ಸಂಪಾದಕೀಯ್:
ನವಿಂ ಪಾವ್ಲಾಂ ಕಾಡ್ತಾನಾ ಕಾವ್ಜೆಣಿ ಪೊಟ್ಲುನ್ ಧರುಂಕ್ ಯೆತಾ
ಹಿಂ ಫುಡ್ಲದ್ ಪಾವ್ಲಾಂ, ನವಿಂ ಪಾವ್ಲಾಂ. ನವಿಂ ಪಾವ್ಲಾಂ ತೆಂಕ್ತಾನಾ ಮತಿಂತ್ ಹಜಾರ್ ದುಭಾವ್, ಭ್ಯೆಂ, ಖಂತಿ. ಇತ್ಲೆಂ ಅಸೊನ್‌ಯ್ ಖಂಯ್ ಥಾವ್ನ್‌ಕಿ ಕುಸ್ಕುಟ್ ಧೈರಾಚೊ ಉಜ್ವಾಡ್ ಫಾಂಕ್ತಾನಾ, ಫುಡ್ಲಿಂ ಪಾವ್ಲಾಂ ಕಾಡ್ಚಿ ಹುಮೆದ್ ಆಂಗಾ ಪಾಂಗಾಕ್ ವೆಂಗೊಂಕ್ ಯೆತಾ. ನವಿಂ ಪಾವ್ಲಾಂ ಕಾಡ್ತಲ್ಯಾಂನಿ ವಾಟ್ ಕಸಲೀಯ್ ಜಾಂವ್, ತಿ ವಿಸ್ತಾರ್ ಉಗ್ತಿ ಅಶೆಂ ಸಮ್ಜಜಾಯ್. ನವಿಂ ಪಾವ್ಲಾಂ ಕಾಡ್ತಲ್ಯಾಂನಿ ವಾಟೆವಯ್ಲೆಂ ಮೊಳಾಬ್ ವಿಶಾಲ್ ಅಶೆಂ ಲೆಕಿಜಾಯ್. ತವಳ್ ವಾಟ್ ದಾಕಂವ್ಚೊ ಸುಕುರ್ ಖಂಯ್ ಥಾವ್ನ್ ತರೀ ಝಳ್ಕೆಕ್ ಯೆತಲೊ.
ವಿಲ್ಸನ್ ಕಿನ್ನಿಗೋಳಿಕ್ ಪಯ್ಲೆ ಪಾವ್ಟಿಂಚ್ ಹಾಂವೆಂ ವಾಚ್ಚೆಂ. ಪಯ್ಲೆ ಪಾವ್ಟಿಂ ವಾಚ್ತಾನಾಂಚ್ ಕವಿತಾ ಶೆತಾಂತ್ ಪಾಳಾಂ ರೊಂಬವ್ನ್ ರಾಂವ್ಚಿಂ ತಾಕತ್ ತಾಕಾ ಆಸಾ ಮ್ಹಳ್ಳ್ಯಾಚಿ ಖಾತ್ರಿ ಜಾತಾ. ಕೊಂಕಣಿ ಶೆತಾಂತ್, ತೇಂಯ್ ಕವಿತಾ ಶೆತಾಂತ್ ನವಿಂ ಪಾವ್ಲಾಂ ಕಾಡುಂಕ್ ಧೈರ್ ಘೆತ್‌ಲ್ಲ್ಯಾ ತಾಕಾ ಕೊಂಕಣಿ ಮಾಯ್ ಸದಾಂಚ್ ಸಾಂಬಾಳ್ತಲಿ.
