಗಡ್ಟಾಂ ಸಾಂಗೊಂ ಕಿತೆಂ
ಚೆರ್ಕೊ ಭುರ್ಗೊ ಚೆಡ್ವಾಚೆ ಹಾಂಡಿಯೆರ್
ಅರೆ ಬಾಬಾ ಅಜ್ಯಾಪ್ ಘಡ್ಲಾಂ
ಚೆಡ್ವಾನ್ ಆಪ್ಲೆಂ ಹಟ್ ಸಾಂಡ್ಲಾಂ
ಮ್ಹಿನತ್ ಮ್ಹಜಿ ವ್ಯರ್ಥ್ ಜಾಲ್ಯಾರಿ
ಕಾಜಾರ್ ಜಾವ್ನ್ ಬರ್‍ಯಾಕ್ ಪಡ್ಲಾಂ
ಸಭಾರ್ ವರ್ಸಾಂಚೆಂ ಮ್ಹಜೆಂ ಹಟ್ ಸಾಂಡುನ್
ಪಾವ್ಲೊಂ ಪಾಟಿಂ ಮ್ಹಜ್ಯಾ ಘರ್‍ಚ್ಯಾ ದಾರಾರ್
ಘರಾ ಪಾವ್ತಾಂ ಸಾಂಗೊಂ ಕಿತೆಂ
ಧುವೆನ್ ಮ್ಹಜ್ಯಾ ಹಟ್ ಧರ್‍ಲಾಂ...
ಗುಮ್ಟ್ಯಾಲಾಗಿಂ ಕಾಜಾರ್ ಜಾತಾಂ
ಗುಮ್ಟ್ಯಾಲಾಗಿಂ ಕಾಜಾರ್ ಜಾತಾಂ
ಪಾಂಚ್ ವರ್ಸಾಂ ಉಪಾಶಿಂ ರಾವೊನ್
ಏಕ್ ದೀಸ್ ದುಧಾಂತ್ ನ್ಹಾತಾಂ.
- ನವೀನ್ ಪಿರೇರ್, ಸುರತ್ಕಲ್