ಇತ್ಲೆಂ ಸಾಂಗ್ತಾನಾ ಉಣೆಪಣಾಂ ವ್ಹಡ್‌ಪಣಾ ತೆವ್ಶಿಂ ಪಾವ್ಲಾಂ ಕಾಡ್ಚ್ಯಾಕ್ ಮಜತ್ ಕರ್‍ತಾತ್ ಮ್ಹಣೊನ್ ಸಮ್ಜೊಂಚೆಂ ಆನಿ ಖಂಯ್ಚೋಯ್ ವಿಮರ್ಸೊ ಖರ್‍ಯಾ ಸ್ಪಿರಿತಾನ್ ಭಿಂಯೆನಾಸ್ತಾಂ ಮಾನುನ್ ಘೆಂವ್ಚೊ.
-ಮೆಲ್ವಿನ್ ರೊಡ್ರಿಗಸ್
ಕವಿತಾ:
ನವಿಂ ಪಾವ್ಲಾಂ
ಮೀತ್ ಮೇರ್ ನಾತ್ಲ್ಯಾ ಉಗ್ತ್ಯಾ ರಸ್ತ್ಯಾರ್
ಕಾಡುಂಕ್ ಧರ್‍ಲಿಂ ಪಾವ್ಲಾಂ ಮೆಜುನ್ ಮೆಜುನ್
ದಿಂಬ್ಯಾಂಥಾವ್ನ್ ಉಟೊನ್ ರಾವ್ಲಾಂ ಬಾವ್ಳ್ಯಾಂಕ್ ಧರ್‍ಲಾಂ ಆಮ್ಚೆ ಆವಯ್ನ್
ಮಸ್ಕ್ ದೀಶ್ಟ್ ಮ್ಹಜಿ ತಿಕಾಚ್ ಚೊವುನ್ ಚೊವುನ್
ಮೊಳಾಬ್ ಪುಣೀ ನೀಳ್ ವಿಶಾಲ್
ತರೀ ಮಧೆಂ ಮೊಡಾಂ ಕಾಳಿಂ ಕಾಳಿಂ
ಖೊಮಿಸ್ ನಾ, ಚೆಪೆಂ ನಾ ಭಿಜಾತ್ ಮ್ಹಜೆಂ ನಾಗ್ಡೆಂ ಆಂಗ್
ಸುಶೆಗಾ ಉಬೆಚೊ ಪಾಲೊಂವ್ ತುಜೊ
ಯೆತಾಂ ತುಜೆ ಲಾಗಿಂ ಲಾಗಿಂ
ವಾಟ್ ಪುಣೀ ರೂಂದ್ ನಿರಂತರ್
ಚಡ್ಣ್ಯೊ ದೆಂವ್ಣ್ಯೊ ಆನಿ ಪಡ್ಣ್ಯೊ ಸಭಾರ್
ಜಾಂಗ್ಯಾಂಕ್ ಜರ್ ವಾಕ್ಳಾಂ ಆಯ್ಲಿಂ, ಉಮೆದ್ ಮ್ಹಜಿ ಜರೊನ್ ವಚತ್
ಜಾಣ್ವಾಯೆಚೆ ಝರಿಚೊ ಪಾನೊ ತುಜೊ
ದೊಂಗ್ರಾಕ್ ಸಯ್ತ್ ಕರಿತ್ ಲಾಚಾರ್
ಜೈತಾ ವಾಟೆರ್ ಸಭಾರ್ ಕಾಂಟೆ
ಶೆಣ್, ಕುಂಡೊ ಅಶೆಂ ಇಲ್ಲೆ ಇಲ್ಲೆ ಫಾಂಟೆ
ದೀಶ್ಟ್ ಜರ್ ಖಂಚ್ಲಿ ತುಜ್ಯಾಚ್ ಪರ್ಜಳಾಂತ್, `ಕೊಂಕ್ಣಿ ಮಾಯೆ'
ಪಾವ್ಲಾಂ ಚಮ್ಕತಲಿಂ ಎಕಾ ವಯ್ರ್ ಏಕ್... ಆಪಾಪಿಂಚ್...
-ವಿಲ್ಸನ್, ಕಿನ್ನಿಗೋಳಿ